১. কত্থপঞ্ঞত্তিৰারো

১. পারাজিককণ্ডং

২০১. যং তেন ভগৰতা জানতা পস্সতা অরহতা সম্মাসম্বুদ্ধেন ভিক্খুনীনং পঞ্চমং পারাজিকং কত্থ পঞ্ঞত্তং? কং আরব্ভ? কিস্মিং ৰত্থুস্মিং? অত্থি তত্থ পঞ্ঞত্তি, অনুপঞ্ঞত্তি, অনুপ্পন্নপঞ্ঞত্তি? সব্বত্থপঞ্ঞত্তি, পদেসপঞ্ঞত্তি? সাধারণপঞ্ঞত্তি, অসাধারণপঞ্ঞত্তি? একতোপঞ্ঞত্তি, উভতোপঞ্ঞত্তি? চতুন্নং পাতিমোক্খুদ্দেসানং কত্থোগধং কত্থ পরিযাপন্নং? কতমেন উদ্দেসেন উদ্দেসং আগচ্ছতি? চতুন্নং ৰিপত্তীনং কতমা ৰিপত্তি? সত্তন্নং আপত্তিক্খন্ধানং কতমো আপত্তিক্খন্ধো? ছন্নং আপত্তিসমুট্ঠানানং কতিহি সমুট্ঠানেহি সমুট্ঠাতি? চতুন্নং অধিকরণানং কতমং অধিকরণং? সত্তন্নং সমথানং কতিহি সমথেহি সম্মতি? কো তত্থ ৰিনযো? কো তত্থ অভিৰিনযো? কিং তত্থ পাতিমোক্খং? কিং তত্থ অধিপাতিমোক্খং? কা ৰিপত্তি? কা সম্পত্তি? কা পটিপত্তি? কতি অত্থৰসে পটিচ্চ ভগৰতা ভিক্খুনীনং পঞ্চমং পারাজিকং পঞ্ঞত্তং? কা সিক্খন্তি? কা সিক্খিতসিক্খা? কত্থ ঠিতং? কা ধারেন্তি? কস্স ৰচনং? কেনাভতন্তি?

২০২. যং তেন ভগৰতা জানতা পস্সতা অরহতা সম্মাসম্বুদ্ধেন ভিক্খুনীনং পঞ্চমং পারাজিকং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? সুন্দরীনন্দং ভিক্খুনিং আরব্ভ. কিস্মিং ৰত্থুস্মিন্তি? সুন্দরীনন্দা ভিক্খুনী অৰস্সুতা অৰস্সুতস্স পুরিসপুগ্গলস্স কাযসংসগ্গং সাদিযি, তস্মিং ৰত্থুস্মিং. অত্থি তত্থ পঞ্ঞত্তি অনুপঞ্ঞত্তি অনুপ্পন্নপঞ্ঞত্তীতি? একা পঞ্ঞত্তি. অনুপঞ্ঞত্তি অনুপ্পন্নপঞ্ঞত্তি তস্মিং নত্থি. সব্বত্থপঞ্ঞত্তি, পদেসপঞ্ঞত্তীতি? সব্বত্থপঞ্ঞত্তি. সাধারণপঞ্ঞত্তি, অসাধারণপঞ্ঞত্তীতি? অসাধারণপঞ্ঞত্তি. একতোপঞ্ঞত্তি, উভতোপঞ্ঞত্তীতি? একতোপঞ্ঞত্তি. চতুন্নং পাতিমোক্খুদ্দেসানং কত্থোগধং কত্থ পরিযাপন্নন্তি? নিদানোগধং নিদানপরিযাপন্নং. কতমেন উদ্দেসেন উদ্দেসং আগচ্ছতীতি? দুতিযেন উদ্দেসেন উদ্দেসং আগচ্ছতি. চতুন্নং ৰিপত্তীনং কতমা ৰিপত্তীতি? সীলৰিপত্তি. সত্তন্নং আপত্তিক্খন্ধানং কতমো আপত্তিক্খন্ধোতি? পারাজিকাপত্তিক্খন্ধো. ছন্নং আপত্তিসমুট্ঠানানং কতিহি সমুট্ঠানেহি সমুট্ঠাতীতি? একেন সমুট্ঠানে সমুট্ঠাতি – কাযতো চ চিত্ততো চ সমুট্ঠাতি, ন ৰাচতো. চতুন্নং অধিকরণানং কতমং অধিকরণন্তি? আপত্তাধিকরণং? সত্তন্নং সমথানং কতিহি সমথেহি সম্মতীতি? দ্ৰীহি সমথেহি সম্মতি – সম্মুখাৰিনযেন চ পটিঞ্ঞাতকরণেন চ. কো তত্থ ৰিনযো, কো তত্থ অভিৰিনযোতি? পঞ্ঞত্তি ৰিনযো, ৰিভত্তি অভিৰিনযো. কিং তত্থ পাতিমোক্খং, কিং তত্থ অধিপাতিমোক্খন্তি? পঞ্ঞত্তি পাতিমোক্খং, ৰিভত্তি অধিপাতিমোক্খং. কা ৰিপত্তীতি? অসংৰরো ৰিপত্তি. কা সম্পত্তীতি? সংৰরো সম্পত্তি. কা পটিপত্তীতি? ন এৰরূপং করিস্সামীতি যাৰজীৰং আপাণকোটিকং সমাদায সিক্খতি সিক্খাপদেসু. [অ. নি. ১০.৩১] কতি অত্থৰসে পটিচ্চ ভগৰতা ভিক্খুনীনং পঞ্চমং পারাজিকং পঞ্ঞত্তন্তি? দস অত্থৰসে পটিচ্চ ভগৰতা ভিক্খুনীনং পঞ্চমং পারাজিকং পঞ্ঞত্তং – সঙ্ঘসুট্ঠুতায, সঙ্ঘফাসুতায, দুম্মঙ্কূনং ভিক্খুনীনং নিগ্গহায, পেসলানং ভিক্খুনীনং ফাসুৰিহারায, দিট্ঠধম্মিকানং আসৰানং সংৰরায, সম্পরাযিকানং আসৰানং পটিঘাতায, অপ্পসন্নানং পসাদায, পসন্নানং ভিয্যোভাৰায, সদ্ধম্মট্ঠিতিযা, ৰিনযানুগ্গহায. কা সিক্খন্তীতি? সেক্খা চ পুথুজ্জনকল্যাণিকা চ সিক্খন্তি. কা সিক্খিতসিক্খাতি? অরহন্তিযো [অরহন্তা (ক.)] সিক্খিতসিক্খা. কত্থ ঠিতন্তি? সিক্খাকামাসু ঠিতং. কা ধারেন্তীতি? যাসং ৰত্ততি তা ধারেন্তি. কস্স ৰচনন্তি? ভগৰতো ৰচনং অরহতো সম্মাসম্বুদ্ধস্স. কেনাভতন্তি? পরম্পরাভতং –

উপালি দাসকো চেৰ, সোণকো সিগ্গৰো তথা;

মোগ্গলিপুত্তেন পঞ্চমা, এতে জম্বুসিরিৰ্হযে.

ততো মহিন্দো ইট্টিযো, উত্তিযো সম্বলো তথা;

ভদ্দনামো চ পণ্ডিতো.

