৫. অত্তাদানৰগ্গো

৪৩৬. [চূল়ৰ. ৩৯৯; অ. নি. ১০.৪৪] ‘‘চোদকেন, ভন্তে, ভিক্খুনা পরং চোদেতুকামেন কতি ধম্মে অজ্ঝত্তং পচ্চৰেক্খিত্ৰা পরো চোদেতব্বো’’তি? ‘‘চোদকেনুপালি, ভিক্খুনা পরং চোদেতুকামেন পঞ্চ ধম্মে অজ্ঝত্তং পচ্চৰেক্খিত্ৰা পরো চোদেতব্বো. কতমে পঞ্চ? চোদকেনুপালি, ভিক্খুনা পরং চোদেতুকামেন এৰং পচ্চৰেক্খিতব্বং – পরিসুদ্ধকাযসমাচারো নু খোম্হি, পরিসুদ্ধেনম্হি কাযসমাচারেন সমন্নাগতো অচ্ছিদ্দেন অপ্পটিমংসেন, সংৰিজ্জতি নু খো মে এসো ধম্মো উদাহু নো’’তি. নো চে, উপালি, ভিক্খু পরিসুদ্ধকাযসমাচারো হোতি, পরিসুদ্ধেন কাযসমাচারেন সমন্নাগতো অচ্ছিদ্দেন অপ্পটিমংসেন, তস্স ভৰন্তি ৰত্তারো – ‘ইঙ্ঘ, তাৰ আযস্মা কাযিকং সিক্খস্সূ’তি ইতিস্স ভৰন্তি ৰত্তারো.

‘‘পুন চপরং, উপালি, চোদকেন ভিক্খুনা পরং চোদেতুকামেন এৰং পচ্চৰেক্খিতব্বং – ‘পরিসুদ্ধৰচীসমাচারো নু খোম্হি, পরিসুদ্ধেনম্হি ৰচীসমাচারেন সমন্নাগতো অচ্ছিদ্দেন অপ্পটিমংসেন, সংৰিজ্জতি নু খো মে এসো ধম্মো উদাহু নো’তি. নো চে, উপালি, ভিক্খু পরিসুদ্ধৰচীসমাচারো হোতি, পরিসুদ্ধেন ৰচীসমাচারেন সমন্নাগতো অচ্ছিদ্দেন অপ্পটিমংসেন, তস্স ভৰন্তি ৰত্তারো – ‘ইঙ্ঘ, তাৰ আযস্মা ৰাচসিকং সিক্খস্সূ’তি ইতিস্স ভৰন্তি ৰত্তারো.

‘‘পুন চপরং, উপালি, চোদকেন ভিক্খুনা পরং চোদেতুকামেন এৰং পচ্চৰেক্খিতব্বং – ‘মেত্তং নু খো মে চিত্তং পচ্চুপট্ঠিতং সব্রহ্মচারীসু অনাঘাতং, সংৰিজ্জতি নু খো মে এসো ধম্মো উদাহু নো’তি. নো চে, উপালি, ভিক্খুনো মেত্তং চিত্তং পচ্চুপট্ঠিতং হোতি সব্রহ্মচারীসু অনাঘাতং, তস্স ভৰন্তি ৰত্তারো – ‘ইঙ্ঘ, তাৰ আযস্মা সব্রহ্মচারীসু মেত্তং চিত্তং উপট্ঠাপেহী’তি ইতিস্স ভৰন্তি ৰত্তারো.

‘‘পুন চপরং, উপালি, চোদকেন ভিক্খুনা পরং চোদেতুকামেন এৰং পচ্চৰেক্খিতব্বং – ‘বহুস্সুতো নু খোম্হি সুতধরো সুতসন্নিচযো, যে তে ধম্মা আদিকল্যাণা মজ্ঝেকল্যাণা পরিযোসানকল্যাণা সাত্থং সব্যঞ্জনং কেৰলপরিপুণ্ণং পরিসুদ্ধং ব্রহ্মচরিযং অভিৰদন্তি, তথারূপা মে ধম্মা বহুস্সুতা হোন্তি ধাতা ৰচসা পরিচিতা মনসানুপেক্খিতা দিট্ঠিযা সুপ্পটিৰিদ্ধা, সংৰিজ্জতি নু খো মে এসো ধম্মো উদাহু নো’তি. নো চে, উপালি, ভিক্খু বহুস্সুতো হোতি সুতধরো সুতসন্নিচযো, যে তে ধম্মা আদিকল্যাণা মজ্ঝেকল্যাণা পরিযোসানকল্যাণা সাত্থং সব্যঞ্জনং কেৰলপরিপুণ্ণং পরিসুদ্ধং ব্রহ্মচরিযং অভিৰদন্তি, তথারূপস্স ধম্মা ন বহুস্সুতা হোন্তি ধাতা ৰচসা পরিচিতা মনসানুপেক্খিতা দিট্ঠিযা সুপ্পটিৰিদ্ধা, তস্স ভৰন্তি ৰত্তারো – ‘ইঙ্ঘ, তাৰ আযস্মা আগমং পরিযাপুণস্সূ’তি ইতিস্স ভৰন্তি ৰত্তারো.

