৩০. লিখিতকচোরৰত্থু

৯৩. তেন খো পন সমযেন অঞ্ঞতরো পুরিসো চোরিকং কত্ৰা পলাযিত্ৰা ভিক্খূসু পব্বজিতো হোতি. সো চ রঞ্ঞো অন্তেপুরে লিখিতো হোতি – যত্থ পস্সতি, তত্থ হন্তব্বোতি. মনুস্সা পস্সিত্ৰা এৰমাহংসু – ‘‘অযং সো লিখিতকো চোরো. হন্দ, নং হনামা’’তি. একচ্চে এৰমাহংসু – ‘‘মায্যো, এৰং অৰচুত্থ. অনুঞ্ঞাতং রঞ্ঞা মাগধেন সেনিযেন বিম্বিসারেন ‘‘যে সমণেসু সক্যপুত্তিযেসু পব্বজন্তি, ন তে লব্ভা কিঞ্চি কাতুং, স্ৰাক্খাতো ধম্মো, চরন্তু ব্রহ্মচরিযং সম্মা দুক্খস্স অন্তকিরিযাযা’’তি. মনুস্সা উজ্ঝাযন্তি খিয্যন্তি ৰিপাচেন্তি – ‘‘অভযূৰরা ইমে সমণা সক্যপুত্তিযা, নযিমে লব্ভা কিঞ্চি কাতুং. কথঞ্হি নাম সমণা সক্যপুত্তিযা লিখিতকং চোরং পব্বাজেস্সন্তী’’তি. ভগৰতো এতমত্থং আরোচেসুং. ন, ভিক্খৰে, লিখিতকো চোরো পব্বাজেতব্বো. যো পব্বাজেয্য, আপত্তি দুক্কটস্সাতি.

লিখিতকচোরৰত্থু নিট্ঠিতং.