এতে নাগা মহাপঞ্ঞা, জম্বুদীপা ইধাগতা;

ৰিনযং তে ৰাচযিংসু, পিটকং তম্বপণ্ণিযা.

নিকাযে পঞ্চ ৰাচেসুং, সত্ত চেৰ পকরণে;

ততো অরিট্ঠো মেধাৰী, তিস্সদত্তো চ পণ্ডিতো.

ৰিসারদো কাল়সুমনো, থেরো চ দীঘনামকো;

দীঘসুমনো চ পণ্ডিতো.

পুনদেৰ কাল়সুমনো, নাগত্থেরো চ বুদ্ধরক্খিতো;

তিস্সত্থেরো চ মেধাৰী, দেৰত্থেরো চ পণ্ডিতো.

পুনদেৰ সুমনো মেধাৰী, ৰিনযে চ ৰিসারদো;

বহুস্সুতো চূল়নাগো, গজোৰ দুপ্পধংসিযো.

ধম্মপালিতনামো চ, রোহণে সাধুপূজিতো;

তস্স সিস্সো মহাপঞ্ঞো, খেমনামো তিপেটকো.

দীপে তারকরাজাৰ পঞ্ঞায অতিরোচথ;

উপতিস্সো চ মেধাৰী, ফুস্সদেৰো মহাকথী.

পুনদেৰ সুমনো মেধাৰী, পুপ্ফনামো বহুস্সুতো;

মহাকথী মহাসিৰো, পিটকে সব্বত্থ কোৰিদো.

পুনদেৰ উপালি মেধাৰী, ৰিনযে চ ৰিসারদো;

মহানাগো মহাপঞ্ঞো, সদ্ধম্মৰংসকোৰিদো.

পুনদেৰ অভযো মেধাৰী, পিটকে সব্বত্থ কোৰিদো;

তিস্সত্থেরো চ মেধাৰী, ৰিনযে চ ৰিসারদো.

তস্স সিস্সো মহাপঞ্ঞো, পুপ্ফনামো বহুস্সুতো;

সাসনং অনুরক্খন্তো, জম্বুদীপে পতিট্ঠিতো.

চূল়াভযো চ মেধাৰী, ৰিনযে চ ৰিসারদো;

তিস্সত্থেরো চ মেধাৰী, সদ্ধম্মৰংসকোৰিদো.

চূল়দেৰো চ মেধাৰী, ৰিনযে চ ৰিসারদো;

সিৰত্থেরো চ মেধাৰী, ৰিনযে সব্বত্থ কোৰিদো.

এতে নাগা মহাপঞ্ঞা, ৰিনযঞ্ঞূ মগ্গকোৰিদা;

ৰিনযং দীপে পকাসেসুং, পিটকং তম্বপণ্ণিযাতি.

২০৩. যং তেন ভগৰতা জানতা পস্সতা অরহতা সম্মাসম্বুদ্ধেন ভিক্খুনীনং ছট্ঠং পারাজিকং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? থুল্লনন্দং ভিক্খুনিং আরব্ভ. কিস্মিং ৰত্থুস্মিন্তি? থুল্লনন্দা ভিক্খুনী জানং পারাজিকং ধম্মং অজ্ঝাপন্নং ভিক্খুনিং নেৰত্তনা পটিচোদেসি গণস্স আরোচেসি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – কাযতো চ ৰাচতো চ চিত্ততো চ সমুট্ঠাতি…পে….

২০৪. ভিক্খুনীনং সত্তমং পারাজিকং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? থুল্লনন্দং ভিক্খুনিং আরব্ভ. কিস্মিং ৰত্থুস্মিন্তি? থুল্লনন্দা ভিক্খুনী সমগ্গেন সঙ্ঘেন উক্খিত্তং অরিট্ঠং ভিক্খুং গদ্ধবাধিপুব্বং অনুৰত্তি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – ধুরনিক্খেপে…পে….

২০৫. ভিক্খুনীনং অট্ঠমং পারাজিকং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? ছব্বগ্গিযা ভিক্খুনিযো আরব্ভ. কিস্মিং ৰত্থুস্মিন্তি? ছব্বগ্গিযা ভিক্খুনিযো অট্ঠমং ৰত্থুং পরিপূরেসুং, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – ধুরনিক্খেপে…পে….

অট্ঠ পারাজিকা নিট্ঠিতা.

তস্সুদ্দানং –

মেথুনাদিন্নাদানঞ্চ, মনুস্সৰিগ্গহুত্তরি;

কাযসংসগ্গং ছাদেতি, উক্খিত্তা অট্ঠ ৰত্থুকা;

পঞ্ঞাপেসি মহাৰীরো, ছেজ্জৰত্থূ অসংসযাতি.

২. সঙ্ঘাদিসেসকণ্ডং

২০৬. যং তেন ভগৰতা জানতা পস্সতা অরহতা সম্মাসম্বুদ্ধেন উস্সযৰাদিকায ভিক্খুনিযা অড্ডং করোন্তিযা সঙ্ঘাদিসেসো কত্থ পঞ্ঞত্তো? কং আরব্ভ? কিস্মিং ৰত্থুস্মিং…পে… কেনাভতন্তি?

২০৭. যং তেন ভগৰতা জানতা পস্সতা অরহতা সম্মাসম্বুদ্ধেন উস্সযৰাদিকায ভিক্খুনিযা অড্ডং করোন্তিযা সঙ্ঘাদিসেসো কত্থ পঞ্ঞত্তোতি? সাৰত্থিযং পঞ্ঞত্তো. কং আরব্ভাতি? থুল্লনন্দং ভিক্খুনিং আরব্ভ. কিস্মিং ৰত্থুস্মিন্তি? থুল্লনন্দা ভিক্খুনী উস্সযৰাদিকা ৰিহরি, তস্মিং ৰত্থুস্মিং. অত্থি তত্থ পঞ্ঞত্তি, অনুপঞ্ঞত্তি, অনুপ্পন্নপঞ্ঞত্তীতি? একা পঞ্ঞত্তি. অনুপঞ্ঞত্তি অনুপ্পন্নপঞ্ঞত্তি তস্মিং নত্থি. সব্বত্থপঞ্ঞত্তি, পদেসপঞ্ঞত্তীতি? সব্বত্থপঞ্ঞত্তি. সাধারণপঞ্ঞত্তি, অসাধারণপঞ্ঞত্তীতি? অসাধারণপঞ্ঞত্তি. একতোপঞ্ঞত্তি, উভতোপঞ্ঞত্তীতি? একতোপঞ্ঞত্তি. চতুন্নং পাতিমোক্খুদ্দেসানং কত্থোগধং কত্থ পরিযাপন্নন্তি? নিদানোগধং নিদানপরিযাপন্নং. কতমেন উদ্দেসেন উদ্দেসং আগচ্ছতীতি? ততিযেন উদ্দেসেন উদ্দেসং আগচ্ছতি. চতুন্নং ৰিপত্তীনং কতমা ৰিপত্তীতি? সীলৰিপত্তি. সত্তন্নং আপত্তিক্খন্ধানং কতমো আপত্তিক্খন্ধোতি? সঙ্ঘাদিসেসাপত্তিক্খন্ধো. ছন্নং আপত্তিসমুট্ঠানানং কতিহি সমুট্ঠানেহি সমুট্ঠাতীতি? দ্ৰীহি সমুট্ঠানেহি সমুট্ঠাতি – সিযা কাযতো চ ৰাচতো চ সমুট্ঠাতি, ন চিত্ততো; সিযা কাযতো চ ৰাচতো চ চিত্ততো চ সমুট্ঠাতি…পে… কেনাভতন্তি? পরম্পরাভতং –

উপালি দাসকো চেৰ, সোণকো সিগ্গৰো তথা;

মোগ্গলিপুত্তেন পঞ্চমা, এতে জম্বুসিরিৰ্হযে. …পে…;

এতে নাগা মহাপঞ্ঞা, ৰিনযঞ্ঞূ মগ্গকোৰিদা;

ৰিনযং দীপে পকাসেসুং, পিটকং তম্বপণ্ণিযাতি.

