৮. অচ্চেকচীৰরসিক্খাপদং

৬৪৬. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন অঞ্ঞতরো মহামত্তো পৰাসং গচ্ছন্তো ভিক্খূনং সন্তিকে দূতং পাহেসি – ‘‘আগচ্ছন্তু ভদন্তা ৰস্সাৰাসিকং দস্সামী’’তি. ভিক্খূ – ‘ৰস্সংৰুট্ঠানং ভগৰতা ৰস্সাৰাসিকং অনুঞ্ঞাত’ন্তি, কুক্কুচ্চাযন্তা নাগমংসু. অথ খো সো মহামত্তো উজ্ঝাযতি খিয্যতি ৰিপাচেতি – ‘‘কথঞ্হি নাম ভদন্তা মযা দূতে পহিতে নাগচ্ছিস্সন্তি! অহঞ্হি সেনায গচ্ছামি. দুজ্জানং জীৰিতং দুজ্জানং মরণ’’ন্তি. অস্সোসুং খো ভিক্খূ তস্স মহামত্তস্স উজ্ঝাযন্তস্স খিয্যন্তস্স ৰিপাচেন্তস্স. অথ খো তে ভিক্খূ ভগৰতো এতমত্থং আরোচেসুং. অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, অচ্চেকচীৰরং পটিগ্গহেত্ৰা নিক্খিপিতু’’ন্তি.

৬৪৭. তেন খো পন সমযেন ভিক্খূ – ‘‘ভগৰতা অনুঞ্ঞাতং অচ্চেকচীৰরং পটিগ্গহেত্ৰা নিক্খিপিতু’’ন্তি, অচ্চেকচীৰরানি পটিগ্গহেত্ৰা চীৰরকালসমযং অতিক্কামেন্তি. তানি চীৰরানি চীৰরৰংসে ভণ্ডিকাবদ্ধানি তিট্ঠন্তি. অদ্দস খো আযস্মা আনন্দো সেনাসনচারিকং আহিণ্ডন্তো তানি চীৰরানি চীৰরৰংসে ভণ্ডিকাবদ্ধানি. তিট্ঠন্তে দিস্ৰা ভিক্খূ এতদৰোচ – ‘‘কস্সিমানি, আৰুসো, চীৰরানি চীৰরৰংসে ভণ্ডিকাবদ্ধানি তিট্ঠন্তী’’তি? ‘‘অম্হাকং, আৰুসো, অচ্চেকচীৰরানী’’তি. ‘‘কীৰচিরং পনাৰুসো, ইমানি চীৰরানি নিক্খিত্তানী’’তি? অথ খো তে ভিক্খূ আযস্মতো আনন্দস্স যথানিক্খিত্তং আরোচেসুং. আযস্মা আনন্দো উজ্ঝাযতি খিয্যতি ৰিপাচেতি – ‘‘কথঞ্হি নাম ভিক্খূ অচ্চেকচীৰরং পটিগ্গহেত্ৰা চীৰরকালসমযং অতিক্কামেস্সন্তী’’তি! অথ খো আযস্মা আনন্দো তে ভিক্খূ অনেকপরিযাযেন ৰিগরহিত্ৰা ভগৰতো এতমত্থং আরোচেসি…পে… – ‘‘সচ্চং কির, ভিক্খৰে, ভিক্খূ অচ্চেকচীৰরং পটিগ্গহেত্ৰা চীৰরকালসমযং অতিক্কামেন্তী’’তি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম তে, ভিক্খৰে, মোঘপুরিসা অচ্চেকচীৰরং পটিগ্গহেত্ৰা চীৰরকালসমযং অতিক্কামেস্সন্তি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

৬৪৮. ‘‘দসাহানাগতং কত্তিকতেমাসিকপুণ্ণমং ভিক্খুনো পনেৰ অচ্চেকচীৰরং উপ্পজ্জেয্য, অচ্চেকং মঞ্ঞমানেন ভিক্খুনা পটিগ্গহেতব্বং, পটিগ্গহেত্ৰা যাৰ চীৰরকালসমযং নিক্খিপিতব্বং. ততো চে উত্তরি নিক্খিপেয্য, নিস্সগ্গিযং পাচিত্তিয’’ন্তি.

৬৪৯. দসাহানাগতন্তি দসাহানাগতায পৰারণায.

কত্তিকতেমাসিকপুণ্ণমন্তি পৰারণা কত্তিকা ৰুচ্চতি.

