২. সঙ্ঘাদিসেসকণ্ডং

২০৬. যং তেন ভগৰতা জানতা পস্সতা অরহতা সম্মাসম্বুদ্ধেন উস্সযৰাদিকায ভিক্খুনিযা অড্ডং করোন্তিযা সঙ্ঘাদিসেসো কত্থ পঞ্ঞত্তো? কং আরব্ভ? কিস্মিং ৰত্থুস্মিং…পে… কেনাভতন্তি?

২০৭. যং তেন ভগৰতা জানতা পস্সতা অরহতা সম্মাসম্বুদ্ধেন উস্সযৰাদিকায ভিক্খুনিযা অড্ডং করোন্তিযা সঙ্ঘাদিসেসো কত্থ পঞ্ঞত্তোতি? সাৰত্থিযং পঞ্ঞত্তো. কং আরব্ভাতি? থুল্লনন্দং ভিক্খুনিং আরব্ভ. কিস্মিং ৰত্থুস্মিন্তি? থুল্লনন্দা ভিক্খুনী উস্সযৰাদিকা ৰিহরি, তস্মিং ৰত্থুস্মিং. অত্থি তত্থ পঞ্ঞত্তি, অনুপঞ্ঞত্তি, অনুপ্পন্নপঞ্ঞত্তীতি? একা পঞ্ঞত্তি. অনুপঞ্ঞত্তি অনুপ্পন্নপঞ্ঞত্তি তস্মিং নত্থি. সব্বত্থপঞ্ঞত্তি, পদেসপঞ্ঞত্তীতি? সব্বত্থপঞ্ঞত্তি. সাধারণপঞ্ঞত্তি, অসাধারণপঞ্ঞত্তীতি? অসাধারণপঞ্ঞত্তি. একতোপঞ্ঞত্তি, উভতোপঞ্ঞত্তীতি? একতোপঞ্ঞত্তি. চতুন্নং পাতিমোক্খুদ্দেসানং কত্থোগধং কত্থ পরিযাপন্নন্তি? নিদানোগধং নিদানপরিযাপন্নং. কতমেন উদ্দেসেন উদ্দেসং আগচ্ছতীতি? ততিযেন উদ্দেসেন উদ্দেসং আগচ্ছতি. চতুন্নং ৰিপত্তীনং কতমা ৰিপত্তীতি? সীলৰিপত্তি. সত্তন্নং আপত্তিক্খন্ধানং কতমো আপত্তিক্খন্ধোতি? সঙ্ঘাদিসেসাপত্তিক্খন্ধো. ছন্নং আপত্তিসমুট্ঠানানং কতিহি সমুট্ঠানেহি সমুট্ঠাতীতি? দ্ৰীহি সমুট্ঠানেহি সমুট্ঠাতি – সিযা কাযতো চ ৰাচতো চ সমুট্ঠাতি, ন চিত্ততো; সিযা কাযতো চ ৰাচতো চ চিত্ততো চ সমুট্ঠাতি…পে… কেনাভতন্তি? পরম্পরাভতং –

উপালি দাসকো চেৰ, সোণকো সিগ্গৰো তথা;

মোগ্গলিপুত্তেন পঞ্চমা, এতে জম্বুসিরিৰ্হযে. …পে…;

এতে নাগা মহাপঞ্ঞা, ৰিনযঞ্ঞূ মগ্গকোৰিদা;

ৰিনযং দীপে পকাসেসুং, পিটকং তম্বপণ্ণিযাতি.

২০৮. চোরিং ৰুট্ঠাপেন্তিযা সঙ্ঘাদিসেসো কত্থ পঞ্ঞত্তোতি? সাৰত্থিযং পঞ্ঞত্তো. কং আরব্ভাতি? থুল্লনন্দং ভিক্খুনিং আরব্ভ. কিস্মিং ৰত্থুস্মিন্তি? থুল্লনন্দা ভিক্খুনী চোরিং ৰুট্ঠাপেসি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – সিযা ৰাচতো চ চিত্ততো চ সমুট্ঠাতি, ন কাযতো; সিযা কাযতো চ ৰাচতো চ চিত্ততো চ সমুট্ঠাতি…পে….

