২. পরিৰাসো

অগ্ঘসমোধানপরিৰাসো

১৩৪. তেন খো পন সমযেন অঞ্ঞতরো ভিক্খু সম্বহুলা সঙ্ঘাদিসেসা আপত্তিযো আপন্নো হোতি – একা আপত্তি একাহপ্পটিচ্ছন্না, একা আপত্তি দ্ৰীহপ্পটিচ্ছন্না, একা আপত্তি তীহপ্পটিচ্ছন্না, একা আপত্তি চতূহপ্পটিচ্ছন্না, একা আপত্তি পঞ্চাহপ্পটিচ্ছন্না, একা আপত্তি ছাহপ্পটিচ্ছন্না, একা আপত্তি সত্তাহপ্পটিচ্ছন্না, একা আপত্তি অট্ঠাহপ্পটিচ্ছন্না, একা আপত্তি নৰাহপ্পটিচ্ছন্না, একা আপত্তি দসাহপ্পটিচ্ছন্না. সো ভিক্খূনং আরোচেসি – ‘‘অহং, আৰুসো, সম্বহুলা সঙ্ঘাদিসেসা আপত্তিযো আপজ্জিং – একা আপত্তি একাহপ্পটিচ্ছন্না…পে… একা আপত্তি দসাহপ্পটিচ্ছন্না. কথং নু খো মযা পটিপজ্জিতব্ব’’ন্তি? ভগৰতো এতমত্থং আরোচেসুং. ‘‘তেন হি, ভিক্খৰে, সঙ্ঘো তস্স ভিক্খুনো তাসং আপত্তীনং যা আপত্তি দসাহপ্পটিচ্ছন্না তস্সা অগ্ঘেন সমোধানপরিৰাসং দেতু. এৰঞ্চ পন, ভিক্খৰে, দাতব্বো –

‘‘তেন, ভিক্খৰে, ভিক্খুনা সঙ্ঘং উপসঙ্কমিত্ৰা…পে… এৰমস্স ৰচনীযো – ‘অহং, ভন্তে, সম্বহুলা সঙ্ঘাদিসেসা আপত্তিযো আপজ্জিং – একা আপত্তি একাহপ্পটিচ্ছন্না…পে… একা আপত্তি দসাহপ্পটিচ্ছন্না. সোহং, ভন্তে, সঙ্ঘং তাসং আপত্তীনং যা আপত্তি দসাহপ্পটিচ্ছন্না তস্সা অগ্ঘেন সমোধানপরিৰাসং যাচামী’তি. দুতিযম্পি যাচিতব্বো. ততিযম্পি যাচিতব্বো. ব্যত্তেন ভিক্খুনা পটিবলেন সঙ্ঘো ঞাপেতব্বো –

১৩৫. ‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু সম্বহুলা সঙ্ঘাদিসেসা আপত্তিযো আপজ্জি – একা আপত্তি একাহপ্পটিচ্ছন্না…পে… একা আপত্তি দসাহপ্পটিচ্ছন্না. সো সঙ্ঘং তাসং আপত্তীনং যা আপত্তি দসাহপ্পটিচ্ছন্না তস্সা অগ্ঘেন সমোধানপরিৰাসং যাচতি. যদি সঙ্ঘস্স পত্তকল্লং, সঙ্ঘো ইত্থন্নামস্স ভিক্খুনো তাসং আপত্তীনং যা আপত্তি দসাহপ্পটিচ্ছন্না তস্সা অগ্ঘেন সমোধানপরিৰাসং দদেয্য. এসা ঞত্তি.

‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু সম্বহুলা সঙ্ঘাদিসেসা আপত্তিযো আপজ্জি – একা আপত্তি একাহপ্পটিচ্ছন্না…পে… একা আপত্তি দসাহপ্পটিচ্ছন্না. সো সঙ্ঘং তাসং আপত্তীনং যা আপত্তি দসাহপ্পটিচ্ছন্না তস্সা অগ্ঘেন সমোধানপরিৰাসং যাচতি. সঙ্ঘো ইত্থন্নামস্স ভিক্খুনো তাসং আপত্তীনং যা আপত্তি দসাহপ্পটিচ্ছন্না তস্সা অগ্ঘেন সমোধানপরিৰাসং দেতি. যস্সাযস্মতো খমতি ইত্থন্নামস্স ভিক্খুনো তাসং আপত্তীনং যা আপত্তি দসাহপ্পটিচ্ছন্না; তস্সা অগ্ঘেন সমোধানপরিৰাসস্স দানং, সো তুণ্হস্স; যস্স নক্খমতি, সো ভাসেয্য.

‘‘দুতিযম্পি এতমত্থং ৰদামি…পে… ততিযম্পি এতমত্থং ৰদামি…পে….

‘‘দিন্নো সঙ্ঘেন ইত্থন্নামস্স ভিক্খুনো তাসং আপত্তীনং যা আপত্তি দসাহপ্পটিচ্ছন্না তস্সা অগ্ঘেন সমোধানপরিৰাসো. খমতি সঙ্ঘস্স, তস্মা তুণ্হী, এৰমেতং ধারযামী’’তি.

সব্বচিরপ্পটিচ্ছন্নঅগ্ঘসমোধানং

১৩৬. তেন খো পন সমযেন অঞ্ঞতরো ভিক্খু সম্বহুলা সঙ্ঘাদিসেসা আপত্তিযো আপন্নো হোতি – একা আপত্তি একাহপ্পটিচ্ছন্না, দ্ৰে আপত্তিযো দ্ৰীহপ্পটিচ্ছন্নাযো [দ্ৰীহপ্পটিচ্ছন্না (ক. এৰং যাৰদসাহপ্পটিচ্ছন্না)], তিস্সো আপত্তিযো তীহপ্পটিচ্ছন্নাযো, চতস্সো আপত্তিযো চতূহপ্পটিচ্ছন্নাযো, পঞ্চ আপত্তিযো পঞ্চাহপ্পটিচ্ছন্নাযো, ছ আপত্তিযো ছাহপ্পটিচ্ছন্নাযো, সত্ত আপত্তিযো সত্তাহপ্পটিচ্ছন্নাযো, অট্ঠ আপত্তিযো অট্ঠাহপ্পটিচ্ছন্নাযো, নৰ আপত্তিযো নৰাহপ্পটিচ্ছন্নাযো, দস আপত্তিযো দসাহপ্পটিচ্ছন্নাযো. সো ভিক্খূনং আরোচেসি – ‘‘অহং, আৰুসো, সম্বহুলা সঙ্ঘাদিসেসা আপত্তিযো আপজ্জিং, একা আপত্তি একাহপ্পটিচ্ছন্না…পে… দস আপত্তিযো দসাহপ্পটিচ্ছন্নাযো. কথং নু খো মযা পটিপজ্জিতব্ব’’ন্তি? ভগৰতো এতমত্থং আরোচেসুং. ‘‘তেন হি, ভিক্খৰে, সঙ্ঘো তস্স ভিক্খুনো তাসং আপত্তীনং যা আপত্তিযো সব্বচিরপ্পটিচ্ছন্নাযো তাসং অগ্ঘেন সমোধানপরিৰাসং দেতু. এৰঞ্চ পন, ভিক্খৰে, দাতব্বো –

