৫২. অরহন্তঘাতকৰত্থু

১১৪. তেন খো পন সমযেন সম্বহুলা ভিক্খূ সাকেতা সাৰত্থিং অদ্ধানমগ্গপ্পটিপন্না হোন্তি. অন্তরামগ্গে চোরা নিক্খমিত্ৰা একচ্চে ভিক্খূ অচ্ছিন্দিংসু, একচ্চে ভিক্খূ হনিংসু. সাৰত্থিযা রাজভটা নিক্খমিত্ৰা একচ্চে চোরে অগ্গহেসুং, একচ্চে চোরা পলাযিংসু. যে তে পলাযিংসু তে ভিক্খূসু পব্বজিংসু, যে তে গহিতা তে ৰধায ওনিয্যন্তি. অদ্দসংসু খো তে পলাযিত্ৰা পব্বজিতা তে চোরে ৰধায ওনিয্যমানে, দিস্ৰান এৰমাহংসু – ‘‘সাধু খো মযং পলাযিম্হা, সচা চ [সচে চ, সচজ্জ (অট্ঠকথাযং পাঠন্তরা)] মযং গয্হেয্যাম [গণ্হেয্যাম (ক.)], মযম্পি এৰমেৰ হঞ্ঞেয্যামা’’তি. ভিক্খূ এৰমাহংসু – ‘‘কিং পন তুম্হে, আৰুসো, অকত্থা’’তি? অথ খো তে পব্বজিতা ভিক্খূনং এতমত্থং আরোচেসুং. ভিক্খূ ভগৰতো এতমত্থং আরোচেসুং. অরহন্তো এতে, ভিক্খৰে, ভিক্খূ. অরহন্তঘাতকো, ভিক্খৰে, অনুপসম্পন্নো ন উপসম্পাদেতব্বো, উপসম্পন্নো নাসেতব্বোতি.