৪. দিট্ঠাৰিকম্মৰগ্গো

৪২৫. ‘‘কতি নু খো, ভন্তে, অধম্মিকা দিট্ঠাৰিকম্মা’’তি? ‘‘পঞ্চিমে, উপালি, অধম্মিকা দিট্ঠাৰিকম্মা. কতমে পঞ্চ? অনাপত্তিযা দিট্ঠিং আৰি করোতি, অদেসনাগামিনিযা আপত্তিযা দিট্ঠিং আৰি করোতি, দেসিতায আপত্তিযা দিট্ঠিং আৰি করোতি, চতূহি পঞ্চহি দিট্ঠিং আৰি করোতি, মনো মানসেন দিট্ঠিং আৰি করোতি – ইমে খো, উপালি, পঞ্চ অধম্মিকা দিট্ঠাৰিকম্মা.

‘‘পঞ্চিমে, উপালি, ধম্মিকা দিট্ঠাৰিকম্মা. কতমে পঞ্চ? আপত্তিযা দিট্ঠিং আৰি করোতি, দেসনাগামিনিযা আপত্তিযা দিট্ঠিং আৰি করোতি, অদেসিতায আপত্তিযা দিট্ঠিং আৰি করোতি, ন চতূহি পঞ্চহি দিট্ঠিং আৰি করোতি, ন মনো মানসেন দিট্ঠিং আৰি করোতি – ইমে খো, উপালি, পঞ্চ ধম্মিকা দিট্ঠাৰিকম্মা.

‘‘অপরেপি, উপালি, পঞ্চ অধম্মিকা দিট্ঠাৰিকম্মা. কতমে পঞ্চ? নানাসংৰাসকস্স সন্তিকে দিট্ঠিং আৰি করোতি, নানাসীমায ঠিতস্স সন্তিকে দিট্ঠিং আৰি করোতি, অপকতত্তস্স সন্তিকে দিট্ঠিং আৰি করোতি, চতূহি পঞ্চহি দিট্ঠিং আৰি করোতি, মনো মানসেন দিট্ঠিং আৰি করোতি – ইমে খো, উপালি, পঞ্চ অধম্মিকা দিট্ঠাৰিকম্মা.

‘‘পঞ্চিমে, উপালি, ধম্মিকা দিট্ঠাৰিকম্মা. কতমে পঞ্চ? সমানসংৰাসকস্স সন্তিকে দিট্ঠিং আৰি করোতি, সমানসীমায ঠিতস্স সন্তিকে দিট্ঠিং আৰি করোতি, পকতত্তস্স সন্তিকে দিট্ঠিং আৰি করোতি, ন চতূহি পঞ্চহি দিট্ঠিং আৰি করোতি, ন মনো মানসেন দিট্ঠিং আৰি করোতি – ইমে খো, উপালি, পঞ্চ ধম্মিকা দিট্ঠাৰিকম্মাতি.

৪২৬. ‘‘কতি নু খো, ভন্তে, অধম্মিকা পটিগ্গহা’’তি? ‘‘পঞ্চিমে, উপালি, অধম্মিকা পটিগ্গহা. কতমে পঞ্চ? কাযেন দিয্যমানং কাযেন অপ্পটিগ্গহিতং, কাযেন দিয্যমানং কাযপ্পটিবদ্ধেন অপ্পটিগ্গহিতং, কাযপ্পটিবদ্ধেন দিয্যমানং কাযেন অপ্পটিগ্গহিতং, কাযপ্পটিবদ্ধেন দিয্যমানং কাযপ্পটিবদ্ধেন অপ্পটিগ্গহিতং, নিস্সগ্গিযেন দিয্যমানং কাযেন ৰা কাযপ্পটিবদ্ধেন ৰা অপ্পটিগ্গহিতং – ইমে খো, উপালি, পঞ্চ অধম্মিকা পটিগ্গহা.

