৩. গমিকৰত্তকথা

৩৬০. তেন খো পন সমযেন গমিকা ভিক্খূ দারুভণ্ডং মত্তিকাভণ্ডং অপ্পটিসামেত্ৰা দ্ৰারৰাতপানং ৰিৰরিত্ৰা সেনাসনং অনাপুচ্ছা পক্কমন্তি. দারুভণ্ডং মত্তিকাভণ্ডং নস্সতি. সেনাসনং অগুত্তং হোতি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম গমিকা ভিক্খূ দারুভণ্ডং মত্তিকাভণ্ডং অপ্পটিসামেত্ৰা দ্ৰারৰাতপানং ৰিৰরিত্ৰা সেনাসনং অনাপুচ্ছা পক্কমিস্সন্তি! দারুভণ্ডং মত্তিকাভণ্ডং নস্সতি. সেনাসনং অগুত্তং হোতী’’তি. অথ খো তে ভিক্খূ ভগৰতো এতমত্থং আরোচেসুং…পে… সচ্চং কির, ভিক্খৰে…পে… সচ্চং ভগৰাতি…পে… ৰিগরহিত্ৰা…পে… ধম্মিং কথং কত্ৰা ভিক্খূ আমন্তেসি –

৩৬১. ‘‘তেন হি, ভিক্খৰে, গমিকানং ভিক্খূনং ৰত্তং পঞ্ঞপেস্সামি যথা গমিকেহি ভিক্খূহি সম্মা ৰত্তিতব্বং. গমিকেন, ভিক্খৰে, ভিক্খুনা দারুভণ্ডং মত্তিকাভণ্ডং পটিসামেত্ৰা দ্ৰারৰাতপানং থকেত্ৰা সেনাসনং আপুচ্ছা পক্কমিতব্বং [আপুচ্ছিতব্বং (স্যা.)]. সচে ভিক্খু ন হোতি, সামণেরো আপুচ্ছিতব্বো. সচে সামণেরো ন হোতি, আরামিকো আপুচ্ছিতব্বো. সচে আরামিকো ন হোতি, উপাসকো আপুচ্ছিতব্বো. সচে ন হোতি ভিক্খু ৰা সামণেরো ৰা আরামিকো ৰা উপাসকো ৰা, চতূসু পাসাণেসু মঞ্চং পঞ্ঞপেত্ৰা মঞ্চে মঞ্চং আরোপেত্ৰা পীঠে পীঠং আরোপেত্ৰা সেনাসনং উপরি পুঞ্জং করিত্ৰা দারুভণ্ডং মত্তিকাভণ্ডং পটিসামেত্ৰা দ্ৰারৰাতপানং থকেত্ৰা পক্কমিতব্বং. সচে ৰিহারো ওৰস্সতি, সচে উস্সহতি, ছাদেতব্বো, উস্সুকং ৰা কাতব্বং – ‘কিন্তি নু খো ৰিহারো ছাদিযেথা’তি. এৰঞ্চেতং লভেথ, ইচ্চেতং কুসলং. নো চে লভেথ, যো দেসো অনোৰস্সকো হোতি, তত্থ চতূসু পাসাণেসু মঞ্চং পঞ্ঞপেত্ৰা মঞ্চে মঞ্চং আরোপেত্ৰা পীঠে পীঠং আরোপেত্ৰা সেনাসনং উপরি পুঞ্জং করিত্ৰা দারুভণ্ডং মত্তিকাভণ্ডং পটিসামেত্ৰা দ্ৰারৰাতপানং থকেত্ৰা পক্কমিতব্বং. সচে সব্বো ৰিহারো ওৰস্সতি, সচে উস্সহতি, সেনাসনং গামং অতিহরিতব্বং, উস্সুকং ৰা কাতব্বং – ‘কিন্তি নু খো সেনাসনং গামং অতিহরিযেথা’তি. এৰঞ্চেতং লভেথ, ইচ্চেতং কুসলং. নো চে লভেথ, অজ্ঝোকাসে চতূসু পাসাণেসু মঞ্চং পঞ্ঞপেত্ৰা মঞ্চে মঞ্চং আরোপেত্ৰা পীঠে পীঠং আরোপেত্ৰা সেনাসনং উপরি পুঞ্জং করিত্ৰা দারুভণ্ডং মত্তিকাভণ্ডং পটিসামেত্ৰা তিণেন ৰা পণ্ণেন ৰা পটিচ্ছাদেত্ৰা পক্কমিতব্বং – অপ্পেৰ নাম অঙ্গানিপি সেসেয্যুন্তি. ইদং খো, ভিক্খৰে, গমিকানং ভিক্খূনং ৰত্তং যথা গমিকেহি ভিক্খূহি সম্মা ৰত্তিতব্ব’’ন্তি.