২. কতাপত্তিৰারো

১. পারাজিককণ্ডং

২২৮. অৰস্সুতা ভিক্খুনী অৰস্সুতস্স পুরিসপুগ্গলস্স কাযসংসগ্গং সাদিযন্তী কতি আপত্তিযো আপজ্জতি? অৰস্সুতা ভিক্খুনী অৰস্সুতস্স পুরিসপুগ্গলস্স কাযসংসগ্গং সাদিযন্তী তিস্সো আপত্তিযো আপজ্জতি. অধক্খকং উব্ভজাণুমণ্ডলং গহণং সাদিযতি, আপত্তি পারাজিকস্স; উব্ভক্খকং অধোজাণুমণ্ডলং গহণং সাদিযতি, আপত্তি থুল্লচ্চযস্স; কাযপটিবদ্ধং গহণং সাদিযতি, আপত্তি দুক্কটস্স – অৰস্সুতা ভিক্খুনী অৰস্সুতস্স পুরিসপুগ্গলস্স কাযসংসগ্গং সাদিযন্তী ইমা তিস্সো আপত্তিযো আপজ্জতি.

ৰজ্জপ্পটিচ্ছাদিকা ভিক্খুনী ৰজ্জং পটিচ্ছাদেন্তী কতি আপত্তিযো আপজ্জতি? ৰজ্জপ্পটিচ্ছাদিকা ভিক্খুনী ৰজ্জং পটিচ্ছাদেন্তী তিস্সো আপত্তিযো আপজ্জতি. জানং পারাজিকং ধম্মং পটিচ্ছাদেতি, আপত্তি পারাজিকস্স; ৰেমতিকা পটিচ্ছাদেতি, আপত্তি থুল্লচ্চযস্স; আচারৰিপত্তিং পটিচ্ছাদেতি, আপত্তি দুক্কটস্স – ৰজ্জপ্পটিচ্ছাদিকা ভিক্খুনী ৰজ্জং পটিচ্ছাদেন্তী ইমা তিস্সো আপত্তিযো আপজ্জতি.

উক্খিত্তানুৰত্তিকা ভিক্খুনী যাৰততিযং সমনুভাসনায ন পটিনিস্সজ্জন্তী কতি আপত্তিযো আপজ্জতি? উক্খিত্তানুৰত্তিকা ভিক্খুনী যাৰততিযং সমনুভাসনায ন পটিনিস্সজ্জন্তী তিস্সো আপত্তিযো আপজ্জতি. ঞত্তিযা দুক্কটং; দ্ৰীহি কম্মৰাচাহি থুল্লচ্চযা; কম্মৰাচাপরিযোসানে আপত্তি পারাজিকস্স – উক্খিত্তানুৰত্তিকা ভিক্খুনী যাৰততিযং সমনুভাসনায ন পটিনিস্সজ্জন্তী ইমা তিস্সো আপত্তিযো আপজ্জতি.

অট্ঠমং ৰত্থুং পরিপূরেন্তী কতি আপত্তিযো আপজ্জতি? অট্ঠমং ৰত্থুং পরিপূরেন্তী তিস্সো আপত্তিযো আপজ্জতি. পুরিসেন – ‘‘ইত্থন্নামং ওকাসং [ইত্থন্নামং গহনং (সী.), ইত্থন্নামং গব্ভং (স্যা.)] আগচ্ছা’’তি ৰুত্তা গচ্ছতি, আপত্তি দুক্কটস্স; পুরিসস্স হত্থপাসং ওক্কন্তমত্তে আপত্তি থুল্লচ্চযস্স; অট্ঠমং ৰত্থুং পরিপূরেতি, আপত্তি পারাজিকস্স – অট্ঠমং ৰত্থুং পরিপূরেন্তী ইমা তিস্সো আপত্তিযো আপজ্জতি.

পারাজিকা নিট্ঠিতা.

২. সঙ্ঘাদিসেসকণ্ডং

২২৯. উস্সযৰাদিকা ভিক্খুনী অড্ডং করোন্তী তিস্সো আপত্তিযো আপজ্জতি. একস্স আরোচেতি, আপত্তি দুক্কটস্স; দুতিযস্স আরোচেতি, আপত্তি থুল্লচ্চযস্স; অড্ডপরিযোসানে আপত্তি সঙ্ঘাদিসেসস্স.

চোরিং ৰুট্ঠাপেন্তী তিস্সো আপত্তিযো আপজ্জতি. ঞত্তিযা দুক্কটং; দ্ৰীহি কম্মৰাচাহি থুল্লচ্চযা; কম্মৰাচাপরিযোসানে আপত্তি সঙ্ঘাদিসেসস্স.

একা গামন্তরং গচ্ছন্তী তিস্সো আপত্তিযো আপজ্জতি. গচ্ছতি, আপত্তি দুক্কটস্স; পঠমং পাদং পরিক্খেপং অতিক্কামেতি, আপত্তি থুল্লচ্চযস্স; দুতিযং পাদং অতিক্কামেতি, আপত্তি সঙ্ঘাদিসেসস্স.

সমগ্গেন সঙ্ঘেন উক্খিত্তং ভিক্খুনিং ধম্মেন ৰিনযেন সত্থুসাসনেন অনপলোকেত্ৰা কারকসঙ্ঘং অনঞ্ঞায গণস্স ছন্দং ওসারেন্তী তিস্সো আপত্তিযো আপজ্জতি. ঞত্তিযা দুক্কটং; দ্ৰীহি কম্মৰাচাহি থুল্লচ্চযা; কম্মৰাচাপরিযোসানে আপত্তি সঙ্ঘাদিসেসস্স.

