২৪৪. পব্বাজনীযকম্মকথা

৪১৩. ইধ পন, ভিক্খৰে, ভিক্খু কুলদূসকো হোতি পাপসমাচারো. তত্র চে ভিক্খূনং এৰং হোতি – ‘‘অযং খো, আৰুসো, ভিক্খু কুলদূসকো পাপসমাচারো. হন্দস্স মযং পব্বাজনীযকম্মং করোমা’’তি. তে তস্স পব্বাজনীযকম্মং করোন্তি – অধম্মেন ৰগ্গা. সো তম্হা আৰাসা অঞ্ঞং আৰাসং গচ্ছতি. তত্থপি ভিক্খূনং এৰং হোতি – ‘‘অযং খো, আৰুসো, ভিক্খু সঙ্ঘেন পব্বাজনীযকম্মকতো অধম্মেন ৰগ্গেহি. হন্দস্স মযং পব্বাজনীযকম্মং করোমা’’তি. তে তস্স পব্বাজনীযকম্মং করোন্তি – অধম্মেন সমগ্গা…পে… ধম্মেন ৰগ্গা… ধম্মপতিরূপকেন ৰগ্গা… ধম্মপতিরূপকেন সমগ্গা…পে….

চক্কং কাতব্বং.

পব্বাজনীযকম্মকতা নিট্ঠিতা.