অচ্চেকচীৰরং নাম সেনায ৰা গন্তুকামো হোতি, পৰাসং ৰা গন্তুকামো হোতি, গিলানো ৰা হোতি, গব্ভিনী ৰা হোতি, অস্সদ্ধস্স ৰা সদ্ধা উপ্পন্না হোতি, অপ্পসন্নস্স ৰা পসাদো উপ্পন্নো হোতি, সো চে ভিক্খূনং সন্তিকে দূতং পহিণেয্য – ‘‘আগচ্ছন্তু ভদন্তা ৰস্সাৰাসিকং দস্সামী’’তি, এতং অচ্চেকচীৰরং নাম.

অচ্চেকং মঞ্ঞমানেন ভিক্খুনা পটিগ্গহেতব্বং পটিগ্গহেত্ৰা যাৰ চীৰরকালসমযং নিক্খিপিতব্বন্তি সঞ্ঞাণং কত্ৰা নিক্খিপিতব্বং – ‘‘ইদং অচ্চেকচীৰর’’ন্তি.

চীৰরকালসমযো নাম অনত্থতে কথিনে ৰস্সানস্স পচ্ছিমো মাসো, অত্থতে কথিনে পঞ্চমাসা.

ততো চে উত্তরি নিক্খিপেয্যাতি অনত্থতে কথিনে ৰস্সানস্স পচ্ছিমং দিৰসং অতিক্কামেতি, নিস্সগ্গিযং পাচিত্তিযং [নিস্সগ্গিযং হোতি (স্যা.)]. অত্থতে কথিনে কথিনুদ্ধারদিৰসং অতিক্কামেতি, নিস্সগ্গিযং হোতি. নিস্সজ্জিতব্বং সঙ্ঘস্স ৰা গণস্স ৰা পুগ্গলস্স ৰা. এৰঞ্চ পন, ভিক্খৰে, নিস্সজ্জিতব্বং…পে… ইদং মে, ভন্তে, অচ্চেকচীৰরং চীৰরকালসমযং অতিক্কামিতং নিস্সগ্গিযং. ইমাহং সঙ্ঘস্স নিস্সজ্জামীতি…পে… দদেয্যাতি…পে… দদেয্যুন্তি…পে… আযস্মতো দম্মীতি.

৬৫০. অচ্চেকচীৰরে অচ্চেকচীৰরসঞ্ঞী চীৰরকালসমযং অতিক্কামেতি, নিস্সগ্গিযং পাচিত্তিযং. অচ্চেকচীৰরে ৰেমতিকো চীৰরকালসমযং অতিক্কামেতি, নিস্সগ্গিযং পাচিত্তিযং. অচ্চেকচীৰরে অনচ্চেকচীৰরসঞ্ঞী চীৰরকালসমযং অতিক্কামেতি, নিস্সগ্গিযং পাচিত্তিযং. অনধিট্ঠিতে অধিট্ঠিতসঞ্ঞী …পে… অৰিকপ্পিতে ৰিকপ্পিতসঞ্ঞী… অৰিস্সজ্জিতে ৰিস্সজ্জিতসঞ্ঞী… অনট্ঠে নট্ঠসঞ্ঞী… অৰিনট্ঠে ৰিনট্ঠসঞ্ঞী… অদড্ঢে দড্ঢসঞ্ঞী… অৰিলুত্তে ৰিলুত্তসঞ্ঞী চীৰরকালসমযং অতিক্কামেতি, নিস্সগ্গিযং পাচিত্তিযং.

নিস্সগ্গিযং চীৰরং অনিস্সজ্জিত্ৰা পরিভুঞ্জতি, আপত্তি দুক্কটস্স. অনচ্চেকচীৰরে অচ্চেকচীৰরসঞ্ঞী, আপত্তি দুক্কটস্স. অনচ্চেকচীৰরে ৰেমতিকো, আপত্তি দুক্কটস্স. অনচ্চেকচীৰরে অনচ্চেকচীৰরসঞ্ঞী, অনাপত্তি.

৬৫১. অনাপত্তি – অন্তোসমযে অধিট্ঠেতি, ৰিকপ্পেতি, ৰিস্সজ্জেতি, নস্সতি, ৰিনস্সতি, ডয্হতি, অচ্ছিন্দিত্ৰা গণ্হন্তি, ৰিস্সাসং গণ্হন্তি, উম্মত্তকস্স, আদিকম্মিকস্সাতি.

অচ্চেকচীৰরসিক্খাপদং নিট্ঠিতং অট্ঠমং.