১. লসুণৰগ্গো

২৩১. লসুণং খাদন্তী দ্ৰে আপত্তিযো আপজ্জতি. খাদিস্সামীতি পটিগ্গণ্হাতি, আপত্তি দুক্কটস্স; অজ্ঝোহারে অজ্ঝোহারে আপত্তি পাচিত্তিযস্স.

সম্বাধে লোমং সংহরাপেন্তী দ্ৰে আপত্তিযো আপজ্জতি. সংহরাপেতি, পযোগে দুক্কটং; সংহরাপিতে আপত্তি পাচিত্তিযস্স.

তলঘাতকং করোন্তী দ্ৰে আপত্তিযো আপজ্জতি. করোতি, পযোগে দুক্কটং; কতে আপত্তি পাচিত্তিযস্স.

জতুমট্ঠকং আদিযন্তী দ্ৰে আপত্তিযো আপজ্জতি. আদিযতি, পযোগে দুক্কটং, আদিন্নে আপত্তি পাচিত্তিযস্স.

অতিরেকদ্ৰঙ্গুলপব্বপরমং উদকসুদ্ধিকং আদিযন্তী দ্ৰে আপত্তিযো আপজ্জতি. আদিযতি, পযোগে দুক্কটং; আদিন্নে আপত্তি পাচিত্তিযস্স.

ভিক্খুস্স ভুঞ্জন্তস্স পানীযেন ৰা ৰিধূপনেন ৰা উপতিট্ঠন্তী দ্ৰে আপত্তিযো আপজ্জতি. হত্থপাসে তিট্ঠতি, আপত্তি পাচিত্তিযস্স; হত্থপাসং ৰিজহিত্ৰা তিট্ঠতি, আপত্তি দুক্কটস্স.

আমকধঞ্ঞং ৰিঞ্ঞাপেত্ৰা ভুঞ্জন্তী দ্ৰে আপত্তিযো আপজ্জতি. ভুঞ্জিস্সামীতি পটিগ্গণ্হাতি, আপত্তি দুক্কটস্স; অজ্ঝোহারে অজ্ঝোহারে আপত্তি পাচিত্তিযস্স.

উচ্চারং ৰা পস্সাৰং ৰা সঙ্কারং ৰা ৰিঘাসং ৰা তিরোকুট্টে ৰা তিরোপাকারে ৰা ছড্ডেন্তী দ্ৰে আপত্তিযো আপজ্জতি. ছড্ডেতি, পযোগে দুক্কটং; ছড্ডিতে আপত্তি পাচিত্তিযস্স.

উচ্চারং ৰা পস্সাৰং ৰা সঙ্কারং ৰা ৰিঘাসং ৰা হরিতে ছড্ডেন্তী দ্ৰে আপত্তিযো আপজ্জতি. ছড্ডেতি, পযোগে দুক্কটং; ছড্ডিতে আপত্তি পাচিত্তিযস্স.

নচ্চং ৰা গীতং ৰা ৰাদিতং ৰা দস্সনায গচ্ছন্তী দ্ৰে আপত্তিযো আপজ্জতি. গচ্ছতি, আপত্তি দুক্কটস্স; যত্থ ঠিতা পস্সতি ৰা সুণাতি ৰা, আপত্তি পাচিত্তিযস্স.

লসুণৰগ্গো পঠমো.