৬৩. উপসম্পদাৰিধি

১২৫. তেন খো পন সমযেন উপসম্পন্না দিস্সন্তি কুট্ঠিকাপি গণ্ডিকাপি কিলাসিকাপি সোসিকাপি অপমারিকাপি. ভগৰতো এতমত্থং আরোচেসুং. অনুজানামি, ভিক্খৰে, উপসম্পাদেন্তেন তেরস [তস্স (ক.)] অন্তরাযিকে ধম্মে পুচ্ছিতুং. এৰঞ্চ পন, ভিক্খৰে, পুচ্ছিতব্বো – ‘‘সন্তি তে এৰরূপা আবাধা – কুট্ঠং, গণ্ডো, কিলাসো, সোসো, অপমারো? মনুস্সোসি? পুরিসোসি? ভুজিস্সোসি? অণণোসি? নসি রাজভটো? অনুঞ্ঞাতোসি মাতাপিতূহি? পরিপুণ্ণৰীসতিৰস্সোসি? পরিপুণ্ণং তে পত্তচীৰরং? কিংনামোসি? কোনামো তে উপজ্ঝাযো’’তি?

তেন খো পন সমযেন ভিক্খূ অননুসিট্ঠে উপসম্পদাপেক্খে অন্তরাযিকে ধম্মে পুচ্ছন্তি. উপসম্পদাপেক্খা ৰিত্থাযন্তি, মঙ্কূ হোন্তি, ন সক্কোন্তি ৰিস্সজ্জেতুং. ভগৰতো এতমত্থং আরোচেসুং. অনুজানামি, ভিক্খৰে, পঠমং অনুসাসিত্ৰা পচ্ছা অন্তরাযিকে ধম্মে পুচ্ছিতুন্তি.

তত্থেৰ সঙ্ঘমজ্ঝে অনুসাসন্তি. উপসম্পদাপেক্খা তথেৰ ৰিত্থাযন্তি, মঙ্কূ হোন্তি, ন সক্কোন্তি ৰিস্সজ্জেতুং. ভগৰতো এতমত্থং আরোচেসুং. অনুজানামি, ভিক্খৰে, একমন্তং অনুসাসিত্ৰা সঙ্ঘমজ্ঝে অন্তরাযিকে ধম্মে পুচ্ছিতুং. এৰঞ্চ পন, ভিক্খৰে, অনুসাসিতব্বো –

১২৬. পঠমং উপজ্ঝং গাহাপেতব্বো. উপজ্ঝং গাহাপেত্ৰা পত্তচীৰরং আচিক্খিতব্বং – অযং তে পত্তো, অযং সঙ্ঘাটি, অযং উত্তরাসঙ্গো, অযং অন্তরৰাসকো. গচ্ছ, অমুম্হি ওকাসে তিট্ঠাহীতি.

বালা অব্যত্তা অনুসাসন্তি. দুরনুসিট্ঠা উপসম্পদাপেক্খা ৰিত্থাযন্তি, মঙ্কূ হোন্তি, ন সক্কোন্তি ৰিস্সজ্জেতুং. ভগৰতো এতমত্থং আরোচেসুং. ন, ভিক্খৰে, বালেন অব্যত্তেন অনুসাসিতব্বো. যো অনুসাসেয্য, আপত্তি দুক্কটস্স. অনুজানামি, ভিক্খৰে, ব্যত্তেন ভিক্খুনা পটিবলেন অনুসাসিতুন্তি.

অসম্মতা অনুসাসন্তি. ভগৰতো এতমত্থং আরোচেসুং. ন, ভিক্খৰে, অসম্মতেন অনুসাসিতব্বো. যো অনুসাসেয্য, আপত্তি দুক্কটস্স. অনুজানামি, ভিক্খৰে, সম্মতেন অনুসাসিতুং. এৰঞ্চ পন, ভিক্খৰে, সম্মন্নিতব্বো [সম্মনিতব্বো (ক.)] – অত্তনা ৰা [অত্তনাৰ (স্যা.)] অত্তানং সম্মন্নিতব্বং, পরেন ৰা পরো সম্মন্নিতব্বো.

