৩৯. আহুন্দরিকৰত্থু

১০২. তেন খো পন সমযেন ভগৰা তত্থেৰ রাজগহে ৰস্সং ৰসি, তত্থ হেমন্তং, তত্থ গিম্হং. মনুস্সা উজ্ঝাযন্তি খিয্যন্তি ৰিপাচেন্তি – ‘‘আহুন্দরিকা সমণানং সক্যপুত্তিযানং দিসা অন্ধকারা, ন ইমেসং দিসা পক্খাযন্তী’’তি. অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. অথ খো তে ভিক্খূ ভগৰতো এতমত্থং আরোচেসুং. অথ খো ভগৰা আযস্মন্তং আনন্দং আমন্তেসি – ‘‘গচ্ছানন্দ, অৰাপুরণং [অপাপুরণং (ক.)] আদায অনুপরিৰেণিযং ভিক্খূনং আরোচেহি – ‘‘ইচ্ছতাৰুসো ভগৰা দক্খিণাগিরিং চারিকং পক্কমিতুং. যস্সাযস্মতো অত্থো, সো আগচ্ছতূ’’তি. এৰং, ভন্তে, তি খো আযস্মা আনন্দো ভগৰতো পটিস্সুণিত্ৰা অৰাপুরণং আদায অনুপরিৰেণিযং ভিক্খূনং আরোচেসি – ‘ইচ্ছতাৰুসো ভগৰা দক্খিণাগিরিং চারিকং পক্কমিতুং. যস্সাযস্মতো অত্থো, সো আগচ্ছতূ’’’তি. ভিক্খূ এৰমাহংসু – ‘‘ভগৰতা, আৰুসো আনন্দ, পঞ্ঞত্তং দসৰস্সানি নিস্সায ৰত্থুং, দসৰস্সেন নিস্সযং দাতুং. তত্থ চ নো গন্তব্বং ভৰিস্সতি, নিস্সযো চ গহেতব্বো ভৰিস্সতি, ইত্তরো চ ৰাসো ভৰিস্সতি, পুন চ পচ্চাগন্তব্বং ভৰিস্সতি, পুন চ নিস্সযো গহেতব্বো ভৰিস্সতি. সচে অম্হাকং আচরিযুপজ্ঝাযা গমিস্সন্তি, মযম্পি গমিস্সাম; নো চে অম্হাকং আচরিযুপজ্ঝাযা গমিস্সন্তি, মযম্পি ন গমিস্সাম. লহুচিত্তকতা নো, আৰুসো আনন্দ, পঞ্ঞাযিস্সতী’’তি. অথ খো ভগৰা ওগণেন ভিক্খুসঙ্ঘেন দক্খিণাগিরিং চারিকং পক্কামি.

আহুন্দরিকৰত্থু নিট্ঠিতং.