২০৮. চোরিং ৰুট্ঠাপেন্তিযা সঙ্ঘাদিসেসো কত্থ পঞ্ঞত্তোতি? সাৰত্থিযং পঞ্ঞত্তো. কং আরব্ভাতি? থুল্লনন্দং ভিক্খুনিং আরব্ভ. কিস্মিং ৰত্থুস্মিন্তি? থুল্লনন্দা ভিক্খুনী চোরিং ৰুট্ঠাপেসি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – সিযা ৰাচতো চ চিত্ততো চ সমুট্ঠাতি, ন কাযতো; সিযা কাযতো চ ৰাচতো চ চিত্ততো চ সমুট্ঠাতি…পে….

২০৯. একায গামন্তরং গচ্ছন্তিযা সঙ্ঘাদিসেসো কত্থ পঞ্ঞত্তোতি? সাৰত্থিযং পঞ্ঞত্তো. কং আরব্ভাতি? অঞ্ঞতরং ভিক্খুনিং আরব্ভ. কিস্মিং ৰত্থুস্মিন্তি? অঞ্ঞতরা ভিক্খুনী একা গামন্তরং গচ্ছি, তস্মিং ৰত্থুস্মিং. একা পঞ্ঞত্তি, তিস্সো অনুপঞ্ঞত্তিযো. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – পঠমপারাজিকে…পে….

২১০. সমগ্গেন সঙ্ঘেন উক্খিত্তং ভিক্খুনিং ধম্মেন ৰিনযেন সত্থুসাসনেন অনপলোকেত্ৰা কারকসঙ্ঘং অনঞ্ঞায গণস্স ছন্দং ওসারেন্তিযা সঙ্ঘাদিসেসো কত্থ পঞ্ঞত্তোতি? সাৰত্থিযং পঞ্ঞত্তো. কং আরব্ভাতি? থুল্লনন্দং ভিক্খুনিং আরব্ভ. কিস্মিং ৰত্থুস্মিন্তি? থুল্লনন্দা ভিক্খুনী সমগ্গেন সঙ্ঘেন উক্খিত্তং ভিক্খুনিং ধম্মেন ৰিনযেন সত্থুসাসনেন অনপলোকেত্ৰা কারকসঙ্ঘং অনঞ্ঞায গণস্স ছন্দং ওসারেসি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – ধুরনিক্খেপে…পে….

২১১. অৰস্সুতায ভিক্খুনিযা অৰস্সুতস্স পুরিসপুগ্গলস্স হত্থতো খাদনীযং ৰা ভোজনীযং ৰা সহত্থা পটিগ্গহেত্ৰা ভুঞ্জন্তিযা সঙ্ঘাদিসেসো কত্থ পঞ্ঞত্তোতি? সাৰত্থিযং পঞ্ঞত্তো. কং আরব্ভাতি? সুন্দরীনন্দং ভিক্খুনিং আরব্ভ. কিস্মিং ৰত্থুস্মিন্তি? সুন্দরীনন্দা ভিক্খুনী অৰস্সুতা অৰস্সুতস্স পুরিসপুগ্গলস্স হত্থতো আমিসং পটিগ্গহেসি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – পঠমপারাজিকে…পে….

২১২. ‘‘কিং তে, অয্যে, এসো পুরিসপুগ্গলো করিস্সতি অৰস্সুতো ৰা অনৰস্সুতো ৰা, যতো ত্ৰং অনৰস্সুতা! ইঙ্ঘ, অয্যে, যং তে এসো পুরিসপুগ্গলো দেতি খাদনীযং ৰা ভোজনীযং ৰা, তং ত্ৰং সহত্থা পটিগ্গহেত্ৰা খাদ ৰা ভুঞ্জ ৰা’’তি উয্যোজেন্তিযা সঙ্ঘাদিসেসো কত্থ পঞ্ঞত্তোতি? সাৰত্থিযং পঞ্ঞত্তো. কং অরব্ভাতি? অঞ্ঞতরং ভিক্খুনিং আরব্ভ. কিস্মিং ৰত্থুস্মিন্তি? অঞ্ঞতরা ভিক্খুনী –‘‘কিং তে, অয্যে, এসো পুরিসপুগ্গলো করিস্সতি অৰস্সুতো ৰা অনৰস্সুতো ৰা, যতো ত্ৰং অনৰস্সুতা! ইঙ্ঘ, অয্যে, যং তে এসো পুরিসপুগ্গলো দেতি খাদনীযং ৰা ভোজনীযং ৰা, তং ত্ৰং সহত্থা পটিগ্গহেত্ৰা খাদ ৰা ভুঞ্জ ৰা’’তি উয্যোজেসি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং তীহি সমুট্ঠানেহি সমুট্ঠাতি…পে….

২১৩. কুপিতায অনত্তমনায ভিক্খুনিযা যাৰততিযং সমনুভাসনায ন পটিনিস্সজ্জন্তিযা সঙ্ঘাদিসেসো কত্থ পঞ্ঞত্তোতি? সাৰত্থিযং পঞ্ঞত্তো. কং আরব্ভাতি? চণ্ডকাল়িং ভিক্খুনিং আরব্ভ. কিস্মিং ৰত্থুস্মিন্তি? চণ্ডকাল়ী ভিক্খুনী কুপিতা অনত্তমনা এৰং অৰচ – ‘‘বুদ্ধং পচ্চাচিক্খামি, ধম্মং পচ্চাচিক্খামি, সঙ্ঘং পচ্চাচিক্খামি, সিক্খং পচ্চাচিক্খামী’’তি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – ধুরনিক্খেপে…পে….

২১৪. কিস্মিঞ্চিদেৰ অধিকরণে পচ্চাকতায ভিক্খুনিযা যাৰততিযং সমনুভাসনায ন পটিনিস্সজ্জন্তিযা সঙ্ঘাদিসেসো কত্থ পঞ্ঞত্তোতি? সাৰত্থিযং পঞ্ঞত্তো. কং আরব্ভাতি? চণ্ডকাল়িং ভিক্খুনিং আরব্ভ. কিস্মিং ৰত্থুস্মিন্তি? চণ্ডকাল়ী ভিক্খুনী কিস্মিঞ্চিদেৰ অধিকরণে পচ্চাকতা কুপিতা অনত্তমনা এৰং অৰচ – ‘‘ছন্দগামিনিযো চ ভিক্খুনিযো, দোসগামিনিযো চ ভিক্খুনিযো, মোহগামিনিযো চ ভিক্খুনিযো, ভযগামিনিযো চ ভিক্খুনিযো’’তি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – ধুরনিক্খেপে…পে….

