৭. পাদুকৰগ্গো

১২৪১. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ছব্বগ্গিযা ভিক্খুনিযো উদকে উচ্চারম্পি পস্সাৰম্পি খেল়ম্পি করোন্তি. মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো উদকে উচ্চারম্পি পস্সাৰম্পি খেল়ম্পি করিস্সন্তি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যা তা ভিক্খুনিযো অপ্পিচ্ছা, তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খুনিযো উদকে উচ্চারম্পি পস্সাৰম্পি খেল়ম্পি করিস্সন্তী’’তি! অথ খো ভিক্খুনিযো ভিক্খূনং এতমত্থং আরোচেসুং. ভিক্খূ [যে তে ভিক্খূ…পে… (?)] ভগৰতো এতমত্থং আরোচেসুং. অথ খো ভগৰা…পে… ভিক্খূ পটিপুচ্ছি – ‘‘সচ্চং কির, ভিক্খৰে, ছব্বগ্গিযা ভিক্খুনিযো উদকে উচ্চারম্পি পস্সাৰম্পি খেল়ম্পি করোন্তী’’তি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ছব্বগ্গিযা ভিক্খুনিযো উদকে উচ্চারম্পি পস্সাৰম্পি খেল়ম্পি করিস্সন্তি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

‘‘ন উদকে উচ্চারং ৰা পস্সাৰং ৰা খেল়ং ৰা করিস্সামীতি সিক্খা করণীযা’’তি.

এৰঞ্চিদং ভগৰতা ভিক্খুনীনং সিক্খাপদং পঞ্ঞত্তং হোতি.

তেন খো পন সমযেন গিলানা ভিক্খুনিযো উদকে উচ্চারম্পি পস্সাৰম্পি খেল়ম্পি কাতুং কুক্কুচ্চাযন্তি. ভগৰতো এতমত্থং আরোচেসুং…পে… অনুজানামি, ভিক্খৰে, গিলানায ভিক্খুনিযা উদকে উচ্চারম্পি পস্সাৰম্পি খেল়ম্পি কাতুং. এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

‘‘ন উদকে অগিলানা উচ্চারং ৰা পস্সাৰং ৰা খেল়ং ৰা করিস্সামীতি সিক্খা করণীযা’’তি.

ন উদকে অগিলানায উচ্চারো ৰা পস্সাৰো ৰা খেল়ো ৰা কাতব্বো. যা অনাদরিযং পটিচ্চ উদকে অগিলানা উচ্চারং ৰা পস্সাৰং ৰা খেল়ং ৰা করোতি, আপত্তি দুক্কটস্স.

অনাপত্তি অসঞ্চিচ্চ, অস্সতিযা, অজানন্তিযা, গিলানায, থলে কতো উদকং ওত্থরতি, আপদাসু, উম্মত্তিকায, খিত্তচিত্তায, ৰেদনাট্টায, আদিকম্মিকাযাতি.

পন্নরসমসিক্খাপদং নিট্ঠিতং.

পাদুকৰগ্গো সত্তমো.

উদ্দিট্ঠা খো, অয্যাযো, সেখিযা ধম্মা. তত্থায্যাযো পুচ্ছামি – ‘‘কচ্চিত্থ পরিসুদ্ধা’’? দুতিযম্পি পুচ্ছামি – ‘‘কচ্চিত্থ পরিসুদ্ধা’’? ততিযম্পি পুচ্ছামি – ‘‘কচ্চিত্থ পরিসুদ্ধা’’? পরিসুদ্ধেত্থায্যাযো, তস্মা তুণ্হী, এৰমেতং ধারযামীতি.

সেখিযকণ্ডং নিট্ঠিতং.