৩. দুট্ঠুল্লৰাচাসিক্খাপদং

২৮৩. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন আযস্মা উদাযী অরঞ্ঞে ৰিহরতি. তস্সাযস্মতো ৰিহারো অভিরূপো হোতি দস্সনীযো পাসাদিকো. তেন খো পন সমযেন সম্বহুলা ইত্থিযো আরামং আগমংসু ৰিহারপেক্খিকাযো. অথ খো তা ইত্থিযো যেনাযস্মা উদাযী তেনুপসঙ্কমিংসু; উপসঙ্কমিত্ৰা আযস্মন্তং উদাযিং এতদৰোচুং – ‘‘ইচ্ছাম মযং, ভন্তে, অয্যস্স ৰিহারং পেক্খিতু’’ন্তি. অথ খো আযস্মা উদাযী তা ইত্থিযো ৰিহারং পেক্খাপেত্ৰা তাসং ইত্থীনং ৰচ্চমগ্গং পস্সাৰমগ্গং আদিস্স ৰণ্ণম্পি ভণতি অৰণ্ণম্পি ভণতি যাচতিপি আযাচতিপি পুচ্ছতিপি পটিপুচ্ছতিপি আচিক্খতিপি অনুসাসতিপি অক্কোসতিপি. যা তা ইত্থিযো ছিন্নিকা ধুত্তিকা অহিরিকাযো তা আযস্মতা উদাযিনা সদ্ধিং উহসন্তিপি উল্লপন্তিপি উজ্জগ্ঘন্তিপি উপ্পণ্ডেন্তিপি. যা পন তা ইত্থিযো হিরিমনা তা নিক্খমিত্ৰা ভিক্খূ উজ্ঝাপেন্তি – ‘‘ইদং, ভন্তে, নচ্ছন্নং নপ্পতিরূপং. সামিকেনপি মযং এৰং ৰুত্তা ন ইচ্ছেয্যাম, কিং পনায্যেন উদাযিনা’’তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা উদাযী মাতুগামং দুট্ঠুল্লাহি ৰাচাহি ওভাসিস্সতী’’তি! অথ খো তে ভিক্খূ আযস্মন্তং উদাযিং অনেকপরিযাযেন ৰিগরহিত্ৰা ভগৰতো এতমত্থং আরোচেসুং. অথ খো ভগৰা এতস্মিং নিদানে এতস্মিং পকরণে ভিক্খুসঙ্ঘং সন্নিপাতাপেত্ৰা আযস্মন্তং উদাযিং পটিপুচ্ছি – ‘‘সচ্চং কির ত্ৰং, উদাযি, মাতুগামং দুট্ঠুল্লাহি ৰাচাহি ওভাসসী’’তি? ‘‘সচ্চং, ভগৰা’’তি. ৰিগরহি বুদ্ধো ভগৰা – ‘‘অননুচ্ছৰিকং, মোঘপুরিস, অননুলোমিকং অপ্পতিরূপং অস্সামণকং অকপ্পিযং অকরণীযং. কথঞ্হি নাম ত্ৰং, মোঘপুরিস, মাতুগামং দুট্ঠুল্লাহি ৰাচাহি ওভাসিস্সসি! ননু মযা, মোঘপুরিস, অনেকপরিযাযেন ৰিরাগায ধম্মো দেসিতো নো সরাগায…পে… কামপরিল়াহানং ৰূপসমো অক্খাতো. নেতং, মোঘপুরিস, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

২৮৪. ‘‘যো পন ভিক্খু ওতিণ্ণো ৰিপরিণতেন চিত্তেন মাতুগামং দুট্ঠুল্লাহি ৰাচাহি ওভাসেয্য যথা তং যুৰা যুৰতিং মেথুনুপসংহিতাহি, সঙ্ঘাদিসেসো’’তি.

২৮৫. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

ওতিণ্ণো নাম সারত্তো অপেক্খৰা পটিবদ্ধচিত্তো.

ৰিপরিণতন্তি রত্তম্পি চিত্তং ৰিপরিণতং, দুট্ঠম্পি চিত্তং ৰিপরিণতং মূল়্হম্পি চিত্তং ৰিপরিণতং. অপিচ, রত্তং চিত্তং ইমস্মিং অত্থে অধিপ্পেতং ৰিপরিণতন্তি.

মাতুগামো নাম মনুস্সিত্থী, ন যক্খী, ন পেতী, ন তিরচ্ছানগতা. ৰিঞ্ঞূ পটিবলা সুভাসিতদুব্ভাসিতং দুট্ঠুল্লাদুট্ঠুল্লং আজানিতুং.

দুট্ঠুল্লা নাম ৰাচা ৰচ্চমগ্গপস্সাৰমগ্গমেথুনধম্মপ্পটিসংযুত্তা ৰাচা.

