২৬৪. নিযস্সকম্মপটিপ্পস্সদ্ধিকথা

৪৪৫. ইধ পন, ভিক্খৰে, ভিক্খু সঙ্ঘেন নিযস্সকম্মকতো সম্মা ৰত্ততি, লোমং পাতেতি, নেত্থারং ৰত্ততি, নিযস্সস্স কম্মস্স পটিপ্পস্সদ্ধিং যাচতি. তত্র চে ভিক্খূনং এৰং হোতি – ‘‘অযং খো, আৰুসো, ভিক্খু সঙ্ঘেন নিযস্সকম্মকতো সম্মা ৰত্ততি, লোমং পাতেতি, নেত্থারং ৰত্ততি, নিযস্সস্স কম্মস্স পটিপ্পস্সদ্ধিং যাচতি. হন্দস্স মযং নিযস্সকম্মং পটিপ্পস্সম্ভেমা’’তি. তে তস্স নিযস্সকম্মং পটিপ্পস্সম্ভেন্তি – অধম্মেন ৰগ্গা…পে… অধম্মেন সমগ্গা… ধম্মেন ৰগ্গা… ধম্মপতিরূপকেন ৰগ্গা… ধম্মপতিরূপকেন সমগ্গা. তত্রট্ঠো সঙ্ঘো ৰিৰদতি – ‘‘অধম্মেন ৰগ্গকম্মং, অধম্মেন সমগ্গকম্মং, ধম্মেন ৰগ্গকম্মং, ধম্মপতিরূপকেন ৰগ্গকম্মং, ধম্মপতিরূপকেন সমগ্গকম্মং, অকতং কম্মং দুক্কটং কম্মং পুন কাতব্বং কম্ম’’ন্তি. তত্র, ভিক্খৰে, যে তে ভিক্খূ এৰমাহংসু – ‘‘ধম্মপতিরূপকেন সমগ্গকম্ম’’ন্তি, যে চ তে ভিক্খূ এৰমাহংসু – ‘‘অকতং কম্মং দুক্কটং কম্মং পুন কাতব্বং কম্ম’’ন্তি, ইমে তত্থ ভিক্খূ ধম্মৰাদিনো. ইমেপি [ইমে (সী. স্যা. এৰমুপরিপি)] পঞ্চ ৰারা সংখিত্তা.

নিযস্সকম্মপটিপ্পস্সদ্ধিকথা নিট্ঠিতা.