কথঞ্চ অত্তনাৰ অত্তানং সম্মন্নিতব্বং? ব্যত্তেন ভিক্খুনা পটিবলেন সঙ্ঘো ঞাপেতব্বো – ‘‘সুণাতু মে, ভন্তে, সঙ্ঘো. ইত্থন্নামো ইত্থন্নামস্স আযস্মতো উপসম্পদাপেক্খো. যদি সঙ্ঘস্স পত্তকল্লং, অহং ইত্থন্নামং অনুসাসেয্য’’ন্তি. এৰং অত্তনাৰ অত্তানং সম্মন্নিতব্বং.

কথঞ্চ পন পরেন পরো সম্মন্নিতব্বো? ব্যত্তেন ভিক্খুনা পটিবলেন সঙ্ঘো ঞাপেতব্বো – ‘‘সুণাতু মে, ভন্তে, সঙ্ঘো. ইত্থন্নামো ইত্থন্নামস্স আযস্মতো উপসম্পদাপেক্খো. যদি সঙ্ঘস্স পত্তকল্লং, ইত্থন্নামো ইত্থন্নামং অনুসাসেয্যা’’তি. এৰং পরেন পরো সম্মন্নিতব্বো.

তেন সম্মতেন ভিক্খুনা উপসম্পদাপেক্খো উপসঙ্কমিত্ৰা এৰমস্স ৰচনীযো – ‘‘সুণসি, ইত্থন্নাম, অযং তে সচ্চকালো ভূতকালো. যং জাতং তং সঙ্ঘমজ্ঝে পুচ্ছন্তে সন্তং অত্থীতি ৰত্তব্বং, অসন্তং নত্থী’’তি ৰত্তব্বং. মা খো ৰিত্থাযি, মা খো মঙ্কু অহোসি. এৰং তং পুচ্ছিস্সন্তি – ‘‘সন্তি তে এৰরূপা আবাধা – কুট্ঠং, গণ্ডো, কিলাসো, সোসো, অপমারো? মনুস্সোসি? পুরিসোসি? ভুজিস্সোসি? অণণোসি? নসি রাজভটো? অনুঞ্ঞাতোসি মাতাপিতূহি? পরিপুণ্ণৰীসতিৰস্সোসি? পরিপুণ্ণং তে পত্তচীৰরং? কিংনামোসি? কোনামো তে উপজ্ঝাযো’’তি?

একতো আগচ্ছন্তি. ন, ভিক্খৰে, একতো আগন্তব্বং. অনুসাসকেন পঠমতরং আগন্ত্ৰা সঙ্ঘো ঞাপেতব্বো – ‘‘সুণাতু মে, ভন্তে, সঙ্ঘো. ইত্থন্নামো ইত্থন্নামস্স আযস্মতো উপসম্পদাপেক্খো. অনুসিট্ঠো সো মযা. যদি সঙ্ঘস্স পত্তকল্লং, ইত্থন্নামো আগচ্ছেয্যা’’তি. আগচ্ছাহীতি ৰত্তব্বো.

একংসং উত্তরাসঙ্গং কারাপেত্ৰা ভিক্খূনং পাদে ৰন্দাপেত্ৰা উক্কুটিকং নিসীদাপেত্ৰা অঞ্জলিং পগ্গণ্হাপেত্ৰা উপসম্পদং যাচাপেতব্বো – ‘‘সঙ্ঘং, ভন্তে, উপসম্পদং যাচামি. উল্লুম্পতু মং, ভন্তে, সঙ্ঘো অনুকম্পং উপাদায. দুতিযম্পি, ভন্তে, সঙ্ঘং উপসম্পদং যাচামি. উল্লুম্পতু মং, ভন্তে, সঙ্ঘো অনুকম্পং উপাদায. ততিযম্পি, ভন্তে, সঙ্ঘং উপসম্পদং যাচামি. উল্লুম্পতু মং, ভন্তে, সঙ্ঘো অনুকম্পং উপাদাযা’’তি. ব্যত্তেন ভিক্খুনা পটিবলেন সঙ্ঘো ঞাপেতব্বো –

