২১০. ৰরযাচনাকথা

৩৩৭. অথ খো ভগৰতো কাযো নচিরস্সেৰ পকতত্তো অহোসি. অথ খো জীৰকো কোমারভচ্চো তং সিৰেয্যকং দুস্সযুগং আদায যেন ভগৰা তেনুপসঙ্কমি, উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো জীৰকো কোমারভচ্চো ভগৰন্তং এতদৰোচ – ‘‘একাহং, ভন্তে, ভগৰন্তং ৰরং যাচামী’’তি. ‘‘অতিক্কন্তৰরা খো, জীৰক, তথাগতা’’তি. ‘‘যঞ্চ, ভন্তে, কপ্পতি যঞ্চ অনৰজ্জ’’ন্তি. ‘‘ৰদেহি, জীৰকা’’তি. ‘‘ভগৰা, ভন্তে, পংসুকূলিকো, ভিক্খুসঙ্ঘো চ. ইদং মে, ভন্তে, সিৰেয্যকং দুস্সযুগং রঞ্ঞা পজ্জোতেন পহিতং – বহূনং দুস্সানং বহূনং দুস্সযুগানং বহূনং দুস্সযুগসতানং বহূনং দুস্সযুগসহস্সানং বহূনং দুস্সযুগসতসহস্সানং অগ্গঞ্চ সেট্ঠঞ্চ মোক্খঞ্চ উত্তমঞ্চ পৰরঞ্চ. পটিগ্গণ্হাতু মে, ভন্তে, ভগৰা সিৰেয্যকং দুস্সযুগং; ভিক্খুসঙ্ঘস্স চ গহপতিচীৰরং অনুজানাতূ’’তি. পটিগ্গহেসি ভগৰা সিৰেয্যকং দুস্সযুগং. অথ খো ভগৰা জীৰকং কোমারভচ্চং ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি. অথ খো জীৰকো কোমারভচ্চো ভগৰতা ধম্মিযা কথায সন্দস্সিতো সমাদপিতো সমুত্তেজিতো সম্পহংসিতো উট্ঠাযাসনা ভগৰন্তং অভিৰাদেত্ৰা পদক্খিণং কত্ৰা পক্কামি. অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, গহপতিচীৰরং. যো ইচ্ছতি, পংসুকূলিকো হোতু. যো ইচ্ছতি, গহপতিচীৰরং সাদিযতু. ইতরীতরেনপাহং [পহং (সী.), চাহং (স্যা.)], ভিক্খৰে, সন্তুট্ঠিং ৰণ্ণেমী’’তি.

অস্সোসুং খো রাজগহে মনুস্সা – ‘‘ভগৰতা কির ভিক্খূনং গহপতিচীৰরং অনুঞ্ঞাত’’ন্তি. তে চ মনুস্সা হট্ঠা অহেসুং উদগ্গা ‘‘ইদানি খো মযং দানানি দস্সাম পুঞ্ঞানি করিস্সাম, যতো ভগৰতা ভিক্খূনং গহপতিচীৰরং অনুঞ্ঞাত’’ন্তি. একাহেনেৰ রাজগহে বহূনি চীৰরসহস্সানি উপ্পজ্জিংসু.

অস্সোসুং খো জানপদা মনুস্সা – ‘‘ভগৰতা কির ভিক্খূনং গহপতিচীৰরং অনুঞ্ঞাত’’ন্তি. তে চ মনুস্সা হট্ঠা অহেসুং উদগ্গা – ‘‘ইদানি খো মযং দানানি দস্সাম পুঞ্ঞানি করিস্সাম, যতো ভগৰতা ভিক্খূনং গহপতিচীৰরং অনুঞ্ঞাত’’ন্তি. জনপদেপি একাহেনেৰ বহূনি চীৰরসহস্সানি উপ্পজ্জিংসু.

তেন খো পন সমযেন সঙ্ঘস্স পাৰারো উপ্পন্নো হোতি. ভগৰতো এতমত্থং আরোচেসুং. অনুজানামি, ভিক্খৰে, পাৰারন্তি.

কোসেয্যপাৰারো উপ্পন্নো হোতি. ভগৰতো এতমত্থং আরোচেসুং. অনুজানামি, ভিক্খৰে, কোসেয্যপাৰারন্তি.

কোজৰং উপ্পন্নং হোতি. ভগৰতো এতমত্থং আরোচেসুং. অনুজানামি, ভিক্খৰে, কোজৰন্তি.

ৰরযাচনাকথা নিট্ঠিতা.

পঠমভাণৰারো নিট্ঠিতো.