‘‘পঞ্চিমে, উপালি, ধম্মিকা পটিগ্গহা. কতমে পঞ্চ? কাযেন দিয্যমানং কাযেন পটিগ্গহিতং, কাযেন দিয্যমানং কাযপ্পটিবদ্ধেন পটিগ্গহিতং, কাযপ্পটিবদ্ধেন দিয্যমানং কাযেন পটিগ্গহিতং, কাযপ্পটিবদ্ধেন দিয্যমানং কাযপ্পটিবদ্ধেন পটিগ্গহিতং, নিস্সগ্গিযেন দিয্যমানং কাযেন ৰা কাযপ্পটিবদ্ধেন ৰা পটিগ্গহিতং – ইমে খো, উপালি, পঞ্চ ধম্মিকা পটিগ্গহা’’তি.

৪২৭. ‘‘কতি নু খো, ভন্তে, অনতিরিত্তা’’তি? ‘‘পঞ্চিমে, উপালি, অনতিরিত্তা. কতমে পঞ্চ? [পাচি. ২৩৯] অকপ্পিযকতং হোতি, অপ্পটিগ্গহিতকতং হোতি অনুচ্চারিতকতং হোতি, অহত্থপাসে কতং হোতি, অলমেতং সব্বন্তি অৰুত্তং হোতি – ইমে খো, উপালি, পঞ্চ অনতিরিত্তা.

‘‘পঞ্চিমে, উপালি, অতিরিত্তা. কতমে পঞ্চ? [পাচি. ২৩৯] কপ্পিযকতং হোতি, পটিগ্গহিতকতং হোতি, উচ্চারিতকতং হোতি, হত্থপাসে কতং হোতি, অলমেতং সব্বন্তি ৰুত্তং হোতি – ইমে খো, উপালি, পঞ্চ অতিরিত্তা’’তি.

৪২৮. ‘‘কতিহি নু খো, ভন্তে, আকারেহি পৰারণা পঞ্ঞাযতী’’তি? ‘‘পঞ্চহুপালি, আকারেহি পৰারণা পঞ্ঞাযতি. কতমেহি পঞ্চহি? [পাচি. ২৩৯] অসনং পঞ্ঞাযতি, ভোজনং পঞ্ঞাযতি, হত্থপাসে ঠিতো অভিহরতি, পটিক্খেপো পঞ্ঞাযতি – ইমেহি খো, উপালি, পঞ্চহাকারেহি পৰারণা পঞ্ঞাযতী’’তি.

৪২৯. ‘‘কতি নু খো, ভন্তে, অধম্মিকা পটিঞ্ঞাতকরণা’’তি? ‘‘পঞ্চিমে, উপালি, অধম্মিকা পটিঞ্ঞাতকরণা. কতমে পঞ্চ? ভিক্খু পারাজিকং অজ্ঝাপন্নো হোতি, পারাজিকেন চোদিযমানো সঙ্ঘাদিসেসং অজ্ঝাপন্নো পটিজানাতি, তং সঙ্ঘো সঙ্ঘাদিসেসেন কারেতি, অধম্মিকং পটিঞ্ঞাতকরণং. ভিক্খু পারাজিকং অজ্ঝাপন্নো হোতি, পারাজিকেন চোদিযমানো পাচিত্তিযং…পে… পাটিদেসনীযং… দুক্কটং অজ্ঝাপন্নো পটিজানাতি, তং সঙ্ঘো দুক্কটেন কারেতি, অধম্মিকং পটিঞ্ঞাতকরণং. ভিক্খু সঙ্ঘাদিসেসং…পে… পাচিত্তিযং… পাটিদেসনীযং… দুক্কটং অজ্ঝাপন্নো হোতি. দুক্কটেন চোদিযমানো পারাজিকং অজ্ঝাপন্নো পটিজানাতি, তং সঙ্ঘো পারাজিকেন কারেতি, অধম্মিকং পটিঞ্ঞাতকরণং. ভিক্খু দুক্কটং অজ্ঝাপন্নো হোতি, দুক্কটেন চোদিযমানো সঙ্ঘাদিসেসং…পে… পাচিত্তিযং… পাটিদেসনীযং অজ্ঝাপন্নো পটিজানাতি, তং সঙ্ঘো পাটিদেসনীযেন কারেতি – অধম্মিকং পটিঞ্ঞাতকরণং. ইমে খো, উপালি, পঞ্চ অধম্মিকা পটিঞ্ঞাতকরণা.