অৰস্সুতা ভিক্খুনী অৰস্সুতস্স পুরিসপুগ্গলস্স হত্থতো খাদনীযং ৰা ভোজনীযং ৰা সহত্থা পটিগ্গহেত্ৰা ভুঞ্জন্তী তিস্সো আপত্তিযো আপজ্জতি. ‘‘খাদিস্সামি ভুঞ্জিস্সামী’’তি পটিগ্গণ্হাতি, আপত্তি থুল্লচ্চযস্স; অজ্ঝোহারে অজ্ঝোহারে আপত্তি সঙ্ঘাদিসেসস্স; উদকদন্তপোনং পটিগ্গণ্হাতি, আপত্তি দুক্কটস্স.

‘‘কিং তে, অয্যে, এসো পুরিসপুগ্গলো করিস্সতি অৰস্সুতো ৰা অনৰস্সুতো ৰা, যতো ত্ৰং অনৰস্সুতা! ইঙ্ঘ, অয্যে, যং তে এসো পুরিসপুগ্গলো দেতি খাদনীযং ৰা ভোজনীযং ৰা, তং ত্ৰং সহত্থা পটিগ্গহেত্ৰা খাদ ৰা ভুঞ্জ ৰা’’তি উয্যোজেন্তী তিস্সো আপত্তিযো আপজ্জতি. তস্সা ৰচনেন খাদিস্সামি ভুঞ্জিস্সামীতি পটিগ্গণ্হাতি, আপত্তি দুক্কটস্স; অজ্ঝোহারে অজ্ঝোহারে আপত্তি থুল্লচ্চযস্স; ভোজনপরিযোসানে আপত্তি সঙ্ঘাদিসেসস্স.

কুপিতা ভিক্খুনী যাৰততিযং সমনুভাসনায ন পটিনিস্সজ্জন্তী তিস্সো আপত্তিযো আপজ্জতি. ঞত্তিযা দুক্কটং; দ্ৰীহি কম্মৰাচাহি থুল্লচ্চযা; কম্মৰাচাপরিযোসানে আপত্তি সঙ্ঘাদিসেসস্স.

কিস্মিঞ্চিদেৰ অধিকরণে পচ্চাকতা ভিক্খুনী যাৰততিযং সমনুভাসনায ন পটিনিস্সজ্জন্তী তিস্সো আপত্তিযো আপজ্জতি. ঞত্তিযা দুক্কটং; দ্ৰীহি কম্মৰাচাহি থুল্লচ্চযা; কম্মৰাচাপরিযোসানে আপত্তি সঙ্ঘাদিসেসস্স.

সংসট্ঠা ভিক্খুনিযো যাৰততিযং সমনুভাসনায ন পটিনিস্সজ্জন্তিযো তিস্সো আপত্তিযো আপজ্জন্তি. ঞত্তিযা দুক্কটং; দ্ৰীহি কম্মৰাচাহি থুল্লচ্চযা; কম্মৰাচাপরিযোসানে আপত্তি সঙ্ঘাদিসেসস্স.

‘‘সংসট্ঠাৰ, অয্যে, তুম্হে ৰিহরথ. মা তুম্হে নানা ৰিহরিত্থা’’তি উয্যোজেন্তী যাৰততিযং সমনুভাসনায ন পটিনিস্সজ্জন্তী তিস্সো আপত্তিযো আপজ্জতি. ঞত্তিযা দুক্কটং; দ্ৰীহি কম্মৰাচাহি থুল্লচ্চযা; কম্মৰাচাপরিযোসানে আপত্তি সঙ্ঘাদিসেসস্স.

সঙ্ঘাদিসেসা নিট্ঠিতা.

৩. নিস্সগ্গিযকণ্ডং

২৩০. পত্তসন্নিচযং করোন্তী একং আপত্তিং আপজ্জতি. নিস্সগ্গিযং পাচিত্তিযং.

অকালচীৰরং ‘‘কালচীৰর’’ন্তি অধিট্ঠহিত্ৰা ভাজাপেন্তী দ্ৰে আপত্তিযো আপজ্জতি. ভাজাপেতি, পযোগে দুক্কটং; ভাজাপিতে নিস্সগ্গিযং পাচিত্তিযং.

ভিক্খুনিযা সদ্ধিং চীৰরং পরিৰত্তেত্ৰা অচ্ছিন্দন্তী দ্ৰে আপত্তিযো আপজ্জতি. অচ্ছিন্দতি, পযোগে দুক্কটং; অচ্ছিন্নে নিস্সগ্গিযং পাচিত্তিযং.

অঞ্ঞং ৰিঞ্ঞাপেত্ৰা অঞ্ঞং ৰিঞ্ঞাপেন্তী দ্ৰে আপত্তিযো আপজ্জতি. ৰিঞ্ঞাপেতি, পযোগে দুক্কটং; ৰিঞ্ঞাপিতে নিস্সগ্গিযং পাচিত্তিযং.

অঞ্ঞং চেতাপেত্ৰা অঞ্ঞং চেতাপেন্তী দ্ৰে আপত্তিযো আপজ্জতি. চেতাপেতি, পযোগে দুক্কটং; চেতাপিতে নিস্সগ্গিযং পাচিত্তিযং.

অঞ্ঞদত্থিকেন পরিক্খারেন অঞ্ঞুদ্দিসিকেন সঙ্ঘিকেন অঞ্ঞং চেতাপেন্তী দ্ৰে আপত্তিযো আপজ্জতি. চেতাপেতি, পযোগে দুক্কটং; চেতাপিতে নিস্সগ্গিযং পাচিত্তিযং.