‘‘পুন চপরং, উপালি, চোদকেন ভিক্খুনা পরং চোদেতুকামেন এৰং পচ্চৰেক্খিতব্বং – ‘উভযানি খো মে পাতিমোক্খানি ৰিত্থারেন স্ৰাগতানি হোন্তি সুৰিভত্তানি সুপ্পৰত্তীনি সুৰিনিচ্ছিতানি সুত্তসো অনুব্যঞ্জনসো, সংৰিজ্জতি নু খো মে এসো ধম্মো উদাহু নো’তি. নো চে, উপালি, ভিক্খুনো উভযানি পাতিমোক্খানি ৰিত্থারেন স্ৰাগতানি হোন্তি সুৰিভত্তানি সুপ্পৰত্তীনি সুৰিনিচ্ছিতানি সুত্তসো অনুব্যঞ্জনসো, ‘ইদং পনাৰুসো কত্থ ৰুত্তং ভগৰতা’তি ইতি পুট্ঠো ন সম্পাযতি [ন সম্পাদযতি (ক.), ন সম্পাদেতি (স্যা.)], তস্স ভৰন্তি ৰত্তারো – ‘ইঙ্ঘ, তাৰ আযস্মা ৰিনযং পরিযাপুণস্সূ’তি ইতিস্স ভৰন্তি ৰত্তারো. চোদকেনুপালি, ভিক্খুনা পরং চোদেতুকামেন ইমে পঞ্চ ধম্মে অজ্ঝত্তং পচ্চৰেক্খিত্ৰা পরো চোদেতব্বো’’তি.

৪৩৭. ‘‘চোদকেন, ভন্তে, ভিক্খুনা পরং চোদেতুকামেন কতি ধম্মে অজ্ঝত্তং উপট্ঠাপেত্ৰা পরো চোদেতব্বো’’তি? ‘‘চোদকেনুপালি, ভিক্খুনা পরং চোদেতুকামেন পঞ্চ ধম্মে অজ্ঝত্তং উপট্ঠাপেত্ৰা পরো চোদেতব্বো. কতমে পঞ্চ? কালেন ৰক্খামি নো অকালেন, ভূতেন ৰক্খামি নো অভূতেন, সণ্হেন ৰক্খামি নো ফরুসেন, অত্থসংহিতেন ৰক্খামি নো অনত্থসংহিতেন, মেত্তাচিত্তো ৰক্খামি নো দোসন্তরোতি – চোদকেনুপালি, ভিক্খুনা পরং চোদেতুকামেন ইমে পঞ্চ ধম্মে অজ্ঝত্তং উপট্ঠাপেত্ৰা পরো চোদেতব্বো’’তি.

৪৩৮. [চূল়ৰ. ৪০০] ‘‘চোদকেন, ভন্তে, ভিক্খুনা পরং চোদেতুকামেন কতি ধম্মে অজ্ঝত্তং মনসি করিত্ৰা পরো চোদেতব্বো’’তি? ‘‘চোদকেনুপালি, ভিক্খুনা পরং চোদেতুকামেন পঞ্চ ধম্মে অজ্ঝত্তং মনসি করিত্ৰা পরো চোদেতব্বো. কতমে পঞ্চ? কারুঞ্ঞতা, হিতেসিতা, অনুকম্পতা, আপত্তিৰুট্ঠানতা, ৰিনযপুরেক্খারতা – চোদকেনুপালি, ভিক্খুনা পরং চোদেতুকামেন ইমে পঞ্চ ধম্মে অজ্ঝত্তং মনসি করিত্ৰা পরো চোদেতব্বো’’তি.