‘‘পঞ্চিমে, উপালি, ধম্মিকা পটিঞ্ঞাতকরণা. কতমে পঞ্চ? ভিক্খু পারাজিকং অজ্ঝাপন্নো হোতি, পারাজিকেন চোদিযমানো পারাজিকং অজ্ঝাপন্নো পটিজানাতি, তং সঙ্ঘো পারাজিকেন কারেতি, ধম্মিকং পটিঞ্ঞাতকরণং. ভিক্খু সঙ্ঘাদিসেসং…পে… পাচিত্তিযং… পাটিদেসনীযং… দুক্কটং অজ্ঝাপন্নো হোতি, দুক্কটেন চোদিযমানো দুক্কটং অজ্ঝাপন্নো পটিজানাতি, তং সঙ্ঘো দুক্কটেন কারেতি, ধম্মিকং পটিঞ্ঞাতকরণং. ইমে খো, উপালি, পঞ্চ ধম্মিকা পটিঞ্ঞাতকরণা’’তি.

৪৩০. ‘‘কতিহি নু খো, ভন্তে, অঙ্গেহি সমন্নাগতস্স ভিক্খুনো ওকাসকম্মং কারাপেন্তস্স নালং ওকাসকম্মং কাতু’’ন্তি? ‘‘পঞ্চহুপালি, অঙ্গেহি সমন্নাগতস্স ভিক্খুনো ওকাসকম্মং কারাপেন্তস্স নালং ওকাসকম্মং কাতুং. কতমেহি পঞ্চহি? অলজ্জী চ হোতি, বালো চ, অপকতত্তো চ, চাৰনাধিপ্পাযো ৰত্তা হোতি, নো ৰুট্ঠানাধিপ্পাযো – ইমেহি খো, উপালি, পঞ্চহঙ্গেহি সমন্নাগতস্স ভিক্খুনো ওকাসকম্মং কারাপেন্তস্স নালং ওকাসকম্মং কাতুং.

‘‘পঞ্চহুপালি, অঙ্গেহি সমন্নাগতস্স ভিক্খুনো ওকাসকম্মং কারাপেন্তস্স অলং ওকাসকম্মং কাতুং. কতমেহি পঞ্চহি? লজ্জী চ হোতি, পণ্ডিতো চ, পকতত্তো চ, ৰুট্ঠানাধিপ্পাযো ৰত্তা হোতি, নো চাৰনাধিপ্পাযো – ইমেহি খো, উপালি, পঞ্চহঙ্গেহি সমন্নাগতস্স ভিক্খুনো ওকাসকম্মং কারাপেন্তস্স অলং ওকাসকম্মং কাতু’’ন্তি.

৪৩১. ‘‘কতিহি নু খো, ভন্তে, অঙ্গেহি সমন্নাগতেন ভিক্খুনা সদ্ধিং ৰিনযো ন সাকচ্ছিতব্বো’’তি? ‘‘পঞ্চহুপালি, অঙ্গেহি সমন্নাগতেন ভিক্খুনা সদ্ধিং ৰিনযো ন সাকচ্ছিতব্বো. কতমেহি পঞ্চহি? ৰত্থুং ন জানাতি, নিদানং ন জানাতি, পঞ্ঞত্তিং ন জানাতি, পদপচ্চাভট্ঠং ন জানাতি, অনুসন্ধিৰচনপথং ন জানাতি – ইমেহি খো, উপালি, পঞ্চহঙ্গেহি সমন্নাগতেন ভিক্খুনা সদ্ধিং ৰিনযো ন সাকচ্ছিতব্বো.

‘‘পঞ্চহুপালি, অঙ্গেহি সমন্নাগতেন ভিক্খুনা সদ্ধিং ৰিনযো সাকচ্ছিতব্বো. কতমেহি পঞ্চহি? ৰত্থুং জানাতি, নিদানং জানাতি, পঞ্ঞত্তিং জানাতি, পদপচ্চাভট্ঠং জানাতি, অনুসন্ধিৰচনপথং জানাতি – ইমেহি খো, উপালি, পঞ্চহঙ্গেহি সমন্নাগতেন ভিক্খুনা সদ্ধিং ৰিনযো সাকচ্ছিতব্বো’’তি.