ওভাসেয্যাতি অজ্ঝাচারো ৰুচ্চতি.

যথা তং যুৰা যুৰতিন্তি দহরো দহরিং, তরুণো তরুণিং, কামভোগী কামভোগিনিং.

মেথুনুপসংহিতাহীতি মেথুনধম্মপ্পটিসংযুত্তাহি.

সঙ্ঘাদিসেসোতি …পে… তেনপি ৰুচ্চতি সঙ্ঘাদিসেসোতি.

দ্ৰে মগ্গে আদিস্স ৰণ্ণম্পি ভণতি, অৰণ্ণম্পি ভণতি, যাচতিপি, আযাচতিপি, পুচ্ছতিপি, পটিপুচ্ছতিপি, আচিক্খতিপি, অনুসাসতিপি, অক্কোসতিপি.

ৰণ্ণং ভণতি নাম দ্ৰে মগ্গে থোমেতি ৰণ্ণেতি পসংসতি.

অৰণ্ণং ভণতি নাম দ্ৰে মগ্গে খুংসেতি ৰম্ভেতি গরহতি.

যাচতি নাম দেহি মে, অরহসি মে দাতুন্তি.

আযাচতি নাম কদা তে মাতা পসীদিস্সতি, কদা তে পিতা পসীদিস্সতি, কদা তে দেৰতাযো পসীদিস্সন্তি, কদা [কদা তে (স্যা.)] সুখণো সুলযো সুমুহুত্তো ভৰিস্সতি, কদা তে মেথুনং ধম্মং লভিস্সামীতি.

পুচ্ছতি নাম কথং ত্ৰং সামিকস্স দেসি, কথং জারস্স দেসীতি?

পটিপুচ্ছতি নাম এৰং কির ত্ৰং সামিকস্স দেসি, এৰং জারস্স দেসীতি.

আচিক্খতি নাম পুট্ঠো ভণতি – ‘‘এৰং দেহি. এৰং দেন্তা সামিকস্স পিযা ভৰিস্সসি মনাপা চা’’তি.

অনুসাসতি নাম অপুট্ঠো ভণতি – ‘‘এৰং দেহি. এৰং দেন্তা সামিকস্স পিযা ভৰিস্সতি মনাপা চা’’তি.

অক্কোসতি নাম অনিমিত্তাসি, নিমিত্তমত্তাসি, অলোহিতাসি, ধুৰলোহিতাসি, ধুৰচোল়াসি, পগ্ঘরন্তীসি, সিখরণীসি, ইত্থিপণ্ডকাসি, ৰেপুরিসিকাসি, সম্ভিন্নাসি, উভতোব্যঞ্জনাসীতি.

২৮৬. ইত্থী চ হোতি ইত্থিসঞ্ঞী সারত্তো চ. ভিক্খু চ নং ইত্থিযা ৰচ্চমগ্গং পস্সাৰমগ্গং আদিস্স ৰণ্ণম্পি ভণতি অৰণ্ণম্পি ভণতি যাচতিপি আযাচতিপি পুচ্ছতিপি পটিপুচ্ছতিপি আচিক্খতিপি অনুসাসতিপি অক্কোসতিপি, আপত্তি সঙ্ঘাদিসেসস্স…পে….

দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ. ভিক্খু চ নং দ্ৰিন্নং ইত্থীনং ৰচ্চমগ্গং পস্সাৰমগ্গং আদিস্স ৰণ্ণম্পি ভণতি অৰণ্ণংপি ভণতি…পে… অক্কোসতিপি, আপত্তি দ্ৰিন্নং সঙ্ঘাদিসেসানং…পে….

ইত্থী চ পণ্ডকো চ উভিন্নং ইত্থিসঞ্ঞী সারত্তো চ. ভিক্খু চ নং উভিন্নং ৰচ্চমগ্গং পস্সাৰমগ্গং আদিস্স ৰণ্ণম্পি ভণতি অৰণ্ণম্পি ভণতি…পে… অক্কোসতিপি, আপত্তি সঙ্ঘাদিসেসেন দুক্কটস্স…পে….

ইত্থী চ হোতি ইত্থিসঞ্ঞী সারত্তো চ. ভিক্খু চ নং ইত্থিযা ৰচ্চমগ্গং পস্সাৰমগ্গং ঠপেত্ৰা অধক্খকং উব্ভজাণুমণ্ডলং আদিস্স ৰণ্ণম্পি ভণতি অৰণ্ণম্পি ভণতি…পে… অক্কোসতিপি, আপত্তি থুল্লচ্চযস্স…পে….

দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ. ভিক্খু চ নং দ্ৰিন্নং ইত্থীনং ৰচ্চমগ্গং পস্সাৰমগ্গং ঠপেত্ৰা অধক্খকং উব্ভজাণুমণ্ডলং আদিস্স ৰণ্ণম্পি ভণতি অৰণ্ণম্পি ভণতি…পে… অক্কোসতিপি, আপত্তি দ্ৰিন্নং থুল্লচ্চযানং…পে….

ইত্থী চ পণ্ডকো চ উভিন্নং ইত্থিসঞ্ঞী সারত্তো চ. ভিক্খু চ নং উভিন্নং ৰচ্চমগ্গং পস্সাৰমগ্গং ঠপেত্ৰা অধক্খকং উব্ভজাণুমণ্ডলং আদিস্স ৰণ্ণম্পি ভণতি অৰণ্ণম্পি ভণতি…পে… অক্কোসতিপি, আপত্তি থুল্লচ্চযেন দুক্কটস্স…পে….

ইত্থী চ হোতি ইত্থিসঞ্ঞী সারত্তো চ. ভিক্খু চ নং ইত্থিযা উব্ভক্খকং অধোজাণুমণ্ডলং আদিস্স ৰণ্ণম্পি ভণতি অৰণ্ণম্পি ভণতি…পে… অক্কোসতিপি, আপত্তি দুক্কটস্স…পে….

দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ. ভিক্খু চ নং দ্ৰিন্নং ইত্থীনং উব্ভক্খকং অধোজাণুমণ্ডলং আদিস্স ৰণ্ণম্পি ভণতি অৰণ্ণম্পি ভণতি…পে… অক্কোসতিপি, আপত্তি দ্ৰিন্নং দুক্কটানং…পে….

ইত্থী চ পণ্ডকো চ উভিন্নং ইত্থিসঞ্ঞী সারত্তো চ. ভিক্খু চ নং উভিন্নং উব্ভক্খকং অধোজাণুমণ্ডলং আদিস্স ৰণ্ণম্পি ভণতি অৰণ্ণম্পি ভণতি…পে… অক্কোসতিপি, আপত্তি দ্ৰিন্নং দুক্কটানং…পে….

ইত্থী চ হোতি ইত্থিসঞ্ঞী সারত্তো চ. ভিক্খু চ নং ইত্থিযা কাযপটিবদ্ধং আদিস্স ৰণ্ণম্পি ভণতি অৰণ্ণম্পি ভণতি…পে… অক্কোসতিপি, আপত্তি দুক্কটস্স…পে….

দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ. ভিক্খু চ নং দ্ৰিন্নং ইত্থীনং কাযপটিবদ্ধং আদিস্স ৰণ্ণম্পি ভণতি অৰণ্ণম্পি ভণতি…পে… অক্কোসতিপি, আপত্তি দ্ৰিন্নং দুক্কটানং…পে….

ইত্থী চ পণ্ডকো চ উভিন্নং ইত্থিসঞ্ঞী সারত্তো চ. ভিক্খু চ নং উভিন্নং কাযপটিবদ্ধং আদিস্স ৰণ্ণম্পি ভণতি অৰণ্ণম্পি ভণতি…পে… অক্কোসতিপি, আপত্তি দ্ৰিন্নং দুক্কটানং…পে….

২৮৭. অনাপত্তি অত্থপুরেক্খারস্স, ধম্মপুরেক্খারস্স, অনুসাসনিপুরেক্খারস্স, উম্মত্তকস্স, আদিকম্মিকস্সাতি.

ৰিনীতৰত্থুউদ্দানগাথা

লোহিতং কক্কসাকিণ্ণং, খরং দীঘঞ্চ ৰাপিতং;

কচ্চি সংসীদতি মগ্গো, সদ্ধা দানেন কম্মুনাতি.

ৰিনীতৰত্থু

২৮৮. তেন খো পন সমযেন অঞ্ঞতরা ইত্থী নৰরত্তং কম্বলং পারুতা হোতি. অঞ্ঞতরো ভিক্খু সারত্তো তং ইত্থিং এতদৰোচ – ‘‘লোহিতং খো তে, ভগিনী’’তি. সা ন পটিৰিজানি. ‘‘আমায্য, নৰরত্তো কম্বলো’’তি. তস্স কুক্কুচ্চং অহোসি ‘‘ভগৰতা সিক্খাপদং পঞ্ঞত্তং, কচ্চি নু খো অহং সঙ্ঘাদিসেসং আপত্তিং আপন্নো’’তি? ভগৰতো এতমত্থং আরোচেসি. ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি.

তেন খো পন সমযেন অঞ্ঞতরা ইত্থী খরকম্বলং পারুতা হোতি. অঞ্ঞতরো ভিক্খু সারত্তো তং ইত্থিং এতদৰোচ – ‘‘কক্কসলোমং খো তে, ভগিনী’’তি. সা ন পটিৰিজানি. ‘‘আমায্য, খরকম্বলকো’’তি. তস্স কুক্কুচ্চং অহোসি…পে… ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি.