৪৩৯. ‘‘কতিহি নু খো, ভন্তে, অঙ্গেহি সমন্নাগতস্স ভিক্খুনো ওকাসকম্মং কারাপেন্তস্স নালং ওকাসকম্মং কাতু’’ন্তি? ‘‘পঞ্চহুপালি, অঙ্গেহি সমন্নাগতস্স ভিক্খুনো ওকাসকম্মং কারাপেন্তস্স নালং ওকাসকম্মং কাতুং. কতমেহি পঞ্চহি? অপরিসুদ্ধকাযসমাচারো হোতি, অপরিসুদ্ধৰচীসমাচারো হোতি, অপরিসুদ্ধাজীৰো হোতি, বালো হোতি অব্যত্তো, ন পটিবলো অনুযুঞ্জিযমানো অনুযোগং দাতুং – ইমেহি খো, উপালি, পঞ্চহঙ্গেহি সমন্নাগতস্স ভিক্খুনো ওকাসকম্মং কারাপেন্তস্স নালং ওকাসকম্মং কাতুং.

‘‘পঞ্চহুপালি, অঙ্গেহি সমন্নাগতস্স ভিক্খুনো ওকাসকম্মং কারাপেন্তস্স অলং ওকাসকম্মং কাতুং. কতমেহি পঞ্চহি? পরিসুদ্ধকাযসমাচারো হোতি, পরিসুদ্ধৰচীসমাচারো হোতি, পরিসুদ্ধাজীৰো হোতি, পণ্ডিতো হোতি ব্যত্তো পটিবলো অনুযুঞ্জিযমানো অনুযোগং দাতুং – ইমেহি খো, উপালি, পঞ্চহঙ্গেহি সমন্নাগতস্স ভিক্খুনো ওকাসকম্মং কারাপেন্তস্স অলং ওকাসকম্মং কাতু’’ন্তি.

৪৪০. [চূল়ৰ. ৩৯৮] ‘‘অত্তাদানং আদাতুকামেন, ভন্তে, ভিক্খুনা কতিহঙ্গেহি সমন্নাগতং অত্তাদানং আদাতব্ব’’ন্তি? ‘‘অত্তাদানং আদাতুকামেনুপালি, ভিক্খুনা পঞ্চঙ্গসমন্নাগতং [পঞ্চহঙ্গেহি সমন্নাগতং (সী. স্যা.)] অত্তাদানং আদাতব্বং. কতমে পঞ্চ [কতমেহি পঞ্চহি (স্যা.)]? অত্তাদানং আদাতুকামেন, উপালি, ভিক্খুনা এৰং পচ্চৰেক্খিতব্বং – ‘যং খো অহং ইমং অত্তাদানং আদাতুকামো, কালো নু খো ইমং অত্তাদানং আদাতুং উদাহু নো’তি. সচে, উপালি, ভিক্খু পচ্চৰেক্খমানো এৰং জানাতি – ‘অকালো ইমং অত্তাদানং আদাতুং নো কালো’তি, ন তং, উপালি, অত্তাদানং আদাতব্বং.

‘‘সচে পনুপালি, ভিক্খু পচ্চৰেক্খমানো এৰং জানাতি – ‘কালো ইমং অত্তাদানং আদাতুং নো অকালো’তি, তেনুপালি ভিক্খুনা উত্তরি পচ্চৰেক্খিতব্বং – ‘যং খো অহং ইমং অত্তাদানং আদাতুকামো ভূতং নু খো ইদং অত্তাদানং উদাহু নো’তি. সচে, উপালি, ভিক্খু পচ্চৰেক্খমানো এৰং জানাতি – ‘অভূতং ইদং অত্তাদানং নো ভূত’ন্তি, ন তং, উপালি, অত্তাদানং আদাতব্বং.

‘‘সচে পনুপালি ভিক্খু পচ্চৰেক্খমানো এৰং জানাতি – ‘ভূতং ইদং অত্তাদানং নো অভূত’ন্তি, তেনুপালি ভিক্খুনা উত্তরি পচ্চৰেক্খিতব্বং – ‘যং খো অহং ইমং অত্তাদানং আদাতুকামো, অত্থসংহিতং নু খো ইদং অত্তাদানং উদাহু নো’তি. সচে, উপালি, ভিক্খু পচ্চৰেক্খমানো এৰং জানাতি –’ অনত্থসংহিতং ইদং অত্তাদানং নো অত্থসংহিত’ন্তি, ন তং, উপালি, অত্তাদানং আদাতব্বং.

