২১৬. ছিন্নকচীৰরানুজাননা

৩৪৫. অথ খো ভগৰা রাজগহে যথাভিরন্তং ৰিহরিত্ৰা যেন দক্খিণাগিরি তেন চারিকং পক্কামি. অদ্দসা খো ভগৰা মগধখেত্তং অচ্ছিবদ্ধং [অচ্চিবদ্ধং (সী. স্যা.), অচ্ছিবন্ধং (ক.)] পাল়িবদ্ধং মরিযাদবদ্ধং সিঙ্ঘাটকবদ্ধং, দিস্ৰান আযস্মন্তং আনন্দং আমন্তেসি – ‘‘পস্সসি নো ত্ৰং, আনন্দ, মগধখেত্তং অচ্ছিবদ্ধং পাল়িবদ্ধং মরিযাদবদ্ধং সিঙ্ঘাটকবদ্ধ’’ন্তি? ‘‘এৰং, ভন্তে’’তি. ‘‘উস্সহসি ত্ৰং, আনন্দ, ভিক্খূনং এৰরূপানি চীৰরানি সংৰিদহিতু’’ন্তি? ‘‘উস্সহামি, ভগৰা’’তি. অথ খো ভগৰা দক্খিণাগিরিস্মিং যথাভিরন্তং ৰিহরিত্ৰা পুনদেৰ রাজগহং পচ্চাগঞ্ছি. অথ খো আযস্মা আনন্দো সম্বহুলানং ভিক্খূনং চীৰরানি সংৰিদহিত্ৰা যেন ভগৰা তেনুপসঙ্কমি; উপসঙ্কমিত্ৰা ভগৰন্তং এতদৰোচ – ‘‘পস্সতু মে [পস্সথ তুম্হে (ক.)], ভন্তে, ভগৰা চীৰরানি সংৰিদহিতানী’’তি. অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘পণ্ডিতো, ভিক্খৰে, আনন্দো; মহাপঞ্ঞো, ভিক্খৰে, আনন্দো; যত্র হি নাম মযা সংখিত্তেন ভাসিতস্স ৰিত্থারেন অত্থং আজানিস্সতি, কুসিম্পি নাম করিস্সতি, অড্ঢকুসিম্পি নাম করিস্সতি, মণ্ডলম্পি নাম করিস্সতি, অড্ঢমণ্ডলম্পি নাম করিস্সতি, ৰিৰট্টম্পি নাম করিস্সতি, অনুৰিৰট্টম্পি নাম করিস্সতি, গীৰেয্যকম্পি নাম করিস্সতি, জঙ্ঘেয্যকম্পি নাম করিস্সতি, বাহন্তম্পি নাম করিস্সতি, ছিন্নকং ভৰিস্সতি, সত্থলূখং সমণসারুপ্পং পচ্চত্থিকানঞ্চ অনভিচ্ছিতং. অনুজানামি, ভিক্খৰে, ছিন্নকং সঙ্ঘাটিং ছিন্নকং উত্তরাসঙ্গং ছিন্নকং অন্তরৰাসক’’ন্তি.

ছিন্নকচীৰরানুজাননা নিট্ঠিতা.