৯. জন্তাঘরৰত্তকথা

৩৭১. তেন খো পন সমযেন ছব্বগ্গিযা ভিক্খূ জন্তাঘরে থেরেহি ভিক্খূহি নিৰারিযমানা অনাদরিযং পটিচ্চ পহূতং কট্ঠং আরোপেত্ৰা অগ্গিং দত্ৰা দ্ৰারং থকেত্ৰা দ্ৰারে নিসীদন্তি. ভিক্খূ [থেরা চ ভিক্খূ (স্যা. কং.)] উণ্হাভিতত্তা দ্ৰারং অলভমানা মুচ্ছিতা পপতন্তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ জন্তাঘরে থেরেহি ভিক্খূহি নিৰারিযমানা অনাদরিযং পটিচ্চ পহূতং কট্ঠং আরোপেত্ৰা অগ্গিং দত্ৰা দ্ৰারং থকেত্ৰা দ্ৰারে নিসীদিস্সন্তি! ভিক্খূ উণ্হাভিতত্তা দ্ৰারং অলভমানা মুচ্ছিতা পপতন্তী’’তি. অথ খো তে ভিক্খূ ভগৰতো এতমত্থং আরোচেসুং…পে… ‘‘সচ্চং কির, ভিক্খৰে, ছব্বগ্গিযা ভিক্খূ জন্তাঘরে থেরেহি ভিক্খূহি নিৰারিযমানা অনাদরিযং পটিচ্চ পহূতং কট্ঠং আরোপেত্ৰা অগ্গিং দত্ৰা দ্ৰারং থকেত্ৰা দ্ৰারে নিসীদন্তি; ভিক্খূ উণ্হাভিতত্তা দ্ৰারং অলভমানা মুচ্ছিতা পপতন্তী’’তি? ‘‘সচ্চং ভগৰা’’তি…পে… ৰিগরহিত্ৰা…পে… ধম্মিং কথং কত্ৰা ভিক্খূ আমন্তেসি – ‘‘ন, ভিক্খৰে, জন্তাঘরে থেরেন ভিক্খুনা নিৰারিযমানেন অনাদরিযং পটিচ্চ পহূতং কট্ঠং আরোপেত্ৰা অগ্গি দাতব্বো. যো দদেয্য, আপত্তি দুক্কটস্স. ন, ভিক্খৰে, দ্ৰারং থকেত্ৰা দ্ৰারে নিসীদিতব্বং. যো নিসীদেয্য, আপত্তি দুক্কটস্স.

৩৭২. ‘‘তেন হি, ভিক্খৰে, ভিক্খূনং জন্তাঘরৰত্তং পঞ্ঞপেস্সামি যথা ভিক্খূহি জন্তাঘরে সম্মা ৰত্তিতব্বং. যো পঠমং জন্তাঘরং গচ্ছতি, সচে ছারিকা উস্সন্না হোতি, ছারিকা ছড্ডেতব্বা. সচে জন্তাঘরং উক্লাপং হোতি, জন্তাঘরং সম্মজ্জিতব্বং. সচে পরিভণ্ডং উক্লাপং হোতি, পরিভণ্ডং সম্মজ্জিতব্বং. সচে পরিৰেণং উক্লাপং হোতি, পরিৰেণং সম্মজ্জিতব্বং. সচে কোট্ঠকো উক্লাপো হোতি, কোট্ঠকো সম্মজ্জিতব্বো. সচে জন্তাঘরসালা উক্লাপা হোতি, জন্তাঘরসালা সম্মজ্জিতব্বা.

‘‘চুণ্ণং সন্নেতব্বং, মত্তিকা তেমেতব্বা, উদকদোণিকায উদকং আসিঞ্চিতব্বং. জন্তাঘরং পৰিসন্তেন মত্তিকায মুখং মক্খেত্ৰা পুরতো চ পচ্ছতো চ পটিচ্ছাদেত্ৰা জন্তাঘরং পৰিসিতব্বং. ন থেরে ভিক্খূ অনুপখজ্জ নিসীদিতব্বং. ন নৰা ভিক্খূ আসনেন পটিবাহিতব্বা. সচে উস্সহতি, জন্তাঘরে থেরানং ভিক্খূনং পরিকম্মং কাতব্বং. জন্তাঘরা নিক্খমন্তেন জন্তাঘরপীঠং আদায পুরতো চ পচ্ছতো চ পটিচ্ছাদেত্ৰা জন্তাঘরা নিক্খমিতব্বং. সচে উস্সহতি, উদকেপি থেরানং ভিক্খূনং পরিকম্মং কাতব্বং. ন থেরানং ভিক্খূনং পুরতোপি নহাযিতব্বং, ন উপরিতোপি নহাযিতব্বং. নহাতেন উত্তরন্তেন ওতরন্তানং মগ্গো দাতব্বো. যো পচ্ছা জন্তাঘরা নিক্খমতি, সচে জন্তাঘরং চিক্খল্লং হোতি, ধোৰিতব্বং. মত্তিকাদোণিকং ধোৰিত্ৰা জন্তাঘরপীঠং পটিসামেত্ৰা অগ্গিং ৰিজ্ঝাপেত্ৰা দ্ৰারং থকেত্ৰা পক্কমিতব্বং. ইদং খো, ভিক্খৰে, ভিক্খূনং জন্তাঘরৰত্তং যথা ভিক্খূহি জন্তাঘরে সম্মা ৰত্তিতব্ব’’ন্তি.