‘‘সচে পনুপালি ভিক্খু পচ্চৰেক্খমানো এৰং জানাতি – ‘অত্থসংহিতং ইদং অত্তাদানং নো অনত্থসংহিত’ন্তি, তেনুপালি ভিক্খুনা উত্তরি পচ্চৰেক্খিতব্বং – ‘ইমং খো অহং অত্তাদানং আদিযমানো লভিস্সামি সন্দিট্ঠে সম্ভত্তে ভিক্খূ ধম্মতো ৰিনযতো পক্খে উদাহু নো’তি. সচে, উপালি, ভিক্খু পচ্চৰেক্খমানো এৰং জানাতি – ‘ইমং খো অহং অত্তাদানং আদিযমানো ন লভিস্সামি সন্দিট্ঠে সম্ভত্তে ভিক্খূ ধম্মতো ৰিনযতো পক্খে’তি, ন তং, উপালি, অত্তাদানং আদাতব্বং.

‘‘সচে পনুপালি ভিক্খু পচ্চৰেক্খমানো এৰং জানাতি – ‘ইদং খো অহং অত্তাদানং আদিযমানো লভিস্সামি সন্দিট্ঠে সম্ভত্তে ভিক্খূ ধম্মতো ৰিনযতো পক্খে’তি, তেনুপালি ভিক্খুনা উত্তরি পচ্চৰেক্খিতব্বং – ‘ইমং খো মে অত্তাদানং আদিযতো ভৰিস্সতি সঙ্ঘস্স ততোনিদানং ভণ্ডনং কলহো ৰিগ্গহো ৰিৰাদো সঙ্ঘভেদো সঙ্ঘরাজি সঙ্ঘৰৰত্থানং সঙ্ঘনানাকরণং উদাহু নো’তি. সচে, উপালি, ভিক্খু পচ্চৰেক্খমানো এৰং জানাতি – ‘ইমং খো মে অত্তাদানং আদিযতো ভৰিস্সতি সঙ্ঘস্স ততোনিদানং ভণ্ডনং কলহো ৰিগ্গহো ৰিৰাদো সঙ্ঘভেদো সঙ্ঘরাজি সঙ্ঘৰৰত্থানং সঙ্ঘনানাকরণ’ন্তি, ন তং, উপালি, অত্তাদানং আদাতব্বং.

‘‘সচে পনুপালি ভিক্খু পচ্চৰেক্খমানো এৰং জানাতি – ‘ইমং খো মে অত্তাদানং আদিযতো ন ভৰিস্সতি সঙ্ঘস্স ততোনিদানং ভণ্ডনং কলহো ৰিগ্গহো ৰিৰাদো সঙ্ঘভেদো সঙ্ঘরাজি সঙ্ঘৰৰত্থানং সঙ্ঘনানাকরণ’ন্তি, তং আদাতব্বং, উপালি, অত্তাদানং. এৰং পঞ্চঙ্গসমন্নাগতং খো, উপালি, অত্তাদানং আদিন্নং পচ্ছাপি অৰিপ্পটিসারকরং ভৰিস্সতী’’তি.

৪৪১. ‘‘কতিহি নু খো, ভন্তে, অঙ্গেহি সমন্নাগতো ভিক্খু অধিকরণজাতানং ভিক্খূনং বহূপকারো হোতী’’তি? ‘‘পঞ্চহুপালি, অঙ্গেহি সমন্নাগতো ভিক্খু অধিকরণজাতানং ভিক্খূনং বহূপকারো হোতি. কতমেহি পঞ্চহি? সীলৰা হোতি, পাতিমোক্খসংৰরসংৰুতো ৰিহরতি আচারগোচরসম্পন্নো অণুমত্তেসু ৰজ্জেসু ভযদস্সাৰী, সমাদায সিক্খতি সিক্খাপদেসু; বহুস্সুতো হোতি সুতধরো সুতসন্নিচযো; যে তে ধম্মা আদিকল্যাণা মজ্ঝেকল্যাণা পরিযোসানকল্যাণা সাত্থং সব্যঞ্জনং কেৰলপরিপুণ্ণং পরিসুদ্ধং ব্রহ্মচরিযং অভিৰদন্তি তথারূপস্স ধম্মা বহুস্সুতা হোন্তি ধাতা ৰচসা পরিচিতা মনসানুপেক্খিতা দিট্ঠিযা সুপ্পটিৰিদ্ধা, উভযানি খো পনস্স পাতিমোক্খানি ৰিত্থারেন স্ৰাগতানি হোন্তি সুৰিভত্তানি সুপ্পৰত্তীনি সুৰিনিচ্ছিতানি সুত্তসো অনুব্যঞ্জনসো; ৰিনযে খো পন ঠিতো হোতি অসংহীরো; পটিবলো হোতি উভো অত্থপচ্চত্থিকে অস্সাসেতুং সঞ্ঞাপেতুং নিজ্ঝাপেতুং পেক্খেতুং পসাদেতুং – ইমেহি খো, উপালি, পঞ্চহঙ্গেহি সমন্নাগতো ভিক্খু অধিকরণজাতানং ভিক্খূনং বহূপকারো হোতি.