‘‘তেন, ভিক্খৰে, ভিক্খুনা সঙ্ঘং উপসঙ্কমিত্ৰা…পে… এৰমস্স ৰচনীযো – ‘অহং, ভন্তে, সম্বহুলা সঙ্ঘাদিসেসা আপত্তিযো আপজ্জিং, একা আপত্তি একাহপ্পটিচ্ছন্না…পে… দস আপত্তিযো দসাহপ্পটিচ্ছন্নাযো. সোহং, ভন্তে, সঙ্ঘং তাসং আপত্তীনং যা আপত্তিযো সব্বচিরপ্পটিচ্ছন্নাযো তাসং অগ্ঘেন সমোধানপরিৰাসং যাচামী’তি. দুতিযম্পি যাচিতব্বো. ততিযম্পি যাচিতব্বো. ‘‘ব্যত্তেন ভিক্খুনা পটিবলেন সঙ্ঘো ঞাপেতব্বো –

১৩৭. সুণাতু মে, ভন্তে, সঙ্ঘো. অযং ইত্থন্নামো ভিক্খু সম্বহুলা সঙ্ঘাদিসেসা আপত্তিযো আপজ্জি, একা আপত্তি একাহপ্পটিচ্ছন্না…পে… দস আপত্তিযো দসাহপ্পটিচ্ছন্নাযো. সো সঙ্ঘং তাসং আপত্তীনং যা আপত্তিযো সব্বচিরপ্পটিচ্ছন্নাযো তাসং অগ্ঘেন সমোধানপরিৰাসং যাচতি. যদি সঙ্ঘস্স পত্তকল্লং সঙ্ঘো ইত্থন্নামস্স ভিক্খুনো তাসং আপত্তীনং যা আপত্তিযো সব্বচিরপ্পটিচ্ছন্নাযো তাসং অগ্ঘেন সমোধানপরিৰাসং দদেয্য. এসা ঞত্তি.

‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু সম্বহুলা সঙ্ঘাদিসেসা আপত্তিযো আপজ্জি – একা আপত্তি একাহপ্পটিচ্ছন্না…পে… দস আপত্তিযো দসাহপ্পটিচ্ছন্নাযো. সো সঙ্ঘং তাসং আপত্তীনং যা আপত্তিযো সব্বচিরপ্পটিচ্ছন্নাযো তাসং অগ্ঘেন সমোধানপরিৰাসং যাচতি. সঙ্ঘো ইত্থন্নামস্স ভিক্খুনো তাসং আপত্তীনং যা আপত্তিযো সব্বচিরপ্পটিচ্ছন্নাযো তাসং অগ্ঘেন সমোধানপরিৰাসং দেতি. যস্সাযস্মতো খমতি ইত্থন্নামস্স ভিক্খুনো তাসং আপত্তীনং যা আপত্তিযো সব্বচিরপ্পটিচ্ছন্নাযো তাসং অগ্ঘেন সমোধানপরিৰাসস্স দানং, সো তুণ্হস্স; যস্স নক্খমতি, সো ভাসেয্য.

‘‘দুতিযম্পি এতমত্থং ৰদামি…পে… ততিযম্পি এতমত্থং ৰদামি…পে….

‘‘দিন্নো সঙ্ঘেন ইত্থন্নামস্স ভিক্খুনো তাসং আপত্তীনং যা আপত্তিযো সব্বচিরপ্পটিচ্ছন্নাযো তাসং অগ্ঘেন সমোধানপরিৰাসো. খমতি সঙ্ঘস্স, তস্মা তুণ্হী, এৰমেতং ধারযামী’’তি.

দ্ৰেমাসপরিৰাসো

১৩৮. তেন খো পন সমযেন অঞ্ঞতরো ভিক্খু দ্ৰে সঙ্ঘাদিসেসা আপত্তিযো আপন্নো হোতি দ্ৰেমাসপ্পটিচ্ছন্নাযো. তস্স এতদহোসি – ‘‘অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. যংনূনাহং সঙ্ঘং একিস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচেয্য’’ন্তি. সো সঙ্ঘং একিস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচি. তস্স সঙ্ঘো একিস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং অদাসি. তস্স পরিৰসন্তস্স লজ্জীধম্মো ওক্কমি – অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. তস্স মে এতদহোসি – ‘‘অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. যংনূনাহং সঙ্ঘং একিস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচেয্যন্তি. সোহং সঙ্ঘং একিস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচিং. তস্স মে সঙ্ঘো একিস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং অদাসি. তস্স মে পরিৰসন্তস্স লজ্জীধম্মো ওক্কমি. যংনূনাহং সঙ্ঘং ইতরিস্সাপি আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচেয্য’’ন্তি.

সো ভিক্খূনং আরোচেসি – ‘‘অহং, আৰুসো, দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. তস্স মে এতদহোসি – ‘অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. যংনূনাহং সঙ্ঘং একিস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচেয্য’ন্তি. সোহং সঙ্ঘং একিস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচিং. তস্স মে সঙ্ঘো একিস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং অদাসি. তস্স মে পরিৰসন্তস্স লজ্জীধম্মো ওক্কমি – অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. তস্স মে এতদহোসি – ‘অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. যংনূনাহং সঙ্ঘং একিস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচেয্য’ন্তি. সোহং সঙ্ঘং একিস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচিং. তস্স মে সঙ্ঘো একিস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং অদাসি. তস্স মে পরিৰসন্তস্স লজ্জীধম্মো ওক্কমি – যংনূনাহং সঙ্ঘং ইতরিস্সাপি আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচেয্যন্তি. কথং নু খো মযা পটিপজ্জিতব্ব’’ন্তি? ভগৰতো এতমত্থং আরোচেসুং. ‘‘তেন হি, ভিক্খৰে, সঙ্ঘো তস্স ভিক্খুনো ইতরিস্সাপি আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং দেতু. এৰঞ্চ পন, ভিক্খৰে, দাতব্বো –

‘‘তেন, ভিক্খৰে, ভিক্খুনা সঙ্ঘং উপসঙ্কমিত্ৰা, একংসং উত্তরাসঙ্গং করিত্ৰা, ৰুড্ঢানং ভিক্খূনং পাদে ৰন্দিত্ৰা, উক্কুটিকং নিসীদিত্ৰা, অঞ্জলিং পগ্গহেত্ৰা, এৰমস্স ৰচনীযো – ‘অহং, ভন্তে, দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. তস্স মে এতদহোসি – অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. যংনূনাহং সঙ্ঘং একিস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচেয্য’ন্তি. সোহং সঙ্ঘং একিস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচিং. তস্স মে সঙ্ঘো একিস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং অদাসি. তস্স মে পরিৰসন্তস্স লজ্জীধম্মো ওক্কমি – অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. তস্স মে এতদহোসি – ‘অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. যংনূনাহং সঙ্ঘং একিস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচেয্য’ন্তি. সোহং সঙ্ঘং একিস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচিং. তস্স মে সঙ্ঘো একিস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং অদাসি. তস্স মে পরিৰসন্তস্স লজ্জীধম্মো ওক্কমি – যংনূনাহং সঙ্ঘং ইতরিস্সাপি আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচেয্যন্তি. সোহং, ভন্তে, সঙ্ঘং ইতরিস্সাপি আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচামীতি.