অঞ্ঞদত্থিকে পরিক্খারেন অঞ্ঞুদ্দিসিকেন সঙ্ঘিকেন সংযাচিকেন অঞ্ঞং চেতাপেন্তী দ্ৰে আপত্তিযো আপজ্জতি. চেতাপেতি, পযোগে দুক্কটং; চেতাপিতে নিস্সগ্গিযং পাচিত্তিযং.

অঞ্ঞদত্থিকেন পরিক্খারেন অঞ্ঞুদ্দিসিকেন মহাজনিকেন অঞ্ঞং চেতাপেন্তী দ্ৰে আপত্তিযো আপজ্জতি. চেতাপেতি, পযোগে দুক্কটং; চেতাপিতে নিস্সগ্গিযং পাচিত্তিযং.

অঞ্ঞদত্থিকেন পরিক্খারেন অঞ্ঞুদ্দিসিকেন মহাজনিকেন সংযাচিকেন অঞ্ঞং চেতাপেন্তী দ্ৰে আপত্তিযো আপজ্জতি. চেতাপেতি, পযোগে দুক্কটং; চেতাপিতে নিস্সগ্গিযং পাচিত্তিযং.

অঞ্ঞদত্থিকেন পরিক্খারেন অঞ্ঞুদ্দিসিকে পুগ্গলিকেন সংযাচিকেন অঞ্ঞং চেতাপেন্তী দ্ৰে আপত্তিযো আপজ্জতি. চেতাপেতি, পযোগে দুক্কটং; চেতাপিতে নিস্সগ্গিযং পাচিত্তিযং.

অতিরেকচতুক্কংসপরমং গরুপাৰুরণং চেতাপেন্তী দ্ৰে আপত্তিযো আপজ্জতি. চেতাপেতি, পযোগে দুক্কটং; চেতাপিতে নিস্সগ্গিযং পাচিত্তিযং.

অতিরেকঅড্ঢতেয্যকংসপরমং লহুপাৰুরণং চেতাপেন্তী দ্ৰে আপত্তিযো আপজ্জতি. চেতাপেতি, পযোগে দুক্কটং; চেতাপিতে নিস্সগ্গিযং পাচিত্তিযং.

নিস্সগ্গিযা পাচিত্তিযা নিট্ঠিতা.

৪. পাচিত্তিযকণ্ডং

১. লসুণৰগ্গো

২৩১. লসুণং খাদন্তী দ্ৰে আপত্তিযো আপজ্জতি. খাদিস্সামীতি পটিগ্গণ্হাতি, আপত্তি দুক্কটস্স; অজ্ঝোহারে অজ্ঝোহারে আপত্তি পাচিত্তিযস্স.

সম্বাধে লোমং সংহরাপেন্তী দ্ৰে আপত্তিযো আপজ্জতি. সংহরাপেতি, পযোগে দুক্কটং; সংহরাপিতে আপত্তি পাচিত্তিযস্স.

তলঘাতকং করোন্তী দ্ৰে আপত্তিযো আপজ্জতি. করোতি, পযোগে দুক্কটং; কতে আপত্তি পাচিত্তিযস্স.

জতুমট্ঠকং আদিযন্তী দ্ৰে আপত্তিযো আপজ্জতি. আদিযতি, পযোগে দুক্কটং, আদিন্নে আপত্তি পাচিত্তিযস্স.

অতিরেকদ্ৰঙ্গুলপব্বপরমং উদকসুদ্ধিকং আদিযন্তী দ্ৰে আপত্তিযো আপজ্জতি. আদিযতি, পযোগে দুক্কটং; আদিন্নে আপত্তি পাচিত্তিযস্স.

ভিক্খুস্স ভুঞ্জন্তস্স পানীযেন ৰা ৰিধূপনেন ৰা উপতিট্ঠন্তী দ্ৰে আপত্তিযো আপজ্জতি. হত্থপাসে তিট্ঠতি, আপত্তি পাচিত্তিযস্স; হত্থপাসং ৰিজহিত্ৰা তিট্ঠতি, আপত্তি দুক্কটস্স.

আমকধঞ্ঞং ৰিঞ্ঞাপেত্ৰা ভুঞ্জন্তী দ্ৰে আপত্তিযো আপজ্জতি. ভুঞ্জিস্সামীতি পটিগ্গণ্হাতি, আপত্তি দুক্কটস্স; অজ্ঝোহারে অজ্ঝোহারে আপত্তি পাচিত্তিযস্স.

উচ্চারং ৰা পস্সাৰং ৰা সঙ্কারং ৰা ৰিঘাসং ৰা তিরোকুট্টে ৰা তিরোপাকারে ৰা ছড্ডেন্তী দ্ৰে আপত্তিযো আপজ্জতি. ছড্ডেতি, পযোগে দুক্কটং; ছড্ডিতে আপত্তি পাচিত্তিযস্স.

উচ্চারং ৰা পস্সাৰং ৰা সঙ্কারং ৰা ৰিঘাসং ৰা হরিতে ছড্ডেন্তী দ্ৰে আপত্তিযো আপজ্জতি. ছড্ডেতি, পযোগে দুক্কটং; ছড্ডিতে আপত্তি পাচিত্তিযস্স.

নচ্চং ৰা গীতং ৰা ৰাদিতং ৰা দস্সনায গচ্ছন্তী দ্ৰে আপত্তিযো আপজ্জতি. গচ্ছতি, আপত্তি দুক্কটস্স; যত্থ ঠিতা পস্সতি ৰা সুণাতি ৰা, আপত্তি পাচিত্তিযস্স.

লসুণৰগ্গো পঠমো.

