৫৯. গমিকাদিনিস্সযৰত্থূনি

১২১. তেন খো পন সমযেন অঞ্ঞতরো ভিক্খু কোসলেসু জনপদে অদ্ধানমগ্গপ্পটিপন্নো হোতি. অথ খো তস্স ভিক্খুনো এতদহোসি – ‘‘ভগৰতা পঞ্ঞত্তং ‘ন অনিস্সিতেন ৰত্থব্ব’ন্তি. অহঞ্চম্হি নিস্সযকরণীযো অদ্ধানমগ্গপ্পটিপন্নো, কথং নু খো মযা পটিপজ্জিতব্ব’’ন্তি? ভগৰতো এতমত্থং আরোচেসুং. অনুজানামি, ভিক্খৰে, অদ্ধানমগ্গপ্পটিপন্নেন ভিক্খুনা নিস্সযং অলভমানেন অনিস্সিতেন ৰত্থুন্তি.

তেন খো পন সমযেন দ্ৰে ভিক্খূ কোসলেসু জনপদে অদ্ধানমগ্গপ্পটিপন্না হোন্তি. তে অঞ্ঞতরং আৰাসং উপগচ্ছিংসু. তত্থ একো ভিক্খু গিলানো হোতি. অথ খো তস্স গিলানস্স ভিক্খুনো এতদহোসি – ‘‘ভগৰতা পঞ্ঞত্তং ‘ন অনিস্সিতেন ৰত্থব্ব’ন্তি. অহঞ্চম্হি নিস্সযকরণীযো গিলানো, কথং নু খো মযা পটিপজ্জিতব্ব’’ন্তি? ভগৰতো এতমত্থং আরোচেসুং. অনুজানামি, ভিক্খৰে, গিলানেন ভিক্খুনা নিস্সযং অলভমানেন অনিস্সিতেন ৰত্থুন্তি.

অথ খো তস্স গিলানুপট্ঠাকস্স ভিক্খুনো এতদহোসি – ‘‘ভগৰতা পঞ্ঞত্তং ‘ন অনিস্সিতেন ৰত্থব্ব’ন্তি. অহঞ্চম্হি নিস্সযকরণীযো, অযঞ্চ ভিক্খু গিলানো, কথং নু খো মযা পটিপজ্জিতব্ব’’ন্তি? ভগৰতো এতমত্থং আরোচেসুং. অনুজানামি, ভিক্খৰে, গিলানুপট্ঠাকেন ভিক্খুনা নিস্সযং অলভমানেন যাচিযমানেন অনিস্সিতেন ৰত্থুন্তি.

তেন খো পন সমযেন অঞ্ঞতরো ভিক্খু অরঞ্ঞে ৰিহরতি. তস্স চ তস্মিং সেনাসনে ফাসু হোতি. অথ খো তস্স ভিক্খুনো এতদহোসি – ‘‘ভগৰতা পঞ্ঞত্তং ‘ন অনিস্সিতেন ৰত্থব্ব’ন্তি. অহঞ্চম্হি নিস্সযকরণীযো অরঞ্ঞে ৰিহরামি, ময্হঞ্চ ইমস্মিং সেনাসনে ফাসু হোতি, কথং নু খো মযা পটিপজ্জিতব্ব’’ন্তি? ভগৰতো এতমত্থং আরোচেসুং. অনুজানামি, ভিক্খৰে, আরঞ্ঞিকেন ভিক্খুনা ফাসুৰিহারং সল্লক্খেন্তেন নিস্সযং অলভমানেন অনিস্সিতেন ৰত্থুং – যদা পতিরূপো নিস্সযদাযকো আগচ্ছিস্সতি, তদা তস্স নিস্সায ৰসিস্সামীতি.