দুতিযগাথাসঙ্গণিকং

১. কাযিকাদিআপত্তি

৪৭৪. কতি আপত্তিযো কাযিকা, কতি ৰাচসিকা কতা.

ছাদেন্তস্স কতি আপত্তিযো, কতি সংসগ্গপচ্চযা.

ছাপত্তিযো কাযিকা, ছ ৰাচসিকা কতা;

ছাদেন্তস্স তিস্সো আপত্তিযো, পঞ্চ সংসগ্গপচ্চযা.

অরুণুগ্গে কতি আপত্তিযো, কতি যাৰততিযকা;

কতেত্থ অট্ঠ ৰত্থুকা, কতিহি সব্বসঙ্গহো.

অরুণুগ্গে তিস্সো আপত্তিযো, দ্ৰে যাৰততিযকা;

একেত্থ অট্ঠ ৰত্থুকা, একেন সব্বসঙ্গহো.

ৰিনযস্স কতি মূলানি, যানি বুদ্ধেন পঞ্ঞত্তা;

ৰিনযগরুকা কতি ৰুত্তা, দুট্ঠুল্লচ্ছাদনা কতি.

ৰিনযস্স দ্ৰে মূলানি, যানি বুদ্ধেন পঞ্ঞত্তা;

ৰিনযগরুকা দ্ৰে ৰুত্তা, দ্ৰে দুট্ঠুল্লচ্ছাদনা.

গামন্তরে কতি আপত্তিযো, কতি নদিপারপচ্চযা;

কতিমংসেসু থুল্লচ্চযং, কতিমংসেসু দুক্কটং.

গামন্তরে চতস্সো আপত্তিযো, চতস্সো নদিপারপচ্চযা;

একমংসে থুল্লচ্চযং, নৰমংসেসু দুক্কটং.

কতি ৰাচসিকা রত্তিং, কতি ৰাচসিকা দিৰা;

দদমানস্স কতি আপত্তিযো, পটিগ্গণ্হন্তস্স কিত্তকা.

দ্ৰে ৰাচসিকা রত্তিং, দ্ৰে ৰাচসিকা দিৰা;

দদমানস্স তিস্সো আপত্তিযো, চত্তারো চ পটিগ্গহে.

২. দেসনাগামিনিযাদিআপত্তি

৪৭৫. কতি দেসনাগামিনিযো, কতি সপ্পটিকম্মা কতা;

কতেত্থ অপ্পটিকম্মা ৰুত্তা, বুদ্ধেনাদিচ্চবন্ধুনা.

পঞ্চ দেসনাগামিনিযো, ছ সপ্পটিকম্মা কতা;

একেত্থ অপ্পটিকম্মা ৰুত্তা, বুদ্ধেনাদিচ্চবন্ধুনা.

ৰিনযগরুকা কতি ৰুত্তা, কাযৰাচসিকানি চ;

কতি ৰিকালে ধঞ্ঞরসো, কতি ঞত্তিচতুত্থেন সম্মুতি.

ৰিনযগরুকা দ্ৰে ৰুত্তা, কাযৰাচসিকানি চ;

একো ৰিকালে ধঞ্ঞরসো, একা ঞত্তিচতুত্থেন সম্মুতি.

পারাজিকা কাযিকা কতি, কতি সংৰাসকভূমিযো;

কতিনং রত্তিচ্ছেদো, পঞ্ঞত্তা দ্ৰঙ্গুলা কতি.

পারাজিকা কাযিকা দ্ৰে, দ্ৰে সংৰাসকভূমিযো;

দ্ৰিন্নং রত্তিচ্ছেদো, পঞ্ঞত্তা দ্ৰঙ্গুলা দুৰে.

কতত্তানং ৰধিত্ৰান, কতিহি সঙ্ঘো ভিজ্জতি;

কতেত্থ পঠমাপত্তিকা, ঞত্তিযা করণা কতি.

দ্ৰে অত্তানং ৰধিত্ৰান, দ্ৰীহি সঙ্ঘো ভিজ্জতি;

দ্ৰেত্থ পঠমাপত্তিকা, ঞত্তিযা করণা দুৰে.

পাণাতিপাতে কতি আপত্তিযো, ৰাচা পারাজিকা কতি;

ওভাসনা কতি ৰুত্তা, সঞ্চরিত্তেন ৰা কতি.

পাণাতিপাতে তিস্সো আপত্তিযো;

ৰাচা পারাজিকা তযো;

ওভাসনা তযো ৰুত্তা;

সঞ্চরিত্তেন ৰা তযো.

কতি পুগ্গলা ন উপসম্পাদেতব্বা, কতি কম্মানং সঙ্গহা;

নাসিতকা কতি ৰুত্তা, কতিনং একৰাচিকা.

তযো পুগ্গলা ন উপসম্পাদেতব্বা, তযো কম্মানং সঙ্গহা;

নাসিতকা তযো ৰুত্তা, তিণ্ণন্নং একৰাচিকা.

অদিন্নাদানে কতি আপত্তিযো, কতি মেথুনপচ্চযা;

ছিন্দন্তস্স কতি আপত্তিযো, কতি ছড্ডিতপচ্চযা.

অদিন্নাদানে তিস্সো আপত্তিযো, চতস্সো মেথুনপচ্চযা;

ছিন্দন্তস্স তিস্সো আপত্তিযো, পঞ্চ ছড্ডিতপচ্চযা.

ভিক্খুনোৰাদকৰগ্গস্মিং, পাচিত্তিযেন দুক্কটা;

কতেত্থ নৰকা ৰুত্তা, কতিনং চীৰরেন চ.

ভিক্খুনোৰাদকৰগ্গস্মিং, পাচিত্তিযেন দুক্কটা কতা;

চতুরেত্থ নৰকা ৰুত্তা, দ্ৰিন্নং চীৰরেন চ.

ভিক্খুনীনঞ্চ অক্খাতা, পাটিদেসনিযা কতি;

ভুঞ্জন্তামকধঞ্ঞেন, পাচিত্তিযেন দুক্কটা কতি.

ভিক্খুনীনঞ্চ অক্খাতা, অট্ঠ পাটিদেসনীযা কতা;

ভুঞ্জন্তামকধঞ্ঞেন, পাচিত্তিযেন দুক্কটা কতা.

গচ্ছন্তস্স কতি আপত্তিযো, ঠিতস্স চাপি কিত্তকা;

নিসিন্নস্স কতি আপত্তিযো, নিপন্নস্সাপি কিত্তকা.

গচ্ছন্তস্স চতস্সো আপত্তিযো, ঠিতস্স চাপি তত্তকা;

নিসিন্নস্স চতস্সো আপত্তিযো, নিপন্নস্সাপি তত্তকা.

৩. পাচিত্তিযং

৪৭৬. কতি পাচিত্তিযানি, সব্বানি নানাৰত্থুকানি;

অপুব্বং অচরিমং, আপজ্জেয্য একতো.

পঞ্চ পাচিত্তিযানি, সব্বানি নানাৰত্থুকানি;

অপুব্বং অচরিমং, আপজ্জেয্য একতো.