৬. আরামৰগ্গো

২২৩. জানং সভিক্খুকং আরামং অনাপুচ্ছা পৰিসন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? সম্বহুলা ভিক্খুনিযো আরব্ভ. কিস্মিং ৰত্থুস্মিন্তি? সম্বহুলা ভিক্খুনিযো আরামং অনাপুচ্ছা পৰিসিংসু, তস্মিং ৰত্থুস্মিং. একা পঞ্ঞত্তি, দ্ৰে অনুপঞ্ঞত্তিযো. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – ধুরনিক্খেপে…পে….

ভিক্খুং অক্কোসন্তিযা পরিভাসন্তিযা পাচিত্তিযং কত্থ পঞ্ঞত্তন্তি? ৰেসালিযং পঞ্ঞত্তং. কং আরব্ভাতি? ছব্বগ্গিযা ভিক্খুনিযো আরব্ভ. কিস্মিং ৰত্থুস্মিন্তি? ছব্বগ্গিযা ভিক্খুনিযো আযস্মন্তং উপালিং অক্কোসিংসু, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং তীহি সমুট্ঠানেহি সমুট্ঠাতি…পে….

চণ্ডীকতায গণং পরিভাসন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? থুল্লনন্দং ভিক্খুনিং আরব্ভ. কিস্মিং ৰত্থুস্মিন্তি? থুল্লনন্দা ভিক্খুনী চণ্ডীকতায গণং পরিভাসি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং তীহি সমুট্ঠানেহি সমুট্ঠাতি…পে….

নিমন্তিতায ৰা পৰারিতায ৰা খাদনীযং ৰা ভোজনীযং ৰা অঞ্ঞত্র ভুঞ্জন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? সম্বহুলা ভিক্খুনিযো আরব্ভ. কিস্মিং ৰত্থুস্মিন্তি? সম্বহুলা ভিক্খুনিযো ভুত্তাৰিনিযো পৰারিতা অঞ্ঞত্র ভুঞ্জিংসু, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং চতূহি সমুট্ঠানেহি সমুট্ঠাতি…পে….

কুলং মচ্ছরাযন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? অঞ্ঞতরং ভিক্খুনিং আরব্ভ. কিস্মিং ৰত্থুস্মিন্তি? অঞ্ঞতরা ভিক্খুনী কুলং মচ্ছরাযি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং তীহি সমুট্ঠানেহি সমুট্ঠাতি…পে….

অভিক্খুকে আৰাসে ৰস্সং ৰসন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? সম্বহুলা ভিক্খুনিযো আরব্ভ. কিস্মিং ৰত্থুস্মিন্তি? সম্বহুলা ভিক্খুনিযো অভিক্খুকে আৰাসে ৰস্সং ৰসিংসু, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – এল়কলোমকে…পে….

ৰস্সংৰুট্ঠায ভিক্খুনিযা উভতোসঙ্ঘে তীহি ঠানেহি ন পৰারেন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? সম্বহুলা ভিক্খুনিযো আরব্ভ. কিস্মিং ৰত্থুস্মিন্তি? সম্বহুলা ভিক্খুনিযো ৰস্সংৰুট্ঠা ভিক্খুসঙ্ঘং [ভিক্খুনিসংঘে (ক.)] ন পৰারেসুং, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – ধুরনিক্খেপে…পে….

ওৰাদায ৰা সংৰাসায ৰা ন গচ্ছন্তিযা পাচিত্তিযং কত্থ পঞ্ঞত্তন্তি? সক্কেসু পঞ্ঞত্তং. কং আরব্ভাতি? ছব্বগ্গিযা ভিক্খুনিযো আরব্ভ. কিস্মিং ৰত্থুস্মিন্তি? ছব্বগ্গিযা ভিক্খুনিযো ওৰাদং ন গচ্ছিংসু, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – পঠমপারাজিকে…পে….

উপোসথম্পি ন পুচ্ছন্তিযা ওৰাদম্পি ন যাচন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? সম্বহুলা ভিক্খুনিযো আরব্ভ. কিস্মিং ৰত্থুস্মিন্তি? সম্বহুলা ভিক্খুনিযো উপোসথম্পি ন পুচ্ছিংসু ওৰাদম্পি ন যাচিংসু, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – ধুরনিক্খেপে…পে….

পসাখে জাতং গণ্ডং ৰা রুধিতং [রুহিতং (সী. স্যা.)] ৰা অনপলোকেত্ৰা সঙ্ঘং ৰা গণং ৰা পুরিসেন সদ্ধিং একেনেকায ভেদাপেন্তিযা পাচিত্তিযং কত্থ পঞ্ঞত্তন্তি? সাৰত্থিযং পঞ্ঞত্তং. কং আরব্ভাতি? অঞ্ঞতরং ভিক্খুনিং আরব্ভ. কিস্মিং ৰত্থুস্মিন্তি? অঞ্ঞতরা ভিক্খুনী পসাখে জাতং গণ্ডং পুরিসেন সদ্ধিং একেনেকা ভেদাপেসি, তস্মিং ৰত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৰীহি সমুট্ঠানেহি সমুট্ঠাতি – কথিনকে…পে….

আরামৰগ্গো ছট্ঠো.