৪৯. তিরচ্ছানগতৰত্থু

১১১. তেন খো পন সমযেন অঞ্ঞতরো নাগো নাগযোনিযা অট্টীযতি হরাযতি জিগুচ্ছতি. অথ খো তস্স নাগস্স এতদহোসি – ‘‘কেন নু খো অহং উপাযেন নাগযোনিযা চ পরিমুচ্চেয্যং খিপ্পঞ্চ মনুস্সত্তং পটিলভেয্য’’ন্তি. অথ খো তস্স নাগস্স এতদহোসি – ‘‘ইমে খো সমণা সক্যপুত্তিযা ধম্মচারিনো সমচারিনো ব্রহ্মচারিনো সচ্চৰাদিনো সীলৰন্তো কল্যাণধম্মা. সচে খো অহং সমণেসু সক্যপুত্তিযেসু পব্বজেয্যং, এৰাহং নাগযোনিযা চ পরিমুচ্চেয্যং, খিপ্পঞ্চ মনুস্সত্তং পটিলভেয্য’’ন্তি. অথ খো সো নাগো মাণৰকৰণ্ণেন ভিক্খূ উপসঙ্কমিত্ৰা পব্বজ্জং যাচি. তং ভিক্খূ পব্বাজেসুং, উপসম্পাদেসুং. তেন খো পন সমযেন সো নাগো অঞ্ঞতরেন ভিক্খুনা সদ্ধিং পচ্চন্তিমে ৰিহারে পটিৰসতি. অথ খো সো ভিক্খু রত্তিযা পচ্চূসসমযং পচ্চুট্ঠায অজ্ঝোকাসে চঙ্কমতি. অথ খো সো নাগো তস্স ভিক্খুনো নিক্খন্তে ৰিস্সট্ঠো নিদ্দং ওক্কমি. সব্বো ৰিহারো অহিনা পুণ্ণো, ৰাতপানেহি ভোগা নিক্খন্তা হোন্তি. অথ খো সো ভিক্খু ৰিহারং পৰিসিস্সামীতি কৰাটং পণামেন্তো অদ্দস সব্বং ৰিহারং অহিনা পুণ্ণং, ৰাতপানেহি ভোগে নিক্খন্তে, দিস্ৰান ভীতো ৰিস্সরমকাসি. ভিক্খূ উপধাৰিত্ৰা তং ভিক্খুং এতদৰোচুং – ‘‘কিস্স ত্ৰং, আৰুসো, ৰিস্সরমকাসী’’তি? ‘‘অযং, আৰুসো, সব্বো ৰিহারো অহিনা পুণ্ণো, ৰাতপানেহি ভোগা নিক্খন্তা’’তি. অথ খো সো নাগো তেন সদ্দেন পটিবুজ্ঝিত্ৰা সকে আসনে নিসীদি. ভিক্খূ এৰমাহংসু – ‘‘কোসি ত্ৰং, আৰুসো’’তি? ‘‘অহং, ভন্তে, নাগো’’তি. ‘‘কিস্স পন ত্ৰং, আৰুসো, এৰরূপং অকাসী’’তি? অথ খো সো নাগো ভিক্খূনং এতমত্থং আরোচেসি. ভিক্খূ ভগৰতো এতমত্থং আরোচেসুং. অথ খো ভগৰা এতস্মিং নিদানে এতস্মিং পকরণে ভিক্খুসঙ্ঘং সন্নিপাতাপেত্ৰা তং নাগং এতদৰোচ – ‘‘তুম্হে খোত্থ নাগা অৰিরুল়্হিধম্মা ইমস্মিং ধম্মৰিনযে. গচ্ছ ত্ৰং, নাগ, তত্থেৰ চাতুদ্দসে পন্নরসে অট্ঠমিযা চ পক্খস্স উপোসথং উপৰস, এৰং ত্ৰং নাগযোনিযা চ পরিমুচ্চিস্সসি, খিপ্পঞ্চ মনুস্সত্তং পটিলভিস্সসী’’তি. অথ খো সো নাগো অৰিরুল়্হিধম্মো কিরাহং ইমস্মিং ধম্মৰিনযেতি দুক্খী দুম্মনো অস্সূনি পৰত্তযমানো ৰিস্সরং কত্ৰা পক্কামি. অথ খো ভগৰা ভিক্খূ আমন্তেসি – ‘‘দ্ৰেমে, ভিক্খৰে, পচ্চযা নাগস্স সভাৰপাতুকম্মায. যদা চ সজাতিযা মেথুনং ধম্মং পটিসেৰতি, যদা চ ৰিস্সট্ঠো নিদ্দং ওক্কমতি – ইমে খো, ভিক্খৰে, দ্ৰে পচ্চযা নাগস্স সভাৰপাতুকম্মায. তিরচ্ছানগতো, ভিক্খৰে, অনুপসম্পন্নো ন উপসম্পাদেতব্বো, উপসম্পন্নো নাসেতব্বো’’তি.