২১৫. সংসট্ঠানং ভিক্খুনীনং যাৰততিযং সমনুভাসনায ন পটিনিস্সজ্জন্তীনং সঙ্ঘাদিসেসো কত্থ পঞ্ঞত্তোতি? সাৰত্থিযং পঞ্ঞত্তো. কং আরব্ভাতি? সম্বহুলা ভিক্খুনিযো আরব্ভ. কিস্মিং ৰত্থুস্মিন্তি? সম্বহুলা ভিক্খুনিযো সংসট্ঠা ৰিহরিংসু, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – ধুরনিক্খেপে…পে….

২১৬. ‘‘সংসট্ঠাৰ, অয্যে, তুম্হে ৰিহরথ. মা তুম্হে নানা ৰিহরিত্থা’’তি উয্যোজেন্তিযা যাৰততিযং সমনুভাসনায ন পটিনিস্সজ্জন্তিযা সঙ্ঘাদিসেসো কত্থ পঞ্ঞত্তোতি? সাৰত্থিযং পঞ্ঞত্তো. কং আরব্ভাতি? থুল্লনন্দং ভিক্খুনিং আরব্ভ. কিস্মিং ৰত্থুস্মিন্তি? থুল্লনন্দা ভিক্খুনী – ‘‘সংসট্ঠাৰ অয্যে, তুম্হে ৰিহরথ, মা তুম্হে নানা ৰিহরিত্থা’’তি উয্যোজেসি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – ধুরনিক্খেপে…পে….

দস সঙ্ঘাদিসেসা নিট্ঠিতা.

তস্সুদ্দানং –

উস্সযচোরি গামন্তং, উক্খিত্তং খাদনেন চ;

কিং তে কুপিতা কিস্মিঞ্চি, সংসট্ঠা ঞাযতে দসাতি.

৩. নিস্সগ্গিযকণ্ডং

২১৭. যং তেন ভগৰতা জানতা পস্সতা অরহতা সম্মাসম্বুদ্ধেন পত্তসন্নিচযং করোন্তিযা নিস্সগ্গিযং পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? ছব্বগ্গিযা ভিক্খুনিযো আরব্ভ. কিস্মিং ৰত্থুস্মিন্তি? ছব্বগ্গিযা ভিক্খুনিযো পত্তসন্নিচযং অকংসু, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – কথিনকে…পে….

অকালচীৰরং ‘‘কালচীৰর’’ন্তি অধিট্ঠহিত্ৰা ভাজাপেন্তিযা নিস্সগ্গিযং পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? থুল্লনন্দং ভিক্খুনিং আরব্ভ. কিস্মিং ৰত্থুস্মিন্তি? থুল্লনন্দা ভিক্খুনী অকালচীৰরং ‘‘কালচীৰর’’ন্তি অধিট্ঠহিত্ৰা ভাজাপেসি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং তীহি সমুট্ঠানেহি সমুট্ঠাতি…পে….

ভিক্খুনিযা সদ্ধিং চীৰরং পরিৰত্তেত্ৰা অচ্ছিন্দন্তিযা নিস্সগ্গিযং পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? থুল্লনন্দং ভিক্খুনিং আরব্ভ. কিস্মিং ৰত্থুস্মিন্তি? থুল্লনন্দা ভিক্খুনী ভিক্খুনিযা সদ্ধিং চীৰরং পরিৰত্তেত্ৰা অচ্ছিন্দি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং তীহি সমুট্ঠানেহি সমুট্ঠাতি…পে….

অঞ্ঞং ৰিঞ্ঞাপেত্ৰা অঞ্ঞং ৰিঞ্ঞাপেন্তিযা নিস্সগ্গিযং পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? থুল্লনন্দং ভিক্খুনিং আরব্ভ. কিস্মিং ৰত্থুস্মিন্তি? থুল্লনন্দা ভিক্খুনী অঞ্ঞং ৰিঞ্ঞাপেত্ৰা অঞ্ঞং ৰিঞ্ঞাপেসি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং ছহি সমুট্ঠানেহি সমুট্ঠাতি…পে….

অঞ্ঞং চেতাপেত্ৰা অঞ্ঞং চেতাপেন্তিযা নিস্সগ্গিযং পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? থুল্লনন্দং ভিক্খুনিং আরব্ভ. কিস্মিং ৰত্থুস্মিন্তি? থুল্লনন্দা ভিক্খুনী অঞ্ঞং চেতাপেত্ৰা অঞ্ঞং চেতাপেসি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং ছহি সমুট্ঠানেহি সমুট্ঠাতি…পে….

অঞ্ঞদত্থিকেন পরিক্খারেন অঞ্ঞুদ্দিসিকেন সঙ্ঘিকেন অঞ্ঞং চেতাপেন্তিযা নিস্সগ্গিযং পাচিত্তিযং কত্থং পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? সম্বহুলা ভিক্খুনিযো আরব্ভ. কিস্মিং ৰত্থুস্মিন্তি? সম্বহুলা ভিক্খুনিযো অঞ্ঞদত্থিকেন পরিক্খারেন অঞ্ঞুদ্দিসিকেন সঙ্ঘিকেন অঞ্ঞং চেতাপেসুং, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং ছহি সমুট্ঠানেহি সমুট্ঠাতি…পে….

অঞ্ঞদত্থিকেন পরিক্খারেন অঞ্ঞুদ্দিসিকেন সঙ্ঘিকেন সঞ্ঞাচিকেন অঞ্ঞং চেতাপেন্তিযা নিস্সগ্গিযং পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? সম্বহুলা ভিক্খুনিযো আরব্ভ. কিস্মিং ৰত্থুস্মিন্তি? সম্বহুলা ভিক্খুনিযো অঞ্ঞদত্থিকেন পরিক্খারেন অঞ্ঞুদ্দিসিকেন সঙ্ঘিকেন সঞ্ঞাচিকেন অঞ্ঞং চেতাপেসুং, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং ছহি সমুট্ঠানেহি সমুট্ঠাতি…পে….

অঞ্ঞদত্থিকেন পরিক্খারেন অঞ্ঞুদ্দিসিকেন মহাজনিকেন অঞ্ঞং চেতাপেন্তিযা নিস্সগ্গিযং পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? সম্বহুলা ভিক্খুনিযো আরব্ভ. কিস্মিং ৰত্থুস্মিন্তি? সম্বহুলা ভিক্খুনিযো অঞ্ঞদত্থিকেন পরিক্খারেন অঞ্ঞুদ্দিসিকেন মহাজনিকেন অঞ্ঞং চেতাপেসুং, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং ছহি সমুট্ঠানেহি সমুট্ঠাতি…পে….

অঞ্ঞদত্থিকেন পরিক্খারেন অঞ্ঞুদ্দিসিকেন মহাজনিকেন সঞ্ঞাচিকেন অঞ্ঞং চেতাপেন্তিযা নিস্সগ্গিযং পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? সম্বহুলা ভিক্খুনিযো আরব্ভ. কিস্মিং ৰত্থুস্মিন্তি? সম্বহুলা ভিক্খুনিযো অঞ্ঞদত্থিকেন পরিক্খারেন অঞ্ঞুদ্দিসিকেন মহাজনিকেন সঞ্ঞাচিকেন অঞ্ঞং চেতাপেসুং, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং ছহি সমুট্ঠানেহি সমুট্ঠাতি…পে….

