২২৮. সব্বনীলকাদিপটিক্খেপকথা

৩৭২. তেন খো পন সমযেন ছব্বগ্গিযা ভিক্খূ সব্বনীলকানি চীৰরানি ধারেন্তি…পে… সব্বপীতকানি চীৰরানি ধারেন্তি…পে… সব্বলোহিতকানি চীৰরানি ধারেন্তি…পে… সব্বমঞ্জিট্ঠকানি [সব্বমঞ্জেট্ঠকানি (সী. স্যা.)] চীৰরানি ধারেন্তি…পে… সব্বকণ্হানি চীৰরানি ধারেন্তি …পে… সব্বমহারঙ্গরত্তানি চীৰরানি ধারেন্তি…পে… সব্বমহানামরত্তানি চীৰরানি ধারেন্তি…পে… অচ্ছিন্নদসানি চীৰরানি ধারেন্তি…পে… দীঘদসানি চীৰরানি ধারেন্তি…পে… পুপ্ফদসানি চীৰরানি ধারেন্তি…পে… ফণদসানি [ফলদসানি (ক.)] চীৰরানি ধারেন্তি…পে… কঞ্চুকং ধারেন্তি…পে… তিরীটকং ধারেন্তি…পে… ৰেঠনং ধারেন্তি. মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা ৰেঠনং ধারেস্সন্তি, সেয্যথাপি গিহী কামভোগিনো’’তি. ভগৰতো এতমত্থং আরোচেসুং. ন, ভিক্খৰে, সব্বনীলকানি চীৰরানি ধারেতব্বানি, ন সব্বপীতকানি চীৰরানি ধারেতব্বানি, ন সব্বলোহিতকানি চীৰরানি ধারেতব্বানি, ন সব্বমঞ্জিট্ঠকানি চীৰরানি ধারেতব্বানি, ন সব্বকণ্হানি চীৰরানি ধারেতব্বানি, ন সব্বমহারঙ্গরত্তানি চীৰরানি ধারেতব্বানি, ন সব্বমহানামরত্তানি চীৰরানি ধারেতব্বানি, ন অচ্ছিন্নদসানি চীৰরানি ধারেতব্বানি, ন দীঘদসানি চীৰরানি ধারেতব্বানি, ন পুপ্ফদসানি চীৰরানি ধারেতব্বানি, ন ফণদসানি চীৰরানি ধারেতব্বানি, ন কঞ্চুকং ধারেতব্বং, ন তিরীটকং ধারেতব্বং, ন ৰেঠনং ধারেতব্বং. যো ধারেয্য, আপত্তি দুক্কটস্সাতি.

সব্বনীলকাদিপটিক্খেপকথা নিট্ঠিতা.