২৬৭. অদস্সনে উক্খেপনীযকম্মপটিপ্পস্সদ্ধিকথা

৪৪৮. ইধ পন, ভিক্খৰে, ভিক্খু সঙ্ঘেন আপত্তিযা অদস্সনে উক্খেপনীযকম্মকতো সম্মা ৰত্ততি, লোমং পাতেতি, নেত্থারং ৰত্ততি, আপত্তিযা অদস্সনে উক্খেপনীযস্স কম্মস্স পটিপ্পস্সদ্ধিং যাচতি. তত্র চে ভিক্খূনং এৰং হোতি – ‘‘অযং খো, আৰুসো, ভিক্খু সঙ্ঘেন আপত্তিযা অদস্সনে উক্খেপনীযকম্মকতো সম্মা ৰত্ততি, লোমং পাতেতি, নেত্থারং ৰত্ততি, আপত্তিযা অদস্সনে উক্খেপনীযস্স কম্মস্স পটিপ্পস্সদ্ধিং যাচতি. হন্দস্স মযং আপত্তিযা অদস্সনে উক্খেপনীযকম্মং পটিপ্পস্সম্ভেমা’’তি. তে তস্স আপত্তিযা অদস্সনে উক্খেপনীযকম্মং পটিপ্পস্সম্ভেন্তি – অধম্মেন ৰগ্গা…পে… অধম্মেন সমগ্গা… ধম্মেন ৰগ্গা… ধম্মপতিরূপকেন ৰগ্গা… ধম্মপতিরূপকেন সমগ্গা. তত্রট্ঠো সঙ্ঘো ৰিৰদতি – ‘‘অধম্মেন ৰগ্গকম্মং, অধম্মেন সমগ্গকম্মং, ধম্মেন ৰগ্গকম্মং, ধম্মপতিরূপকেন ৰগ্গকম্মং, ধম্মপতিরূপকেন সমগ্গকম্মং, অকতং কম্মং দুক্কটং কম্মং পুন কাতব্বং কম্ম’’ন্তি. তত্র, ভিক্খৰে, যে তে ভিক্খূ এৰমাহংসু – ‘‘ধম্মপতিরূপকেন সমগ্গকম্ম’’ন্তি, যে চ তে ভিক্খূ এৰমাহংসু – ‘‘অকতং কম্মং দুক্কটং কম্মং পুন কাতব্বং কম্ম’’ন্তি, ইমে তত্থ ভিক্খূ ধম্মৰাদিনো. ইমেপি পঞ্চ ৰারা সংখিত্তা.

অদস্সনে উক্খেপনীযকম্মপটিপ্পস্সদ্ধিকথা নিট্ঠিতা.