৪৩২. ‘‘কতি নু খো, ভন্তে, পঞ্হাপুচ্ছা’’তি? ‘‘পঞ্চিমা, উপালি, পঞ্হাপুচ্ছা. কতমা পঞ্চ? মন্দত্তা মোমূহত্তা পঞ্হং পুচ্ছতি, পাপিচ্ছো ইচ্ছাপকতো পঞ্হং পুচ্ছতি, পরিভৰা পঞ্হং পুচ্ছতি, অঞ্ঞাতুকামো পঞ্হং পুচ্ছতি, সচে মে পঞ্হং পুট্ঠো সম্মদেৰ ব্যাকরিস্সতি ইচ্চেতং কুসলং নো চে পঞ্হং পুট্ঠো সম্মদেৰ ব্যাকরিস্সতি অহমস্স সম্মদেৰ ব্যাকরিস্সামীতি পঞ্হং পুচ্ছতি – ইমা খো, উপালি, পঞ্চ পঞ্হাপুচ্ছা’’তি.

৪৩৩. ‘‘কতি নু খো, ভন্তে, অঞ্ঞব্যাকরণা’’তি? ‘‘পঞ্চিমে, উপালি, অঞ্ঞব্যাকরণা. কতমে পঞ্চ? মন্দত্তা মোমূহত্তা অঞ্ঞং ব্যাকরোতি, পাপিচ্ছো ইচ্ছাপকতো অঞ্ঞং ব্যাকরোতি, উম্মাদা চিত্তক্খেপা অঞ্ঞং ব্যাকরোতি, অধিমানেন অঞ্ঞং ব্যাকরোতি, ভূতং অঞ্ঞং ব্যাকরোতি – ইমে খো, উপালি, পঞ্চ অঞ্ঞব্যাকরণা’’তি.

৪৩৪. ‘‘কতি নু খো, ভন্তে, ৰিসুদ্ধিযো’’তি? ‘‘পঞ্চিমা, উপালি, ৰিসুদ্ধিযো. কতমা পঞ্চ? নিদানং উদ্দিসিত্ৰা অৰসেসং সুতেন সাৰেতব্বং অযং পঠমা ৰিসুদ্ধি, নিদানং উদ্দিসিত্ৰা চত্তারি পারাজিকানি উদ্দিসিত্ৰা অৰসেসং সুতেন সাৰেতব্বং অযং দুতিযা ৰিসুদ্ধি, নিদানং উদ্দিসিত্ৰা চত্তারি পারাজিকানি উদ্দিসিত্ৰা তেরস সঙ্ঘাদিসেসে উদ্দিসিত্ৰা অৰসেসং সুতেন সাৰেতব্বং অযং ততিযা ৰিসুদ্ধি, নিদানং উদ্দিসিত্ৰা চত্তারি পারাজিকানি উদ্দিসিত্ৰা তেরস সঙ্ঘাদিসেসে উদ্দিসিত্ৰা দ্ৰে অনিযতে উদ্দিসিত্ৰা অৰসেসং সুতেন সাৰেতব্বং অযং চতুত্থা ৰিসুদ্ধি, ৰিত্থারেনেৰ পঞ্চমী – ইমা খো, উপালি, পঞ্চ ৰিসুদ্ধিযো’’তি.

৪৩৫. ‘‘কতি নু খো, ভন্তে, ভোজনা’’তি? ‘‘পঞ্চিমে, উপালি, ভোজনা. কতমে পঞ্চ? ওদনো, কুম্মাসো, সত্তু, মচ্ছো, মংসং – ইমে খো, উপালি, পঞ্চ ভোজনা’’তি.

দিট্ঠাৰিকম্মৰগ্গো নিট্ঠিতো চতুত্থো.

তস্সুদ্দানং –

দিট্ঠাৰিকম্মা অপরে, পটিগ্গহানতিরিত্তা;

পৰারণা পটিঞ্ঞাতং, ওকাসং সাকচ্ছেন চ;

পঞ্হং অঞ্ঞব্যাকরণা, ৰিসুদ্ধি চাপি ভোজনাতি.