‘‘দুতিযম্পি যাচিতব্বো. ততিযম্পি যাচিতব্বো. ‘‘ব্যত্তেন ভিক্খুনা পটিবলেন সঙ্ঘো ঞাপেতব্বো –

১৩৯. ‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু দ্ৰে সঙ্ঘাদিসেসা আপত্তিযো আপজ্জি দ্ৰেমাসপ্পটিচ্ছন্নাযো. তস্স এতদহোসি – ‘অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. যংনূনাহং সঙ্ঘং একিস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচেয্য’ন্তি. সো সঙ্ঘং একিস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচি. তস্স সঙ্ঘো একিস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং অদাসি. তস্স পরিৰসন্তস্স লজ্জীধম্মো ওক্কমি – অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. তস্স মে এতদহোসি – ‘অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. যংনূনাহং সঙ্ঘং একিস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচেয্য’ন্তি. সোহং সঙ্ঘং একিস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচিং. তস্স মে সঙ্ঘো একিস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং অদাসি. তস্স মে পরিৰসন্তস্স লজ্জীধম্মো ওক্কমি. যংনূনাহং সঙ্ঘং ইতরিস্সাপি আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচেয্যন্তি. সো সঙ্ঘং ইতরিস্সাপি আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচতি. যদি সঙ্ঘস্স পত্তকল্লং, সঙ্ঘো ইত্থন্নামস্স ভিক্খুনো ইতরিস্সাপি আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং দদেয্য. এসা ঞত্তি.

‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু দ্ৰে সঙ্ঘাদিসেসা আপত্তিযো আপজ্জি দ্ৰেমাসপ্পটিচ্ছন্নাযো. তস্স এতদহোসি – ‘অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. যংনূনাহং সঙ্ঘং একিস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচেয্য’ন্তি. সো সঙ্ঘং একিস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচি. তস্স সঙ্ঘো একিস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং অদাসি. তস্স পরিৰসন্তস্স লজ্জীধম্মো ওক্কমি – অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. তস্স মে এতদহোসি – ‘অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. যংনূনাহং সঙ্ঘং একিস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচেয্য’ন্তি. সোহং সঙ্ঘং একিস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচিং. তস্স মে সঙ্ঘো একিস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং অদাসি. তস্স মে পরিৰসন্তস্স লজ্জীধম্মো ওক্কমি. যংনূনাহং সঙ্ঘং ইতরিস্সাপি আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচেয্যন্তি. সো সঙ্ঘং ইতরিস্সাপি আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচতি. সঙ্ঘো ইত্থন্নামস্স ভিক্খুনো ইতরিস্সাপি আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং দেতি. যস্সাযস্মতো খমতি ইত্থন্নামস্স ভিক্খুনো ইতরিস্সাপি আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসস্স দানং, সো তুণ্হস্স; যস্স নক্খমতি, সো ভাসেয্য.

‘‘দুতিযম্পি এতমত্থং ৰদামি…পে… ততিযম্পি এতমত্থং ৰদামি…পে….

‘‘দিন্নো সঙ্ঘেন ইত্থন্নামস্স ভিক্খুনো ইতরিস্সাপি আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসো. খমতি সঙ্ঘস্স, তস্মা তুণ্হী, এৰমেতং ধারযামী’’তি. তেন, ভিক্খৰে, ভিক্খুনা তদুপাদায দ্ৰে মাসা পরিৰসিতব্বা.

দ্ৰে মাসা পরিৰসিতব্বৰিধি

১৪০. ‘‘ইধ পন, ভিক্খৰে, ভিক্খু দ্ৰে সঙ্ঘাদিসেসা আপত্তিযো আপজ্জতি দ্ৰেমাসপ্পটিচ্ছন্নাযো. তস্স এৰং হোতি – ‘অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. যংনূনাহং সঙ্ঘং একিস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচেয্য’ন্তি. সো সঙ্ঘং একিস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচতি. তস্স সঙ্ঘো একিস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং দেতি. তস্স পরিৰসন্তস্স লজ্জীধম্মো ওক্কমি – ‘অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. তস্স মে এতদহোসি – অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. যংনূনাহং সঙ্ঘং একিস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচেয্য’ন্তি. সোহং সঙ্ঘং একিস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচিং. তস্স মে সঙ্ঘো একিস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং অদাসি. তস্স মে পরিৰসন্তস্স লজ্জীধম্মো ওক্কমি. যংনূনাহং সঙ্ঘং ইতরিস্সাপি আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচেয্যন্তি. সো সঙ্ঘং ইতরিস্সাপি আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচতি. তস্স সঙ্ঘো ইতরিস্সাপি আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং দেতি. তেন, ভিক্খৰে, ভিক্খুনা তদুপাদায দ্ৰে মাসা পরিৰসিতব্বা.

১৪১. ‘‘ইধ পন, ভিক্খৰে, ভিক্খু দ্ৰে সঙ্ঘাদিসেসা আপত্তিযো আপজ্জতি দ্ৰেমাসপ্পটিচ্ছন্নাযো; একং আপত্তিং জানাতি, একং আপত্তিং ন জানাতি. সো সঙ্ঘং যং আপত্তিং জানাতি তস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচতি. তস্স সঙ্ঘো তস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং দেতি. সো পরিৰসন্তো ইতরম্পি আপত্তিং জানাতি. তস্স এৰং হোতি – ‘অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো; একং আপত্তিং জানিং, একং আপত্তিং ন জানিং. সোহং সঙ্ঘং যং আপত্তিং জানিং তস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচিং. তস্স মে সঙ্ঘো তস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং অদাসি. সোহং পরিৰসন্তো ইতরম্পি আপত্তিং জানামি. যংনূনাহং সঙ্ঘং ইতরিস্সাপি আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচেয্য’ন্তি. সো সঙ্ঘং ইতরিস্সাপি আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচতি. তস্স সঙ্ঘো ইতরিস্সাপি আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং দেতি. তেন, ভিক্খৰে, ভিক্খুনা তদুপাদায দ্ৰে মাসা পরিৰসিতব্বা.

১৪২. ‘‘ইধ পন, ভিক্খৰে, ভিক্খু দ্ৰে সঙ্ঘাদিসেসা আপত্তিযো আপজ্জতি দ্ৰেমাসপ্পটিচ্ছন্নাযো; একং আপত্তিং সরতি, একং আপত্তিং নস্সরতি. সো সঙ্ঘং যং আপত্তিং সরতি তস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচতি. তস্স সঙ্ঘো তস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং দেতি. সো পরিৰসন্তো ইতরম্পি আপত্তিং সরতি. তস্স এৰং হোতি – ‘অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো; একং আপত্তিং সরিং, একং আপত্তিং নস্সরিং. সোহং সঙ্ঘং যং আপত্তিং সরিং, তস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচিং. তস্স মে সঙ্ঘো তস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং অদাসি. সোহং পরিৰসন্তো ইতরম্পি আপত্তিং সরামি. যংনূনাহং সঙ্ঘং ইতরিস্সাপি আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচেয্য’ন্তি. সো সঙ্ঘং ইতরিস্সাপি আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচতি. তস্স সঙ্ঘো ইতরিস্সাপি আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং দেতি. তেন, ভিক্খৰে, ভিক্খুনা তদুপাদায দ্ৰে মাসা পরিৰসিতব্বা.