২. রত্তন্ধকারৰগ্গো

২৩২. রত্তন্ধকারে অপ্পদীপে পুরিসেন সদ্ধিং একেনেকা সন্তিট্ঠন্তী দ্ৰে আপত্তিযো আপজ্জতি. হত্থপাসে তিট্ঠতি, আপত্তি পাচিত্তিযস্স; হত্থপাসং ৰিজহিত্ৰা তিট্ঠতি, আপত্তি দুক্কটস্স.

পটিচ্ছন্নে ওকাসে পুরিসেন সদ্ধিং একেনেকা সন্তিট্ঠন্তী দ্ৰে আপত্তিযো আপজ্জতি. হত্থপাসে তিট্ঠতি, আপত্তি পাচিত্তিযস্স; হত্থপাসং ৰিজহিত্ৰা তিট্ঠতি, আপত্তি দুক্কটস্স.

অজ্ঝোকাসে পুরিসেন সদ্ধিং একেনেকা সন্তিট্ঠন্তী দ্ৰে আপত্তিযো আপজ্জতি. হত্থপাসে তিট্ঠতি, আপত্তি পাচিত্তিযস্স; হত্থপাসং ৰিজহিত্ৰা তিট্ঠতি, আপত্তি দুক্কটস্স.

রথিকায ৰা ব্যূহে ৰা সিঙ্ঘাটকে ৰা পুরিসেন সদ্ধিং একেনেকা সন্তিট্ঠন্তী দ্ৰে আপত্তিযো আপজ্জতি. হত্থপাসে তিট্ঠতি, আপত্তি পাচিত্তিযস্স; হত্থপাসং ৰিজহিত্ৰা তিট্ঠতি, আপত্তি দুক্কটস্স.

পুরেভত্তং কুলানি উপসঙ্কমিত্ৰা আসনে নিসীদিত্ৰা সামিকে অনাপুচ্ছা পক্কমন্তী দ্ৰে আপত্তিযো আপজ্জতি. পঠমং পাদং অনোৰস্সকং অতিক্কামেতি, আপত্তি দুক্কটস্স; দুতিযং পাদং অতিক্কামেতি, আপত্তি পাচিত্তিযস্স.

পচ্ছাভত্তং কুলানি উপসঙ্কমিত্ৰা সামিকে অনাপুচ্ছা আসনে নিসীদন্তী দ্ৰে আপত্তিযো আপজ্জতি. নিসীদতি, পযোগে দুক্কটং; নিসিন্নে আপত্তি পাচিত্তিযস্স.

ৰিকালে কুলানি উপসঙ্কমিত্ৰা সামিকে অনাপুচ্ছা সেয্যং সন্থরিত্ৰা ৰা সন্থরাপেত্ৰা ৰা অভিনিসীদন্তী দ্ৰে আপত্তিযো আপজ্জতি. অভিনিসীদতি, পযোগে দুক্কটং; অভিনিসিন্নে আপত্তি পাচিত্তিযস্স.

দুগ্গহিতেন দূপধারিতেন পরং উজ্ঝাপেন্তী দ্ৰে আপত্তিযো আপজ্জতি. উজ্ঝাপেতি, পযোগে দুক্কটং; উজ্ঝাপিতে আপত্তি পাচিত্তিযস্স.

অত্তানং ৰা পরং ৰা নিরযেন ৰা ব্রহ্মচরিযেন ৰা অভিসপন্তী দ্ৰে আপত্তিযো আপজ্জতি. অভিসপতি, পযোগে দুক্কটং; অভিসপিতে আপত্তি পাচিত্তিযস্স.

অত্তানং ৰধিত্ৰা ৰধিত্ৰা রোদন্তী দ্ৰে আপত্তিযো আপজ্জতি. ৰধতি রোদতি, আপত্তি পাচিত্তিযস্স; ৰধতি ন রোদতি, আপত্তি দুক্কটস্স.

রত্তন্ধকারৰগ্গো দুতিযো.

৩. নহানৰগ্গো

২৩৩. নগ্গা নহাযন্তী দ্ৰে আপত্তিযো আপজ্জতি. নহাযতি, পযোগে দুক্কটং; নহানপরিযোসানে আপত্তি পাচিত্তিযস্স.

পমাণাতিক্কন্তং উদকসাটিকং কারাপেন্তী দ্ৰে আপত্তিযো আপজ্জতি. কারাপেতি, পযোগে দুক্কটং; কারাপিতে, আপত্তি পাচিত্তিযস্স.

ভিক্খুনিযা চীৰরং ৰিসিব্বেত্ৰা ৰা ৰিসিব্বাপেত্ৰা ৰা নেৰ সিব্বেন্তী ন সিব্বাপনায উস্সুক্কং করোন্তী একং আপত্তিং আপজ্জতি. পাচিত্তিযং.

পঞ্চাহিকং সঙ্ঘাটিচারং অতিক্কামেন্তী একং আপত্তিং আপজ্জতি. পাচিত্তিযং. চীৰরসঙ্কমনীযং ধারেন্তী দ্ৰে আপত্তিযো আপজ্জতি. ধারেতি, পযোগে দুক্কটং; ধারিতে, আপত্তি পাচিত্তিযস্স.

গণস্স চীৰরলাভং অন্তরাযং করোন্তী দ্ৰে আপত্তিযো আপজ্জতি. করোতি, পযোগে দুক্কটং; কতে, আপত্তি পাচিত্তিযস্স.

ধম্মিকং চীৰরৰিভঙ্গং পটিবাহন্তী দ্ৰে আপত্তিযো আপজ্জতি. পটিবাহতি, পযোগে দুক্কটং; পটিবাহিতে, আপত্তি পাচিত্তিযস্স.

অগারিকস্স ৰা পরিব্বাজকস্স ৰা পরিব্বাজিকায ৰা সমণচীৰরং দেন্তী দ্ৰে আপত্তিযো আপজ্জতি. দেতি, পযোগে দুক্কটং; দিন্নে, আপত্তি পাচিত্তিযস্স.

