১০. ৰচ্চকুটিৰত্তকথা

৩৭৩. তেন খো পন সমযেন অঞ্ঞতরো ভিক্খু ব্রাহ্মণজাতিকো ৰচ্চং কত্ৰা ন ইচ্ছতি আচমেতুং – কো ইমং ৰসলং দুগ্গন্ধং আমসিস্সতীতি [আচমিস্সতীতি (ক.)]. তস্স ৰচ্চমগ্গে কিমি সণ্ঠাতি. অথ খো সো ভিক্খু ভিক্খূনং এতমত্থং আরোচেসি. ‘‘কিং পন ত্ৰং, আৰুসো, ৰচ্চং কত্ৰা ন আচমেসী’’তি? ‘‘এৰমাৰুসো’’তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খু ৰচ্চং কত্ৰা ন আচমেস্সতী’’তি! অথ খো তে ভিক্খূ ভগৰতো এতমত্থং আরোচেসুং…পে… ‘‘সচ্চং কির ত্ৰং, ভিক্খু, ৰচ্চং কত্ৰা ন আচমেসী’’তি? ‘‘সচ্চং ভগৰা’’তি…পে… ৰিগরহিত্ৰা…পে… ধম্মিং কথং কত্ৰা ভিক্খূ আমন্তেসি – ‘‘ন, ভিক্খৰে, ৰচ্চং কত্ৰা সতি উদকে নাচমেতব্বং. যো নাচমেয্য, আপত্তি দুক্কটস্সা’’তি.

তেন খো পন সমযেন ভিক্খূ ৰচ্চকুটিযা যথাৰুড্ঢং ৰচ্চং করোন্তি. নৰকা ভিক্খূ পঠমতরং আগন্ত্ৰা ৰচ্চিতা আগমেন্তি. তে ৰচ্চং সন্ধারেন্তা মুচ্ছিতা পপতন্তি. ভগৰতো এতমত্থং আরোচেসুং…পে… সচ্চং কির ভিক্খৰে…পে… সচ্চং ভগৰাতি…পে… ‘‘ন, ভিক্খৰে, ৰচ্চকুটিযা যথাৰুড্ঢং ৰচ্চো কাতব্বো. যো করেয্য, আপত্তি দুক্কটস্স. অনুজানামি, ভিক্খৰে, আগতপটিপাটিযা ৰচ্চং কাতু’’ন্তি.

তেন খো পন সমযেন ছব্বগ্গিযা ভিক্খূ অতিসহসাপি ৰচ্চকুটিং পৰিসন্তি, উব্ভজিত্ৰাপি [উব্ভুজ্জিত্ৰাপি (সী.), উব্ভুজিত্ৰা (স্যা.)] পৰিসন্তি, নিত্থুনন্তাপি ৰচ্চং করোন্তি, দন্তকট্ঠং খাদন্তাপি ৰচ্চং করোন্তি, বহিদ্ধাপি ৰচ্চদোণিকায ৰচ্চং করোন্তি, বহিদ্ধাপি পস্সাৰদোণিকায পস্সাৰং করোন্তি, পস্সাৰদোণিকাযপি খেল়ং করোন্তি, ফরুসেনপি কট্ঠেন অৰলেখন্তি, অৰলেখনকট্ঠম্পি ৰচ্চকূপম্হি পাতেন্তি, অতিসহসাপি নিক্খমন্তি, উব্ভজিত্ৰাপি নিক্খমন্তি, চপুচপুকারকম্পি আচমেন্তি, আচমনসরাৰকেপি উদকং সেসেন্তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ অতিসহসাপি ৰচ্চকুটিং পৰিসিস্সন্তি, উব্ভজিত্ৰাপি পৰিসিস্সন্তি, নিত্থুনন্তাপি ৰচ্চং করিস্সন্তি, দন্তকট্ঠং খাদন্তাপি ৰচ্চং করিস্সন্তি, বহিদ্ধাপি ৰচ্চদোণিকায ৰচ্চং করিস্সন্তি, বহিদ্ধাপি পস্সাৰদোণিকায পস্সাৰং করিস্সন্তি, পস্সাৰদোণিকাযপি খেল়ং করিস্সন্তি, ফরুসেনপি কট্ঠেন অৰলেখিস্সন্তি, অৰলেখনকট্ঠম্পি ৰচ্চকূপম্হি পাতেস্সন্তি, অতিসহসাপি নিক্খমিস্সন্তি, উব্ভজিত্ৰাপি নিক্খমিস্সন্তি, চপুচপুকারকম্পি আচমেস্সন্তি, আচমনসরাৰকেপি উদকং সেসেস্সন্তী’’তি! অথ খো তে ভিক্খূ ভগৰতো এতমত্থং আরোচেসুং…পে… সচ্চং কির, ভিক্খৰে…পে… সচ্চং ভগৰাতি…পে… ৰিগরহিত্ৰা…পে… ধম্মিং কথং কত্ৰা ভিক্খূ আমন্তেসি –

