৮. সমুচ্চযৰারো

২৫৬. কাযসংসগ্গং সাদিযনপচ্চযা কতি আপত্তিযো আপজ্জতি? কাযসংসগ্গং সাদিযনপচ্চযা পঞ্চ আপত্তিযো আপজ্জতি. অৰস্সুতা ভিক্খুনী অৰস্সুতস্স পুরিসপুগ্গলস্স অধক্খকং উব্ভজাণুমণ্ডলং গহণং সাদিযতি, আপত্তি পারাজিকস্স; ভিক্খু কাযেন কাযং আমসতি, আপত্তি সঙ্ঘাদিসেসস্স; কাযেন কাযপটিবদ্ধং আমসতি, আপত্তি থুল্লচ্চযস্স; কাযপটিবদ্ধেন কাযপটিবদ্ধং আমসতি, আপত্তি দুক্কটস্স; অঙ্গুলিপতোদকে পাচিত্তিযং – কাযসংসগ্গং সাদিযনপচ্চযা ইমা পঞ্চ আপত্তিযো আপজ্জতি.

তা আপত্তিযো চতুন্নং ৰিপত্তীনং কতি ৰিপত্তিযো ভজন্তি? সত্তন্নং আপত্তিক্খন্ধানং কতিহি আপত্তিক্খন্ধেহি সঙ্গহিতা? ছন্নং আপত্তিসমুট্ঠানানং কতিহি সমুট্ঠানেহি সমুট্ঠন্তি? চতুন্নং অধিকরণানং কতমং অধিকরণং? সত্তন্নং সমথানং কতিহি সমথেহি সম্মন্তি? তা আপত্তিযো চতুন্নং ৰিপত্তীনং দ্ৰে ৰিপত্তিযো ভজন্তি – সিযা সীলৰিপত্তিং, সিযা আচারৰিপত্তিং. সত্তন্নং আপত্তিক্খন্ধানং পঞ্চহি আপত্তিক্খন্ধেহি সঙ্গহিতা – সিযা পারাজিকাপত্তিক্খন্ধেন, সিযা সঙ্ঘাদিসেসাপত্তিক্খন্ধেন, সিযা থুল্লচ্চযাপত্তিক্খন্ধেন, সিযা পাচিত্তিযাপত্তিক্খন্ধেন, সিযা দুক্কটাপত্তিক্খন্ধেন. ছন্নং আপত্তিসমুট্ঠানানং একেন সমুট্ঠানেন সমুট্ঠন্তি – কাযতো চ চিত্ততো চ সমুট্ঠন্তি, ন ৰাচতো. চতুন্নং অধিকরণানং আপত্তাধিকরণং. সত্তন্নং সমথানং তীহি সমথেহি সম্মন্তি – সিযা সম্মুখাৰিনযেন চ পটিঞ্ঞাতকরণেন চ, সিযা সম্মুখাৰিনযেন চ তিণৰত্থারকেন চ…পে….

দধিং ৰিঞ্ঞাপেত্ৰা ভুঞ্জনপচ্চযা কতি আপত্তিযো আপজ্জতি? দধিং ৰিঞ্ঞাপেত্ৰা ভুঞ্জনপচ্চযা দ্ৰে আপত্তিযো আপজ্জতি. ভুঞ্জিস্সামীতি পটিগ্গণ্হাতি, আপত্তি দুক্কটস্স; অজ্ঝোহারে অজ্ঝোহারে আপত্তি পাটিদেসনীযস্স – দধিং ৰিঞ্ঞাপেত্ৰা ভুঞ্জনপচ্চযা ইমা দ্ৰে আপত্তিযো আপজ্জতি.

তা আপত্তিযো চতুন্নং ৰিপত্তীনং কতি ৰিপত্তিযো ভজন্তি? সত্তন্নং আপত্তিক্খন্ধানং কতিহি আপত্তিক্খন্ধেহি সঙ্গহিতা? ছন্নং আপত্তিসমুট্ঠানানং কতিহি সমুট্ঠানেহি সমুট্ঠন্তি? চতুন্নং অধিকরণানং কতমং অধিকরণং? সত্তন্নং সমথানং কতিহি সমথেহি সম্মন্তি? তা আপত্তিযো চতুন্নং ৰিপত্তীনং একং ৰিপত্তিং ভজন্তি – আচারৰিপত্তিং. সত্তন্নং আপত্তিক্খন্ধানং দ্ৰীহি আপত্তিক্খন্ধেহি সঙ্গহিতা – সিযা পাটিদেসনীযাপত্তিক্খন্ধেন, সিযা দুক্কটাপত্তিক্খন্ধেন. ছন্নং আপত্তিসমুট্ঠানানং চতূহি সমুট্ঠানেহি সমুট্ঠন্তি – সিযা কাযতো সমুট্ঠন্তি, ন ৰাচতো ন চিত্ততো; সিযা কাযতো চ ৰাচতো চ সমুট্ঠন্তি, ন চিত্ততো; সিযা কাযতো চ চিত্ততো চ সমুট্ঠন্তি ন ৰাচতো; সিযা কাযতো চ ৰাচতো চ চিত্ততো চ সমুট্ঠন্তি. চতুন্নং অধিকরণানং, আপত্তাধিকরণং. সত্তন্নং সমথানং তীহি সমথেহি সম্মন্তি – সিযা সম্মুখাৰিনযেন চ পটিঞ্ঞাতকরণেন চ, সিযা সম্মুখাৰিনযেন চ তিণৰত্থারকেন চাতি.

সমুচ্চযৰারো নিট্ঠিতো অট্ঠমো. [ইমস্সানন্তরং পোরাণসীহল়পোত্থকে এৰম্পি§দিস্সতি –§‘‘তেসমুদ্দানং –§কতিৰারো চ ৰিপত্তিৰারো চ, সঙ্গহৰারো চ সমুট্ঠানৰারো. অধিকরণৰারো চ সমথৰারো চ, সমুচ্চযৰারো চ ইমে সত্ত ৰারা. আদিতো পঞ্ঞত্তিৰারেন সহ অট্ঠৰারাতি’’ইতি.]

অট্ঠ পচ্চযৰারা নিট্ঠিতা.

ভিক্খুনীৰিভঙ্গে সোল়স মহাৰারা নিট্ঠিতা.