২. আৰাসিকৰত্তকথা

৩৫৮. তেন খো পন সমযেন আৰাসিকা ভিক্খূ আগন্তুকে ভিক্খূ দিস্ৰা নেৰ আসনং পঞ্ঞপেন্তি, ন পাদোদকং পাদপীঠং পাদকথলিকং উপনিক্খিপন্তি, ন পচ্চুগ্গন্ত্ৰা পত্তচীৰরং পটিগ্গণ্হন্তি, ন পানীযেন পুচ্ছন্তি [ন পানীযেন পুচ্ছন্তি, ন পরিভোজনীযেন পুচ্ছন্তি (স্যা. কং.)], ন ৰুড্ঢতরেপি আগন্তুকে ভিক্খূ অভিৰাদেন্তি, ন সেনাসনং পঞ্ঞপেন্তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আৰাসিকা ভিক্খূ আগন্তুকে ভিক্খূ দিস্ৰা নেৰ আসনং পঞ্ঞপেস্সন্তি, ন পাদোদকং পাদপীঠং পাদকথলিকং উপনিক্খিপিস্সন্তি, ন পচ্চুগ্গন্ত্ৰা পত্তচীৰরং পটিগ্গহিস্সন্তি, ন পানীযেন পুচ্ছিস্সন্তি, ৰুড্ঢতরেপি আগন্তুকে ভিক্খূ ন অভিৰাদেস্সন্তি, ন সেনাসনং পঞ্ঞপেস্সন্তী’’তি! অথ খো তে ভিক্খূ ভগৰতো এতমত্থং আরোচেসুং…পে… সচ্চং কিরং, ভিক্খৰে…পে… সচ্চং ভগৰাতি…পে… ৰিগরহিত্ৰা…পে… ধম্মিং কথং কত্ৰা ভিক্খূ আমন্তেসি –

৩৫৯. ‘‘তেন হি, ভিক্খৰে, আৰাসিকানং ভিক্খূনং ৰত্তং পঞ্ঞপেস্সামি যথা আৰাসিকেহি ভিক্খূহি সম্মা ৰত্তিতব্বং. আৰাসিকেন, ভিক্খৰে, ভিক্খুনা আগন্তুকং ভিক্খুং ৰুড্ঢতরং দিস্ৰা আসনং পঞ্ঞপেতব্বং, পাদোদকং পাদপীঠং পাদকথলিকং উপনিক্খিপিতব্বং, পচ্চুগ্গন্ত্ৰা পত্তচীৰরং পটিগ্গহেতব্বং, পানীযেন পুচ্ছিতব্বো [পানীযেন পুচ্ছিতব্বো, পরিভোজনীযেন পুচ্ছিতব্বো (স্যা.)]. সচে উস্সহতি, উপাহনা পুঞ্ছিতব্বা. উপাহনা পুঞ্ছন্তেন পঠমং সুক্খেন চোল়কেন পুঞ্ছিতব্বা, পচ্ছা অল্লেন. উপাহনাপুঞ্ছনচোল়কং ধোৰিত্ৰা [ধোৰিত্ৰা পীল়েত্ৰা (স্যা.)] একমন্তং ৰিস্সজ্জেতব্বং.

‘‘আগন্তুকো ভিক্খু ৰুড্ঢতরো অভিৰাদেতব্বো. সেনাসনং পঞ্ঞপেতব্বং – ‘এতং তে সেনাসনং পাপুণাতী’তি. অজ্ঝাৰুট্ঠং ৰা অনজ্ঝাৰুট্ঠং ৰা আচিক্খিতব্বং. গোচরো আচিক্খিতব্বো. অগোচরো আচিক্খিতব্বো. সেক্খসম্মতানি কুলানি আচিক্খিতব্বানি. ৰচ্চট্ঠানং আচিক্খিতব্বং. পস্সাৰট্ঠানং আচিক্খিতব্বং. পানীযং আচিক্খিতব্বং. পরিভোজনীযং আচিক্খিতব্বং. কত্তরদণ্ডো আচিক্খিতব্বো. সঙ্ঘস্স কতিকসণ্ঠানং আচিক্খিতব্বং – ‘ইমং কালং পৰিসিতব্বং, ইমং কালং নিক্খমিতব্ব’ন্তি.

‘‘সচে নৰকো হোতি, নিসিন্নকেনেৰ আচিক্খিতব্বং – ‘অত্র পত্তং নিক্খিপাহি, অত্র চীৰরং নিক্খিপাহি, ইদং আসনং নিসীদাহী’তি. পানীযং আচিক্খিতব্বং. পরিভোজনীযং আচিক্খিতব্বং. উপাহনাপুঞ্ছনচোল়কং আচিক্খিতব্বং. আগন্তুকো ভিক্খু নৰকো অভিৰাদাপেতব্বো. সেনাসনং আচিক্খিতব্বং – ‘এতং তে সেনাসনং পাপুণাতী’তি. অজ্ঝাৰুট্ঠং ৰা অনজ্ঝাৰুট্ঠং ৰা আচিক্খিতব্বং. গোচরো আচিক্খিতব্বো. অগোচরো আচিক্খিতব্বো. সেক্খসম্মতানি কুলানি আচিক্খিতব্বানি. ৰচ্চট্ঠানং আচিক্খিতব্বং. পস্সাৰট্ঠানং আচিক্খিতব্বং. পানীযং আচিক্খিতব্বং. পরিভোজনীযং আচিক্খিতব্বং. কত্তরদণ্ডো আচিক্খিতব্বো. সঙ্ঘস্স কতিকসণ্ঠানং আচিক্খিতব্বং – ‘ইমং কালং পৰিসিতব্বং, ইমং কালং নিক্খমিতব্ব’ন্তি. ইদং খো, ভিক্খৰে, আৰাসিকানং ভিক্খূনং ৰত্তং যথা আৰাসিকেহি ভিক্খূহি সম্মা ৰত্তিতব্ব’’ন্তি.