২৭৫. পালিলেয্যকগমনকথা

৪৬৭. [উদা. ৩৫ আদযো থোকং ৰিসদিসং] অথ খো ভগৰা আযস্মন্তঞ্চ অনুরুদ্ধং আযস্মন্তঞ্চ নন্দিযং আযস্মন্তঞ্চ কিমিলং ধম্মিযা কথায সন্দস্সেত্ৰা সমাদপেত্ৰা সমুত্তেজেত্ৰা সম্পহংসেত্ৰা উট্ঠাযাসনা যেন পালিলেয্যকং [পারিলেয্যকং (সী. স্যা.)] তেন চারিকং পক্কামি. অনুপুব্বেন চারিকং চরমানো যেন পালিলেয্যকং তদৰসরি. তত্র সুদং ভগৰা পালিলেয্যকে ৰিহরতি রক্খিতৰনসণ্ডে ভদ্দসালমূলে. অথ খো ভগৰতো রহোগতস্স পটিসল্লীনস্স এৰং চেতসো পরিৰিতক্কো উদপাদি – ‘‘অহং খো পুব্বে আকিণ্ণো ন ফাসু ৰিহাসিং তেহি কোসম্বকেহি [কোসব্ভিকেহি (স্যা.)] ভিক্খূহি ভণ্ডনকারকেহি কলহকারকেহি ৰিৰাদকারকেহি ভস্সকারকেহি সঙ্ঘে অধিকরণকারকেহি. সোম্হি এতরহি একো অদুতিযো সুখং ফাসু ৰিহরামি অঞ্ঞত্রেৰ তেহি কোসম্বকেহি ভিক্খূহি ভণ্ডনকারকেহি কলহকারকেহি ৰিৰাদকারকেহি ভস্সকারকেহি সঙ্ঘে অধিকরণকারকেহী’’তি.

অঞ্ঞতরোপি খো হত্থিনাগো আকিণ্ণো ৰিহরতি হত্থীহি হত্থিনীহি হত্থিকল়ভেহি হত্থিচ্ছাপেহি, ছিন্নগ্গানি চেৰ তিণানি খাদতি, ওভগ্গোভগ্গঞ্চস্স সাখাভঙ্গং খাদন্তি, আৰিলানি চ পানীযানি পিৰতি, ওগাহা চস্স ওতিণ্ণস্স হত্থিনিযো কাযং উপনিঘংসন্তিযো গচ্ছন্তি. অথ খো তস্স হত্থিনাগস্স এতদহোসি – ‘‘অহং খো আকিণ্ণো ৰিহরামি হত্থীহি হত্থিনীহি হত্থিকল়ভেহি হত্থিচ্ছাপেহি, ছিন্নগ্গানি চেৰ তিণানি খাদামি, ওভগ্গোভগ্গঞ্চ মে সাখাভঙ্গং খাদন্তি, আৰিলানি চ পানীযানি পিৰামি, ওগাহা চ মে ওতিণ্ণস্স হত্থিনিযো কাযং উপনিঘংসন্তিযো গচ্ছন্তি. যংনূনাহং একোৰ গণস্মা ৰূপকট্ঠো ৰিহরেয্য’’ন্তি. অথ খো সো হত্থিনাগো যূথা অপক্কম্ম যেন পালিলেয্যকং রক্খিতৰনসণ্ডো ভদ্দসালমূলং যেন ভগৰা তেনুপসঙ্কমি, উপসঙ্কমিত্ৰা সোণ্ডায ভগৰতো পানীযং পরিভোজনীযং উপট্ঠাপেতি, অপ্পহরিতঞ্চ করোতি. অথ খো তস্স হত্থিনাগস্স এতদহোসি – ‘‘অহং খো পুব্বে আকিণ্ণো ন ফাসু ৰিহাসিং হত্থীহি হত্থিনীহি হত্থিকল়ভেহি হত্থিচ্ছাপেহি, ছিন্নগ্গানি চেৰ তিণানি খাদিং, ওভগ্গোভগ্গঞ্চ মে সাখাভঙ্গং খাদিংসু, আৰিলানি চ পানীযানি অপাযিং ওগাহা চ মে ওতিণ্ণস্স [ওগাহঞ্চস্স ওতিণ্ণস্স (স্যা.), ওগাহা চস্স উত্তিণ্ণস্স (সী.)] হত্থিনিযো কাযং উপনিঘংসন্তিযো অগমংসু. সোম্হি এতরহি একো অদুতিযো সুখং ফাসু ৰিহরামি অঞ্ঞত্রেৰ হত্থীহি হত্থিনীহি হত্থিকল়ভেহি হত্থিচ্ছাপেহী’’তি.

অথ খো ভগৰা অত্তনো চ পৰিৰেকং ৰিদিত্ৰা তস্স চ হত্থিনাগস্স চেতসা চেতোপরিৰিতক্কমঞ্ঞায তাযং ৰেলাযং ইমং উদানং উদানেসি –

[উদা. ৩৫] ‘‘এতং [এৰং (ক.)] নাগস্স নাগেন, ঈসাদন্তস্স হত্থিনো;

সমেতি চিত্তং চিত্তেন, যদেকো রমতী ৰনে’’তি.

অথ খো ভগৰা পালিলেয্যকে যথাভিরন্তং ৰিহরিত্ৰা যেন সাৰত্থি তেন চারিকং পক্কামি. অনুপুব্বেন চারিকং চরমানো যেন সাৰত্থি তদৰসরি. তত্র সুদং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. অথ খো কোসম্বকা উপাসকা – ‘‘ইমে খো অয্যা কোসম্বকা ভিক্খূ বহুনো অম্হাকং অনত্থস্স কারকা. ইমেহি উব্বাল়্হো ভগৰা পক্কন্তো. হন্দ মযং অয্যে কোসম্বকে ভিক্খূ নেৰ অভিৰাদেয্যাম, ন পচ্চুট্ঠেয্যাম, ন অঞ্জলিকম্মং সামীচিকম্মং করেয্যাম, ন সক্করেয্যাম, ন গরুং করেয্যাম, ন মানেয্যাম, ন ভজেয্যাম, ন পূজেয্যাম, উপগতানম্পি পিণ্ডকং ন দজ্জেয্যাম – এৰং ইমে অম্হেহি অসক্করিযমানা অগরুকরিযমানা অমানিযমানা অভজিযমানা অপূজিযমানা অসক্কারপকতা পক্কমিস্সন্তি ৰা ৰিব্ভমিস্সন্তি ৰা ভগৰন্তং ৰা পসাদেস্সন্তী’’তি. অথ খো কোসম্বকা উপাসকা কোসম্বকে ভিক্খূ নেৰ অভিৰাদেসুং, ন পচ্চুট্ঠেসুং, ন অঞ্জলিকম্মং সামীচিকম্মং অকংসু, ন সক্করিংসু, ন গরুং করিংসু, ন মানেসুং, ন ভজেসুং ন পূজেসুং, উপগতানম্পি পিণ্ডকং ন অদংসু. অথ খো কোসম্বকা ভিক্খূ কোসম্বকেহি উপাসকেহি অসক্করিযমানা অগরুকরিযমানা অমানিযমানা অভজিযমানা অপূজিযমানা অসক্কারপকতা এৰমাহংসু – ‘‘হন্দ মযং, আৰুসো, সাৰত্থিং গন্ত্ৰা ভগৰতো সন্তিকে ইমং অধিকরণং ৰূপসমেয্যামা’’তি.

পালিলেয্যকগমনকথা নিট্ঠিতা.