১. মুসাৰাদৰগ্গো

১৬৫. সম্পজানমুসাৰাদং ভাসন্তো কতি আপত্তিযো আপজ্জতি? সম্পজানমুসাৰাদং ভাসন্তো পঞ্চ আপত্তিযো আপজ্জতি. পাপিচ্ছো ইচ্ছাপকতো অসন্তং অভূতং উত্তরিমনুস্সধম্মং উল্লপতি, আপত্তি পারাজিকস্স; ভিক্খুং অমূলকেন পারাজিকেন ধম্মেন অনুদ্ধংসেতি, আপত্তি সঙ্ঘাদিসেসস্স; ‘‘যো তে ৰিহারে ৰসতি, সো ভিক্খু অরহা’’তি ভণতি, পটিৰিজানন্তস্স আপত্তি থুল্লচ্চযস্স; ন পটিৰিজানন্তস্স আপত্তি দুক্কটস্স; সম্পজানমুসাৰাদে পাচিত্তিযং – সম্পজানমুসাৰাদং ভাসন্তো ইমা পঞ্চ আপত্তিযো আপজ্জতি.

ওমসন্তো দ্ৰে আপত্তিযো আপজ্জতি. উপসম্পন্নং ওমসতি, আপত্তি পাচিত্তিযস্স; অনুপসম্পন্নং ওমসতি, আপত্তি দুক্কটস্স.

পেসুঞ্ঞং উপসংহরন্তো দ্ৰে আপত্তিযো আপজ্জতি. উপসম্পন্নস্স পেসুঞ্ঞং উপসংহরতি, আপত্তি পাচিত্তিযস্স; অনুপসম্পন্নস্স পেসুঞ্ঞং উপসংহরতি, আপত্তি দুক্কটস্স.

অনুপসম্পন্নং পদসো ধম্মং ৰাচেন্তো দ্ৰে আপত্তিযো আপজ্জতি. ৰাচেতি, পযোগে দুক্কটং; পদে পদে আপত্তি পাচিত্তিযস্স.

অনুপসম্পন্নেন উত্তরিদিরত্ততিরত্তং সহসেয্যং কপ্পেন্তো দ্ৰে আপত্তিযো আপজ্জতি. নিপজ্জতি, পযোগে দুক্কটং; নিপন্নে আপত্তি পাচিত্তিযস্স.

মাতুগামেন সহসেয্যং কপ্পেন্তো দ্ৰে আপত্তিযো আপজ্জতি. নিপজ্জতি, পযোগে দুক্কটং; নিপন্নে আপত্তি পাচিত্তিযস্স.

মাতুগামস্স উত্তরিছপ্পঞ্চৰাচাহি ধম্মং দেসেন্তো দ্ৰে আপত্তিযো আপজ্জতি. দেসেতি, পযোগে দুক্কটং; পদে পদে আপত্তি পাচিত্তিযস্স.

অনুপসম্পন্নস্স উত্তরিমনুস্সধম্মং ভূতং আরোচেন্তো দ্ৰে আপত্তিযো আপজ্জতি. আরোচেতি, পযোগে দুক্কটং; আরোচিতে আপত্তি পাচিত্তিযস্স.

ভিক্খুস্স দুট্ঠুল্লং আপত্তিং অনুপসম্পন্নস্স আরোচেন্তো দ্ৰে আপত্তিযো আপজ্জতি. আরোচেতি, পযোগে দুক্কটং; আরোচিতে আপত্তি পাচিত্তিযস্স.

পথৰিং খণন্তো দ্ৰে আপত্তিযো আপজ্জতি. খণতি, পযোগে দুক্কটং; পহারে পহারে আপত্তি পাচিত্তিযস্স.

মুসাৰাদৰগ্গো পঠমো.