৩৭৪. ‘‘তেন হি, ভিক্খৰে, ভিক্খূনং ৰচ্চকুটিৰত্তং পঞ্ঞপেস্সামি যথা ভিক্খূহি ৰচ্চকুটিযা সম্মা ৰত্তিতব্বং. যো ৰচ্চকুটিং গচ্ছতি তেন বহি ঠিতেন [বহি ঠিতেন (সী. ক.)] উক্কাসিতব্বং. অন্তো নিসিন্নেনপি উক্কাসিতব্বং. চীৰরৰংসে ৰা চীৰররজ্জুযা ৰা চীৰরং নিক্খিপিত্ৰা সাধুকং অতরমানেন ৰচ্চকুটী পৰিসিতব্বা. নাতিসহসা পৰিসিতব্বা. ন উব্ভজিত্ৰা পৰিসিতব্বা. ৰচ্চপাদুকায ঠিতেন উব্ভজিতব্বং. ন নিত্থুনন্তেন ৰচ্চো কাতব্বো. ন দন্তকট্ঠং খাদন্তেন ৰচ্চো কাতব্বো. ন বহিদ্ধা ৰচ্চদোণিকায ৰচ্চো কাতব্বো. ন বহিদ্ধা পস্সাৰদোণিকায পস্সাৰো কাতব্বো. ন পস্সাৰদোণিকায খেল়ো কাতব্বো. ন ফরুসেন কট্ঠেন অৰলেখিতব্বং. ন অৰলেখনকট্ঠং ৰচ্চকূপম্হি পাতেতব্বং. ৰচ্চপাদুকায ঠিতেন পটিচ্ছাদেতব্বং. নাতিসহসা নিক্খমিতব্বং. ন উব্ভজিত্ৰা নিক্খমিতব্বং. আচমনপাদুকায ঠিতেন উব্ভজিতব্বং. ন চপুচপুকারকং আচমেতব্বং. ন আচমনসরাৰকে উদকং সেসেতব্বং. আচমনপাদুকায ঠিতেন পটিচ্ছাদেতব্বং.

‘‘সচে ৰচ্চকুটি উহতা [ঊহতা (সী. স্যা.)] হোতি, ধোৰিতব্বা. সচে অৰলেখনপিধরো পূরো হোতি, অৰলেখনকট্ঠং ছড্ডেতব্বং. সচে ৰচ্চকুটি উক্লাপা হোতি, ৰচ্চকুটি সম্মজ্জিতব্বা. সচে পরিভণ্ডং উক্লাপং হোতি, পরিভণ্ডং সম্মজ্জিতব্বং. সচে পরিৰেণং উক্লাপং হোতি, পরিৰেণং সম্মজ্জিতব্বং. সচে কোট্ঠকো উক্লাপো হোতি, কোট্ঠকো সম্মজ্জিতব্বো. সচে আচমনকুম্ভিযা উদকং ন হোতি, আচমনকুম্ভিযা উদকং আসিঞ্চিতব্বং. ইদং খো, ভিক্খৰে, ভিক্খূনং ৰচ্চকুটিৰত্তং যথা ভিক্খূহি ৰচ্চকুটিযা সম্মা ৰত্তিতব্ব’’ন্তি.