অঞ্ঞদত্থিকেন পরিক্খারেন অঞ্ঞুদ্দিসিকেন পুগ্গলিকেন সঞ্ঞাচিকেন অঞ্ঞং চেতাপেন্তিযা নিস্সগ্গিযং পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? থুল্লনন্দং ভিক্খুনিং আরব্ভ. কিস্মিং ৰত্থুস্মিন্তি? থুল্লনন্দা ভিক্খুনী অঞ্ঞদত্থিকেন পরিক্খারেন অঞ্ঞুদ্দিসিকেন পুগ্গলিকেন সঞ্ঞাচিকেন অঞ্ঞং চেতাপেসি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং ছহি সমুট্ঠানেহি সমুট্ঠাতি…পে….

অতিরেকচতুক্কংসপরমং গরুপাৰুরণং চেতাপেন্তিযা নিস্সগ্গিযং পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? থুল্লনন্দং ভিক্খুনিং আরব্ভ. কিস্মিং ৰত্থুস্মিন্তি? থুল্লনন্দা ভিক্খুনী রাজানং কম্বলং ৰিঞ্ঞাপেসি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং ছহি সমুট্ঠানেহি সমুট্ঠাতি…পে….

অতিরেকঅড্ঢতেয্যকংসপরমং লহুপাৰুরণং চেতাপেন্তিযা নিস্সগ্গিযং পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? থুল্লনন্দং ভিক্খুনিং আরব্ভ. কিস্মিং ৰত্থুস্মিন্তি? থুল্লনন্দা ভিক্খুনী রাজানং খোমং ৰিঞ্ঞাপেসি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং ছহি সমুট্ঠানেহি সমুট্ঠাতি …পে….

দ্ৰাদস নিস্সগ্গিযা পাচিত্তিযা নিট্ঠিতা.

তস্সুদ্দানং –

পত্তং অকালং কালঞ্চ, পরিৰত্তে চ ৰিঞ্ঞাপে;

চেতাপেত্ৰা অঞ্ঞদত্থি, সঙ্ঘিকঞ্চ মহাজনিকং;

সঞ্ঞাচিকা পুগ্গলিকা, চতুক্কংসড্ঢতেয্যকাতি.

৪. পাচিত্তিযকণ্ডং

১. লসুণৰগ্গো

২১৮. যং তেন ভগৰতা জানতা পস্সতা অরহতা সম্মাসম্বুদ্ধেন লসুণং খাদন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? থুল্লনন্দং ভিক্খুনিং আরব্ভ. কিস্মিং ৰত্থুস্মিন্তি? থুল্লনন্দা ভিক্খুনী ন মত্তং জানিত্ৰা লসুণং হরাপেসি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি এল়কলোমকে…পে….

সম্বাধে লোমং সংহরাপেন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? ছব্বগ্গিযা ভিক্খুনিযো আরব্ভ. কিস্মিং ৰত্থুস্মিন্তি? ছব্বগ্গিযা ভিক্খুনিযো সম্বাধে লোমং সংহরাপেসুং, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং চতূহি সমুট্ঠানেহি সমুট্ঠাতি…পে….

তলঘাতকে পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? দ্ৰে ভিক্খুনিযো আরব্ভ. কিস্মিং ৰত্থুস্মিন্তি? দ্ৰে ভিক্খুনিযো তলঘাতকং অকংসু, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – পঠমপারাজিকে…পে….

জতুমট্ঠকে পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? অঞ্ঞতরং ভিক্খুনিং আরব্ভ. কিস্মিং ৰত্থুস্মিন্তি? অঞ্ঞতরা ভিক্খুনী জতুমট্ঠকং আদিযি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – পঠমপারাজিকে…পে….

অতিরেকদ্ৰঙ্গুলপব্বপরমং উদকসুদ্ধিকং আদিযন্তিযা পাচিত্তিযং কত্থ পঞ্ঞত্তন্তি? সক্কেসু পঞ্ঞত্তং. কং আরব্ভাতি? অঞ্ঞতরং ভিক্খুনিং আরব্ভ. কিস্মিং ৰত্থুস্মিন্তি? অঞ্ঞতরা ভিক্খুনী অতিগম্ভীরং উদকসুদ্ধিকং আদিযি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – পঠমপারাজিকে…পে….

ভিক্খুস্স ভুঞ্জন্তস্স পানীযেন ৰা ৰিধূপনেন ৰা উপতিট্ঠন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? অঞ্ঞতরং ভিক্খুনিং আরব্ভ. কিস্মিং ৰত্থুস্মিন্তি? অঞ্ঞতরা ভিক্খুনী ভিক্খুস্স ভুঞ্জন্তস্স পানীযেন চ ৰিধূপনেন চ উপতিট্ঠি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – এল়কলোমকে…পে….

আমকধঞ্ঞং ৰিঞ্ঞাপেত্ৰা ভুঞ্জন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? সম্বহুলা ভিক্খুনিযো আরব্ভ. কিস্মিং ৰত্থুস্মিন্তি? সম্বহুলা ভিক্খুনিযো আমকধঞ্ঞং ৰিঞ্ঞাপেত্ৰা ভুঞ্জিংসু, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং চতূহি সমুট্ঠানেহি সমুট্ঠাতি…পে….

উচ্চারং ৰা পস্সাৰং ৰা সঙ্কারং ৰা ৰিঘাসং ৰা তিরোকুট্টে [তিরোকুড্ডে (সী. স্যা.)] ছড্ডেন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? অঞ্ঞতরং ভিক্খুনিং আরব্ভ. কিস্মিং ৰত্থুস্মিন্তি? অঞ্ঞতরা ভিক্খুনী উচ্চারং [উচ্চারম্পি পস্সাৰম্পি সঙ্কারম্পি ৰিঘাসম্পি (ক.)] তিরোকুট্টে ছড্ডেসি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং ছহি সমুট্ঠানেহি সমুট্ঠাতি…পে….

উচ্চারং ৰা পস্সাৰং ৰা সঙ্কারং ৰা ৰিঘাসং ৰা হরিতে ছড্ডেন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? সম্বহুলা ভিক্খুনিযো আরব্ভ. কিস্মিং ৰত্থুস্মিন্তি? সম্বহুলা ভিক্খুনিযো উচ্চারম্পি পস্সাৰম্পি সঙ্কারম্পি ৰিঘাসম্পি হরিতে ছড্ডেসুং, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং ছহি সমুট্ঠানেহি সমুট্ঠাতি…পে….

নচ্চং ৰা গীতং ৰা ৰাদিতং ৰা দস্সনায গচ্ছন্তিযা পাচিত্তিযং কত্থ পঞ্ঞত্তন্তি? রাজগহে পঞ্ঞত্তং. কং আরব্ভাতি? ছব্বগ্গিযা ভিক্খুনিযো আরব্ভ. কিস্মিং ৰত্থুস্মিন্তি? ছব্বগ্গিযা ভিক্খুনিযো নচ্চম্পি গীতম্পি ৰাদিতম্পি দস্সনায অগমংসু, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – এল়কলোমকে…পে….

লসুণৰগ্গো পঠমো.

