২. সঙ্ঘাদিসেসকণ্ডাদি

১৯৪. উপক্কমিত্ৰা অসুচিং মোচনপচ্চযা কতি আপত্তিযো আপজ্জতি? উপক্কমিত্ৰা অসুচিমোচনপচ্চযা তিস্সো আপত্তিযো আপজ্জতি – চেতেতি উপক্কমতি মুচ্চতি, আপত্তি সঙ্ঘাদিসেসস্স; চেতেতি উপক্কমতি ন মুচ্চতি, আপত্তি থুল্লচ্চযস্স; পযোগে দুক্কটং – উপক্কমিত্ৰা অসুচিমোচনপচ্চযা ইমা তিস্সো আপত্তিযো আপজ্জতি.

কাযসংসগ্গং সমাপজ্জনপচ্চযা কতি আপত্তিযো আপজ্জতি? কাযসংসগ্গং সমাপজ্জনপচ্চযা পঞ্চ আপত্তিযো আপজ্জতি – অৰস্সুতা ভিক্খুনী অৰস্সুতস্স পুরিসপুগ্গলস্স অধক্খকং উব্ভজাণুমণ্ডলং গহণং সাদিযতি, আপত্তি পারাজিকস্স; ভিক্খু কাযেন কাযং আমসতি, আপত্তি সঙ্ঘাদিসেসস্স; কাযেন কাযপটিবদ্ধং আমসতি, আপত্তি থুল্লচ্চযস্স; কাযপটিবদ্ধেন কাযপটিবদ্ধং আমসতি, আপত্তি দুক্কটস্স; অঙ্গুলিপতোদকে পাচিত্তিযং – কাযসংসগ্গং সমাপজ্জনপচ্চযা ইমা পঞ্চ আপত্তিযো আপজ্জতি.

মাতুগামং দুট্ঠুল্লাহি ৰাচাহি ওভাসনপচ্চযা তিস্সো আপত্তিযো আপজ্জতি – ৰচ্চমগ্গং পস্সাৰমগ্গং আদিস্স ৰণ্ণম্পি ভণতি অৰণ্ণম্পি ভণতি, আপত্তি সঙ্ঘাদিসেসস্স; ৰচ্চমগ্গং পস্সাৰমগ্গং ঠপেত্ৰা অধক্খকং উব্ভজাণুমণ্ডলং আদিস্স ৰণ্ণম্পি ভণতি অৰণ্ণম্পি ভণতি, আপত্তি থুল্লচ্চযস্স; কাযপটিবদ্ধং আদিস্স ৰণ্ণম্পি ভণতি অৰণ্ণম্পি ভণতি, আপত্তি দুক্কটস্স.

অত্তকামপারিচরিযায ৰণ্ণং ভাসনপচ্চযা তিস্সো আপত্তিযো আপজ্জতি – মাতুগামস্স সন্তিকে অত্তকামপারিচরিযায ৰণ্ণং ভাসতি, আপত্তি সঙ্ঘাদিসেসস্স; পণ্ডকস্স সন্তিকে অত্তকামপারিচরিযায ৰণ্ণং ভাসতি, আপত্তি থুল্লচ্চযস্স; তিরচ্ছানগতস্স সন্তিকে অত্তকামপারিচরিযায ৰণ্ণং ভাসতি, আপত্তি দুক্কটস্স.

সঞ্চরিত্তং সমাপজ্জনপচ্চযা তিস্সো আপত্তিযো আপজ্জতি – পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স; পটিগ্গণ্হাতি ৰীমংসতি ন পচ্চাহরতি, আপত্তি থুল্লচ্চযস্স; পটিগ্গণ্হাতি ন ৰীমংসতি ন পচ্চাহরতি, আপত্তি দুক্কটস্স.

সঞ্ঞাচিকায কুটিং কারাপনপচ্চযা তিস্সো আপত্তিযো আপজ্জতি – কারাপেতি, পযোগে দুক্কটং; একং পিণ্ডং [একপিণ্ডে (স্যা.)] অনাগতে আপত্তি থুল্লচ্চযস্স; তস্মিং পিণ্ডে আগতে আপত্তি সঙ্ঘাদিসেসস্স.

