২১৪. ভণ্ডাগারসম্মুতিআদিকথা

৩৪৩. তেন খো পন সমযেন চীৰরনিদহকো ভিক্খু মণ্ডপেপি রুক্খমূলেপি নিব্বকোসেপি চীৰরং নিদহতি, উন্দূরেহিপি উপচিকাহিপি খজ্জন্তি. ভগৰতো এতমত্থং আরোচেসুং. অনুজানামি, ভিক্খৰে, ভণ্ডাগারং সম্মন্নিতুং, যং সঙ্ঘো আকঙ্খতি ৰিহারং ৰা অড্ঢযোগং ৰা পাসাদং ৰা হম্মিযং ৰা গুহং ৰা. এৰঞ্চ পন, ভিক্খৰে, সম্মন্নিতব্বো. ব্যত্তেন ভিক্খুনা পটিবলেন সঙ্ঘো ঞাপেতব্বো –

‘‘সুণাতু মে, ভন্তে, সঙ্ঘো. যদি সঙ্ঘস্স পত্তকল্লং, সঙ্ঘো ইত্থন্নামং ৰিহারং ভণ্ডাগারং সম্মন্নেয্য. এসা ঞত্তি.

‘‘সুণাতু মে, ভন্তে, সঙ্ঘো. সঙ্ঘো ইত্থন্নামং ৰিহারং ভণ্ডাগারং সম্মন্নতি. যস্সাযস্মতো খমতি ইত্থন্নামস্স ৰিহারস্স ভণ্ডাগারস্স সম্মুতি, সো তুণ্হস্স; যস্স নক্খমতি, সো ভাসেয্য.

‘‘সম্মতো সঙ্ঘেন ইত্থন্নামো ৰিহারো ভণ্ডাগারং. খমতি সঙ্ঘস্স, তস্মা তুণ্হী, এৰমেতং ধারযামী’’তি.

তেন খো পন সমযেন সঙ্ঘস্স ভণ্ডাগারে চীৰরং অগুত্তং হোতি. ভগৰতো এতমত্থং আরোচেসুং. অনুজানামি, ভিক্খৰে, পঞ্চহঙ্গেহি সমন্নাগতং ভিক্খুং ভণ্ডাগারিকং সম্মন্নিতুং – যো ন ছন্দাগতিং গচ্ছেয্য, ন দোসাগতিং গচ্ছেয্য, ন মোহাগতিং গচ্ছেয্য, ন ভযাগতিং গচ্ছেয্য, গুত্তাগুত্তঞ্চ জানেয্য. এৰঞ্চ পন, ভিক্খৰে, সম্মন্নিতব্বো. পঠমং ভিক্খু যাচিতব্বো; যাচিত্ৰা ব্যত্তেন ভিক্খুনা পটিবলেন সঙ্ঘো ঞাপেতব্বো –

‘‘সুণাতু মে, ভন্তে, সঙ্ঘো. যদি সঙ্ঘস্স পত্তকল্লং, সঙ্ঘো ইত্থন্নামং ভিক্খুং ভণ্ডাগারিকং সম্মন্নেয্য. এসা ঞত্তি.

‘‘সুণাতু মে, ভন্তে, সঙ্ঘো. সঙ্ঘো ইত্থন্নামং ভিক্খুং ভণ্ডাগারিকং সম্মন্নতি. যস্সাযস্মতো খমতি ইত্থন্নামস্স ভিক্খুনো ভণ্ডাগারিকস্স সম্মুতি, সো তুণ্হস্স; যস্স নক্খমতি, সো ভাসেয্য.

‘‘সম্মতো সঙ্ঘেন ইত্থন্নামো ভিক্খু ভণ্ডাগারিকো. খমতি সঙ্ঘস্স, তস্মা তুণ্হী, এৰমেতং ধারযামী’’তি.

তেন খো পন সমযেন ছব্বগ্গিযা ভিক্খূ ভণ্ডাগারিকং ৰুট্ঠাপেন্তি. ভগৰতো এতমত্থং আরোচেসুং. ন, ভিক্খৰে, ভণ্ডাগারিকো ৰুট্ঠাপেতব্বো. যো ৰুট্ঠাপেয্য, আপত্তি দুক্কটস্সাতি.