দুব্বলচীৰরপচ্চাসা চীৰরকালসমযং অতিক্কামেন্তী দ্ৰে আপত্তিযো আপজ্জতি. অতিক্কামেতি, পযোগে দুক্কটং; অতিক্কামিতে, আপত্তি পাচিত্তিযস্স.

ধম্মিকং কথিনুদ্ধারং পটিবাহন্তী দ্ৰে আপত্তিযো আপজ্জতি. পটিবাহতি, পযোগে দুক্কটং; পটিবাহিতে, আপত্তি পাচিত্তিযস্স.

নহানৰগ্গো ততিযো.

৪. তুৰট্টৰগ্গো

২৩৪. দ্ৰে ভিক্খুনিযো একমঞ্চে তুৰট্টেন্তিযো দ্ৰে আপত্তিযো আপজ্জন্তি. নিপজ্জন্তি, পযোগে দুক্কটং; নিপন্নে, আপত্তি পাচিত্তিযস্স.

দ্ৰে ভিক্খুনিযো একত্থরণপাৰুরণা তুৰট্টেন্তিযো দ্ৰে আপত্তিযো আপজ্জন্তি. নিপজ্জন্তি, পযোগে দুক্কটং; নিপন্নে, আপত্তি পাচিত্তিযস্স.

ভিক্খুনিযা সঞ্চিচ্চ অফাসুং করোন্তী দ্ৰে আপত্তিযো আপজ্জতি. করোতি, পযোগে দুক্কটং; কতে, আপত্তি পাচিত্তিযস্স.

দুক্খিতং সহজীৰিনিং নেৰ উপট্ঠেন্তী ন উপট্ঠাপনায উস্সুক্কং করোন্তী একং আপত্তিং আপজ্জতি. পাচিত্তিযং.

ভিক্খুনিযা উপস্সযং দত্ৰা কুপিতা অনত্তমনা নিক্কড্ঢন্তী দ্ৰে আপত্তিযো আপজ্জতি. নিক্কড্ঢতি, পযোগে দুক্কটং; নিক্কড্ঢিতে, আপত্তি পাচিত্তিযস্স.

সংসট্ঠা ভিক্খুনী যাৰততিযং সমনুভাসনায ন পটিনিস্সজ্জন্তী দ্ৰে আপত্তিযো আপজ্জতি. ঞত্তিযা দুক্কটং; কম্মৰাচাপরিযোসানে আপত্তি পাচিত্তিযস্স.

অন্তোরট্ঠে সাসঙ্কসম্মতে সপ্পটিভযে অসত্থিকা চারিকং চরন্তী দ্ৰে আপত্তিযো আপজ্জতি. পটিপজ্জতি, পযোগে দুক্কটং; পটিপন্নে, আপত্তি পাচিত্তিযস্স.

তিরোরট্ঠে সাসঙ্কসম্মতে সপ্পটিভযে অসত্থিকা চারিকং চরন্তী দ্ৰে আপত্তিযো আপজ্জতি. পটিপজ্জতি, পযোগে দুক্কটং; পটিপন্নে, আপত্তি পাচিত্তিযস্স.

অন্তোৰস্সং চারিকং চরন্তী দ্ৰে আপত্তিযো আপজ্জতি. পটিপজ্জতি, পযোগে দুক্কটং; পটিপন্নে, আপত্তি পাচিত্তিযস্স.

ৰস্সংৰুট্ঠা ভিক্খুনী চারিকং ন পক্কমন্তী একং আপত্তিং আপজ্জতি. পাচিত্তিযং.

তুৰট্টৰগ্গো চতুত্থো.

৫. চিত্তাগারৰগ্গো

২৩৫. রাজাগারং ৰা চিত্তাগারং ৰা আরামং ৰা উয্যানং ৰা পোক্খরণিং ৰা দস্সনায গচ্ছন্তী দ্ৰে আপত্তিযো আপজ্জতি. গচ্ছতি, আপত্তি দুক্কটস্স; যত্থ ঠিতা পস্সতি, আপত্তি পাচিত্তিযস্স.

আসন্দিং ৰা পল্লঙ্কং ৰা পরিভুঞ্জন্তী দ্ৰে আপত্তিযো আপজ্জতি. পরিভুঞ্জতি, পযোগে দুক্কটং; পরিভুত্তে, আপত্তি পাচিত্তিযস্স.

সুত্তং কন্তন্তী দ্ৰে আপত্তিযো আপজ্জতি. কন্ততি, পযোগে দুক্কটং; উজ্জৰুজ্জৰে, আপত্তি পাচিত্তিযস্স.

গিহিৰেয্যাৰচ্চং করোন্তী দ্ৰে আপত্তিযো আপজ্জতি. করোতি, পযোগে দুক্কটং; কতে, আপত্তি পাচিত্তিযস্স.

ভিক্খুনিযা – ‘‘এহায্যে ইমং অধিকরণং ৰূপসমেহী’’তি ৰুচ্চমানা – ‘‘সাধূ’’তি পটিস্সুণিত্ৰা নেৰ ৰূপসমেন্তী ন ৰূপসমায উস্সুক্কং করোন্তী একং আপত্তিং আপজ্জতি. পাচিত্তিযং.

অগারিকস্স ৰা পরিব্বাজকস্স ৰা পরিব্বাজিকায ৰা সহত্থা খাদনীযং ৰা ভোজনীযং ৰা দেন্তী দ্ৰে আপত্তিযো আপজ্জতি. দেতি, পযোগে দুক্কটং; দিন্নে, আপত্তি পাচিত্তিযস্স.