মহল্লকং ৰিহারং কারাপনপচ্চযা তিস্সো আপত্তিযো আপজ্জতি – কারাপেতি, পযোগে দুক্কটং; একং পিণ্ডং অনাগতে, আপত্তি থুল্লচ্চযস্স; তস্মিং পিণ্ডে আগতে আপত্তি সঙ্ঘাদিসেসস্স.

ভিক্খুং অমূলকেন পারাজিকেন ধম্মেন অনুদ্ধংসনপচ্চযা তিস্সো আপত্তিযো আপজ্জতি – অনোকাসং কারাপেত্ৰা চাৰনাধিপ্পাযো ৰদেতি, আপত্তি সঙ্ঘাদিসেসেন দুক্কটস্স; ওকাসং কারাপেত্ৰা অক্কোসাধিপ্পাযো ৰদেতি, আপত্তি ওমসৰাদস্স.

ভিক্খুং অঞ্ঞভাগিযস্স অধিকরণস্স কিঞ্চি দেসং লেসমত্তং উপাদায পারাজিকেন ধম্মেন অনুদ্ধংসনপচ্চযা তিস্সো আপত্তিযো আপজ্জতি – অনোকাসং কারাপেত্ৰা চাৰনাধিপ্পাযো ৰদেতি, আপত্তি সঙ্ঘাদিসেসেন দুক্কটস্স; ওকাসং কারাপেত্ৰা অক্কোসাধিপ্পাযো ৰদেতি, আপত্তি ওমসৰাদস্স.

সঙ্ঘভেদকো ভিক্খু যাৰততিযং সমনুভাসনায ন পটিনিস্সজ্জনপচ্চযা তিস্সো আপত্তিযো আপজ্জতি – ঞত্তিযা দুক্কটং; দ্ৰীহি কম্মৰাচাহি থুল্লচ্চযা; কম্মৰাচাপরিযোসানে আপত্তি সঙ্ঘাদিসেসস্স.

ভেদকানুৰত্তকা ভিক্খূ যাৰততিযং সমনুভাসনায ন পটিনিস্সজ্জনপচ্চযা তিস্সো আপত্তিযো আপজ্জতি – ঞত্তিযা দুক্কটং; দ্ৰীহি কম্মৰাচাহি থুল্লচ্চযা; কম্মৰাচাপরিযোসানে আপত্তি সঙ্ঘাদিসেসস্স.

দুব্বচো ভিক্খু যাৰততিযং সমনুভাসনায ন পটিনিস্সজ্জনপচ্চযা তিস্সো আপত্তিযো আপজ্জতি – ঞত্তিযা দুক্কটং; দ্ৰীহি কম্মৰাচাহি থুল্লচ্চযা; কম্মৰাচাপরিযোসানে আপত্তি সঙ্ঘাদিসেসস্স.

কুলদূসকো ভিক্খু যাৰততিযং সমনুভাসনায ন পটিনিস্সজ্জনপচ্চযা তিস্সো আপত্তিযো আপজ্জতি – ঞত্তিযা দুক্কটং; দ্ৰীহি কম্মৰাচাহি থুল্লচ্চযা; কম্মৰাচাপরিযোসানে আপত্তি সঙ্ঘাদিসেসস্স…পে….

অনাদরিযং পটিচ্চ উদকে উচ্চারং ৰা পস্সাৰং ৰা খেল়ং ৰা করণপচ্চযা কতি আপত্তিযো আপজ্জতি? অনাদরিযং পটিচ্চ উদকে উচ্চারং ৰা পস্সাৰং ৰা খেল়ং ৰা করণপচ্চযা একং আপত্তিং আপজ্জতি. দুক্কটং – অনাদরিযং পটিচ্চ উদকে উচ্চারং ৰা পস্সাৰং ৰা খেল়ং ৰা করণপচ্চযা ইমং একং আপত্তিং আপজ্জতি.

কতাপত্তিৰারো নিট্ঠিতো দুতিযো.