১. কোসিযসিক্খাপদং

৫৪২. তেন সমযেন বুদ্ধো ভগৰা আল়ৰিযং ৰিহরতি অগ্গাল়ৰে চেতিযে. তেন খো পন সমযেন ছব্বগ্গিযা ভিক্খূ কোসিযকারকে উপসঙ্কমিত্ৰা এৰং ৰদন্তি – ‘‘বহূ, আৰুসো, কোসকারকে পচথ, অম্হাকম্পি দস্সথ, মযম্পি ইচ্ছাম কোসিযমিস্সকং সন্থতং কাতু’’ন্তি. তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা অম্হে উপসঙ্কমিত্ৰা এৰং ৰক্খন্তি – ‘বহূ, আৰুসো, কোসকারকে পচথ, অম্হাকম্পি দস্সথ, মযম্পি ইচ্ছাম কোসিযমিস্সকং সন্থতং কাতু’ন্তি! অম্হাকম্পি অলাভা, অম্হাকম্পি দুল্লদ্ধং, যে মযং আজীৰস্স হেতু পুত্তদারস্স কারণা বহূ খুদ্দকে পাণে সঙ্ঘাতং আপাদেমা’’তি. অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ কোসিযকারকে উপসঙ্কমিত্ৰা এৰং ৰক্খন্তি – ‘বহূ, আৰুসো, কোসকারকে পচথ, অম্হাকম্পি দস্সথ, মযম্পি ইচ্ছাম কোসিযমিস্সকং সন্থতং কাতু’’’ন্তি! অথ খো তে ভিক্খূ ছব্বগ্গিযে ভিক্খূ অনেকপরিযাযেন ৰিগরহিত্ৰা ভগৰতো এতমত্থং আরোচেসুং…পে… ‘‘সচ্চং কির তুম্হে, ভিক্খৰে, কোসিযকারকে উপসঙ্কমিত্ৰা এৰং ৰদেথ – ‘বহূ, আৰুসো, কোসকারকে পচথ, অম্হাকম্পি দস্সথ, মযম্পি ইচ্ছাম কোসিযমিস্সকং সন্থতং কাতু’’’ন্তি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম তুম্হে, মোঘপুরিসা, কোসিযকারকে উপসঙ্কমিত্ৰা এৰং ৰক্খথ – বহূ, আৰুসো, কোসকারকে পচথ, অম্হাকম্পি দস্সথ, মযম্পি ইচ্ছাম কোসিযমিস্সকং সন্থতং কাতুন্তি. নেতং, মোঘপুরিসা, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

৫৪৩. ‘‘যো পন ভিক্খু কোসিযমিস্সকং সন্থতং কারাপেয্য, নিস্সগ্গিযং পাচিত্তিয’’ন্তি.

৫৪৪. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

সন্থতং নাম সন্থরিত্ৰা কতং হোতি অৰাযিমং.

কারাপেয্যাতি একেনপি কোসিযংসুনা মিস্সিত্ৰা করোতি ৰা কারাপেতি ৰা, পযোগে দুক্কটং. পটিলাভেন নিস্সগ্গিযং হোতি. নিস্সজ্জিতব্বং সঙ্ঘস্স ৰা গণস্স ৰা পুগ্গলস্স ৰা. এৰঞ্চ পন, ভিক্খৰে, নিস্সজ্জিতব্ব…পে… ইদং মে, ভন্তে, কোসিযমিস্সকং সন্থতং কারাপিতং নিস্সগ্গিযং. ইমাহং সঙ্ঘস্স নিস্সজ্জামীতি…পে… দদেয্যাতি…পে… দদেয্যুন্তি…পে… আযস্মতো দম্মীতি.

৫৪৫. অত্তনা ৰিপ্পকতং অত্তনা পরিযোসাপেতি, নিস্সগ্গিযং পাচিত্তিযং. অত্তনা ৰিপ্পকতং পরেহি পরিযোসাপেতি, নিস্সগ্গিযং পাচিত্তিযং. পরেহি ৰিপ্পকতং অত্তনা পরিযোসাপেতি, নিস্সগ্গিযং পাচিত্তিযং. পরেহি ৰিপ্পকতং পরেহি পরিযোসাপেতি, নিস্সগ্গিযং পাচিত্তিযং.

অঞ্ঞস্সত্থায করোতি ৰা কারাপেতি ৰা, আপত্তি দুক্কটস্স. অঞ্ঞেন কতং পটিলভিত্ৰা পরিভুঞ্জতি, আপত্তি দুক্কটস্স.

৫৪৬. অনাপত্তি ৰিতানং ৰা ভূমত্থরণং ৰা সাণিপাকারং ৰা ভিসিং ৰা বিব্বোহনং ৰা করোতি, উম্মত্তকস্স, আদিকম্মিকস্সাতি.

কোসিযসিক্খাপদং নিট্ঠিতং পঠমং.