৮. সেনাসনৰত্তকথা

৩৬৯. তেন খো পন সমযেন সম্বহুলা ভিক্খূ অজ্ঝোকাসে চীৰরকম্মং করোন্তি. ছব্বগ্গিযা ভিক্খূ পটিৰাতে অঙ্গণে [পঙ্গণে (সী. স্যা.)] সেনাসনং পপ্ফোটেসুং. ভিক্খূ রজেন ওকিরিংসু. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ পটিৰাতে অঙ্গণে সেনাসনং পপ্ফোটেস্সন্তি! ভিক্খূ রজেন ওকিরিংসূ’’তি. অথ খো তে ভিক্খূ ভগৰতো এতমত্থং আরোচেসুং…পে… ‘‘সচ্চং কির, ভিক্খৰে, ছব্বগ্গিযা ভিক্খূ পটিৰাতে অঙ্গণে সেনাসনং পপ্ফোটেন্তি, ভিক্খূ রজেন ওকিরিংসূ’’তি? ‘‘সচ্চং ভগৰা’’তি…পে… ৰিগরহিত্ৰা…পে… ধম্মিং কথং কত্ৰা ভিক্খূ আমন্তেসি –

৩৭০. ‘‘তেন হি, ভিক্খৰে, ভিক্খূনং সেনাসনৰত্তং পঞ্ঞপেস্সামি যথা ভিক্খূহি সেনাসনে সম্মা ৰত্তিতব্বং. যস্মিং ৰিহারে ৰিহরতি, সচে সো ৰিহারো উক্লাপো হোতি, সচে উস্সহতি, সোধেতব্বো. [মহাৰ. ৬৬, ৬৭; চূল়ৰ. ৩৫৭] ৰিহারং সোধেন্তেন পঠমং পত্তচীৰরং নীহরিত্ৰা একমন্তং নিক্খিপিতব্বং; নিসীদনপচ্চত্থরণং নীহরিত্ৰা একমন্তং নিক্খিপিতব্বং; ভিসিবিব্বোহনং নীহরিত্ৰা একমন্তং নিক্খিপিতব্বং; মঞ্চো নীচং কত্ৰা সাধুকং অপ্পটিঘংসন্তেন, অসঙ্ঘট্টেন্তেন কৰাটপিট্ঠং, নীহরিত্ৰা একমন্তং নিক্খিপিতব্বো; পীঠং নীচং কত্ৰা সাধুকং অপ্পটিঘংসন্তেন, অসঙ্ঘট্টেন্তেন কৰাটপিট্ঠং, নীহরিত্ৰা একমন্তং নিক্খিপিতব্বং; মঞ্চপটিপাদকা নীহরিত্ৰা একমন্তং নিক্খিপিতব্বা; খেল়মল্লকো নীহরিত্ৰা একমন্তং নিক্খিপিতব্বো; অপস্সেনফলকং নীহরিত্ৰা একমন্তং নিক্খিপিতব্বং; ভুম্মত্থরণং যথাপঞ্ঞত্তং সল্লক্খেত্ৰা নীহরিত্ৰা একমন্তং নিক্খিপিতব্বং. সচে ৰিহারে সন্তানকং হোতি, উল্লোকা পঠমং ওহারেতব্বং, আলোকসন্ধিকণ্ণভাগা পমজ্জিতব্বা. সচে গেরুকপরিকম্মকতা ভিত্তি কণ্ণকিতা হোতি, চোল়কং তেমেত্ৰা পীল়েত্ৰা পমজ্জিতব্বা. সচে কাল়ৰণ্ণকতা ভূমি কণ্ণকিতা হোতি, চোল়কং তেমেত্ৰা পীল়েত্ৰা পমজ্জিতব্বা. সচে অকতা হোতি ভূমি, উদকেন পরিপ্ফোসিত্ৰা পরিফোসিত্ৰা সম্মজ্জিতব্বা – মা ৰিহারো রজেন উহঞ্ঞীতি. সঙ্কারং ৰিচিনিত্ৰা একমন্তং ছড্ডেতব্বং.

‘‘ন ভিক্খুসামন্তা সেনাসনং পপ্ফোটেতব্বং. ন ৰিহারসামন্তা সেনাসনং পপ্ফোটেতব্বং. ন পানীযসামন্তা সেনাসনং পপ্ফোটেতব্বং. ন পরিভোজনীযসামন্তা সেনাসনং পপ্ফোটেতব্বং. ন পটিৰাতে অঙ্গণে সেনাসনং পপ্ফোটেতব্বং. অধোৰাতে সেনাসনং পপ্ফোটেতব্বং.

