২. সঙ্ঘাদিসেসকণ্ডাদি

২৫০. উস্সযৰাদিকা ভিক্খুনী অড্ডং করণপচ্চযা তিস্সো আপত্তিযো আপজ্জতি. একস্স আরোচেতি, আপত্তি দুক্কটস্স; দুতিযস্স আরোচেতি, আপত্তি থুল্লচ্চযস্স; অড্ডপরিযোসানে আপত্তি সঙ্ঘাদিসেসস্স.

চোরিং ৰুট্ঠাপনপচ্চযা তিস্সো আপত্তিযো আপজ্জতি. ঞত্তিযা দুক্কটং; দ্ৰীহি কম্মৰাচাহি থুল্লচ্চযা; কম্মৰাচাপরিযোসানে আপত্তি সঙ্ঘাদিসেসস্স.

একা গামন্তরং গমনপচ্চযা তিস্সো আপত্তিযো আপজ্জতি. গচ্ছতি, আপত্তি দুক্কটস্স; পঠমং পাদং পরিক্খেপং অতিক্কামেতি, আপত্তি থুল্লচ্চযস্স; দুতিযং পাদং অতিক্কামেতি, আপত্তি সঙ্ঘাদিসেসস্স.

সমগ্গেন সঙ্ঘেন উক্খিত্তং ভিক্খুনিং ধম্মেন ৰিনযেন সত্থুসাসনেন অনপলোকেত্ৰা কারকসঙ্ঘং অনঞ্ঞায গণস্স ছন্দং ওসারণপচ্চযা তিস্সো আপত্তিযো আপজ্জতি. ঞত্তিযা দুক্কটং; দ্ৰীহি কম্মৰাচাহি থুল্লচ্চযা; কম্মৰাচাপরিযোসানে আপত্তি সঙ্ঘাদিসেসস্স.

অৰস্সুতা ভিক্খুনী অৰস্সুতস্স পুরিসপুগ্গলস্স হত্থতো খাদনীযং ৰা ভোজনীযং ৰা সহত্থা পটিগ্গহেত্ৰা ভুঞ্জনপচ্চযা তিস্সো আপত্তিযো আপজ্জতি. ‘‘খাদিস্সামি ভুঞ্জিস্সামী’’তি পটিগ্গণ্হাতি, আপত্তি থুল্লচ্চযস্স; অজ্ঝোহারে অজ্ঝোহারে আপত্তি সঙ্ঘাদিসেসস্স; উদকদন্তপোনং পটিগ্গণ্হাতি, আপত্তি দুক্কটস্স.

‘‘কিং তে, অয্যে, এসো পুরিসপুগ্গলো করিস্সতি অৰস্সুতো ৰা অনৰস্সুতো ৰা, যতো ত্ৰং অনৰস্সুতা! ইঙ্ঘ, অয্যে, যং তে এসো পুরিসপুগ্গলো দেতি খাদনীযং ৰা ভোজনীযং ৰা তং ত্ৰং সহত্থা পটিগ্গহেত্ৰা খাদ ৰা ভুঞ্জ ৰা’’তি, উয্যোজনপচ্চযা তিস্সো আপত্তিযো আপজ্জতি. তস্সা ৰচনেন খাদিস্সামি ভুঞ্জিস্সামীতি পটিগ্গণ্হাতি, আপত্তি দুক্কটস্স; অজ্ঝোহারে অজ্ঝোহারে আপত্তি থুল্লচ্চযস্স; ভোজনপরিযোসানে আপত্তি সঙ্ঘাদিসেসস্স.

কুপিতা ভিক্খুনী যাৰততিযং সমনুভাসনায ন পটিনিস্সজ্জনপচ্চযা তিস্সো আপত্তিযো আপজ্জতি. ঞত্তিযা দুক্কটং; দ্ৰীহি কম্মৰাচাহি থুল্লচ্চযা; কম্মৰাচাপরিযোসানে আপত্তি সঙ্ঘাদিসেসস্স.

কিস্মিঞ্চিদেৰ অধিকরণে পচ্চাকতা ভিক্খুনী যাৰততিযং সমনুভাসনায ন পটিনিস্সজ্জনপচ্চযা তিস্সো আপত্তিযো আপজ্জতি. ঞত্তিযা দুক্কটং; দ্ৰীহি কম্মৰাচাহি থুল্লচ্চযা; কম্মৰাচাপরিযোসানে আপত্তি সঙ্ঘাদিসেসস্স.

সংসট্ঠা ভিক্খুনী যাৰততিযং সমনুভাসনায ন পটিনিস্সজ্জনপচ্চযা তিস্সো আপত্তিযো আপজ্জতি. ঞত্তিযা দুক্কটং; দ্ৰীহি কম্মৰাচাহি থুল্লচ্চযা; কম্মৰাচাপরিযোসানে আপত্তি সঙ্ঘাদিসেসস্স.

‘‘সংসট্ঠাৰ, অয্যে, তুম্হে ৰিহরথ, মা তুম্হে নানা ৰিহরিত্থা’’তি উয্যোজেন্তী যাৰততিযং সমনুভাসনায ন পটিনিস্সজ্জনপচ্চযা তিস্সো আপত্তিযো আপজ্জতি. ঞত্তিযা দুক্কটং; দ্ৰীহি কম্মৰাচাহি থুল্লচ্চযা; কম্মৰাচাপরিযোসানে আপত্তি সঙ্ঘাদিসেসস্স.

দস সঙ্ঘাদিসেসা নিট্ঠিতা…পে….

(যথা হেট্ঠা তথা ৰিত্থারেতব্বা পচ্চযমেৰ নানাকরণং)

দধিং ৰিঞ্ঞাপেত্ৰা ভুঞ্জনপচ্চযা কতি আপত্তিযো আপজ্জতি? দধিং ৰিঞ্ঞাপেত্ৰা ভুঞ্জনপচ্চযা দ্ৰে আপত্তিযো আপজ্জতি. ভুঞ্জিস্সামীতি পটিগ্গণ্হাতি, আপত্তি দুক্কটস্স; অজ্ঝোহারে অজ্ঝোহারে আপত্তি পাটিদেসনীযস্স – দধিং ৰিঞ্ঞাপেত্ৰা ভুঞ্জনপচ্চযা ইমা দ্ৰে আপত্তিযো আপজ্জতি.

কতাপত্তিৰারো নিট্ঠিতো দুতিযো.