১৪৩. ‘‘ইধ পন, ভিক্খৰে, ভিক্খু দ্ৰে সঙ্ঘাদিসেসা আপত্তিযো আপজ্জতি দ্ৰেমাসপ্পটিচ্ছন্নাযো; একায আপত্তিযা নিব্বেমতিকো, একায আপত্তিযা ৰেমতিকো. সো সঙ্ঘং যায আপত্তিযা নিব্বেমতিকো তস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচতি. তস্স সঙ্ঘো তস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং দেতি. সো পরিৰসন্তো ইতরিস্সাপি আপত্তিযা নিব্বেমতিকো হোতি. তস্স এৰং হোতি – ‘অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো; একায আপত্তিযা নিব্বেমতিকো, একায আপত্তিযা ৰেমতিকো. সোহং সঙ্ঘং যায আপত্তিযা নিব্বেমতিকো তস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচিং. তস্স মে সঙ্ঘো তস্সা আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং অদাসি. সোহং পরিৰসন্তো ইতরিস্সাপি আপত্তিযা নিব্বেমতিকো. যংনূনাহং সঙ্ঘং ইতরিস্সাপি আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচেয্য’ন্তি. সো সঙ্ঘং ইতরিস্সাপি আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং যাচতি. তস্স সঙ্ঘো ইতরিস্সাপি আপত্তিযা দ্ৰেমাসপ্পটিচ্ছন্নায দ্ৰেমাসপরিৰাসং দেতি. তেন, ভিক্খৰে, ভিক্খুনা তদুপাদায দ্ৰে মাসা পরিৰসিতব্বা.

১৪৪. ‘‘ইধ পন, ভিক্খৰে, ভিক্খু দ্ৰে সঙ্ঘাদিসেসা আপত্তিযো আপজ্জতি দ্ৰেমাসপ্পটিচ্ছন্নাযো; একা আপত্তি জানপ্পটিচ্ছন্না, একা আপত্তি অজানপ্পটিচ্ছন্না. সো সঙ্ঘং তাসং আপত্তীনং দ্ৰেমাসপ্পটিচ্ছন্নানং দ্ৰেমাসপরিৰাসং যাচতি. তস্স সঙ্ঘো তাসং আপত্তীনং দ্ৰেমাসপ্পটিচ্ছন্নানং দ্ৰেমাসপরিৰাসং দেতি. তস্স পরিৰসন্তস্স অঞ্ঞো ভিক্খু আগচ্ছতি বহুস্সুতো আগতাগমো ধম্মধরো ৰিনযধরো মাতিকাধরো পণ্ডিতো ৰিযত্তো মেধাৰী লজ্জী কুক্কুচ্চকো সিক্খাকামো. সো এৰং ৰদেতি – ‘কিং অযং, আৰুসো, ভিক্খু আপন্নো? কিস্সাযং ভিক্খু পরিৰসতী’তি? তে এৰং ৰদেন্তি – ‘অযং, আৰুসো, ভিক্খু দ্ৰে সঙ্ঘাদিসেসা আপত্তিযো আপজ্জি দ্ৰেমাসপ্পটিচ্ছন্নাযো; একা আপত্তি জানপ্পটিচ্ছন্না, একা আপত্তি অজানপ্পটিচ্ছন্না. সো সঙ্ঘং তাসং আপত্তীনং দ্ৰেমাসপ্পটিচ্ছন্নানং দ্ৰেমাসপরিৰাসং যাচতি. তস্স সঙ্ঘো তাসং আপত্তীনং দ্ৰেমাসপ্পটিচ্ছন্নানং দ্ৰেমাসপরিৰাসং অদাসি. তাযো অযং, আৰুসো, ভিক্খু আপন্নো, তাসাযং ভিক্খু পরিৰসতী’তি. সো এৰং ৰদেতি – ‘যাযং, আৰুসো, আপত্তি জানপ্পটিচ্ছন্না, ধম্মিকং তস্সা আপত্তিযা পরিৰাসদানং; ধম্মত্তা রুহতি. যা চ খ্ৰাযং, আৰুসো, আপত্তি অজানপ্পটিচ্ছন্না, অধম্মিকং তস্সা আপত্তিযা পরিৰাসদানং; অধম্মত্তা ন রুহতি. একিস্সা, আৰুসো, আপত্তিযা ভিক্খু মানত্তারহো’’’তি.

১৪৫. ‘‘ইধ পন, ভিক্খৰে, ভিক্খু দ্ৰে সঙ্ঘাদিসেসা আপত্তিযো আপজ্জতি দ্ৰেমাসপ্পটিচ্ছন্নাযো; একা আপত্তি সরমানপ্পটিচ্ছন্না, একা আপত্তি অস্সরমানপ্পটিচ্ছন্না. সো সঙ্ঘং তাসং আপত্তীনং দ্ৰেমাসপ্পটিচ্ছন্নানং দ্ৰেমাসপরিৰাসং যাচতি. তস্স সঙ্ঘো তাসং আপত্তীনং দ্ৰেমাসপ্পটিচ্ছন্নানং দ্ৰেমাসপরিৰাসং দেতি. তস্স পরিৰসন্তস্স অঞ্ঞো ভিক্খু আগচ্ছতি বহুস্সুতো আগতাগমো ধম্মধরো ৰিনযধরো মাতিকাধরো পণ্ডিতো ৰিযত্তো মেধাৰী লজ্জী কুক্কুচ্চকো সিক্খাকামো. সো এৰং ৰদেতি – ‘কি অযং, আৰুসো, ভিক্খু আপন্নো? কিস্সাযং ভিক্খু পরিৰসতী’তি? তে এৰং ৰদেন্তি – ‘অযং, আৰুসো, ভিক্খু দ্ৰে সঙ্ঘাদিসেসা আপত্তিযো আপজ্জি দ্ৰেমাসপ্পটিচ্ছন্নাযো; একা আপত্তি সরমানপ্পটিচ্ছন্না, একা আপত্তি অস্সরমানপ্পটিচ্ছন্না. সো সঙ্ঘং তাসং আপত্তীনং দ্ৰেমাসপ্পটিচ্ছন্নানং দ্ৰেমাসপরিৰাসং যাচি. তস্স সঙ্ঘো তাসং আপত্তীনং দ্ৰেমাসপ্পটিচ্ছন্নানং দ্ৰেমাসপরিৰাসং অদাসি. তাযো অযং, আৰুসো, ভিক্খু আপন্নো; তাসাযং ভিক্খু পরিৰসতী’তি. সো এৰং ৰদেতি – ‘যাযং, আৰুসো, আপত্তি সরমানপ্পটিচ্ছন্না ধম্মিকং তস্সা আপত্তিযা পরিৰাসদানং; ধম্মত্তা রুহতি. যা চ খ্ৰাযং, আৰুসো, আপত্তি অস্সরমানপ্পটিচ্ছন্না, অধম্মিকং তস্সা আপত্তিযা পরিৰাসদানং; অধম্মত্তা ন রুহতি. একিস্সা, আৰুসো, আপত্তিযা ভিক্খু মানত্তারহো’’’তি.