২০৯. একায গামন্তরং গচ্ছন্তিযা সঙ্ঘাদিসেসো কত্থ পঞ্ঞত্তোতি? সাৰত্থিযং পঞ্ঞত্তো. কং আরব্ভাতি? অঞ্ঞতরং ভিক্খুনিং আরব্ভ. কিস্মিং ৰত্থুস্মিন্তি? অঞ্ঞতরা ভিক্খুনী একা গামন্তরং গচ্ছি, তস্মিং ৰত্থুস্মিং. একা পঞ্ঞত্তি, তিস্সো অনুপঞ্ঞত্তিযো. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – পঠমপারাজিকে…পে….

২১০. সমগ্গেন সঙ্ঘেন উক্খিত্তং ভিক্খুনিং ধম্মেন ৰিনযেন সত্থুসাসনেন অনপলোকেত্ৰা কারকসঙ্ঘং অনঞ্ঞায গণস্স ছন্দং ওসারেন্তিযা সঙ্ঘাদিসেসো কত্থ পঞ্ঞত্তোতি? সাৰত্থিযং পঞ্ঞত্তো. কং আরব্ভাতি? থুল্লনন্দং ভিক্খুনিং আরব্ভ. কিস্মিং ৰত্থুস্মিন্তি? থুল্লনন্দা ভিক্খুনী সমগ্গেন সঙ্ঘেন উক্খিত্তং ভিক্খুনিং ধম্মেন ৰিনযেন সত্থুসাসনেন অনপলোকেত্ৰা কারকসঙ্ঘং অনঞ্ঞায গণস্স ছন্দং ওসারেসি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – ধুরনিক্খেপে…পে….

২১১. অৰস্সুতায ভিক্খুনিযা অৰস্সুতস্স পুরিসপুগ্গলস্স হত্থতো খাদনীযং ৰা ভোজনীযং ৰা সহত্থা পটিগ্গহেত্ৰা ভুঞ্জন্তিযা সঙ্ঘাদিসেসো কত্থ পঞ্ঞত্তোতি? সাৰত্থিযং পঞ্ঞত্তো. কং আরব্ভাতি? সুন্দরীনন্দং ভিক্খুনিং আরব্ভ. কিস্মিং ৰত্থুস্মিন্তি? সুন্দরীনন্দা ভিক্খুনী অৰস্সুতা অৰস্সুতস্স পুরিসপুগ্গলস্স হত্থতো আমিসং পটিগ্গহেসি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – পঠমপারাজিকে…পে….

২১২. ‘‘কিং তে, অয্যে, এসো পুরিসপুগ্গলো করিস্সতি অৰস্সুতো ৰা অনৰস্সুতো ৰা, যতো ত্ৰং অনৰস্সুতা! ইঙ্ঘ, অয্যে, যং তে এসো পুরিসপুগ্গলো দেতি খাদনীযং ৰা ভোজনীযং ৰা, তং ত্ৰং সহত্থা পটিগ্গহেত্ৰা খাদ ৰা ভুঞ্জ ৰা’’তি উয্যোজেন্তিযা সঙ্ঘাদিসেসো কত্থ পঞ্ঞত্তোতি? সাৰত্থিযং পঞ্ঞত্তো. কং অরব্ভাতি? অঞ্ঞতরং ভিক্খুনিং আরব্ভ. কিস্মিং ৰত্থুস্মিন্তি? অঞ্ঞতরা ভিক্খুনী –‘‘কিং তে, অয্যে, এসো পুরিসপুগ্গলো করিস্সতি অৰস্সুতো ৰা অনৰস্সুতো ৰা, যতো ত্ৰং অনৰস্সুতা! ইঙ্ঘ, অয্যে, যং তে এসো পুরিসপুগ্গলো দেতি খাদনীযং ৰা ভোজনীযং ৰা, তং ত্ৰং সহত্থা পটিগ্গহেত্ৰা খাদ ৰা ভুঞ্জ ৰা’’তি উয্যোজেসি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং তীহি সমুট্ঠানেহি সমুট্ঠাতি…পে….

