২৭৭. ওসারণানুজাননা

৪৭৪. অথ খো তস্স উক্খিত্তকস্স ভিক্খুনো ধম্মঞ্চ ৰিনযঞ্চ পচ্চৰেক্খন্তস্স এতদহোসি – ‘‘আপত্তি এসা, নেসা অনাপত্তি. আপন্নোম্হি, নম্হি অনাপন্নো. উক্খিত্তোম্হি, নম্হি অনুক্খিত্তো. ধম্মিকেনম্হি কম্মেন উক্খিত্তো অকুপ্পেন ঠানারহেনা’’তি. অথ খো সো উক্খিত্তকো ভিক্খু যেন উক্খিত্তানুৰত্তকা ভিক্খূ তেনুপসঙ্কমি, উপসঙ্কমিত্ৰা উক্খিত্তানুৰত্তকে ভিক্খূ এতদৰোচ – ‘‘আপত্তি এসা, আৰুসো; নেসা অনাপত্তি. আপন্নোম্হি, নম্হি অনাপন্নো. উক্খিত্তোম্হি, নম্হি অনুক্খিত্তো. ধম্মিকেনম্হি কম্মেন উক্খিত্তো অকুপ্পেন ঠানারহেন. এথ মং আযস্মন্তো ওসারেথা’’তি. অথ খো তে উক্খিত্তানুৰত্তকা ভিক্খূ তং উক্খিত্তকং ভিক্খুং আদায যেন ভগৰা তেনুপসঙ্কমিংসু, উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু. একমন্তং নিসিন্না খো তে ভিক্খূ ভগৰন্তং এতদৰোচুং – ‘‘অযং, ভন্তে, উক্খিত্তকো ভিক্খু এৰমাহ – ‘আপত্তি এসা, আৰুসো; নেসা অনাপত্তি. আপন্নোম্হি, নম্হি অনাপন্নো. উক্খিত্তোম্হি, নম্হি অনুক্খিত্তো. ধম্মিকেনম্হি কম্মেন উক্খিত্তো অকুপ্পেন ঠানারহেন. এথ মং আযস্মন্তো ওসারেথা’তি. কথং নু খো, ভন্তে, পটিপজ্জিতব্ব’’ন্তি? ‘‘আপত্তি এসা, ভিক্খৰে; নেসা অনাপত্তি. আপন্নো এসো ভিক্খু, নেসো ভিক্খু অনাপন্নো. উক্খিত্তো এসো ভিক্খু, নেসো ভিক্খু অনুক্খিত্তো. ধম্মিকেন কম্মেন উক্খিত্তো অকুপ্পেন ঠানারহেন. যতো চ খো সো, ভিক্খৰে, ভিক্খু আপন্নো চ উক্খিত্তো চ পস্সতি চ, তেন হি, ভিক্খৰে, তং ভিক্খুং ওসারেথা’’তি.

ওসারণানুজাননা নিট্ঠিতা.