২৪৮. অপ্পটিনিস্সগ্গে উক্খেপনীযকম্মকথা

৪১৭. ইধ পন, ভিক্খৰে, ভিক্খু ন ইচ্ছতি পাপিকং দিট্ঠিং পটিনিস্সজ্জিতুং. তত্র চে ভিক্খূনং এৰং হোতি – ‘‘অযং খো, আৰুসো, ভিক্খু ন ইচ্ছতি পাপিকং দিট্ঠিং পটিনিস্সজ্জিতুং. হন্দস্স মযং পাপিকায দিট্ঠিযা অপ্পটিনিস্সগ্গে উক্খেপনীযকম্মং করোমা’’তি. তে তস্স পাপিকায দিট্ঠিযা অপ্পটিনিস্সগ্গে উক্খেপনীযকম্মং করোন্তি – অধম্মেন ৰগ্গা. সো তম্হা আৰাসা অঞ্ঞং আৰাসং গচ্ছতি. তত্থপি ভিক্খূনং এৰং হোতি – ‘‘অযং খো, আৰুসো, ভিক্খু সঙ্ঘেন পাপিকায দিট্ঠিযা অপ্পটিনিস্সগ্গে উক্খেপনীযকম্মকতো অধম্মেন ৰগ্গেহি. হন্দস্স মযং পাপিকায দিট্ঠিযা অপ্পটিনিস্সগ্গে উক্খেপনীযকম্মং করোমা’’তি. তে তস্স পাপিকায দিট্ঠিযা অপ্পটিনিস্সগ্গে উক্খেপনীযকম্মং করোন্তি – অধম্মেন সমগ্গা…পে… ধম্মেন ৰগ্গা… ধম্মপতিরূপকেন ৰগ্গা… ধম্মপতিরূপকেন সমগ্গা…পে….

চক্কং কাতব্বং.

অপ্পটিনিস্সগ্গে উক্খেপনীযকম্মকথা নিট্ঠিতা.