২৩২. অট্ঠচীৰরমাতিকা

৩৭৯. অট্ঠিমা, ভিক্খৰে, মাতিকা চীৰরস্স উপ্পাদায – সীমায দেতি, কতিকায দেতি, ভিক্খাপঞ্ঞত্তিযা দেতি, সঙ্ঘস্স দেতি, উভতোসঙ্ঘস্স দেতি, ৰস্সংৰুট্ঠসঙ্ঘস্স দেতি, আদিস্স দেতি, পুগ্গলস্স দেতি.

সীমায দেতি – যাৰতিকা ভিক্খূ অন্তোসীমগতা তেহি ভাজেতব্বং. কতিকায দেতি – সম্বহুলা আৰাসা সমানলাভা হোন্তি একস্মিং আৰাসে দিন্নে সব্বত্থ দিন্নং হোতি. ভিক্খাপঞ্ঞত্তিযা দেতি, যত্থ সঙ্ঘস্স ধুৰকারা করিয্যন্তি, তত্থ দেতি. সঙ্ঘস্স দেতি, সম্মুখীভূতেন সঙ্ঘেন ভাজেতব্বং. উভতোসঙ্ঘস্স দেতি, বহুকাপি ভিক্খূ হোন্তি, একা ভিক্খুনী হোতি, উপড্ঢং দাতব্বং, বহুকাপি ভিক্খুনিযো হোন্তি, একো ভিক্খু হোতি, উপড্ঢং দাতব্বং. ৰস্সংৰুট্ঠসঙ্ঘস্স দেতি, যাৰতিকা ভিক্খূ তস্মিং আৰাসে ৰস্সংৰুট্ঠা, তেহি ভাজেতব্বং. আদিস্স দেতি, যাগুযা ৰা ভত্তে ৰা খাদনীযে ৰা চীৰরে ৰা সেনাসনে ৰা ভেসজ্জে ৰা. পুগ্গলস্স দেতি, ‘‘ইমং চীৰরং ইত্থন্নামস্স দম্মী’’তি.

অট্ঠচীৰরমাতিকা নিট্ঠিতা.

চীৰরক্খন্ধকো অট্ঠমো.