৪৩. দণ্ডকম্মৰত্থু

১০৭. তেন খো পন সমযেন সামণেরা ভিক্খূসু অগারৰা অপ্পতিস্সা অসভাগৰুত্তিকা ৰিহরন্তি. ভিক্খূ উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সামণেরা ভিক্খূসু অগারৰা অপ্পতিস্সা অসভাগৰুত্তিকা ৰিহরিস্সন্তী’’তি. ভগৰতো এতমত্থং আরোচেসুং…পে… অনুজানামি, ভিক্খৰে, পঞ্চহঙ্গেহি সমন্নাগতস্স সামণেরস্স দণ্ডকম্মং কাতুং. ভিক্খূনং অলাভায পরিসক্কতি, ভিক্খূনং অনত্থায পরিসক্কতি, ভিক্খূনং অৰাসায পরিসক্কতি, ভিক্খূ অক্কোসতি পরিভাসতি, ভিক্খূ ভিক্খূহি ভেদেতি – অনুজানামি, ভিক্খৰে, ইমেহি পঞ্চহঙ্গেহি সমন্নাগতস্স সামণেরস্স দণ্ডকম্মং কাতুন্তি.

অথ খো ভিক্খূনং এতদহোসি – ‘‘কিং নু খো দণ্ডকম্মং কাতব্ব’’ন্তি? ভগৰতো এতমত্থং আরোচেসুং. অনুজানামি, ভিক্খৰে, আৰরণং কাতুন্তি.

তেন খো পন সমযেন ভিক্খূ সামণেরানং সব্বং সঙ্ঘারামং আৰরণং করোন্তি. সামণেরা আরামং পৰিসিতুং অলভমানা পক্কমন্তিপি, ৰিব্ভমন্তিপি, তিত্থিযেসুপি সঙ্কমন্তি. ভগৰতো এতমত্থং আরোচেসুং. ন, ভিক্খৰে, সব্বো সঙ্ঘারামো আৰরণং কাতব্বো. যো করেয্য, আপত্তি দুক্কটস্স. অনুজানামি, ভিক্খৰে, যত্থ ৰা ৰসতি, যত্থ ৰা পটিক্কমতি, তত্থ আৰরণং কাতুন্তি.

তেন খো পন সমযেন ভিক্খূ সামণেরানং মুখদ্ৰারিকং আহারং আৰরণং করোন্তি. মনুস্সা যাগুপানম্পি সঙ্ঘভত্তম্পি করোন্তা সামণেরে এৰং ৰদেন্তি – ‘‘এথ, ভন্তে, যাগুং পিৰথ; এথ, ভন্তে, ভত্তং ভুঞ্জথা’’তি. সামণেরা এৰং ৰদেন্তি – ‘‘নাৰুসো, লব্ভা. ভিক্খূহি আৰরণং কত’’ন্তি. মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভদন্তা সামণেরানং মুখদ্ৰারিকং আহারং আৰরণং করিস্সন্তী’’তি. ভগৰতো এতমত্থং আরোচেসুং. ন, ভিক্খৰে, মুখদ্ৰারিকো আহারো আৰরণং কাতব্বো. যো করেয্য, আপত্তি দুক্কটস্সাতি.

দণ্ডকম্মৰত্থু নিট্ঠিতং.