৬. এল়কলোমসিক্খাপদং

৫৭১. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন অঞ্ঞতরস্স ভিক্খুনো কোসলেসু জনপদে সাৰত্থিং গচ্ছন্তস্স অন্তরামগ্গে এল়কলোমানি উপ্পজ্জিংসু. অথ খো সো ভিক্খু তানি এল়কলোমানি উত্তরাসঙ্গেন ভণ্ডিকং বন্ধিত্ৰা অগমাসি. মনুস্সা তং ভিক্খুং পস্সিত্ৰা উপ্পণ্ডেসুং – ‘‘কিত্তকেন তে, ভন্তে, কীতানি? কিত্তকো উদযো ভৰিস্সতী’’তি? সো ভিক্খু তেহি মনুস্সেহি উপ্পণ্ডিযমানো মঙ্কু অহোসি. অথ খো সো ভিক্খু সাৰত্থিং গন্ত্ৰা তানি এল়কলোমানি ঠিতকোৰ আসুম্ভি. ভিক্খূ তং ভিক্খুং এতদৰোচুং – ‘‘কিস্স ত্ৰং, আৰুসো, ইমানি এল়কলোমানি ঠিতকোৰ আসুম্ভসী’’তি? ‘‘তথা হি পনাহং, আৰুসো, ইমেসং এল়কলোমানং কারণা মনুস্সেহি উপ্পণ্ডিতো’’তি. ‘‘কীৰ দূরতো পন ত্ৰং, আৰুসো, ইমানি এল়কলোমানি আহরী’’তি? ‘‘অতিরেকতিযোজনং, আৰুসো’’তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খু অতিরেকতিযোজনং এল়কলোমানি আহরিস্সতী’’তি! অথ খো তে ভিক্খূ তং ভিক্খুং অনেকপরিযাযেন ৰিগরহিত্ৰা ভগৰতো এতমত্থং আরোচেসুং…পে… সচ্চং কির ত্ৰং, ভিক্খু, অতিরেকতিযোজনং এল়কলোমানি আহরীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম ত্ৰং, মোঘপুরিস, অতিরেকতিযোজনং এল়কলোমানি আহরিস্সসি! নেতং মোঘপুরিস, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

৫৭২. ‘‘ভিক্খুনো পনেৰ অদ্ধানমগ্গপ্পটিপন্নস্স এল়কলোমানি উপ্পজ্জয্যুং. আকঙ্খমানেন ভিক্খুনা পটিগ্গহেতব্বানি. পটিগ্গহেত্ৰা তিযোজনপরমং সহত্থা হরিতব্বানি [হারেতব্বানি (সী. স্যা. ক.)], অসন্তে হারকে. ততো চে উত্তরি হরেয্য, অসন্তেপি হারকে, নিস্সগ্গিযং পাচিত্তিয’’ন্তি.

৫৭৩. ভিক্খুনো পনেৰ অদ্ধানমগ্গপ্পটিপন্নস্সাতি পন্থং গচ্ছন্তস্স.

এল়কলোমানি উপ্পজ্জেয্যুন্তি উপ্পজ্জেয্যুং সঙ্ঘতো ৰা গণতো ৰা ঞাতিতো ৰা মিত্ততো ৰা পংসুকূলং ৰা অত্তনো ৰা ধনেন.

আকঙ্খমানেনাতি ইচ্ছমানেন পটিগ্গহেতব্বানি.

পটিগ্গহেত্ৰা তিযোজনপরমং সহত্থা হরিতব্বানীতি তিযোজনপরমতা সহত্থা হরিতব্বানি.

অসন্তে হারকেতি নাঞ্ঞো কোচি হারকো হোতি ইত্থী ৰা পুরিসো ৰা গহট্ঠো ৰা পব্বজিতো ৰা.

ততো চে উত্তরি হরেয্য, অসন্তেপি হারকেতি পঠমং পাদং তিযোজনং অতিক্কামেতি, আপত্তি দুক্কটস্স. দুতিযং পাদং অতিক্কামেতি, নিস্সগ্গিযং পাচিত্তিযং [নিস্সগ্গিযানি হোন্তি (স্যা.)]. অন্তোতিযোজনে ঠিতো বহিতিযোজনং পাতেতি, নিস্সগ্গিযং পাচিত্তিযং [নিস্সগ্গিযানি হোন্তি (স্যা.)]. অঞ্ঞস্স যানে ৰা ভণ্ডে ৰা অজানন্তস্স পক্খিপিত্ৰা তিযোজনং অতিক্কামেতি, নিস্সগ্গিযানি হোন্তি. নিস্সজ্জিতব্বানি সঙ্ঘস্স ৰা গণস্স ৰা পুগ্গলস্স ৰা. এৰঞ্চ পন, ভিক্খৰে, নিস্সজ্জিতব্বানি…পে… ইমানি মে, ভন্তে, এল়কলোমানি তিযোজনং অতিক্কামিতানি নিস্সগ্গিযানি. ইমানাহং সঙ্ঘস্স নিস্সজ্জামীতি…পে… দদেয্যাতি…পে… দদেয্যুন্তি…পে… আযস্মতো দম্মীতি.

৫৭৪. অতিরেকতিযোজনে অতিরেকসঞ্ঞী অতিক্কামেতি [তিযোজনং অতিক্কামেতি (স্যা.)], নিস্সগ্গিযং পাচিত্তিযং. অতিরেকতিযোজনে ৰেমতিকো অতিক্কামেতি [তিযোজনং অতিক্কামেতি (স্যা.)], নিস্সগ্গিযং পাচিত্তিযং. অতিরেকতিযোজনে ঊনকসঞ্ঞী অতিক্কামেতি [তিযোজনং অতিক্কামেতি (স্যা.)], নিস্সগ্গিযং পাচিত্তিযং.

ঊনকতিযোজনে অতিরেকসঞ্ঞী, আপত্তি দুক্কটস্স. ঊনকতিযোজনে ৰেমতিকো, আপত্তি দুক্কটস্স. ঊনকতিযোজনে ঊনকসঞ্ঞী, অনাপত্তি.

৫৭৫. অনাপত্তি তিযোজনং হরতি, ঊনকতিযোজনং হরতি, তিযোজনং হরতিপি, পচ্চাহরতিপি, তিযোজনং ৰাসাধিপ্পাযো গন্ত্ৰা ততো পরং হরতি, অচ্ছিন্নং পটিলভিত্ৰা হরতি, নিস্সট্ঠং পটিলভিত্ৰা হরতি, অঞ্ঞং হরাপেতি কতভণ্ডং, উম্মত্তকস্স, আদিকম্মিকস্সাতি.

এল়কলোমসিক্খাপদং নিট্ঠিতং ছট্ঠং.