১৪৬. ‘‘ইধ পন, ভিক্খৰে, ভিক্খু দ্ৰে সঙ্ঘাদিসেসা আপত্তিযো আপজ্জতি দ্ৰেমাসপ্পটিচ্ছন্নাযো; একা আপত্তি নিব্বেমতিকপ্পটিচ্ছন্না, একা আপত্তি ৰেমতিকপ্পটিচ্ছন্না. সো সঙ্ঘং তাসং আপত্তীনং দ্ৰেমাসপ্পটিচ্ছন্নানং দ্ৰেমাসপরিৰাসং যাচতি. তস্স সঙ্ঘো তাসং আপত্তীনং দ্ৰেমাসপ্পটিচ্ছন্নানং দ্ৰেমাসপরিৰাসং দেতি. তস্স পরিৰসন্তস্স অঞ্ঞো ভিক্খু আগচ্ছতি বহুস্সুতো আগতাগমো ধম্মধরো ৰিনযধরো মাতিকাধরো পণ্ডিতো ৰিযত্তো মেধাৰী লজ্জী কুক্কুচ্চকো সিক্খাকামো. সো এৰং ৰদেতি – ‘কিং অযং, আৰুসো, ভিক্খু আপন্নো? কিস্সাযং ভিক্খু পরিৰসতী’তি? তে এৰং ৰদেন্তি – ‘অযং, আৰুসো, ভিক্খু দ্ৰে সঙ্ঘাদিসেসা আপত্তিযো আপজ্জি দ্ৰেমাসপ্পটিচ্ছন্নাযো; একা আপত্তি নিব্বেমতিকপ্পটিচ্ছন্না, একা আপত্তি ৰেমতিকপ্পটিচ্ছন্না. সো সঙ্ঘং তাসং আপত্তীনং দ্ৰেমাসপ্পটিচ্ছন্নানং দ্ৰেমাসপরিৰাসং যাচি. তস্স সঙ্ঘো তাসং আপত্তীনং দ্ৰেমাসপ্পটিচ্ছন্নানং দ্ৰেমাসপরিৰাসং অদাসি. তাযো অযং, আৰুসো, ভিক্খু আপন্নো; তাসাযং ভিক্খু পরিৰসতী’তি. সো এৰং ৰদেতি – ‘যাযং, আৰুসো, আপত্তি নিব্বেমতিকপ্পটিচ্ছন্না, ধম্মিকং তস্সা আপত্তিযা পরিৰাসদানং; ধম্মত্তা রুহতি. যা চ খ্ৰাযং, আৰুসো, আপত্তি ৰেমতিকপ্পটিচ্ছন্না অধম্মিকং তস্সা আপত্তিযা পরিৰাসদানং; অধম্মত্তা ন রুহতি. একিস্সা, আৰুসো, আপত্তিযা ভিক্খু মানত্তারহো’’তি.

১৪৭. তেন খো পন সমযেন অঞ্ঞত্তরো ভিক্খু দ্ৰে সঙ্ঘাদিসেসা আপত্তিযো আপন্নো হোতি দ্ৰেমাসপ্পটিচ্ছন্নাযো. তস্স এতদহোসি – ‘‘অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. যংনূনাহং সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং একমাসপরিৰাসং যাচেয্য’’ন্তি. সো সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং একমাসপরিৰাসং যাচি. তস্স সঙ্ঘো দ্ৰিন্নং আপত্তীনং দ্ৰেমাসপ্পটিচ্ছন্নানং একমাসপরিৰাসং অদাসি. তস্স পরিৰসন্তস্স লজ্জীধম্মো ওক্কমি – ‘‘অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. তস্স মে এতদহোসি – ‘অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. যংনূনাহং সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং একমাসপরিৰাসং যাচেয্য’ন্তি. সোহং সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং একমাসপরিৰাসং যাচিং. তস্স মে সঙ্ঘো দ্ৰিন্নং আপত্তীনং দ্ৰেমাসপ্পটিচ্ছন্নানং একমাসপরিৰাসং অদাসি. তস্স মে পরিৰসন্তস্স লজ্জীধম্মো ওক্কমি. যংনূনাহং সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং ইতরম্পি মাসং পরিৰাসং [ইতরম্পি মাসপরিৰাসং (স্যা. ক. এৰমুপরিপি)] যাচেয্য’’ন্তি.

সো ভিক্খূনং আরোচেসি – ‘‘অহং খো, আৰুসো, দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. তস্স মে এতদহোসি – ‘অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. যংনূনাহং সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং একমাসপরিৰাসং যাচেয্য’ন্তি. সোহং সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং একমাসপরিৰাসং যাচিং. তস্স মে সঙ্ঘো দ্ৰিন্নং আপত্তীনং দ্ৰেমাসপ্পটিচ্ছন্নানং একমাসপরিৰাসং অদাসি. তস্স মে পরিৰসন্তস্স লজ্জীধম্মো ওক্কমি – অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. তস্স মে এতদহোসি – ‘অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. যংনূনাহং সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং একমাসপরিৰাসং যাচেয্য’ন্তি. সোহং সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং একমাসপরিৰাসং যাচিং. তস্স মে সঙ্ঘো দ্ৰিন্নং আপত্তীনং দ্ৰেমাসপ্পটিচ্ছন্নানং একমাসপরিৰাসং অদাসি. তস্স মে পরিৰসন্তস্স লজ্জীধম্মো ওক্কমি. যংনূনাহং সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং ইতরম্পি মাসং পরিৰাসং যাচেয্য’ন্তি. কথং নু খো মযা পটিপজ্জিতব্ব’’ন্তি? ভগৰতো এতমত্থং আরোচেসুং. ‘‘তেন হি, ভিক্খৰে, সঙ্ঘো তস্স ভিক্খুনো দ্ৰিন্নং আপত্তীনং দ্ৰেমাসপ্পটিচ্ছন্নানং ইতরম্পি মাসং পরিৰাসং দেতু. এৰঞ্চ পন, ভিক্খৰে, দাতব্বো –