২. রত্তন্ধকারৰগ্গো

২১৯. রত্তন্ধকারে অপ্পদীপে পুরিসেন সদ্ধিং একেনেকায সন্তিট্ঠন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? অঞ্ঞতরং ভিক্খুনিং আরব্ভ. কিস্মিং ৰত্থুস্মিন্তি? অঞ্ঞতরা ভিক্খুনী রত্তন্ধকারে অপ্পদীপে পুরিসেন সদ্ধিং একেনেকা সন্তিট্ঠি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – থেয্যসত্থকে…পে….

পটিচ্ছন্নে ওকাসে পুরিসেন সদ্ধিং একেনেকায সন্তিট্ঠন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? অঞ্ঞতরং ভিক্খুনিং আরব্ভ. কিস্মিং ৰত্থুস্মিন্তি? অঞ্ঞতরা ভিক্খুনী পটিচ্ছন্নে ওকাসে পুরিসেন সদ্ধিং একেনেকা সন্তিট্ঠি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – থেয্যসত্থকে…পে….

অজ্ঝোকাসে পুরিসেন সদ্ধিং একেনেকায সন্তিট্ঠন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? অঞ্ঞতরং ভিক্খুনিং আরব্ভ. কিস্মিং ৰত্থুস্মিন্তি? অঞ্ঞতরা ভিক্খুনী অজ্ঝোকাসে পুরিসেন সদ্ধিং একেনেকা সন্তিট্ঠি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – থেয্যসত্থকে…পে….

রথিকা ৰা [রথিযায ৰা (ক.)] ব্যূহে ৰা সিঙ্ঘাটকে ৰা পুরিসেন সদ্ধিং একেনেকায সন্তিট্ঠন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? থুল্লনন্দং ভিক্খুনিং আরব্ভ. কিস্মিং ৰত্থুস্মিন্তি? থুল্লনন্দা ভিক্খুনী রথিকাযপি ব্যূহেপি সিঙ্ঘাটকেপি পুরিসেন সদ্ধিং একেনেকা সন্তিট্ঠি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – থেয্যসত্থকে…পে….

পুরেভত্তং কুলানি উপসঙ্কমিত্ৰা আসনে নিসীদিত্ৰা সামিকে অনাপুচ্ছা পক্কমন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? অঞ্ঞতরং ভিক্খুনিং আরব্ভ. কিস্মিং ৰত্থুস্মিন্তি? অঞ্ঞতরা ভিক্খুনী পুরেভত্তং কুলানি উপসঙ্কমিত্ৰা আসনে নিসীদিত্ৰা সামিকে অনাপুচ্ছা পক্কামি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – কথিনকে…পে….

পচ্ছাভত্তং কুলানি উপসঙ্কমিত্ৰা সামিকে অনাপুচ্ছা আসনে অভিনিসীদন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? থুল্লনন্দং ভিক্খুনিং আরব্ভ. কিস্মিং ৰত্থুস্মিন্তি? থুল্লনন্দা ভিক্খুনী পচ্ছাভত্তং কুলানি উপসঙ্কমিত্ৰা সামিকে অনাপুচ্ছা আসনে অভিনিসীদি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – কথিনকে…পে….

ৰিকালে কুলানি উপসঙ্কমিত্ৰা সামিকে অনাপুচ্ছা সেয্যং সন্থরিত্ৰা ৰা সন্থরাপেত্ৰা ৰা অভিনিসীদন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? সম্বহুলা ভিক্খুনিযো আরব্ভ. কিস্মিং ৰত্থুস্মিন্তি? সম্বহুলা ভিক্খুনিযো ৰিকালে কুলানি উপসঙ্কমিত্ৰা সামিকে অনাপুচ্ছা সেয্যং সন্থরিত্ৰা অভিনিসীদিংসু, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – কথিনকে…পে….

দুগ্গহিতেন দূপধারিতেন পরং উজ্ঝাপেন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? অঞ্ঞতরং ভিক্খুনিং আরব্ভ. কিস্মিং ৰত্থুস্মিন্তি? অঞ্ঞতরা ভিক্খুনী দুগ্গহিতেন দূপধারিতেন পরং উজ্ঝাপেসি, তস্মিং ৰত্থুস্মিং. একা পঞ্ঞত্তি ছন্নং আপত্তিসমুট্ঠানানং তীহি সমুট্ঠানেহি সমুট্ঠাতি…পে….

অত্তানং ৰা পরং ৰা নিরযেন ৰা ব্রহ্মচরিযেন ৰা অভিসপন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? চণ্ডকাল়িং ভিক্খুনিং আরব্ভ. কিস্মিং ৰত্থুস্মিন্তি? চণ্ডকাল়ী ভিক্খুনী অত্তানম্পি পরম্পি নিরযেনপি ব্রহ্মচরিযেনপি অভিসপি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং তীহি সমুট্ঠানেহি সমুট্ঠাতি…পে….

অত্তানং ৰধিত্ৰা ৰধিত্ৰা রোদন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? চণ্ডকাল়িং ভিক্খুনিং আরব্ভ. কিস্মিং ৰত্থুস্মিন্তি? চণ্ডকাল়ী ভিক্খুনী অত্তানং ৰধিত্ৰা ৰধিত্ৰা রোদি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – ধুরনিক্খেপে…পে….

রত্তন্ধকারৰগ্গো দুতিযো.

৩. নহানৰগ্গো

২২০. নগ্গায নহাযন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? সম্বহুলা ভিক্খুনিযো আরব্ভ. কিস্মিং ৰত্থুস্মিন্তি? সম্বহুলা ভিক্খুনিযো নগ্গা নহাযিংসু, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – এল়কলোমকে…পে….

পমাণাতিক্কন্তং উদকসাটিকং কারাপেন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? ছব্বগ্গিযা ভিক্খুনিযো আরব্ভ. কিস্মিং ৰত্থুস্মিন্তি? ছব্বগ্গিযা ভিক্খুনিযো অপ্পমাণিকাযো উদকসাটিকাযো ধারেসুং, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং ছহি সমুট্ঠানেহি সমুট্ঠাতি…পে….

ভিক্খুনিযা চীৰরং ৰিসিব্বেত্ৰা ৰা ৰিসিব্বাপেত্ৰা ৰা নেৰ সিব্বেন্তিযা ন সিব্বাপনায উস্সুক্কং করোন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? থুল্লনন্দং ভিক্খুনিং আরব্ভ. কিস্মিং ৰত্থুস্মিন্তি? থুল্লনন্দা ভিক্খুনী ভিক্খুনিযা চীৰরং ৰিসিব্বাপেত্ৰা নেৰ সিব্বেসি ন সিব্বাপনায উস্সুক্কং অকাসি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – ধুরনিক্খেপে…পে….

পঞ্চাহিকং সঙ্ঘাটিচারং অতিক্কামেন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? সম্বহুলা ভিক্খুনিযো আরব্ভ. কিস্মিং ৰত্থুস্মিন্তি? সম্বহুলা ভিক্খুনিযো ভিক্খুনীনং হত্থে চীৰরং নিক্খিপিত্ৰা সন্তরুত্তরেন জনপদচারিকং পক্কমিংসু, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি কথিনকে…পে….

চীৰরসঙ্কমনীযং ধারেন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? অঞ্ঞতরং ভিক্খুনিং আরব্ভ. কিস্মিং ৰত্থুস্মিন্তি? অঞ্ঞতরা ভিক্খুনী অঞ্ঞতরায ভিক্খুনিযা চীৰরং অনাপুচ্ছা পারুপি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – কথিনকে…পে….