তেন খো পন সমযেন অঞ্ঞতরা ইত্থী নৰাৰুতং কম্বলং পারুতা হোতি. অঞ্ঞতরো ভিক্খু সারত্তো তং ইত্থিং এতদৰোচ – ‘‘আকিণ্ণলোমং খো তে, ভগিনী’’তি. সা ন পটিৰিজানি. ‘‘আমায্য, নৰাৰুতো কম্বলো’’তি. তস্স কুক্কুচ্চং অহোসি…পে… ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি.

তেন খো পন সমযেন অঞ্ঞতরা ইত্থী খরকম্বলং পারুতা হোতি. অঞ্ঞতরো ভিক্খু সারত্তো তং ইত্থিং এতদৰোচ – ‘‘খরলোমং খো তে, ভগিনী’’তি. সা ন পটিৰিজানি. ‘‘আমায্য, খরকম্বলকো’’তি. তস্স কুক্কুচ্চং অহোসি…পে… ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি.

তেন খো পন সমযেন অঞ্ঞতরা ইত্থী পাৰারং [দীঘপাৰারং (স্যা.)] পারুতা হোতি. অঞ্ঞতরো ভিক্খু সারত্তো তং ইত্থিং এতদৰোচ – ‘‘দীঘলোমং খো তে, ভগিনী’’তি. সা ন পটিৰিজানি. ‘‘আমায্য, পাৰারো’’ [দীঘপাৰারো (স্যা.)] তি. তস্স কুক্কুচ্চং অহোসি…পে… ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি.

২৮৯. তেন খো পন সমযেন অঞ্ঞতরা ইত্থী খেত্তং ৰপাপেত্ৰা আগচ্ছতি. অঞ্ঞতরো ভিক্খু সারত্তো তং ইত্থিং এতদৰোচ – ‘‘ৰাপিতং খো তে, ভগিনী’’তি? সা ন পটিৰিজানি. ‘‘আমায্য, নো চ খো পটিৰুত্ত’’ন্তি. তস্স কুক্কুচ্চং অহোসি…পে… ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি.

তেন খো পন সমযেন অঞ্ঞতরো ভিক্খু পরিব্বাজিকং পটিপথে পস্সিত্ৰা সারত্তো তং পরিব্বাজিকং এতদৰোচ – ‘‘কচ্চি, ভগিনি, মগ্গো সংসীদতী’’তি? সা ন পটিৰিজানি. ‘‘আম ভিক্খু, পটিপজ্জিস্সসী’’তি. তস্স কুক্কুচ্চং অহোসি…পে… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি.

তেন খো পন সমযেন অঞ্ঞতরো ভিক্খু সারত্তো অঞ্ঞতরং ইত্থিং এতদৰোচ – ‘‘সদ্ধাসি ত্ৰং, ভগিনি. অপিচ, যং সামিকস্স দেসি তং নাম্হাকং দেসী’’তি. ‘‘কিং, ভন্তে’’তি? ‘‘মেথুনধম্ম’’ন্তি. তস্স কুক্কুচ্চং অহোসি…পে… ‘‘আপত্তিং ত্ৰং, ভিক্খু, আপন্নো সঙ্ঘাদিসেস’’ন্তি.

তেন খো পন সমযেন অঞ্ঞতরো ভিক্খু সারত্তো অঞ্ঞতরং ইত্থিং এতদৰোচ – ‘‘সদ্ধাসি ত্ৰং, ভগিনি. অপিচ, যং অগ্গদানং তং নাম্হাকং দেসী’’তি. ‘‘কিং, ভন্তে, অগ্গদান’’ন্তি? ‘‘মেথুনধম্ম’’ন্তি. তস্স কুক্কুচ্চং অহোসি…পে… ‘‘আপত্তিং ত্ৰং, ভিক্খু, আপন্নো সঙ্ঘাদিসেস’’ন্তি.

তেন খো পন সমযেন অঞ্ঞতরা ইত্থী কম্মং করোতি. অঞ্ঞতরো ভিক্খু সারত্তো তং ইত্থিং এতদৰোচ – ‘‘তিট্ঠ, ভগিনি, অহং করিস্সামীতি…পে… নিসীদ, ভগিনি, অহং করিস্সামীতি…পে… নিপজ্জ, ভগিনি, অহং করিস্সামী’’তি. সা ন পটিৰিজানি. তস্স কুক্কুচ্চং অহোসি…পে… ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি.

দুট্ঠুল্লৰাচাসিক্খাপদং নিট্ঠিতং ততিযং.