২৭. রাজভটৰত্থু

৯০. তেন খো পন সমযেন রঞ্ঞো মাগধস্স সেনিযস্স বিম্বিসারস্স পচ্চন্তো কুপিতো হোতি. অথ খো রাজা মাগধো সেনিযো বিম্বিসারো সেনানাযকে মহামত্তে আণাপেসি – ‘‘গচ্ছথ, ভণে, পচ্চন্তং উচ্চিনথা’’তি. ‘‘এৰং, দেৰা’’তি খো সেনানাযকা মহামত্তা রঞ্ঞো মাগধস্স সেনিযস্স বিম্বিসারস্স পচ্চস্সোসুং. অথ খো অভিঞ্ঞাতানং অভিঞ্ঞাতানং যোধানং এতদহোসি – ‘‘মযং খো যুদ্ধাভিনন্দিনো গচ্ছন্তা পাপঞ্চ করোম, বহুঞ্চ অপুঞ্ঞং পসৰাম. কেন নু খো মযং উপাযেন পাপা চ ৰিরমেয্যাম কল্যাণঞ্চ করেয্যামা’’তি? অথ খো তেসং যোধানং এতদহোসি – ‘‘ইমে খো সমণা সক্যপুত্তিযা ধম্মচারিনো সমচারিনো ব্রহ্মচারিনো সচ্চৰাদিনো সীলৰন্তো কল্যাণধম্মা. সচে খো মযং সমণেসু সক্যপুত্তিযেসু পব্বজেয্যাম, এৰং মযং পাপা চ ৰিরমেয্যাম কল্যাণঞ্চ করেয্যামা’’তি. অথ খো তে যোধা ভিক্খূ উপসঙ্কমিত্ৰা পব্বজ্জং যাচিংসু. তে ভিক্খূ পব্বাজেসুং, উপসম্পাদেসুং. সেনানাযকা মহামত্তা রাজভটে পুচ্ছিংসু – ‘‘কিং নু খো, ভণে, ইত্থন্নামো চ ইত্থন্নামো চ যোধা ন দিস্সন্তী’’তি? ‘‘ইত্থন্নামো চ ইত্থন্নামো চ, সামি, যোধা ভিক্খূসু পব্বজিতা’’তি. সেনানাযকা মহামত্তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা রাজভটং পব্বাজেস্সন্তী’’তি. সেনানাযকা মহামত্তা রঞ্ঞো মাগধস্স সেনিযস্স বিম্বিসারস্স এতমত্থং আরোচেসুং. অথ খো রাজা মাগধো সেনিযো বিম্বিসারো ৰোহারিকে মহামত্তে পুচ্ছি – ‘‘যো, ভণে, রাজভটং পব্বাজেতি, কিং সো পসৰতী’’তি? ‘‘উপজ্ঝাযস্স, দেৰ, সীসং ছেতব্বং, অনুস্সাৰকস্স [অনুসাৰকস্স (ক.)] জিৰ্হা উদ্ধরিতব্বা, গণস্স উপড্ঢফাসুকা ভঞ্জিতব্বা’’তি. অথ খো রাজা মাগধো সেনিযো বিম্বিসারো যেন ভগৰা তেনুপসঙ্কমি, উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো রাজা মাগধো সেনিযো বিম্বিসারো ভগৰন্তং এতদৰোচ – ‘‘সন্তি, ভন্তে, রাজানো অস্সদ্ধা অপ্পসন্না. তে অপ্পমত্তকেনপি ভিক্খূ ৰিহেঠেয্যুং. সাধু, ভন্তে, অয্যা রাজভটং ন পব্বাজেয্যু’’ন্তি. অথ খো ভগৰা রাজানং মাগধং সেনিযং বিম্বিসারং ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি. অথ খো রাজা মাগধো সেনিযো বিম্বিসারো ভগৰতা ধম্মিযা কথায সন্দস্সিতো সমাদপিতো সমুত্তেজিতো সম্পহংসিতো উট্ঠাযাসনা ভগৰন্তং অভিৰাদেত্ৰা পদক্খিণং কত্ৰা পক্কামি. অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘ন, ভিক্খৰে, রাজভটো পব্বাজেতব্বো. যো পব্বাজেয্য, আপত্তি দুক্কটস্সা’’তি.

রাজভটৰত্থু নিট্ঠিতং.