‘‘তেন, ভিক্খৰে, ভিক্খুনা সঙ্ঘং উপসঙ্কমিত্ৰা…পে… এৰমস্স ৰচনীযো – অহং, ভন্তে, দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. তস্স মে এতদহোসি – ‘অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. যংনূনাহং সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং একমাসপরিৰাসং যাচেয্য’ন্তি. সোহং সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং একমাসপরিৰাসং যাচিং. তস্স মে সঙ্ঘো দ্ৰিন্নং আপত্তীনং দ্ৰেমাসপ্পটিচ্ছন্নানং একমাসপরিৰাসং অদাসি. তস্স মে পরিৰসন্তস্স লজ্জীধম্মো ওক্কমি – অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. তস্স মে এতদহোসি – ‘অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. যংনূনাহং সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং একমাসপরিৰাসং যাচেয্য’ন্তি. সোহং সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং একমাসপরিৰাসং যাচিং. তস্স মে সঙ্ঘো দ্ৰিন্নং আপত্তীনং দ্ৰেমাসপ্পটিচ্ছন্নানং একমাসপরিৰাসং অদাসি. তস্স মে পরিৰসন্তস্স লজ্জীধম্মো ওক্কমি. যংনূনাহং সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং ইতরম্পি মাসং পরিৰাসং যাচেয্যন্তি. সোহং, ভন্তে, সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং ইতরম্পি মাসং পরিৰাসং যাচামীতি. দুতিযম্পি যাচিতব্বো. ততিযম্পি যাচিতব্বো. ব্যত্তেন ভিক্খুনা পটিবলেন সঙ্ঘো ঞাপেতব্বো –

১৪৮. ‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু দ্ৰে সঙ্ঘাদিসেসা আপত্তিযো আপজ্জি দ্ৰেমাসপ্পটিচ্ছন্নাযো. তস্স এতদহোসি – ‘অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. যংনূনাহং সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং একমাসপরিৰাসং যাচেয্য’ন্তি. সো সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং একমাসপরিৰাসং যাচি. তস্স সঙ্ঘো দ্ৰিন্নং আপত্তীনং দ্ৰেমাসপ্পটিচ্ছন্নানং একমাসপরিৰাসং অদাসি. তস্স পরিৰসন্তস্স লজ্জীধম্মো ওক্কমি – অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. তস্স মে এতদহোসি – ‘অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. যংনূনাহং সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং একমাসপরিৰাসং যাচেয্য’ন্তি. সোহং সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং একমাসপরিৰাসং যাচিং. তস্স মে সঙ্ঘো দ্ৰিন্নং আপত্তীনং দ্ৰেমাসপ্পটিচ্ছন্নানং একমাসপরিৰাসং অদাসি. তস্স মে পরিৰসন্তস্স লজ্জীধম্মো ওক্কমি. যংনূনাহং সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং ইতরম্পি মাসং পরিৰাসং যাচেয্যন্তি. সো সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং ইতরম্পি মাসং পরিৰাসং যাচতি. যদি সঙ্ঘস্স পত্তকল্লং, সঙ্ঘো ইত্থন্নামস্স ভিক্খুনো দ্ৰিন্নং আপত্তীনং দ্ৰেমাসপ্পটিচ্ছন্নানং ইতরম্পি মাসং পরিৰাসং দদেয্য. এসা ঞত্তি.

‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু দ্ৰে সঙ্ঘাদিসেসা আপত্তিযো আপজ্জি দ্ৰেমাসপ্পটিচ্ছন্নাযো. তস্স এতদহোসি – ‘অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. যংনূনাহং সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং একমাসপরিৰাসং যাচেয্য’ন্তি. সো সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং একমাসপরিৰাসং যাচি. তস্স সঙ্ঘো দ্ৰিন্নং আপত্তীনং দ্ৰেমাসপ্পটিচ্ছন্নানং একমাসপরিৰাসং অদাসি. তস্স পরিৰসন্তস্স লজ্জীধম্মো ওক্কমি – অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. তস্স মে এতদহোসি – ‘অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. যংনূনাহং সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং একমাসপরিৰাসং যাচেয্য’ন্তি. সোহং সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং একমাসপরিৰাসং যাচিং. তস্স মে সঙ্ঘো দ্ৰিন্নং আপত্তীনং দ্ৰেমাসপ্পটিচ্ছন্নানং একমাসপরিৰাসং অদাসি. তস্স মে পরিৰসন্তস্স লজ্জীধম্মো ওক্কমি. যংনূনাহং সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং ইতরম্পি মাসং পরিৰাসং যাচেয্য’ন্তি. সো সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং ইতরম্পি মাসং পরিৰাসং যাচতি. সঙ্ঘো ইত্থন্নামস্স ভিক্খুনো দ্ৰিন্নং আপত্তীনং দ্ৰেমাসপ্পটিচ্ছন্নানং ইতরম্পি মাসং পরিৰাসং দেতি. যস্সাযস্মতো খমতি ইত্থন্নামস্স ভিক্খুনো দ্ৰিন্নং আপত্তীনং দ্ৰেমাসপ্পটিচ্ছন্নানং ইতরম্পি মাসং পরিৰাসস্স [ইতরম্পি মাসপরিৰাসস্স (ক.), ইতরস্সপি মাসপরিৰাসস্স (স্যা.)] দানং, সো তুণ্হস্স; যস্স নক্খমতি, সো ভাসেয্য.

‘‘দুতিযম্পি এতমত্থং ৰদামি…পে… ততিযম্পি এতমত্থং ৰদামি…পে….

‘‘দিন্নো সঙ্ঘেন ইত্থন্নামস্স ভিক্খুনো দ্ৰিন্নং আপত্তীনং দ্ৰেমাসপ্পটিচ্ছন্নানং ইতরম্পি মাসং পরিৰাসো [ইতরম্পি মাসপরিৰাসো (ক.), ইতরোপি মাসপরিৰাসো (স্যা.)]. খমতি সঙ্ঘস্স, তস্মা তুণ্হী, এৰমেতং ধারযামী’’তি.

‘‘তেন, ভিক্খৰে, ভিক্খুনা পুরিমং উপাদায দ্ৰে মাসা পরিৰসিতব্বা.

১৪৯. ‘‘ইধ পন, ভিক্খৰে, ভিক্খু দ্ৰে সঙ্ঘাদিসেসা আপত্তিযো আপজ্জতি দ্ৰেমাসপ্পটিচ্ছন্নাযো. তস্স এৰং হোতি – ‘অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. যংনূনাহং সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং একমাসপরিৰাসং যাচেয্য’ন্তি. সো সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং একমাসপরিৰাসং যাচতি. তস্স সঙ্ঘো দ্ৰিন্নং আপত্তীনং দ্ৰেমাসপ্পটিচ্ছন্নানং একমাসপরিৰাসং দেতি. তস্স পরিৰসন্তস্স লজ্জীধম্মো ওক্কমি – অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. তস্স মে এতদহোসি – ‘অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো. যংনূনাহং সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং একমাসপরিৰাসং যাচেয্য’ন্তি. সোহং সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং একমাসপরিৰাসং যাচিং. তস্স মে সঙ্ঘো দ্ৰিন্নং আপত্তীনং দ্ৰেমাসপ্পটিচ্ছন্নানং একমাসপরিৰাসং অদাসি. তস্স মে পরিৰসন্তস্স লজ্জীধম্মো ওক্কমি. যংনূনাহং সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং ইতরম্পি মাসং পরিৰাসং যাচেয্য’ন্তি. সো সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং ইতরম্পি মাসং পরিৰাসং যাচতি. তস্স সঙ্ঘো দ্ৰিন্নং আপত্তীনং দ্ৰেমাসপ্পটিচ্ছন্নানং ইতরম্পি মাসং পরিৰাসং দেতি. তেন, ভিক্খৰে, ভিক্খুনা পুরিমং উপাদায দ্ৰে মাসা পরিৰসিতব্বা.

