১. পারাজিককণ্ডং

২২৮. অৰস্সুতা ভিক্খুনী অৰস্সুতস্স পুরিসপুগ্গলস্স কাযসংসগ্গং সাদিযন্তী কতি আপত্তিযো আপজ্জতি? অৰস্সুতা ভিক্খুনী অৰস্সুতস্স পুরিসপুগ্গলস্স কাযসংসগ্গং সাদিযন্তী তিস্সো আপত্তিযো আপজ্জতি. অধক্খকং উব্ভজাণুমণ্ডলং গহণং সাদিযতি, আপত্তি পারাজিকস্স; উব্ভক্খকং অধোজাণুমণ্ডলং গহণং সাদিযতি, আপত্তি থুল্লচ্চযস্স; কাযপটিবদ্ধং গহণং সাদিযতি, আপত্তি দুক্কটস্স – অৰস্সুতা ভিক্খুনী অৰস্সুতস্স পুরিসপুগ্গলস্স কাযসংসগ্গং সাদিযন্তী ইমা তিস্সো আপত্তিযো আপজ্জতি.

ৰজ্জপ্পটিচ্ছাদিকা ভিক্খুনী ৰজ্জং পটিচ্ছাদেন্তী কতি আপত্তিযো আপজ্জতি? ৰজ্জপ্পটিচ্ছাদিকা ভিক্খুনী ৰজ্জং পটিচ্ছাদেন্তী তিস্সো আপত্তিযো আপজ্জতি. জানং পারাজিকং ধম্মং পটিচ্ছাদেতি, আপত্তি পারাজিকস্স; ৰেমতিকা পটিচ্ছাদেতি, আপত্তি থুল্লচ্চযস্স; আচারৰিপত্তিং পটিচ্ছাদেতি, আপত্তি দুক্কটস্স – ৰজ্জপ্পটিচ্ছাদিকা ভিক্খুনী ৰজ্জং পটিচ্ছাদেন্তী ইমা তিস্সো আপত্তিযো আপজ্জতি.

উক্খিত্তানুৰত্তিকা ভিক্খুনী যাৰততিযং সমনুভাসনায ন পটিনিস্সজ্জন্তী কতি আপত্তিযো আপজ্জতি? উক্খিত্তানুৰত্তিকা ভিক্খুনী যাৰততিযং সমনুভাসনায ন পটিনিস্সজ্জন্তী তিস্সো আপত্তিযো আপজ্জতি. ঞত্তিযা দুক্কটং; দ্ৰীহি কম্মৰাচাহি থুল্লচ্চযা; কম্মৰাচাপরিযোসানে আপত্তি পারাজিকস্স – উক্খিত্তানুৰত্তিকা ভিক্খুনী যাৰততিযং সমনুভাসনায ন পটিনিস্সজ্জন্তী ইমা তিস্সো আপত্তিযো আপজ্জতি.

অট্ঠমং ৰত্থুং পরিপূরেন্তী কতি আপত্তিযো আপজ্জতি? অট্ঠমং ৰত্থুং পরিপূরেন্তী তিস্সো আপত্তিযো আপজ্জতি. পুরিসেন – ‘‘ইত্থন্নামং ওকাসং [ইত্থন্নামং গহনং (সী.), ইত্থন্নামং গব্ভং (স্যা.)] আগচ্ছা’’তি ৰুত্তা গচ্ছতি, আপত্তি দুক্কটস্স; পুরিসস্স হত্থপাসং ওক্কন্তমত্তে আপত্তি থুল্লচ্চযস্স; অট্ঠমং ৰত্থুং পরিপূরেতি, আপত্তি পারাজিকস্স – অট্ঠমং ৰত্থুং পরিপূরেন্তী ইমা তিস্সো আপত্তিযো আপজ্জতি.

পারাজিকা নিট্ঠিতা.