আৰসথচীৰরং অনিস্সজ্জিত্ৰা পরিভুঞ্জন্তী দ্ৰে আপত্তিযো আপজ্জতি. পরিভুঞ্জতি, পযোগে দুক্কটং; পরিভুত্তে, আপত্তি পাচিত্তিযস্স.

আৰসথং অনিস্সজ্জিত্ৰা চারিকং পক্কমন্তী দ্ৰে আপত্তিযো আপজ্জতি. পঠমং পাদং পরিক্খেপং অতিক্কামেতি, আপত্তি দুক্কটস্স; দুতিযং পাদং অতিক্কামেতি, আপত্তি পাচিত্তিযস্স.

তিরচ্ছানৰিজ্জং পরিযাপুণন্তী দ্ৰে আপত্তিযো আপজ্জতি. পরিযাপুণাতি, পযোগে দুক্কটং; পদে পদে আপত্তি পাচিত্তিযস্স.

তিরচ্ছানৰিজ্জং ৰাচেন্তী দ্ৰে আপত্তিযো আপজ্জতি. ৰাচেতি, পযোগে দুক্কটং; পদে পদে আপত্তি পাচিত্তিযস্স.

চিত্তাগারৰগ্গো পঞ্চমো.

৬. আরামৰগ্গো

২৩৬. জানং সভিক্খুকং আরামং অনাপুচ্ছা পৰিসন্তী দ্ৰে আপত্তিযো আপজ্জতি. পঠমং পাদং পরিক্খেপং অতিক্কামেতি, আপত্তি দুক্কটস্স; দুতিযং পাদং অতিক্কামেতি, আপত্তি পাচিত্তিযস্স.

ভিক্খুং অক্কোসন্তী পরিভাসন্তী দ্ৰে আপত্তিযো আপজ্জতি. অক্কোসতি, পযোগে দুক্কটং; অক্কোসিতে, আপত্তি পাচিত্তিযস্স.

চণ্ডীকতা গণং পরিভাসন্তী দ্ৰে আপত্তিযো আপজ্জতি. পরিভাসতি, পযোগে দুক্কটং; পরিভাসিতে, আপত্তি পাচিত্তিযস্স.

নিমন্তিতা ৰা পৰারিতা ৰা খাদনীযং ৰা ভোজনীযং ৰা ভুঞ্জন্তী দ্ৰে আপত্তিযো আপজ্জতি. ‘‘খাদিস্সামি ভুঞ্জিস্সামী’’তি পটিগ্গণ্হাতি, আপত্তি দুক্কটস্স; অজ্ঝোহারে অজ্ঝোহারে আপত্তি পাচিত্তিযস্স.

কুলং মচ্ছরাযন্তী দ্ৰে আপত্তিযো আপজ্জতি. মচ্ছরাযতি, পযোগে দুক্কটং; মচ্ছরিতে, আপত্তি পাচিত্তিযস্স.

অভিক্খুকে আৰাসে ৰস্সং ৰসন্তী দ্ৰে আপত্তিযো আপজ্জতি. ‘‘ৰস্সং ৰসিস্সামী’’তি সেনাসনং পঞ্ঞপেতি পানীযং পরিভোজনীযং উপট্ঠপেতি পরিৰেণং সম্মজ্জতি, আপত্তি দুক্কটস্স; সহ অরুণুগ্গমনা আপত্তি পাচিত্তিযস্স.

ৰস্সংৰুট্ঠা ভিক্খুনী উভতোসঙ্ঘে তীহি ঠানেহি ন পৰারেন্তী একং আপত্তিং আপজ্জতি. পাচিত্তিযং.

ওৰাদায ৰা সংৰাসায ৰা ন গচ্ছন্তী একং আপত্তিং আপজ্জতি. পাচিত্তিযং.

উপোসথম্পি ন পুচ্ছন্তী ওৰাদম্পি ন যাচন্তী একং আপত্তিং আপজ্জতি. পাচিত্তিযং.

পসাখে জাতং গণ্ডং ৰা রুধিতং ৰা অনপলোকেত্ৰা সঙ্ঘং ৰা গণং ৰা পুরিসেন সদ্ধিং একেনেকা ভেদাপেন্তী দ্ৰে আপত্তিযো আপজ্জতি. ভেদাপেতি, পযোগে দুক্কটং; ভিন্নে, আপত্তি পাচিত্তিযস্স.

আরামৰগ্গো ছট্ঠো.

৭. গব্ভিনীৰগ্গো

২৩৭. গব্ভিনিং ৰুট্ঠাপেন্তী দ্ৰে আপত্তিযো আপজ্জতি. ৰুট্ঠাপেতি, পযোগে দুক্কটং; ৰুট্ঠাপিতে, আপত্তি পাচিত্তিযস্স.

পাযন্তিং ৰুট্ঠাপেন্তী দ্ৰে আপত্তিযো আপজ্জতি. ৰুট্ঠাপেতি, পযোগে দুক্কটং; ৰুট্ঠাপিতে, আপত্তি পাচিত্তিযস্স.

দ্ৰে ৰস্সানি ছসু ধম্মেসু অসিক্খিতসিক্খং সিক্খমানং ৰুট্ঠাপেন্তী দ্ৰে আপত্তিযো আপজ্জতি. ৰুট্ঠাপেতি, পযোগে দুক্কটং; ৰুট্ঠাপিতে, আপত্তি পাচিত্তিযস্স.

দ্ৰে ৰস্সানি ছসু ধম্মেসু সিক্খিতসিক্খং সিক্খমানং সঙ্ঘেন অসম্মতং ৰুট্ঠাপেন্তী দ্ৰে আপত্তিযো আপজ্জতি. ৰুট্ঠাপেতি, পযোগে দুক্কটং; ৰুট্ঠাপিতে, আপত্তি পাচিত্তিযস্স.