গণস্স চীৰরলাভং অন্তরাযং করোন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? থুল্লনন্দং ভিক্খুনিং আরব্ভ. কিস্মিং ৰত্থুস্মিন্তি? থুল্লনন্দা ভিক্খুনী গণস্স চীৰরলাভং অন্তরাযং অকাসি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং তীহি সমুট্ঠানেহি সমুট্ঠাতি…পে….

ধম্মিকং চীৰরৰিভঙ্গং পটিবাহন্তিযা পাচিত্তিযং কত্থ পঞ্ঞত্তন্তি. সাৰত্থিযং পঞ্ঞত্তং. কং আরব্ভাতি? থুল্লনন্দং ভিক্খুনিং আরব্ভ. কিস্মিং ৰত্থুস্মিন্তি? থুল্লনন্দা ভিক্খুনী ধম্মিকং চীৰরৰিভঙ্গং পটিবাহি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং তীহি সমুট্ঠানেহি সমুট্ঠাতি…পে….

অগারিকস্স ৰা পরিব্বাজকস্স ৰা পরিব্বাজিকায ৰা সমণচীৰরং দেন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? থুল্লনন্দং ভিক্খুনিং আরব্ভ. কিস্মিং ৰত্থুস্মিন্তি? থুল্লনন্দা ভিক্খুনী অগারিকস্স সমণচীৰরং অদাসি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং ছহি সমুট্ঠানেহি সমুট্ঠাতি…পে….

দুব্বলচীৰরপচ্চাসায চীৰরকালসমযং অতিক্কামেন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? থুল্লনন্দং ভিক্খুনিং আরব্ভ. কিস্মিং ৰত্থুস্মিন্তি? থুল্লনন্দা ভিক্খুনী দুব্বলচীৰরপচ্চাসায চীৰরকালসমযং অতিক্কামেসি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং তীহি সমুট্ঠানেহি সমুট্ঠাতি…পে….

ধম্মিকং কথিনুদ্ধারং পটিবাহন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? থুল্লনন্দং ভিক্খুনিং আরব্ভ. কিস্মিং ৰত্থুস্মিন্তি? থুল্লনন্দা ভিক্খুনী ধম্মিকং কথিনুদ্ধারং পটিবাহি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং তীহি সমুট্ঠানেহি সমুট্ঠাতি…পে….

নহানৰগ্গো ততিযো.

৪. তুৰট্টৰগ্গো

২২১. দ্ৰিন্নং ভিক্খুনীনং একমঞ্চে তুৰট্টেন্তীনং পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? সম্বহুলা ভিক্খুনিযো আরব্ভ. কিস্মিং ৰত্থুস্মিন্তি? সম্বহুলা ভিক্খুনিযো দ্ৰে একমঞ্চে তুৰট্টেসুং, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – এল়কলোমকে…পে….

দ্ৰিন্নং ভিক্খুনীনং একত্থরণপাৰুরণে তুৰট্টেন্তীনং পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? সম্বহুলা ভিক্খুনিযো আরব্ভ. কিস্মিং ৰত্থুস্মিন্তি? সম্বহুলা ভিক্খুনিযো দ্ৰে একত্থরণপাৰুরণা তুৰট্টেসুং, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – এল়কলোমকে…পে….

ভিক্খুনিযা সঞ্চিচ্চ অফাসুং করোন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? থুল্লনন্দং ভিক্খুনিং আরব্ভ. কিস্মিং ৰত্থুস্মিন্তি? থুল্লনন্দা ভিক্খুনী ভিক্খুনিযা সঞ্চিচ্চ অফাসুং অকাসি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং তীহি সমুট্ঠানেহি সমুট্ঠাতি…পে….

দুক্খিতং সহজীৰিনিং নেৰ উপট্ঠেন্তিযা ন উপট্ঠাপনায উস্সুক্কং করোন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? থুল্লনন্দং ভিক্খুনিং আরব্ভ. কিস্মিং ৰত্থুস্মিন্তি? থুল্লনন্দা ভিক্খুনী দুক্খিতং সহজীৰিনিং নেৰ উপট্ঠেসি ন উপট্ঠাপনায উস্সুক্কং অকাসি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – ধুরনিক্খেপে…পে….

ভিক্খুনিযা উপস্সযং দত্ৰা কুপিতায অনত্তমনায নিক্কড্ঢন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? থুল্লনন্দং ভিক্খুনিং আরব্ভ. কিস্মিং ৰত্থুস্মিন্তি? থুল্লনন্দা ভিক্খুনী ভিক্খুনিযা উপস্সযং দত্ৰা কুপিতা অনত্তমনা নিক্কড্ঢি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং তীহি সমুট্ঠানেহি সমুট্ঠাতি…পে….

সংসট্ঠায ভিক্খুনিযা যাৰততিযং সমনুভাসনায ন পটিনিস্সজ্জন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? চণ্ডকাল়িং ভিক্খুনিং আরব্ভ. কিস্মিং ৰত্থুস্মিন্তি? চণ্ডকাল়ী ভিক্খুনী সংসট্ঠা ৰিহরি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – ধুরনিক্খেপে…পে….

অন্তোরট্ঠে সাসঙ্কসম্মতে সপ্পটিভযে অসত্থিকায চারিকং চরন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? সম্বহুলা ভিক্খুনিযো আরব্ভ. কিস্মিং ৰত্থুস্মিন্তি? সম্বহুলা ভিক্খুনিযো অন্তোরট্ঠে সাসঙ্কসম্মতে সপ্পটিভযে অসত্থিকাযো চারিকং চরিংসু, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – এল়কলোমকে…পে….

তিরোরট্ঠে সাসঙ্কসম্মতে সপ্পটিভযে অসত্থিকায চারিকং চরন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? সম্বহুলা ভিক্খুনিযো আরব্ভ. কিস্মিং ৰত্থুস্মিন্তি? সম্বহুলা ভিক্খুনিযো তিরোরট্ঠে সাসঙ্কসম্মতে সপ্পটিভযে অসত্থিকাযো চারিকং চরিংসু, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – এল়কলোমকে…পে….

অন্তোৰস্সং চারিকং চরন্তিযা পাচিত্তিযং কত্থ পঞ্ঞত্তন্তি? রাজগহে পঞ্ঞত্তং. কং আরব্ভাতি? সম্বহুলা ভিক্খুনিযো আরব্ভ. কিস্মিং ৰত্থুস্মিন্তি? সম্বহুলা ভিক্খুনিযো অন্তোৰস্সং চারিকং চরিংসু, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – এল়কলোমকে…পে….

ৰস্সংৰুট্ঠায [ৰস্সংৰুত্থায (সী. স্যা.)] ভিক্খুনিযা চারিকং ন পক্কমন্তিযা পাচিত্তিযং কত্থ পঞ্ঞত্তন্তি? রাজগহে পঞ্ঞত্তং. কং আরব্ভাতি? সম্বহুলা ভিক্খুনিযো আরব্ভ. কিস্মিং ৰত্থুস্মিন্তি? সম্বহুলা ভিক্খুনিযো ৰস্সংৰুট্ঠা চারিকং ন পক্কমিংসু, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – পঠমপারাজিকে…পে….

