৪. সক্কচ্চৰগ্গো

৬০৬. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ছব্বগ্গিযা ভিক্খূ অসক্কচ্চং পিণ্ডপাতং ভুঞ্জন্তি অভুঞ্জিতুকামা ৰিয…পে….

‘‘সক্কচ্চং পিণ্ডপাতং ভুঞ্জিস্সামীতি সিক্খা করণীযা’’তি.

সক্কচ্চং পিণ্ডপাতো ভুঞ্জিতব্বো. যো অনাদরিযং পটিচ্চ অসক্কচ্চং পিণ্ডপাতং ভুঞ্জতি, আপত্তি দুক্কটস্স.

অনাপত্তি অসঞ্চিচ্চ, অস্সতিযা, অজানন্তস্স, গিলানস্স, আপদাসু, উম্মত্তকস্স,

আদিকম্মিকস্সাতি.

পঠমসিক্খাপদং নিট্ঠিতং.

৬০৭. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ছব্বগ্গিযা ভিক্খূ তহং তহং ওলোকেন্তা পিণ্ডপাতং ভুঞ্জন্তি, আকিরন্তেপি অতিক্কন্তেপি ন জানন্তি…পে….

‘‘পত্তসঞ্ঞী পিণ্ডপাতং ভুঞ্জিস্সামীতি সিক্খা করণীযা’’তি.

পত্তসঞ্ঞিনা পিণ্ডপাতো ভুঞ্জিতব্বো. যো অনাদরিযং পটিচ্চ তহং তহং ওলোকেন্তো পিণ্ডপাতং ভুঞ্জতি, আপত্তি দুক্কটস্স.

অনাপত্তি অসঞ্চিচ্চ…পে… আদিকম্মিকস্সাতি.

দুতিযসিক্খাপদং নিট্ঠিতং.

৬০৮. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ছব্বগ্গিযা ভিক্খূ তহং তহং ওমসিত্ৰা [ওমদ্দিত্ৰা (ক.)] পিণ্ডপাতং ভুঞ্জন্তি…পে….

‘‘সপদানং পিণ্ডপাতং ভুঞ্জিস্সামীতি সিক্খা করণীযা’’তি.

সপদানং পিণ্ডপাতো ভুঞ্জিতব্বো. যো অনাদরিযং পটিচ্চ তহং তহং ওমসিত্ৰা [ওমদ্দিত্ৰা (ক.)] পিণ্ডপাতং ভুঞ্জতি, আপত্তি দুক্কটস্স.

অনাপত্তি অসঞ্চিচ্চ, অস্সতিযা, অজানন্তস্স, গিলানস্স, অঞ্ঞেসং দেন্তো ওমসতি, অঞ্ঞস্স ভাজনে আকিরন্তো ওমসতি, উত্তরিভঙ্গে, আপদাসু, উম্মত্তকস্স, আদিকম্মিকস্সাতি.

ততিযসিক্খাপদং নিট্ঠিতং.

৬০৯. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ছব্বগ্গিযা ভিক্খূ পিণ্ডপাতং ভুঞ্জন্তা সূপঞ্ঞেৰ বহুং ভুঞ্জন্তি…পে….

‘‘সমসূপকং পিণ্ডপাতং ভুঞ্জিস্সামীতি সিক্খা করণীযা’’তি.

সূপো নাম দ্ৰে সূপা – মুগ্গসূপো, মাসসূপো হত্থহারিযো. সমসূপকো পিণ্ডপাতো ভুঞ্জিতব্বো. যো অনাদরিযং পটিচ্চ সূপঞ্ঞেৰ বহুং ভুঞ্জতি, আপত্তি দুক্কটস্স.

অনাপত্তি অসঞ্চিচ্চ, অস্সতিযা, অজানন্তস্স, গিলানস্স, রসরসে, ঞাতকানং পৰারিতানং, অত্তনো ধনেন, আপদাসু, উম্মত্তকস্স, আদিকম্মিকস্সাতি.

চতুত্থসিক্খাপদং নিট্ঠিতং.

৬১০. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ছব্বগ্গিযা ভিক্খূ থূপকতো ওমদ্দিত্ৰা পিণ্ডপাতং ভুঞ্জন্তি…পে….

