২২৫. মতসন্তককথা

৩৬৭. তেন খো পন সমযেন দ্ৰে ভিক্খূ কোসলেসু জনপদে অদ্ধানমগ্গপ্পটিপন্না হোন্তি. তে অঞ্ঞতরং আৰাসং উপগচ্ছিংসু. তত্থ অঞ্ঞতরো ভিক্খু গিলানো হোতি. অথ খো তেসং ভিক্খূনং এতদহোসি – ‘‘ভগৰতা খো, আৰুসো, গিলানুপট্ঠানং ৰণ্ণিতং. হন্দ, মযং, আৰুসো, ইমং ভিক্খুং উপট্ঠহেমা’’তি. তে তং উপট্ঠহিংসু. সো তেহি উপট্ঠহিযমানো কালমকাসি. অথ খো তে ভিক্খূ তস্স ভিক্খুনো পত্তচীৰরমাদায সাৰত্থিং গন্ত্ৰা ভগৰতো এতমত্থং আরোচেসুং. ‘‘ভিক্খুস্স, ভিক্খৰে, কালঙ্কতে সঙ্ঘো সামী পত্তচীৰরে, অপিচ গিলানুপট্ঠাকা বহূপকারা. অনুজানামি, ভিক্খৰে, সঙ্ঘেন তিচীৰরঞ্চ পত্তঞ্চ গিলানুপট্ঠাকানং দাতুং. এৰঞ্চ পন, ভিক্খৰে, দাতব্বং. তেন গিলানুপট্ঠাকেন ভিক্খুনা সঙ্ঘং উপসঙ্কমিত্ৰা এৰমস্স ৰচনীযো – ‘ইত্থন্নামো, ভন্তে, ভিক্খু কালঙ্কতো. ইদং তস্স তিচীৰরঞ্চ পত্তো চা’’’তি. ব্যত্তেন ভিক্খুনা পটিবলেন সঙ্ঘো ঞাপেতব্বো –

‘‘সুণাতু মে, ভন্তে, সঙ্ঘো. ইত্থন্নামো ভিক্খু কালঙ্কতো. ইদং তস্স তিচীৰরঞ্চ পত্তো চ. যদি সঙ্ঘস্স পত্তকল্লং, সঙ্ঘো ইমং তিচীৰরঞ্চ পত্তঞ্চ গিলানুপট্ঠাকানং দদেয্য. এসা ঞত্তি.

‘‘সুণাতু মে, ভন্তে, সঙ্ঘো. ইত্থন্নামো ভিক্খু কালঙ্কতো. ইদং তস্স তিচীৰরঞ্চ পত্তো চ. সঙ্ঘো ইমং তিচীৰরঞ্চ পত্তঞ্চ গিলানুপট্ঠাকানং দেতি. যস্সাযস্মতো খমতি ইমস্স তিচীৰরস্স চ পত্তস্স চ গিলানুপট্ঠাকানং দানং, সো তুণ্হস্স; যস্স নক্খমতি, সো ভাসেয্য.

‘‘দিন্নং ইদং সঙ্ঘেন তিচীৰরঞ্চ পত্তো চ গিলানুপট্ঠাকানং. খমতি সঙ্ঘস্স, তস্মা তুণ্হী, এৰমেতং ধারযামী’’তি.

৩৬৮. তেন খো পন সমযেন অঞ্ঞতরো সামণেরো কালঙ্কতো হোতি. ভগৰতো এতমত্থং আরোচেসুং. সামণেরস্স, ভিক্খৰে, কালঙ্কতে সঙ্ঘো সামী পত্তচীৰরে, অপি চ গিলানুপট্ঠাকা বহূপকারা. অনুজানামি, ভিক্খৰে, সঙ্ঘেন চীৰরঞ্চ পত্তঞ্চ গিলানুপট্ঠাকানং দাতুং. এৰঞ্চ পন, ভিক্খৰে, দাতব্বং. তেন গিলানুপট্ঠাকেন ভিক্খুনা সঙ্ঘং উপসঙ্কমিত্ৰা এৰমস্স ৰচনীযো – ‘‘ইত্থন্নামো, ভন্তে, সামণেরো কালঙ্কতো, ইদং তস্স চীৰরঞ্চ পত্তো চা’’তি. ব্যত্তেন ভিক্খুনা পটিবলেন সঙ্ঘো ঞাপেতব্বো –

‘‘সুণাতু মে, ভন্তে, সঙ্ঘো. ইত্থন্নামো সামণেরো কালঙ্কতো. ইদং তস্স চীৰরঞ্চ পত্তো চ. যদি সঙ্ঘস্স পত্তকল্লং, সঙ্ঘো ইমং চীৰরঞ্চ পত্তঞ্চ গিলানুপট্ঠাকানং দদেয্য. এসা ঞত্তি.

‘‘সুণাতু মে, ভন্তে, সঙ্ঘো. ইত্থন্নামো সামণেরো কালঙ্কতো. ইদং তস্স চীৰরঞ্চ পত্তো চ. সঙ্ঘো ইমং চীৰরঞ্চ পত্তঞ্চ গিলানুপট্ঠাকানং দেতি. যস্সাযস্মতো খমতি ইমস্স চীৰরস্স চ পত্তস্স চ গিলানুপট্ঠাকানং দানং, সো তুণ্হস্স; যস্স নক্খমতি, সো ভাসেয্য.

‘‘দিন্নং ইদং সঙ্ঘেন চীৰরঞ্চ পত্তো চ গিলানুপট্ঠাকানং. খমতি সঙ্ঘস্স, তস্মা তুণ্হী, এৰমেতং ধারযামী’’তি.

৩৬৯. তেন খো পন সমযেন অঞ্ঞতরো ভিক্খু চ সামণেরো চ গিলানং উপট্ঠহিংসু. সো তেহি উপট্ঠহিযমানো কালমকাসি. অথ খো তস্স গিলানুপট্ঠাকস্স ভিক্খুনো এতদহোসি – ‘‘কথং নু খো গিলানুপট্ঠাকস্স সামণেরস্স চীৰরপটিৰীসো দাতব্বো’’তি? ভগৰতো এতমত্থং আরোচেসুং. অনুজানামি, ভিক্খৰে, গিলানুপট্ঠাকস্স সামণেরস্স সমকং পটিৰীসং দাতুন্তি.

তেন খো পন সমযেন অঞ্ঞতরো ভিক্খু বহুভণ্ডো বহুপরিক্খারো কালঙ্কতো হোতি. ভগৰতো এতমত্থং আরোচেসুং. ভিক্খুস্স, ভিক্খৰে, কালঙ্কতে সঙ্ঘো সামী পত্তচীৰরে, অপি চ গিলানুপট্ঠাকা বহূপকারা. অনুজানামি, ভিক্খৰে, সঙ্ঘেন তিচীৰরঞ্চ পত্তঞ্চ গিলানুপট্ঠাকানং দাতুং. যং তত্থ লহুভণ্ডং লহুপরিক্খারং তং সম্মুখীভূতেন সঙ্ঘেন ভাজেতুং. যং তত্থ গরুভণ্ডং গরুপরিক্খারং তং আগতানাগতস্স চাতুদ্দিসস্স সঙ্ঘস্স অৰিস্সজ্জিকং অৰেভঙ্গিকন্তি.

মতসন্তককথা নিট্ঠিতা.