৪. অনুমোদনৰত্তকথা

৩৬২. তেন খো পন সমযেন ভিক্খূ ভত্তগ্গে ন অনুমোদন্তি. মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা ভত্তগ্গে ন অনুমোদিস্সন্তী’’তি! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. অথ খো তে ভিক্খূ ভগৰতো এতমত্থং আরোচেসুং. অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, ভত্তগ্গে অনুমোদিতু’’ন্তি. অথ খো তেসং ভিক্খূনং এতদহোসি – ‘‘কেন নু খো ভত্তগ্গে অনুমোদিতব্ব’’ন্তি? ভগৰতো এতমত্থং আরোচেসুং. অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, থেরেন ভিক্খুনা ভত্তগ্গে অনুমোদিতু’’ন্তি.

তেন খো পন সমযেন অঞ্ঞতরস্স পূগস্স সঙ্ঘভত্তং হোতি. আযস্মা সারিপুত্তো সঙ্ঘত্থেরো হোতি. ভিক্খূ – ‘ভগৰতা অনুঞ্ঞাতং থেরেন ভিক্খুনা ভত্তগ্গে অনুমোদিতু’ন্তি – আযস্মন্তং সারিপুত্তং এককং ওহায পক্কমিংসু. অথ খো আযস্মা সারিপুত্তো তে মনুস্সে পটিসম্মোদিত্ৰা পচ্ছা এককো অগমাসি. অদ্দসা খো ভগৰা আযস্মন্তং সারিপুত্তং দূরতোৰ এককং আগচ্ছন্তং. দিস্ৰান আযস্মন্তং সারিপুত্তং এতদৰোচ – ‘‘কচ্চি, সারিপুত্ত, ভত্তং ইদ্ধং অহোসী’’তি? ‘‘ইদ্ধং খো, ভন্তে, ভত্তং অহোসি; অপিচ মং ভিক্খূ এককং ওহায পক্কন্তা’’তি. অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, ভত্তগ্গে চতূহি পঞ্চহি থেরানুথেরেহি ভিক্খূহি আগমেতু’’ন্তি.

তেন খো পন সমযেন অঞ্ঞতরো থেরো ভত্তগ্গে ৰচ্চিতো আগমেসি. সো ৰচ্চং সন্ধারেতুং অসক্কোন্তো মুচ্ছিতো পপতি. ভগৰতো এতমত্থং আরোচেসুং. ‘‘অনুজানামি, ভিক্খৰে, সতি করণীযে আনন্তরিকং ভিক্খুং আপুচ্ছিত্ৰা গন্তু’’ন্তি.