‘‘অপরেহিপি, উপালি, পঞ্চহঙ্গেহি সমন্নাগতো ভিক্খু অধিকরণজাতানং ভিক্খূনং বহূপকারো হোতি. কতমেহি পঞ্চহি? পরিসুদ্ধকাযসমাচারো হোতি, পরিসুদ্ধৰচীসমাচারো হোতি, পরিসুদ্ধাজীৰো হোতি, পণ্ডিতো হোতি ব্যত্তো, পটিবলো অনুযুঞ্জিযমানো অনুযোগং দাতুং – ইমেহি খো, উপালি, পঞ্চহঙ্গেহি সমন্নাগতো ভিক্খু অধিকরণজাতানং ভিক্খূনং বহূপকারো হোতি.

‘‘অপরেহিপি, উপালি, পঞ্চহঙ্গেহি সমন্নাগতো ভিক্খু অধিকরণজাতানং ভিক্খূনং বহূপকারো হোতি. কতমেহি পঞ্চহি? ৰত্থুং জানাতি, নিদানং জানাতি, পঞ্ঞত্তিং জানাতি, পদপচ্চাভট্ঠং জানাতি, অনুসন্ধিৰচনপথং জানাতি – ইমেহি খো, উপালি, পঞ্চহঙ্গেহি সমন্নাগতো ভিক্খু অধিকরণজাতানং ভিক্খূনং বহূপকারো হোতী’’তি.

৪৪২. ‘‘কতিহি নু খো, ভন্তে, অঙ্গেহি সমন্নাগতেন ভিক্খুনা নানুযুঞ্জিতব্ব’’ন্তি? ‘‘পঞ্চহুপালি, অঙ্গেহি সমন্নাগতেন ভিক্খুনা নানুযুঞ্জিতব্বং. কতমেহি পঞ্চহি? সুত্তং ন জানাতি, সুত্তানুলোমং ন জানাতি, ৰিনযং ন জানাতি, ৰিনযানুলোমং ন জানাতি, ন চ ঠানাঠানকুসলো হোতি – ইমেহি খো, উপালি, পঞ্চহঙ্গেহি সমন্নাগতেন ভিক্খুনা নানুযুঞ্জিতব্বং.

‘‘পঞ্চহুপালি, অঙ্গেহি সমন্নাগতেন ভিক্খুনা অনুযুঞ্জিতব্বং. কতমেহি পঞ্চহি? সুত্তং জানাতি, সুত্তানুলোমং জানাতি, ৰিনযং জানাতি, ৰিনযানুলোমং জানাতি, ঠানাঠানকুসলো চ হোতি – ইমেহি খো, উপালি, পঞ্চহঙ্গেহি সমন্নাগতেন ভিক্খুনা অনুযুঞ্জিতব্বং.

‘‘অপরেহিপি, উপালি, পঞ্চহঙ্গেহি সমন্নাগতেন ভিক্খুনা নানুযুঞ্জিতব্বং. কতমেহি পঞ্চহি? ধম্মং ন জানাতি, ধম্মানুলোমং ন জানাতি, ৰিনযং ন জানাতি, ৰিনযানুলোমং ন জানাতি, ন চ পুব্বাপরকুসলো হোতি – ইমেহি খো, উপালি, পঞ্চহঙ্গেহি সমন্নাগতেন ভিক্খুনা নানুযুঞ্জিতব্বং.

‘‘পঞ্চহুপালি, অঙ্গেহি সমন্নাগতেন ভিক্খুনা অনুযুঞ্জিতব্বং. কতমেহি পঞ্চহি? ধম্মং জানাতি, ধম্মানুলোমং জানাতি, ৰিনযং জানাতি, ৰিনযানুলোমং জানাতি, পুব্বাপরকুসলো চ হোতি – ইমেহি খো, উপালি, পঞ্চহঙ্গেহি সমন্নাগতেন ভিক্খুনা অনুযুঞ্জিতব্বং.