২১৩. কুপিতায অনত্তমনায ভিক্খুনিযা যাৰততিযং সমনুভাসনায ন পটিনিস্সজ্জন্তিযা সঙ্ঘাদিসেসো কত্থ পঞ্ঞত্তোতি? সাৰত্থিযং পঞ্ঞত্তো. কং আরব্ভাতি? চণ্ডকাল়িং ভিক্খুনিং আরব্ভ. কিস্মিং ৰত্থুস্মিন্তি? চণ্ডকাল়ী ভিক্খুনী কুপিতা অনত্তমনা এৰং অৰচ – ‘‘বুদ্ধং পচ্চাচিক্খামি, ধম্মং পচ্চাচিক্খামি, সঙ্ঘং পচ্চাচিক্খামি, সিক্খং পচ্চাচিক্খামী’’তি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – ধুরনিক্খেপে…পে….

২১৪. কিস্মিঞ্চিদেৰ অধিকরণে পচ্চাকতায ভিক্খুনিযা যাৰততিযং সমনুভাসনায ন পটিনিস্সজ্জন্তিযা সঙ্ঘাদিসেসো কত্থ পঞ্ঞত্তোতি? সাৰত্থিযং পঞ্ঞত্তো. কং আরব্ভাতি? চণ্ডকাল়িং ভিক্খুনিং আরব্ভ. কিস্মিং ৰত্থুস্মিন্তি? চণ্ডকাল়ী ভিক্খুনী কিস্মিঞ্চিদেৰ অধিকরণে পচ্চাকতা কুপিতা অনত্তমনা এৰং অৰচ – ‘‘ছন্দগামিনিযো চ ভিক্খুনিযো, দোসগামিনিযো চ ভিক্খুনিযো, মোহগামিনিযো চ ভিক্খুনিযো, ভযগামিনিযো চ ভিক্খুনিযো’’তি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – ধুরনিক্খেপে…পে….

২১৫. সংসট্ঠানং ভিক্খুনীনং যাৰততিযং সমনুভাসনায ন পটিনিস্সজ্জন্তীনং সঙ্ঘাদিসেসো কত্থ পঞ্ঞত্তোতি? সাৰত্থিযং পঞ্ঞত্তো. কং আরব্ভাতি? সম্বহুলা ভিক্খুনিযো আরব্ভ. কিস্মিং ৰত্থুস্মিন্তি? সম্বহুলা ভিক্খুনিযো সংসট্ঠা ৰিহরিংসু, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – ধুরনিক্খেপে…পে….

২১৬. ‘‘সংসট্ঠাৰ, অয্যে, তুম্হে ৰিহরথ. মা তুম্হে নানা ৰিহরিত্থা’’তি উয্যোজেন্তিযা যাৰততিযং সমনুভাসনায ন পটিনিস্সজ্জন্তিযা সঙ্ঘাদিসেসো কত্থ পঞ্ঞত্তোতি? সাৰত্থিযং পঞ্ঞত্তো. কং আরব্ভাতি? থুল্লনন্দং ভিক্খুনিং আরব্ভ. কিস্মিং ৰত্থুস্মিন্তি? থুল্লনন্দা ভিক্খুনী – ‘‘সংসট্ঠাৰ অয্যে, তুম্হে ৰিহরথ, মা তুম্হে নানা ৰিহরিত্থা’’তি উয্যোজেসি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – ধুরনিক্খেপে…পে….

দস সঙ্ঘাদিসেসা নিট্ঠিতা.

তস্সুদ্দানং –

উস্সযচোরি গামন্তং, উক্খিত্তং খাদনেন চ;

কিং তে কুপিতা কিস্মিঞ্চি, সংসট্ঠা ঞাযতে দসাতি.