‘‘ন থূপকতো ওমদ্দিত্ৰা পিণ্ডপাতং ভুঞ্জিস্সামীতি সিক্খা করণীযা’’তি.

ন থূপকতো ওমদ্দিত্ৰা পিণ্ডপাতো ভুঞ্জিতব্বো. যো অনাদরিযং পটিচ্চ থূপকতো ওমদ্দিত্ৰা পিণ্ডপাতং ভুঞ্জতি আপত্তি দুক্কটস্স.

অনাপত্তি অসঞ্চিচ্চ, অস্সতিযা, অজানন্তস্স, গিলানস্স, পরিত্তকে সেসে একতো সংকড্ঢিত্ৰা ওমদ্দিত্ৰা ভুঞ্জতি, আপদাসু, উম্মত্তকস্স, আদিকম্মিকস্সাতি.

পঞ্চমসিক্খাপদং নিট্ঠিতং.

৬১১. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ছব্বগ্গিযা ভিক্খূ সূপম্পি ব্যঞ্জনম্পি ওদনেন পটিচ্ছাদেন্তি ভিয্যোকম্যতং উপাদায…পে….

‘‘ন সূপং ৰা ব্যঞ্জনং ৰা ওদনেন পটিচ্ছাদেস্সামি ভিয্যোকম্যতং উপাদাযাতি সিক্খা করণীযা’’তি.

ন সূপং ৰা ব্যঞ্জনং ৰা ওদনেন পটিচ্ছাদেতব্বং ভিয্যোকম্যতং উপাদায. যো অনাদরিযং পটিচ্চ সূপং ৰা ব্যঞ্জনং ৰা ওদনেন পটিচ্ছাদেতি ভিয্যোকম্যতং উপাদায, আপত্তি দুক্কটস্স.

অনাপত্তি অসঞ্চিচ্চ, অস্সতিযা, অজানন্তস্স, সামিকা পটিচ্ছাদেত্ৰা দেন্তি, ন ভিয্যোকম্যতং উপাদায, আপদাসু, উম্মত্তকস্স, আদিকম্মিকস্সাতি.

ছট্ঠসিক্খাপদং নিট্ঠিতং.

৬১২. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ছব্বগ্গিযা ভিক্খূ সূপম্পি ওদনম্পি অত্তনো অত্থায ৰিঞ্ঞাপেত্ৰা ভুঞ্জন্তি. মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা সূপম্পি ওদনম্পি অত্তনো অত্থায ৰিঞ্ঞাপেত্ৰা ভুঞ্জিস্সন্তি! কস্স সম্পন্নং ন মনাপং! কস্স সাদুং ন রুচ্চতী’’তি! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ সূপম্পি ওদনম্পি অত্তনো অত্থায ৰিঞ্ঞাপেত্ৰা ভুঞ্জিস্সন্তী’’তি…পে… সচ্চং কির তুম্হে, ভিক্খৰে, সূপম্পি ওদনম্পি অত্তনো অত্থায ৰিঞ্ঞাপেত্ৰা ভুঞ্জথাতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম তুম্হে, মোঘপুরিসা, সূপম্পি ওদনম্পি অত্তনো অত্থায ৰিঞ্ঞাপেত্ৰা ভুঞ্জিস্সথ! নেতং, মোঘপুরিসা, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

‘‘ন সূপং ৰা ওদনং ৰা অত্তনো অত্থায ৰিঞ্ঞাপেত্ৰা ভুঞ্জিস্সামীতি সিক্খা করণীযা’’তি.

এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি.

৬১৩. তেন খো পন সমযেন ভিক্খূ গিলানা হোন্তি. গিলানপুচ্ছকা ভিক্খূ গিলানে ভিক্খূ এতদৰোচুং – ‘‘কচ্চাৰুসো, খমনীযং, কচ্চি যাপনীয’’ন্তি? ‘‘পুব্বে মযং, আৰুসো, সূপম্পি ওদনম্পি অত্তনো অত্থায ৰিঞ্ঞাপেত্ৰা ভুঞ্জাম, তেন নো ফাসু হোতি. ইদানি পন – ‘‘ভগৰতা পটিক্খিত্ত’’ন্তি কুক্কুচ্চাযন্তা ন ৰিঞ্ঞাপেম, তেন নো ন ফাসু হোতী’’তি. ভগৰতো এতমত্থং আরোচেসুং…পে… অনুজানামি, ভিক্খৰে, গিলানেন ভিক্খুনা সূপম্পি ওদনম্পি অত্তনো অত্থায ৰিঞ্ঞাপেত্ৰা ভুঞ্জিতুং. এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