১৫০. ‘‘ইধ পন, ভিক্খৰে, ভিক্খু দ্ৰে সঙ্ঘাদিসেসা আপত্তিযো আপজ্জতি দ্ৰেমাসপ্পটিচ্ছন্নাযো; একং মাসং জানাতি, একং মাসং ন জানাতি. সো সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং যং মাসং জানাতি তং মাসং পরিৰাসং যাচতি. তস্স সঙ্ঘো দ্ৰিন্নং আপত্তীনং দ্ৰেমাসপ্পটিচ্ছন্নানং যং মাসং জানাতি তং মাসং পরিৰাসং দেতি. সো পরিৰসন্তো ইতরম্পি মাসং জানাতি. তস্স এৰং হোতি – ‘অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো; একং মাসং জানিং, একং মাসং ন জানিং. সোহং সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং যং মাসং জানিং তং মাসং পরিৰাসং যাচিং. তস্স মে সঙ্ঘো দ্ৰিন্নং আপত্তীনং দ্ৰেমাসপ্পটিচ্ছন্নানং যং মাসং জানিং তং মাসং পরিৰাসং অদাসি. সোহং পরিৰসন্তো ইতরম্পি মাসং জানামি. যংনূনাহং সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং ইতরম্পি মাসং পরিৰাসং যাচেয্য’ন্তি. সো সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং ইতরম্পি মাসং পরিৰাসং যাচতি. তস্স সঙ্ঘো দ্ৰিন্নং আপত্তীনং দ্ৰেমাসপ্পটিচ্ছন্নানং ইতরম্পি মাসং পরিৰাসং দেতি. তেন, ভিক্খৰে, ভিক্খুনা পুরিমং উপাদায দ্ৰে মাসা পরিৰসিতব্বা.

১৫১. ‘‘ইধ পন, ভিক্খৰে, ভিক্খু দ্ৰে সঙ্ঘাদিসেসা আপত্তিযো আপজ্জতি দ্ৰেমাসপ্পটিচ্ছন্নাযো; একং মাসং সরতি, একং মাসং নস্সরতি. সো সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং যং মাসং সরতি তং মাসং পরিৰাসং যাচতি. তস্স সঙ্ঘো দ্ৰিন্নং আপত্তীনং দ্ৰেমাসপ্পটিচ্ছন্নানং যং মাসং সরতি তং মাসং পরিৰাসং দেতি. সো পরিৰসন্তো ইতরম্পি মাসং সরতি. তস্স এৰং হোতি – ‘অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো; একং মাসং সরিং, একং মাসং নস্সরিং. সোহং সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং যং মাসং সরিং তং মাসং পরিৰাসং যাচিং. তস্স মে সঙ্ঘো দ্ৰিন্নং আপত্তীনং দ্ৰেমাসপ্পটিচ্ছন্নানং যং মাসং সরিং তং মাসং পরিৰাসং অদাসি. সোহং পরিৰসন্তো ইতরম্পি মাসং সরামি. যংনূনাহং সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং ইতরম্পি মাসং পরিৰাসং যাচেয্য’ন্তি. সো সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং ইতরম্পি মাসং পরিৰাসং যাচতি. তস্স সঙ্ঘো দ্ৰিন্নং আপত্তীনং দ্ৰেমাসপ্পটিচ্ছন্নানং ইতরম্পি মাসং পরিৰাসং দেতি. তেন, ভিক্খৰে, ভিক্খুনা পুরিমং উপাদায দ্ৰে মাসা পরিৰসিতব্বা.

১৫২. ‘‘ইধ পন, ভিক্খৰে, ভিক্খু দ্ৰে সঙ্ঘাদিসেসা আপত্তিযো আপজ্জতি দ্ৰেমাসপ্পটিচ্ছন্নাযো; একং মাসং নিব্বেমতিকো, একং মাসং ৰেমতিকো. সো সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং যং মাসং নিব্বেমতিকো তং মাসং পরিৰাসং যাচতি. তস্স সঙ্ঘো দ্ৰিন্নং আপত্তীনং দ্ৰেমাসপ্পটিচ্ছন্নানং যং মাসং নিব্বেমতিকো তং মাসং পরিৰাসং দেতি. সো পরিৰসন্তো ইতরম্পি মাসং নিব্বেমতিকো হোতি. তস্স এৰং হোতি – ‘অহং খো দ্ৰে সঙ্ঘাদিসেসা আপত্তিযো আপজ্জিং দ্ৰেমাসপ্পটিচ্ছন্নাযো; একং মাসং নিব্বেমতিকো, একং মাসং ৰেমতিকো. সোহং সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং যং মাসং নিব্বেমতিকো তং মাসং পরিৰাসং যাচিং. তস্স মে সঙ্ঘো দ্ৰিন্নং আপত্তীনং দ্ৰেমাসপ্পটিচ্ছান্নানং যং মাসং নিব্বেমতিকো তং মাসং পরিৰাসং অদাসি. সোহং পরিৰসন্তো ইতরম্পি মাসং নিব্বেমতিকো. যংনূনাহং সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং ইতরম্পি মাসং পরিৰাসং যাচেয্য’ন্তি. সো সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং ইতরম্পি মাসং পরিৰাসং যাচতি. তস্স সঙ্ঘো দ্ৰিন্নং আপত্তীনং দ্ৰেমাসপ্পটিচ্ছন্নানং ইতরম্পি মাসং পরিৰাসং দেতি. তেন, ভিক্খৰে, ভিক্খুনা পুরিমং উপাদায দ্ৰে মাসা পরিৰসিতব্বা.

