২০৮. সিৰেয্যকদুস্সযুগকথা

৩৩৫. তেন খো পন সমযেন রঞ্ঞো পজ্জোতস্স সিৰেয্যকং দুস্সযুগং উপ্পন্নং হোতি – বহূনং [বহুন্নং (সী. স্যা.)] দুস্সানং বহূনং দুস্সযুগানং বহূনং দুস্সযুগসতানং বহূনং দুস্সযুগসহস্সানং বহূনং দুস্সযুগসতসহস্সানং অগ্গঞ্চ সেট্ঠঞ্চ মোক্খঞ্চ উত্তমঞ্চ পৰরঞ্চ. অথ খো রাজা পজ্জোতো তং সিৰেয্যকং দুস্সযুগং জীৰকস্স কোমারভচ্চস্স পাহেসি. অথ খো জীৰকস্স কোমারভচ্চস্স এতদহোসি – ‘‘ইদং খো মে সিৰেয্যকং দুস্সযুগং রঞ্ঞা পজ্জোতেন পহিতং – বহূনং দুস্সানং বহূনং দুস্সযুগানং বহূনং দুস্সযুগসতানং বহূনং দুস্সযুগসহস্সানং বহূনং দুস্সযুগসতসহস্সানং অগ্গঞ্চ সেট্ঠঞ্চ মোক্খঞ্চ উত্তমঞ্চ পৰরঞ্চ. নযিদং অঞ্ঞো কোচি পচ্চারহতি অঞ্ঞত্র তেন ভগৰতা অরহতা সম্মাসম্বুদ্ধেন, রঞ্ঞা ৰা মাগধেন সেনিযেন বিম্বিসারেনা’’তি.

সিৰেয্যকদুস্সযুগকথা নিট্ঠিতা.