‘‘ন সূপং ৰা ওদনং ৰা অগিলানো অত্তনো অত্থায ৰিঞ্ঞাপেত্ৰা ভুঞ্জিস্সামীতি সিক্খা করণীযা’’তি.

ন সূপং ৰা ওদনং ৰা অগিলানেন অত্তনো অত্থায ৰিঞ্ঞাপেত্ৰা ভুঞ্জিতব্বং. যো অনাদরিযং পটিচ্চ সূপং ৰা ওদনং ৰা অগিলানো অত্তনো অত্থায ৰিঞ্ঞাপেত্ৰা ভুঞ্জতি, আপত্তি দুক্কটস্স.

অনাপত্তি অসঞ্চিচ্চ, অস্সতিযা, অজানন্তস্স, গিলানস্স, ঞাতকানং পৰারিতানং, অঞ্ঞস্সত্থায, অত্তনো ধনেন, আপদাসু, উম্মত্তকস্স, আদিকম্মিকস্সাতি.

সত্তমসিক্খাপদং নিট্ঠিতং.

৬১৪. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ছব্বগ্গিযা ভিক্খূ উজ্ঝানসঞ্ঞী পরেসং পত্তং ওলোকেন্তি…পে….

‘‘ন উজ্ঝানসঞ্ঞী পরেসং পত্তং ওলোকেস্সামীতি সিক্খা করণীযা’’তি.

ন উজ্ঝানসঞ্ঞিনা পরেসং পত্তো ওলোকেতব্বো. যো অনাদরিযং পটিচ্চ উজ্ঝানসঞ্ঞী পরেসং পত্তং ওলোকেতি, আপত্তি দুক্কটস্স.

অনাপত্তি অসঞ্চিচ্চ, অস্সতিযা, অজানন্তস্স, ‘‘দস্সামী’’তি ৰা ‘‘দাপেস্সামী’’তি ৰা ওলোকেতি, ন উজ্ঝানসঞ্ঞিস্স, আপদাসু, উম্মত্তকস্স, আদিকম্মিকস্সাতি.

অট্ঠমসিক্খাপদং নিট্ঠিতং.

৬১৫. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ছব্বগ্গিযা ভিক্খূ মহন্তং কবল়ং করোন্তি…পে….

‘‘নাতিমহন্তং কবল়ং করিস্সামীতি সিক্খা করণীযা’’তি.

নাতিমহন্তো কবল়ো কাতব্বো. যো অনাদরিযং পটিচ্চ মহন্তং কবল়ং করোতি, আপত্তি দুক্কটস্স.

অনাপত্তি অসঞ্চিচ্চ, অস্সতিযা, অজানন্তস্স, গিলানস্স, খজ্জকে, ফলাফলে, উত্তরিভঙ্গে, আপদাসু, উম্মত্তকস্স, আদিকম্মিকস্সাতি.

নৰমসিক্খাপদং নিট্ঠিতং.

৬১৬. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ছব্বগ্গিযা ভিক্খূ দীঘং আলোপং করোন্তি…পে….

‘‘পরিমণ্ডলং আলোপং করিস্সামীতি সিক্খা করণীযা’’তি.

পরিমণ্ডলো আলোপো কাতব্বো. যো অনাদরিযং পটিচ্চ দীঘং আলোপং করোতি, আপত্তি দুক্কটস্স.

অনাপত্তি অসঞ্চিচ্চ, অস্সতিযা, অজানন্তস্স, গিলানস্স, খজ্জকে, ফলাফলে, উত্তরিভঙ্গে, আপদাসু, উম্মত্তকস্স, আদিকম্মিকস্সাতি.

দসমসিক্খাপদং নিট্ঠিতং.

সক্কচ্চৰগ্গো চতুত্থো.