‘‘ভুম্মত্থরণং একমন্তং ওতাপেত্ৰা সোধেত্ৰা পপ্ফোটেত্ৰা অতিহরিত্ৰা যথাপঞ্ঞত্তং পঞ্ঞপেতব্বং. মঞ্চপটিপাদকা একমন্তং ওতাপেত্ৰা পমজ্জিত্ৰা অতিহরিত্ৰা যথাঠানে ঠপেতব্বা. মঞ্চো একমন্তং ওতাপেত্ৰা সোধেত্ৰা পপ্ফোটেত্ৰা নীচং কত্ৰা সাধুকং অপ্পটিঘংসন্তেন, অসঙ্ঘট্টেন্তেন কৰাটপিট্ঠং, অতিহরিত্ৰা যথাপঞ্ঞত্তং পঞ্ঞপেতব্বো. পীঠং একমন্তং ওতাপেত্ৰা সোধেত্ৰা পপ্ফোটেত্ৰা নীচং কত্ৰা সাধুকং অপ্পটিঘংসন্তেন, অসঙ্ঘট্টেন্তেন কৰাটপিট্ঠং, অতিহরিত্ৰা যথাপঞ্ঞত্তং পঞ্ঞপেতব্বং. ভিসিবিব্বোহনং একমন্তং ওতাপেত্ৰা সোধেত্ৰা পপ্ফোটেত্ৰা অতিহরিত্ৰা যথাপঞ্ঞত্তং পঞ্ঞপেতব্বং. নিসীদনপচ্চত্থরণং একমন্তং ওতাপেত্ৰা সোধেত্ৰা পপ্ফোটেত্ৰা অতিহরিত্ৰা যথাপঞ্ঞত্তং পঞ্ঞপেতব্বং. খেল়মল্লকো একমন্তং ওতাপেত্ৰা পমজ্জিত্ৰা অতিহরিত্ৰা যথাঠানে ঠপেতব্বো. অপস্সেনফলকং একমন্তং ওতাপেত্ৰা পমজ্জিত্ৰা অতিহরিত্ৰা যথাঠানে ঠপেতব্বং. পত্তচীৰরং নিক্খিপিতব্বং. পত্তং নিক্খিপন্তেন একেন হত্থেন পত্তং গহেত্ৰা একেন হত্থেন হেট্ঠামঞ্চং ৰা হেট্ঠাপীঠং ৰা পরামসিত্ৰা পত্তো নিক্খিপিতব্বো. ন চ অনন্তরহিতায ভূমিযা পত্তো নিক্খিপিতব্বো. চীৰরং নিক্খিপন্তেন একেন হত্থেন চীৰরং গহেত্ৰা একেন হত্থেন চীৰরৰংসং ৰা চীৰররজ্জু ৰা পমজ্জিত্ৰা পারতো অন্তং ওরতো ভোগং কত্ৰা চীৰরং নিক্খিপিতব্বং.

‘‘সচে পুরত্থিমা সরজা ৰাতা ৰাযন্তি, পুরত্থিমা ৰাতপানা থকেতব্বা. সচে পচ্ছিমা সরজা ৰাতা ৰাযন্তি, পচ্ছিমা ৰাতপানা থকেতব্বা. সচে উত্তরা সরজা ৰাতা ৰাযন্তি উত্তরা ৰাতপানা থকেতব্বা. সচে দক্খিণা সরজা ৰাতা ৰাযন্তি, দক্খিণা ৰাতপানা থকেতব্বা. সচে সীতকালো হোতি, দিৰা ৰাতপানা ৰিৰরিতব্বা, রত্তিং থকেতব্বা. সচে উণ্হকালো হোতি, দিৰা ৰাতপানা থকেতব্বা, রত্তিং ৰিৰরিতব্বা.

‘‘সচে পরিৰেণং উক্লাপং হোতি, পরিৰেণং সম্মজ্জিতব্বং. সচে কোট্ঠকো উক্লাপো হোতি, কোট্ঠকো সম্মজ্জিতব্বো. সচে উপট্ঠানসালা উক্লাপা হোতি, উপট্ঠানসালা সম্মজ্জিতব্বা. সচে অগ্গিসালা উক্লাপা হোতি, অগ্গিসালা সম্মজ্জিতব্বা. সচে ৰচ্চকুটি উক্লাপা হোতি, ৰচ্চকুটি সম্মজ্জিতব্বা. সচে পানীযং ন হোতি, পানীযং উপট্ঠাপেতব্বং. সচে পরিভোজনীযং ন হোতি, পরিভোজনীযং উপট্ঠাপেতব্বং. সচে আচমনকুম্ভিযা উদকং ন হোতি, আচমনকুম্ভিযা উদকং আসিঞ্চিতব্বং.

‘‘সচে ৰুড্ঢেন সদ্ধিং একৰিহারে ৰিহরতি, ন ৰুড্ঢং অনাপুচ্ছা উদ্দেসো দাতব্বো, ন পরিপুচ্ছা দাতব্বা, ন সজ্ঝাযো কাতব্বো, ন ধম্মো ভাসিতব্বো, ন পদীপো কাতব্বো, ন পদীপো ৰিজ্ঝাপেতব্বো, ন ৰাতপানা ৰিৰরিতব্বা, ন ৰাতপানা থকেতব্বা. সচে ৰুড্ঢেন সদ্ধিং একচঙ্কমে চঙ্কমতি, যেন ৰুড্ঢো তেন পরিৰত্তিতব্বং, ন চ ৰুড্ঢো সঙ্ঘাটিকণ্ণেন ঘট্টেতব্বো. ইদং খো, ভিক্খৰে, ভিক্খূনং সেনাসনৰত্তং যথা ভিক্খূহি সেনাসনে সম্মা ৰত্তিতব্ব’’ন্তি.