‘‘অপরেহিপি, উপালি, পঞ্চহঙ্গেহি সমন্নাগতেন ভিক্খুনা নানুযুঞ্জিতব্বং. কতমেহি পঞ্চহি? ৰত্থুং ন জানাতি, নিদানং ন জানাতি, পঞ্ঞত্তিং ন জানাতি, পদপচ্চাভট্ঠং ন জানাতি, অনুসন্ধিৰচনপথং ন জানাতি – ইমেহি খো, উপালি, পঞ্চহঙ্গেহি সমন্নাগতেন ভিক্খুনা নানুযুঞ্জিতব্বং.

‘‘পঞ্চহুপালি, অঙ্গেহি সমন্নাগতেন ভিক্খুনা অনুযুঞ্জিতব্বং. কতমেহি পঞ্চহি? ৰত্থুং জানাতি, নিদানং জানাতি, পঞ্ঞত্তিং জানাতি, পদপচ্চাভট্ঠং জানাতি, অনুসন্ধিৰচনপথং জানাতি – ইমেহি খো, উপালি, পঞ্চহঙ্গেহি সমন্নাগতেন ভিক্খুনা অনুযুঞ্জিতব্বং.

‘‘অপরেহিপি, উপালি, পঞ্চহঙ্গেহি সমন্নাগতেন ভিক্খুনা নানুযুঞ্জিতব্বং. কতমেহি পঞ্চহি? আপত্তিং ন জানাতি, আপত্তিসমুট্ঠানং ন জানাতি, আপত্তিযা পযোগং ন জানাতি, আপত্তিযা ৰূপসমং ন জানাতি, আপত্তিযা ন ৰিনিচ্ছযকুসলো হোতি – ইমেহি খো, উপালি, পঞ্চহঙ্গেহি সমন্নাগতেন ভিক্খুনা নানুযুঞ্জিতব্বং.

‘‘পঞ্চহুপালি, অঙ্গেহি সমন্নাগতেন ভিক্খুনা অনুযুঞ্জিতব্বং. কতমেহি পঞ্চহি? আপত্তিং জানাতি, আপত্তিসমুট্ঠানং জানাতি, আপত্তিযা পযোগং জানাতি, আপত্তিযা ৰূপসমং জানাতি, আপত্তিযা ৰিনিচ্ছযকুসলো হোতি – ইমেহি খো, উপালি, পঞ্চহঙ্গেহি সমন্নাগতেন ভিক্খুনা অনুযুঞ্জিতব্বং.

‘‘অপরেহিপি, উপালি, পঞ্চহঙ্গেহি সমন্নাগতেন ভিক্খুনা নানুযুঞ্জিতব্বং. কতমেহি পঞ্চহি? অধিকরণং ন জানাতি, অধিকরণসমুট্ঠানং ন জানাতি, অধিকরণস্স পযোগং ন জানাতি, অধিকরণস্স ৰূপসমং ন জানাতি, অধিকরণস্স ন ৰিনিচ্ছযকুসলো হোতি – ইমেহি খো, উপালি, পঞ্চহঙ্গেহি সমন্নাগতেন ভিক্খুনা নানুযুঞ্জিতব্বং.

‘‘পঞ্চহুপালি, অঙ্গেহি সমন্নাগতেন ভিক্খুনা অনুযুঞ্জিতব্বং. কতমেহি পঞ্চহি? অধিকরণং জানাতি, অধিকরণসমুট্ঠানং জানাতি, অধিকরণস্স পযোগং জানাতি, অধিকরণস্স ৰূপসমং জানাতি, অধিকরণস্স ৰিনিচ্ছযকুসলো হোতি – ইমেহি খো, উপালি, পঞ্চহঙ্গেহি সমন্নাগতেন ভিক্খুনা অনুযুঞ্জিতব্ব’’ন্তি.

অত্তাদানৰগ্গো নিট্ঠিতো পঞ্চমো.

তস্সুদ্দানং –

পরিসুদ্ধঞ্চ কালেন, কারুঞ্ঞং ওকাসেন চ;

অত্তাদানং অধিকরণং, অপরেহিপি ৰত্থুঞ্চ;

সুত্তং ধম্মং পুন ৰত্থুঞ্চ, আপত্তি অধিকরণেন চাতি.