১. পারাজিককণ্ডং

১৯৩. মেথুনং ধম্মং পটিসেৰনপচ্চযা কতি আপত্তিযো আপজ্জতি? মেথুনং ধম্মং পটিসেৰনপচ্চযা চতস্সো আপত্তিযো আপজ্জতি – অক্খাযিতে সরীরে মেথুনং ধম্মং পটিসেৰতি, আপত্তি পারাজিকস্স; যেভুয্যেন খাযিতে সরীরে মেথুনং ধম্মং পটিসেৰতি, আপত্তি থুল্লচ্চযস্স; ৰট্টকতে মুখে অচ্ছুপন্তং অঙ্গজাতং পৰেসেতি, আপত্তি দুক্কটস্স; জতুমট্ঠকে পাচিত্তিযং – মেথুনং ধম্মং পটিসেৰনপচ্চযা ইমা চতস্সো আপত্তিযো আপজ্জতি.

অদিন্নং আদিযনপচ্চযা কতি আপত্তিযো আপজ্জতি? অদিন্নং আদিযনপচ্চযা তিস্সো আপত্তিযো আপজ্জতি. পঞ্চমাসকং ৰা অতিরেকপঞ্চমাসকং ৰা অগ্ঘনকং অদিন্নং থেয্যসঙ্খাতং আদিযতি, আপত্তি পারাজিকস্স; অতিরেকমাসকং ৰা ঊনপঞ্চমাসকং ৰা অগ্ঘনকং অদিন্নং থেয্যসঙ্খাতং আদিযতি, আপত্তি থুল্লচ্চযস্স; মাসকং ৰা ঊনমাসকং ৰা অগ্ঘনকং অদিন্নং থেয্যসঙ্খাতং আদিযতি, আপত্তি দুক্কটস্স – অদিন্নং আদিযনপচ্চযা ইমা তিস্সো আপত্তিযো আপজ্জতি.

সঞ্চিচ্চ মনুস্সৰিগ্গহং জীৰিতা ৰোরোপনপচ্চযা কতি আপত্তিযো আপজ্জতি? সঞ্চিচ্চ মনুস্সৰিগ্গহং জীৰিতা ৰোরোপনপচ্চযা তিস্সো আপত্তিযো আপজ্জতি. মনুস্সং ওদিস্স ওপাতং খণতি ‘‘পপতিত্ৰা মরিস্সতী’’তি, আপত্তি দুক্কটস্স; পপতিতে দুক্খা ৰেদনা উপ্পজ্জতি, আপত্তি থুল্লচ্চযস্স; মরতি, আপত্তি পারাজিকস্স – সঞ্চিচ্চ মনুস্সৰিগ্গহং জীৰিতা ৰোরোপনপচ্চযা ইমা তিস্সো আপত্তিযো আপজ্জতি.

অসন্তং অভূতং উত্তরিমনুস্সধম্মং উল্লপনপচ্চযা কতি আপত্তিযো আপজ্জতি? অসন্তং অভূতং উত্তরিমনুস্সধম্মং উল্লপনপচ্চযা তিস্সো আপত্তিযো আপজ্জতি – পাপিচ্ছো ইচ্ছাপকতো অসন্তং অভূতং উত্তরিমনুস্সধম্মং উল্লপতি, আপত্তি পারাজিকস্স, ‘‘যো তে ৰিহারে ৰসতি সো ভিক্খু অরহা’’তি ভণতি, পটিৰিজানন্তস্স আপত্তি থুল্লচ্চযস্স; ন পটিৰিজানন্তস্স আপত্তি দুক্কটস্স – অসন্তং অভূতং উত্তরিমনুস্সধম্মং উল্লপনপচ্চযা ইমা তিস্সো আপত্তিযো আপজ্জতি.

চত্তারো পারাজিকা নিট্ঠিতা.