ঊনদ্ৰাদসৰস্সং গিহিগতং ৰুট্ঠাপেন্তী দ্ৰে আপত্তিযো আপজ্জতি. ৰুট্ঠাপেতি, পযোগে দুক্কটং; ৰুট্ঠাপিতে, আপত্তি পাচিত্তিযস্স.

পরিপুণ্ণদ্ৰাদসৰস্সং গিহিগতং দ্ৰে ৰস্সানি ছসু ধম্মেসু অসিক্খিতসিক্খং ৰুট্ঠাপেন্তী দ্ৰে আপত্তিযো আপজ্জতি. ৰুট্ঠাপেতি, পযোগে দুক্কটং; ৰুট্ঠাপিতে, আপত্তি পাচিত্তিযস্স.

পরিপুণ্ণদ্ৰাদসৰস্সং গিহিগতং দ্ৰে ৰস্সানি ছসু ধম্মেসু সিক্খিতসিক্খং সঙ্ঘেন অসম্মতং ৰুট্ঠাপেন্তী দ্ৰে আপত্তিযো আপজ্জতি. ৰুট্ঠাপেতি, পযোগে দুক্কটং; ৰুট্ঠাপিতে, আপত্তি পাচিত্তিযস্স.

সহজীৰিনিং ৰুট্ঠাপেত্ৰা দ্ৰে ৰস্সানি নেৰ অনুগ্গণ্হন্তী নানুগ্গণ্হাপেন্তী একং আপত্তিং আপজ্জতি. পাচিত্তিযং.

ৰুট্ঠাপিতং পৰত্তিনিং দ্ৰে ৰস্সানি নানুবন্ধন্তী একং আপত্তিং আপজ্জতি. পাচিত্তিযং.

সহজীৰিনিং ৰুট্ঠাপেত্ৰা নেৰ ৰূপকাসেন্তী ন ৰূপকাসাপেন্তী একং আপত্তিং আপজ্জতি. পাচিত্তিযং.

গব্ভিনীৰগ্গো সত্তমো.

৮. কুমারীভূতৰগ্গো

২৩৮. ঊনৰীসতিৰস্সং কুমারিভূতং ৰুট্ঠাপেন্তী দ্ৰে আপত্তিযো আপজ্জতি. ৰুট্ঠাপেতি, পযোগে দুক্কটং; ৰুট্ঠাপিতে, আপত্তি পাচিত্তিযস্স.

পরিপুণ্ণৰীসতিৰস্সং কুমারিভূতং দ্ৰে ৰস্সানি ছসু ধম্মেসু অসিক্খিতসিক্খং ৰুট্ঠাপেন্তী দ্ৰে আপত্তিযো আপজ্জতি. ৰুট্ঠাপেতি, পযোগে দুক্কটং; ৰুট্ঠাপিতে, আপত্তি পাচিত্তিযস্স.

পরিপুণ্ণৰীসতিৰস্সং কুমারিভূতং দ্ৰে ৰস্সানি ছসু ধম্মেসু সিক্খিতসিক্খং সঙ্ঘেন অসম্মতং ৰুট্ঠাপেন্তী দ্ৰে আপত্তিযো আপজ্জতি. ৰুট্ঠাপেতি, পযোগে দুক্কটং; ৰুট্ঠাপিতে, আপত্তি পাচিত্তিযস্স.

ঊনদ্ৰাদসৰস্সা ৰুট্ঠাপেন্তী দ্ৰে আপত্তিযো আপজ্জতি. ৰুট্ঠাপেতি, পযোগে দুক্কটং; ৰুট্ঠাপিতে, আপত্তি পাচিত্তিযস্স.

পরিপুণ্ণদ্ৰাদসৰস্সা সঙ্ঘেন অসম্মতা ৰুট্ঠাপেন্তী দ্ৰে আপত্তিযো আপজ্জতি. ৰুট্ঠাপেতি, পযোগে দুক্কটং; ৰুট্ঠাপিতে, আপত্তি পাচিত্তিযস্স.

‘‘অলং তাৰ তে, অয্যে, ৰুট্ঠাপিতেনা’’তি ৰুচ্চমানা ‘‘সাধূ’’তি পটিস্সুণিত্ৰা পচ্ছা খীযনধম্মং আপজ্জন্তী দ্ৰে আপত্তিযো আপজ্জতি. খিয্যতি, পযোগে দুক্কটং; খিয্যিতে, আপত্তি পাচিত্তিযস্স.

সিক্খমানং – ‘‘সচে মে ত্ৰং, অয্যে, চীৰরং দস্সসি, এৰাহং তং ৰুট্ঠাপেস্সামী’’তি ৰত্ৰা নেৰ ৰুট্ঠাপেন্তী ন ৰুট্ঠাপনায উস্সুক্কং করোন্তী একং আপত্তিং আপজ্জতি. পাচিত্তিযং.

সিক্খমানং – ‘‘সচে মং ত্ৰং, অয্যে, দ্ৰে ৰস্সানি অনুবন্ধিস্সসি, এৰাহং তং ৰুট্ঠাপেস্সামী’’তি ৰত্ৰা নেৰ ৰুট্ঠাপেন্তী ন ৰুট্ঠাপনায উস্সুক্কং করোন্তী একং আপত্তিং আপজ্জতি. পাচিত্তিযং.

