১৩৪. দিৰসনানত্তং

২২৮. ইধ পন, ভিক্খৰে, আৰাসিকানং ভিক্খূনং চাতুদ্দসো হোতি, আগন্তুকানং পন্নরসো. সচে আৰাসিকা বহুতরা হোন্তি, আগন্তুকেহি আৰাসিকানং অনুৰত্তিতব্বং. সচে সমসমা হোন্তি, আগন্তুকেহি আৰাসিকানং অনুৰত্তিতব্বং. সচে আগন্তুকা বহুতরা হোন্তি, আৰাসিকেহি আগন্তুকানং অনুৰত্তিতব্বং.

ইধ পন, ভিক্খৰে, আৰাসিকানং ভিক্খূনং পন্নরসো হোতি, আগন্তুকানং চাতুদ্দসো. সচে আৰাসিকা বহুতরা হোন্তি, আগন্তুকেহি আৰাসিকানং অনুৰত্তিতব্বং. সচে সমসমা হোন্তি, আগন্তুকেহি আৰাসিকানং অনুৰত্তিতব্বং. সচে আগন্তুকা বহুতরা হোন্তি, আৰাসিকেহি আগন্তুকানং অনুৰত্তিতব্বং.

ইধ পন, ভিক্খৰে, আৰাসিকানং ভিক্খূনং পাটিপদো হোতি, আগন্তুকানং পন্নরসো. সচে আৰাসিকা বহুতরা হোন্তি, আৰাসিকেহি আগন্তুকানং নাকামা দাতব্বা সামগ্গী; আগন্তুকেহি নিস্সীমং গন্ত্ৰা পৰারেতব্বং. সচে সমসমা হোন্তি, আৰাসিকেহি আগন্তুকানং নাকামা দাতব্বা সামগ্গী; আগন্তুকেহি নিস্সীমং গন্ত্ৰা পৰারেতব্বং. সচে আগন্তুকা বহুতরা হোন্তি, আৰাসিকেহি আগন্তুকানং সামগ্গী ৰা দাতব্বা, নিস্সীমং ৰা গন্তব্বং.

ইধ পন, ভিক্খৰে, আৰাসিকানং ভিক্খূনং পন্নরসো হোতি, আগন্তুকানং পাটিপদো. সচে আৰাসিকা বহুতরা হোন্তি, আগন্তুকেহি আৰাসিকানং সামগ্গী ৰা দাতব্বা, নিস্সীমং ৰা গন্তব্বং. সচে সমসমা হোন্তি, আগন্তুকেহি আৰাসিকানং সামগ্গী ৰা দাতব্বা, নিস্সীমং ৰা গন্তব্বং. সচে আগন্তুকা বহুতরা হোন্তি, আগন্তুকেহি আৰাসিকানং নাকামা দাতব্বা সামগ্গী; আৰাসিকেহি নিস্সীমং গন্ত্ৰা পৰারেতব্বং.

দিৰসনানত্তং নিট্ঠিতং.