তেন খো পন সমযেন সঙ্ঘস্স ভণ্ডাগারে চীৰরং উস্সন্নং হোতি. ভগৰতো এতমত্থং আরোচেসুং. অনুজানামি, ভিক্খৰে, সম্মুখীভূতেন সঙ্ঘেন ভাজেতুন্তি.

তেন খো পন সমযেন সঙ্ঘো চীৰরং ভাজেন্তো কোলাহলং অকাসি. ভগৰতো এতমত্থং আরোচেসুং. অনুজানামি, ভিক্খৰে, পঞ্চহঙ্গেহি সমন্নাগতং ভিক্খুং চীৰরভাজকং সম্মন্নিতুং – যো ন ছন্দাগতিং গচ্ছেয্য, ন দোসাগতিং গচ্ছেয্য, ন মোহাগতিং গচ্ছেয্য, ন ভযাগতিং গচ্ছেয্য, ভাজিতাভাজিতঞ্চ জানেয্য. এৰঞ্চ পন, ভিক্খৰে, সম্মন্নিতব্বো. পঠমং ভিক্খু যাচিতব্বো; যাচিত্ৰা ব্যত্তেন ভিক্খুনা পটিবলেন সঙ্ঘো ঞাপেতব্বো –

‘‘সুণাতু মে, ভন্তে, সঙ্ঘো. যদি সঙ্ঘস্স পত্তকল্লং, সঙ্ঘো ইত্থন্নামং ভিক্খুং চীৰরভাজকং সম্মন্নেয্য. এসা ঞত্তি.

‘‘সুণাতু মে, ভন্তে, সঙ্ঘো. সঙ্ঘো ইত্থন্নামং ভিক্খুং চীৰরভাজকং সম্মন্নতি. যস্সাযস্মতো খমতি ইত্থন্নামস্স ভিক্খুনো চীৰরভাজকস্স সম্মুতি, সো তুণ্হস্স; যস্স নক্খমতি, সো ভাসেয্য.

‘‘সম্মতো সঙ্ঘেন ইত্থন্নামো ভিক্খু চীৰরভাজকো. খমতি সঙ্ঘস্স, তস্মা তুণ্হী, এৰমেতং ধারযামী’’তি.

অথ খো চীৰরভাজকানং ভিক্খূনং এতদহোসি – ‘‘কথং নু খো চীৰরং ভাজেতব্ব’’ন্তি? ভগৰতো এতমত্থং আরোচেসুং. অনুজানামি, ভিক্খৰে, পঠমং উচ্চিনিত্ৰা তুলযিত্ৰা ৰণ্ণাৰণ্ণং কত্ৰা ভিক্খূ গণেত্ৰা ৰগ্গং বন্ধিত্ৰা চীৰরপটিৰীসং ঠপেতুন্তি.

অথ খো চীৰরভাজকানং ভিক্খূনং এতদহোসি – ‘‘কথং নু খো সামণেরানং চীৰরপটিৰীসো দাতব্বো’’তি? ভগৰতো এতমত্থং আরোচেসুং. অনুজানামি, ভিক্খৰে, সামণেরানং উপড্ঢপটিৰীসং দাতুন্তি.

তেন খো পন সমযেন অঞ্ঞতরো ভিক্খু সকেন ভাগেন উত্তরিতুকামো হোতি. ভগৰতো এতমত্থং আরোচেসুং. অনুজানামি, ভিক্খৰে, উত্তরন্তস্স সকং ভাগং দাতুন্তি.

তেন খো পন সমযেন অঞ্ঞতরো ভিক্খু অতিরেকভাগেন উত্তরিতুকামো হোতি. ভগৰতো এতমত্থং আরোচেসুং. অনুজানামি, ভিক্খৰে, অনুক্খেপে দিন্নে অতিরেকভাগং দাতুন্তি.

অথ খো চীৰরভাজকানং ভিক্খূনং এতদহোসি – ‘‘কথং নু খো চীৰরপটিৰীসো দাতব্বো, আগতপটিপাটিযা [আগতাগতপটিপাটিযা (ক.)] নু খো উদাহু যথাৰুড্ঢ’’ন্তি? ভগৰতো এতমত্থং আরোচেসুং. অনুজানামি, ভিক্খৰে, ৰিকলকে তোসেত্ৰা কুসপাতং কাতুন্তি.

ভণ্ডাগারসম্মুতিআদিকথা নিট্ঠিতা.