‘‘সুণাতু মে, ভন্তে, সঙ্ঘো. অযং ইত্থন্নামো ইত্থন্নামস্স আযস্মতো উপসম্পদাপেক্খো. যদি সঙ্ঘস্স পত্তকল্লং, অহং ইত্থন্নামং অন্তরাযিকে ধম্মে পুচ্ছেয্য’’ন্তি? সুণসি, ইত্থন্নাম, অযং তে সচ্চকালো ভূতকালো. যং জাতং তং পুচ্ছামি. সন্তং অত্থীতি ৰত্তব্বং, অসন্তং নত্থীতি ৰত্তব্বং. সন্তি তে এৰরূপা আবাধা – কুট্ঠং গণ্ডো কিলেসো সোসো অপমারো, মনুস্সোসি, পুরিসোসি, ভুজিস্সোসি, অণণোসি, নসি রাজভটো, অনুঞ্ঞাতোসি মাতাপিতূহি, পরিপুণ্ণৰীসতিৰস্সোসি, পরিপুণ্ণং তে পত্তচীৰরং, কিংনামোসি, কোনামো তে উপজ্ঝাযোতি? ব্যত্তেন ভিক্খুনা পটিবলেন সঙ্ঘো ঞাপেতব্বো –

১২৭. ‘‘সুণাতু মে, ভন্তে, সঙ্ঘো. অযং ইত্থন্নামো ইত্থন্নামস্স আযস্মতো উপসম্পদাপেক্খো, পরিসুদ্ধো অন্তরাযিকেহি ধম্মেহি, পরিপুণ্ণস্স পত্তচীৰরং. ইত্থন্নামো সঙ্ঘং উপসম্পদং যাচতি ইত্থন্নামেন উপজ্ঝাযেন. যদি সঙ্ঘস্স পত্তকল্লং, সঙ্ঘো ইত্থন্নামং উপসম্পাদেয্য ইত্থন্নামেন উপজ্ঝাযেন. এসা ঞত্তি.

‘‘সুণাতু মে, ভন্তে, সঙ্ঘো. অযং ইত্থন্নামো ইত্থন্নামস্স আযস্মতো উপসম্পদাপেক্খো, পরিসুদ্ধো অন্তরাযিকেহি ধম্মেহি, পরিপুণ্ণস্স পত্তচীৰরং. ইত্থন্নামো সঙ্ঘং উপসম্পদং যাচতি ইত্থন্নামেন উপজ্ঝাযেন. সঙ্ঘো ইত্থন্নামং উপসম্পাদেতি ইত্থন্নামেন উপজ্ঝাযেন. যস্সাযস্মতো খমতি ইত্থন্নামস্স উপসম্পদা ইত্থন্নামেন উপজ্ঝাযেন, সো তুণ্হস্স; যস্স নক্খমতি, সো ভাসেয্য.

‘‘দুতিযম্পি এতমত্থং ৰদামি – সুণাতু মে, ভন্তে, সঙ্ঘো. অযং ইত্থন্নামো ইত্থন্নামস্স আযস্মতো উপসম্পদাপেক্খো, পরিসুদ্ধো অন্তরাযিকেহি ধম্মেহি, পরিপুণ্ণস্স পত্তচীৰরং. ইত্থন্নামো সঙ্ঘং উপসম্পদং যাচতি ইত্থন্নামেন উপজ্ঝাযেন. সঙ্ঘো ইত্থন্নামং উপসম্পাদেতি ইত্থন্নামেন উপজ্ঝাযেন. যস্সাযস্মতো খমতি ইত্থন্নামস্স উপসম্পদা ইত্থন্নামেন উপজ্ঝাযেন, সো তুণ্হস্স; যস্স নক্খমতি, সো ভাসেয্য.

‘‘ততিযম্পি এতমত্থং ৰদামি – সুণাতু মে, ভন্তে, সঙ্ঘো. অযং ইত্থন্নামো ইত্থন্নামস্স আযস্মতো উপসম্পদাপেক্খো, পরিসুদ্ধো অন্তরাযিকেহি ধম্মেহি, পরিপুণ্ণস্স পত্তচীৰরং. ইত্থন্নামো সঙ্ঘং উপসম্পদং যাচতি ইত্থন্নামেন উপজ্ঝাযেন. সঙ্ঘো ইত্থন্নামং উপসম্পাদেতি ইত্থন্নামেন উপজ্ঝাযেন. যস্সাযস্মতো খমতি ইত্থন্নামস্স উপসম্পদা ইত্থন্নামেন উপজ্ঝাযেন, সো তুণ্হস্স; যস্স নক্খমতি, সো ভাসেয্য.

‘‘উপসম্পন্নো সঙ্ঘেন ইত্থন্নামো ইত্থন্নামেন উপজ্ঝাযেন. খমতি সঙ্ঘস্স, তস্মা তুণ্হী, এৰমেতং ধারযামী’’তি.

উপসম্পদাকম্মং নিট্ঠিতং.