তুৰট্টৰগ্গো চতুত্থো.

৫. চিত্তাগারৰগ্গো

২২২. রাজাগারং ৰা চিত্তাগারং ৰা আরামং ৰা উয্যানং ৰা পোক্খরণিং ৰা দস্সনায গচ্ছন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? ছব্বগ্গিযা ভিক্খুনিযো আরব্ভ. কিস্মিং ৰত্থুস্মিন্তি? ছব্বগ্গিযা ভিক্খুনিযো রাজাগারম্পি চিত্তাগারম্পি দস্সনায অগমংসু, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – এল়কলোমকে…পে….

আসন্দিং ৰা পল্লঙ্কং ৰা পরিভুঞ্জন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? সম্বহুলা ভিক্খুনিযো আরব্ভ. কিস্মিং ৰত্থুস্মিন্তি? সম্বহুলা ভিক্খুনিযো আসন্দিম্পি পল্লঙ্কম্পি পরিভুঞ্জিংসু, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – এল়কলোমকে…পে….

সুত্তং কন্তন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? ছব্বগ্গিযা ভিক্খুনিযো আরব্ভ. কিস্মিং ৰত্থুস্মিন্তি? ছব্বগ্গিযা ভিক্খুনিযো সুত্তং কন্তিংসু, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – এল়কলোমকে…পে….

গিহিৰেয্যাৰচ্চং করোন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? সম্বহুলা ভিক্খুনিযো আরব্ভ. কিস্মিং ৰত্থুস্মিন্তি? সম্বহুলা ভিক্খুনিযো গিহিৰেয্যাৰচ্চং অকংসু, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – এল়কলোমকে…পে….

ভিক্খুনিযা ‘‘এহায্যে ইমং অধিকরণং ৰূপসমেহী’’তি ৰুচ্চমানায ‘‘সাধূ’’তি পটিস্সুণিত্ৰা নেৰ ৰূপসমেন্তিযা ন ৰূপসমায উস্সুক্কং করোন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? থুল্লনন্দং ভিক্খুনিং আরব্ভ. কিস্মিং ৰত্থুস্মিন্তি? থুল্লনন্দা ভিক্খুনী ভিক্খুনিযা – ‘‘এহায্যে, ইমং অধিকরণং ৰূপসমেহী’’তি ৰুচ্চমানা ‘‘সাধূ’’তি পটিস্সুণিত্ৰা নেৰ ৰূপসমেসি ন ৰূপসমায উস্সুক্কং অকাসি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – ধুরনিক্খেপে…পে….

অগারিকস্স ৰা পরিব্বাজকস্স ৰা পরিব্বাজিকায ৰা সহত্থা খাদনীযং ৰা ভোজনীযং ৰা দেন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? থুল্লনন্দং ভিক্খুনিং আরব্ভ. কিস্মিং ৰত্থুস্মিন্তি? থুল্লনন্দা ভিক্খুনী অগারিকস্স সহত্থা খাদনীযম্পি ভোজনীযম্পি অদাসি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – এল়কলোমকে…পে….

আৰসথচীৰরং অনিস্সজ্জিত্ৰা পরিভুঞ্জন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? থুল্লনন্দং ভিক্খুনিং আরব্ভ. কিস্মিং ৰত্থুস্মিন্তি? থুল্লনন্দা ভিক্খুনী আৰসথচীৰরং অনিস্সজ্জিত্ৰা পরিভুঞ্জি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – কথিনকে…পে….

আৰসথং অনিস্সজ্জিত্ৰা চারিকং পক্কমন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? থুল্লনন্দং ভিক্খুনিং আরব্ভ. কিস্মিং ৰত্থুস্মিন্তি? থুল্লনন্দা ভিক্খুনী আৰসথং অনিস্সজ্জিত্ৰা চারিকং পক্কামি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – কথিনকে…পে….

তিরচ্ছানৰিজ্জং পরিযাপুণন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? ছব্বগ্গিযা ভিক্খুনিযো আরব্ভ. কিস্মিং ৰত্থুস্মিন্তি? ছব্বগ্গিযা ভিক্খুনিযো তিরচ্ছানৰিজ্জং পরিযাপুণিংসু, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – পদসোধম্মে…পে….

তিরচ্ছানৰিজ্জং ৰাচেন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? ছব্বগ্গিযা ভিক্খুনিযো আরব্ভ. কিস্মিং ৰত্থুস্মিন্তি. ছব্বগ্গিযা ভিক্খুনিযো তিরচ্ছানৰিজ্জং ৰাচেসুং, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – পদসোধম্মে…পে….

চিত্তাগারৰগ্গো পঞ্চমো.

৬. আরামৰগ্গো

২২৩. জানং সভিক্খুকং আরামং অনাপুচ্ছা পৰিসন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? সম্বহুলা ভিক্খুনিযো আরব্ভ. কিস্মিং ৰত্থুস্মিন্তি? সম্বহুলা ভিক্খুনিযো আরামং অনাপুচ্ছা পৰিসিংসু, তস্মিং ৰত্থুস্মিং. একা পঞ্ঞত্তি, দ্ৰে অনুপঞ্ঞত্তিযো. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – ধুরনিক্খেপে…পে….

ভিক্খুং অক্কোসন্তিযা পরিভাসন্তিযা পাচিত্তিযং কত্থ পঞ্ঞত্তন্তি? ৰেসালিযং পঞ্ঞত্তং. কং আরব্ভাতি? ছব্বগ্গিযা ভিক্খুনিযো আরব্ভ. কিস্মিং ৰত্থুস্মিন্তি? ছব্বগ্গিযা ভিক্খুনিযো আযস্মন্তং উপালিং অক্কোসিংসু, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং তীহি সমুট্ঠানেহি সমুট্ঠাতি…পে….

চণ্ডীকতায গণং পরিভাসন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? থুল্লনন্দং ভিক্খুনিং আরব্ভ. কিস্মিং ৰত্থুস্মিন্তি? থুল্লনন্দা ভিক্খুনী চণ্ডীকতায গণং পরিভাসি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং তীহি সমুট্ঠানেহি সমুট্ঠাতি…পে….

নিমন্তিতায ৰা পৰারিতায ৰা খাদনীযং ৰা ভোজনীযং ৰা অঞ্ঞত্র ভুঞ্জন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? সম্বহুলা ভিক্খুনিযো আরব্ভ. কিস্মিং ৰত্থুস্মিন্তি? সম্বহুলা ভিক্খুনিযো ভুত্তাৰিনিযো পৰারিতা অঞ্ঞত্র ভুঞ্জিংসু, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং চতূহি সমুট্ঠানেহি সমুট্ঠাতি…পে….

কুলং মচ্ছরাযন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? অঞ্ঞতরং ভিক্খুনিং আরব্ভ. কিস্মিং ৰত্থুস্মিন্তি? অঞ্ঞতরা ভিক্খুনী কুলং মচ্ছরাযি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং তীহি সমুট্ঠানেহি সমুট্ঠাতি…পে….

অভিক্খুকে আৰাসে ৰস্সং ৰসন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? সম্বহুলা ভিক্খুনিযো আরব্ভ. কিস্মিং ৰত্থুস্মিন্তি? সম্বহুলা ভিক্খুনিযো অভিক্খুকে আৰাসে ৰস্সং ৰসিংসু, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – এল়কলোমকে…পে….