পুরিসসংসট্ঠং কুমারকসংসট্ঠং চণ্ডিং সোকাৰাসং সিক্খমানং ৰুট্ঠাপেন্তী দ্ৰে আপত্তিযো আপজ্জতি. ৰুট্ঠাপেতি, পযোগে দুক্কটং; ৰুট্ঠাপিতে, আপত্তি পাচিত্তিযস্স.

মাতাপিতূহি ৰা সামিকেন ৰা অননুঞ্ঞাতং সিক্খমানং ৰুট্ঠাপেন্তী দ্ৰে আপত্তিযো আপজ্জতি. ৰুট্ঠাপেতি, পযোগে দুক্কটং; ৰুট্ঠাপিতে, আপত্তি পাচিত্তিযস্স.

পারিৰাসিকছন্দদানে সিক্খমানং ৰুট্ঠাপেন্তী দ্ৰে আপত্তিযো আপজ্জতি. ৰুট্ঠাপেতি, পযোগে দুক্কটং; ৰুট্ঠাপিতে, আপত্তি পাচিত্তিযস্স.

অনুৰস্সং ৰুট্ঠাপেন্তী দ্ৰে আপত্তিযো আপজ্জতি. ৰুট্ঠাপেতি, পযোগে দুক্কটং; ৰুট্ঠাপিতে, আপত্তি পাচিত্তিযস্স.

একং ৰস্সং দ্ৰে ৰুট্ঠাপেন্তী দ্ৰে আপত্তিযো আপজ্জতি. ৰুট্ঠাপেতি, পযোগে দুক্কটং; ৰুট্ঠাপিতে, আপত্তি পাচিত্তিযস্স.

কুমারীভূতৰগ্গো অট্ঠমো.

৯. ছত্তুপাহনৰগ্গো

২৩৯. ছত্তুপাহনং ধারেন্তী দ্ৰে আপত্তিযো আপজ্জতি. ধারেতি, পযোগে দুক্কটং; ধারিতে, আপত্তি পাচিত্তিযস্স.

যানেন যাযন্তী দ্ৰে আপত্তিযো আপজ্জতি. যাযতি, পযোগে দুক্কটং; যাযিতে, আপত্তি পাচিত্তিযস্স.

সঙ্ঘাণিং ধারেন্তী দ্ৰে আপত্তিযো আপজ্জতি. ধারেতি, পযোগে দুক্কটং; ধারিতে, আপত্তি পাচিত্তিযস্স.

ইত্থালঙ্কারং ধারেন্তী দ্ৰে আপত্তিযো আপজ্জতি. ধারেতি, পযোগে দুক্কটং; ধারিতে, আপত্তি পাচিত্তিযস্স.

গন্ধৰণ্ণকেন নহাযন্তী দ্ৰে আপত্তিযো আপজ্জতি. নহাযতি, পযোগে দুক্কটং; নহানপরিযোসানে, আপত্তি পাচিত্তিযস্স.

ৰাসিতকেন পিঞ্ঞাকেন নহাযন্তী দ্ৰে আপত্তিযো আপজ্জতি. নহাযতি, পযোগে দুক্কটং; নহানপরিযোসানে, আপত্তি পাচিত্তিযস্স.

ভিক্খুনিযা উম্মদ্দাপেন্তী পরিমদ্দাপেন্তী দ্ৰে আপত্তিযো আপজ্জতি. উম্মদ্দাপেতি, পযোগে দুক্কটং; উম্মদ্দিতে, আপত্তি পাচিত্তিযস্স.

সিক্খমানায উম্মদ্দাপেন্তী পরিমদ্দাপেন্তী দ্ৰে আপত্তিযো আপজ্জতি. উম্মদ্দাপেতি, পযোগে দুক্কটং; উম্মদ্দিতে, আপত্তি পাচিত্তিযস্স.

সামণেরিযা উম্মদ্দাপেন্তী পরিমদ্দাপেন্তী দ্ৰে আপত্তিযো আপজ্জতি. উম্মদ্দাপেতি, পযোগে দুক্কটং; উম্মদ্দিতে, আপত্তি পাচিত্তিযস্স.

গিহিনিযা উম্মদ্দাপেন্তী পরিমদ্দাপেন্তী দ্ৰে আপত্তিযো আপজ্জতি. উম্মদ্দাপেতি, পযোগে দুক্কটং; উম্মদ্দিতে, আপত্তি পাচিত্তিযস্স.

ভিক্খুস্স পুরতো অনাপুচ্ছা আসনে নিসীদন্তী দ্ৰে আপত্তিযো আপজ্জতি. নিসীদতি, পযোগে দুক্কটং; নিসিন্নে, আপত্তি পাচিত্তিযস্স.

অনোকাসকতং ভিক্খুং পঞ্হং পুচ্ছন্তী দ্ৰে আপত্তিযো আপজ্জতি. পুচ্ছতি, পযোগে দুক্কটং; পুচ্ছিতে, আপত্তি পাচিত্তিযস্স.

অসঙ্কচ্চিকা গামং পৰিসন্তী দ্ৰে আপত্তিযো আপজ্জতি. পঠমং পাদং পরিক্খেপং অতিক্কামেতি, আপত্তি দুক্কটস্স; দুতিযং পাদং অতিক্কামেতি, আপত্তি পাচিত্তিযস্স.

ছত্তুপাহনৰগ্গো নৰমো.

খুদ্দকং নিট্ঠিতং.

৫. পাটিদেসনীযকণ্ডং

২৪০. সপ্পিং ৰিঞ্ঞাপেত্ৰা ভুঞ্জন্তী দ্ৰে আপত্তিযো আপজ্জতি. ভুঞ্জিস্সামীতি পটিগ্গণ্হাতি, আপত্তি দুক্কটস্স; অজ্ঝোহারে অজ্ঝোহারে আপত্তি পাটিদেসনীযস্স.