৮. সমুচ্চযৰারো

২৪৬. অৰস্সুতা ভিক্খুনী অৰস্সুতস্স পুরিসপুগ্গলস্স কাযসংসগ্গং সাদিযন্তী কতি আপত্তিযো আপজ্জতি? অৰস্সুতা ভিক্খুনী অৰস্সুতস্স পুরিসপুগ্গলস্স কাযসংসগ্গং সাদিযন্তী তিস্সো আপত্তিযো আপজ্জতি. অধক্খকং উব্ভজাণুমণ্ডলং গহণং সাদিযতি, আপত্তি পারাজিকস্স; উব্ভক্খকং অধোজাণুমণ্ডলং গহণং সাদিযতি, আপত্তি থুল্লচ্চযস্স; কাযপটিবদ্ধং গহণং সাদিযতি, আপত্তি দুক্কটস্স – অৰস্সুতা ভিক্খুনী অৰস্সুতস্স পুরিসপুগ্গলস্স কাযসংসগ্গং সাদিযন্তী ইমা তিস্সো আপত্তিযো আপজ্জতি.

তা আপত্তিযো চতুন্নং ৰিপত্তীনং কতি ৰিপত্তিযো ভজন্তি? সত্তন্নং আপত্তিক্খন্ধানং কতিহি আপত্তিক্খন্ধেহি সঙ্গহিতা? ছন্নং আপত্তিসমুট্ঠানানং কতিহি সমুট্ঠানেহি সমুট্ঠন্তি? চতুন্নং অধিকরণানং কতমং অধিকরণং? সত্তন্নং সমথানং কতিহি সমথেহি সম্মন্তি? তা আপত্তিযো চতুন্নং ৰিপত্তীনং দ্ৰে ৰিপত্তিযো ভজন্তি – সিযা সীলৰিপত্তিং, সিযা আচারৰিপত্তিং. সত্তন্নং আপত্তিক্খন্ধানং তীহি আপত্তিক্খন্ধেহি সঙ্গহিতা – সিযা পারাজিকাপত্তিক্খন্ধেন, সিযা থুল্লচ্চযাপত্তিক্খন্ধেন, সিযা দুক্কটাপত্তিক্খন্ধেন. ছন্নং আপত্তিসমুট্ঠানানং একেন সমুট্ঠানেন সমুট্ঠন্তি – কাযতো চ চিত্ততো চ সমুট্ঠন্তি, ন ৰাচতো. চতুন্নং অধিকরণানং আপত্তাধিকরণং. সত্তন্নং সমথানং তীহি সমথেহি সম্মন্তি – সিযা সম্মুখাৰিনযেন চ পটিঞ্ঞাতকরণেন চ, সিযা সম্মুখাৰিনযেন চ তিণৰত্থারকেন চ…পে….

দধিং ৰিঞ্ঞাপেত্ৰা ভুঞ্জন্তী কতি আপত্তিযো আপজ্জতি? দধিং ৰিঞ্ঞাপেত্ৰা ভুঞ্জন্তী দ্ৰে আপত্তিযো আপজ্জতি. ভুঞ্জিস্সামীতি পটিগ্গণ্হাতি, আপত্তি দুক্কটস্স; অজ্ঝোহারে অজ্ঝোহারে আপত্তি পাটিদেসনীযস্স – দধিং ৰিঞ্ঞাপেত্ৰা ভুঞ্জন্তী ইমা দ্ৰে আপত্তিযো আপজ্জতি.

তা আপত্তিযো চতুন্নং ৰিপত্তীনং কতি ৰিপত্তিযো ভজন্তি? সত্তন্নং আপত্তিক্খন্ধানং কতিহি আপত্তিক্খন্ধেহি সঙ্গহিতা? ছন্নং আপত্তিসমুট্ঠানানং কতিহি সমুট্ঠানেহি সমুট্ঠন্তি? চতুন্নং অধিকরণানং কতমং অধিকরণং? সত্তন্নং সমথানং কতিহি সমথেহি সম্মন্তি? তা আপত্তিযো চতুন্নং ৰিপত্তীনং একং ৰিপত্তিং ভজন্তি – আচারৰিপত্তিং. সত্তন্নং আপত্তিক্খন্ধানং দ্ৰীহি আপত্তিক্খন্ধেহি সঙ্গহিতা – সিযা পাটিদেসনীযাপত্তিক্খন্ধেন, সিযা দুক্কটাপত্তিক্খন্ধেন. ছন্নং আপত্তিসমুট্ঠানানং চতূহি সমুট্ঠানেহি সমুট্ঠন্তি – সিযা কাযতো সমুট্ঠন্তি ন ৰাচতো ন চিত্ততো, সিযা কাযতো চ ৰাচতো চ সমুট্ঠন্তি ন চিত্ততো, সিযা কাযতো চ চিত্ততো চ সমুট্ঠন্তি ন ৰাচতো, সিযা কাযতো চ ৰাচতো চ চিত্ততো চ সমুট্ঠন্তি. চতুন্নং অধিকরণানং – আপত্তাধিকরণং. সত্তন্নং সমথানং তীহি সমথেহি সম্মন্তি – সিযা সম্মুখাৰিনযেন চ পটিঞ্ঞাতকরণেন চ, সিযা সম্মুখাৰিনযেন চ তিণৰত্থারকেন চ.

সমুচ্চযৰারো নিট্ঠিতো অট্ঠমো.