১৫৩. ‘‘ইধ পন, ভিক্খৰে, ভিক্খু দ্ৰে সঙ্ঘাদিসেসা আপত্তিযো আপজ্জতি দ্ৰেমাসপ্পটিচ্ছন্নাযো; একো মাসো জানপ্পটিচ্ছন্নো, একো মাসো অজানপ্পটিচ্ছন্নো. সো সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং দ্ৰেমাসপরিৰাসং যাচতি. তস্স সঙ্ঘো দ্ৰিন্নং আপত্তীনং দ্ৰেমাসপ্পটিচ্ছন্নানং দ্ৰেমাসপরিৰাসং দেতি. তস্স পরিৰসন্তস্স অঞ্ঞো ভিক্খু আগচ্ছতি বহুস্সুতো আগতাগমো ধম্মধরো ৰিনযধরো মাতিকাধরো পণ্ডিতো ৰিযত্তো মেধাৰী লজ্জী কুক্কুচ্চকো সিক্খাকামো. সো এৰং ৰদেতি – ‘কিং অযং, আৰুসো, ভিক্খু আপন্নো? কিস্সাযং ভিক্খু পরিৰসতী’তি? তে এৰং ৰদেন্তি – ‘অযং, আৰুসো, ভিক্খু দ্ৰে সঙ্ঘাদিসেসা আপত্তিযো আপজ্জি দ্ৰেমাসপ্পটিচ্ছন্নাযো. একো মাসো জানপ্পটিচ্ছন্নো, একো মাসো অজানপ্পটিচ্ছন্নো. সো সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং দ্ৰেমাসপরিৰাসং যাচি. তস্স সঙ্ঘো দ্ৰিন্নং আপত্তীনং দ্ৰেমাসপ্পটিচ্ছন্নানং দ্ৰেমাসপরিৰাসং অদাসি. তাযো অযং, আৰুসো, ভিক্খু আপন্নো তাসাযং ভিক্খু পরিৰসতী’তি. সো এৰং ৰদেতি – ‘য্ৰাযং, আৰুসো, মাসো জানপ্পটিচ্ছন্নো ধম্মিকং তস্স মাসস্স পরিৰাসদানং; ধম্মত্তা রুহতি. যো চ খ্ৰাযং, আৰুসো, মাসো অজানপ্পটিচ্ছন্নো অধম্মিকং তস্স মাসস্স পরিৰাসদানং; অধম্মত্তা ন রুহতি. একস্স, আৰুসো, মাসস্স ভিক্খু মানত্তারহো’তি.

১৫৪. ‘‘ইধ পন, ভিক্খৰে, ভিক্খু দ্ৰে সঙ্ঘাদিসেসা আপত্তিযো আপজ্জতি দ্ৰেমাসপ্পটিচ্ছন্নাযো; একো মাসো সরমানপ্পটিচ্ছন্নো, একো মাসো অস্সরমানপ্পটিচ্ছন্নো. সো সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং দ্ৰেমাসপরিৰাসং যাচতি. তস্স সঙ্ঘো দ্ৰিন্নং আপত্তীনং দ্ৰেমাসপ্পটিচ্ছন্নানং দ্ৰেমাসপরিৰাসং দেতি. তস্স পরিৰসন্তস্স অঞ্ঞো ভিক্খু আগচ্ছতি বহুস্সুতো আগতাগমো ধম্মধরো ৰিনযধরো মাতিকাধরো পণ্ডিতো ৰিযত্তো মেধাৰী লজ্জী কুক্কুচ্চকো সিক্খাকামো. সো এৰং ৰদেতি – ‘কিং অযং, আৰুসো, ভিক্খু আপন্নো? কিস্সাযং ভিক্খু পরিৰসতী’তি? তে এৰং ৰদেন্তি – ‘অযং, আৰুসো, ভিক্খু দ্ৰে সঙ্ঘাদিসেসা আপত্তিযো আপজ্জি দ্ৰেমাসপ্পটিচ্ছন্নাযো; একো মাসো সরমানপ্পটিচ্ছন্নো, একো মাসো অস্সরমানপ্পটিচ্ছন্নো. সো সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং দ্ৰেমাসপরিৰাসং যাচি. তস্স সঙ্ঘো দ্ৰিন্নং আপত্তীনং দ্ৰেমাসপ্পটিচ্ছন্নানং দ্ৰেমাসপরিৰাসং অদাসি. তাযো অযং, আৰুসো, ভিক্খু আপন্নো তাসাযং ভিক্খু পরিৰসতী’তি. সো এৰং ৰদেতি – ‘য্ৰাযং, আৰুসো, মাসো সরমানপ্পটিচ্ছন্নো ধম্মিকং তস্স মাসস্স পরিৰাসদানং; ধম্মত্তা রুহতি. যো চ খ্ৰাযং, আৰুসো, মাসো অস্সরমানপ্পটিচ্ছন্নো অধম্মিকং তস্স মাসস্স পরিৰাসদানং; অধম্মত্তা ন রুহতি. একস্স, আৰুসো, মাসস্স ভিক্খু মানত্তারহো’তি.

১৫৫. ‘‘ইধ পন, ভিক্খৰে, ভিক্খু দ্ৰে সঙ্ঘাদিসেসা আপত্তিযো আপজ্জতি দ্ৰেমাসপ্পটিচ্ছন্নাযো; একো মাসো নিব্বেমতিকপ্পটিচ্ছন্নো, একো মাসো ৰেমতিকপ্পটিচ্ছন্নো. সো সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং দ্ৰেমাসপরিৰাসং যাচতি. তস্স সঙ্ঘো দ্ৰিন্নং আপত্তীনং দ্ৰেমাসপ্পটিচ্ছন্নানং দ্ৰেমাসপরিৰাসং দেতি. তস্স পরিৰসন্তস্স অঞ্ঞো ভিক্খু আগচ্ছতি বহুস্সুতো আগতাগমো ধম্মধরো ৰিনযধরো মাতিকাধরো পণ্ডিতো ৰিযত্তো মেধাৰী লজ্জী কুক্কুচ্চকো সিক্খাকামো. সো এৰং ৰদেতি – ‘কিং অযং, আৰুসো, ভিক্খু আপন্নো? কিস্সাযং ভিক্খু পরিৰসতী’তি? তে এৰং ৰদেন্তি – ‘অযং, আৰুসো, ভিক্খু দ্ৰে সঙ্ঘাদিসেসা আপত্তিযো আপজ্জি দ্ৰেমাসপ্পটিচ্ছন্নাযো; একো মাসো নিব্বেমতিকপ্পটিচ্ছন্নো, একো মাসো ৰেমতিকপ্পটিচ্ছন্নো. সো সঙ্ঘং দ্ৰিন্নং আপত্তীনং দ্ৰেমাসপ্পটিচ্ছন্নানং দ্ৰেমাসপরিৰাসং যাচি. তস্স সঙ্ঘো দ্ৰিন্নং আপত্তীনং দ্ৰেমাসপ্পটিচ্ছন্নানং দ্ৰেমাসপরিৰাসং অদাসি. তাযো অযং, আৰুসো, ভিক্খু আপন্নো তাসাযং ভিক্খু পরিৰসতী’তি. সো এৰং ৰদেতি – ‘য্ৰাযং, আৰুসো, মাসো নিব্বেমতিকপ্পটিচ্ছন্নো ধম্মিকং তস্স মাসস্স পরিৰাসদানং; ধম্মত্তা রুহতি. যো চ খ্ৰাযং, আৰুসো, মাসো ৰেমতিকপ্পটিচ্ছন্নো অধম্মিকং তস্স মাসস্স পরিৰাসদানং; অধম্মত্তা ন রুহতি. একস্স, আৰুসো, মাসস্স ভিক্খু মানত্তারহো’’তি.

সুদ্ধন্তপরিৰাসো

১৫৬. তেন খো পন সমযেন অঞ্ঞতরো ভিক্খু সম্বহুলা সঙ্ঘাদিসেসা আপত্তিযো আপন্নো হোতি. সো আপত্তিপরিযন্তং ন জানাতি; রত্তিপরিযন্তং ন জানাতি; আপত্তিপরিযন্তং নস্সরতি, রত্তিপরিযন্তং নস্সরতি; আপত্তিপরিযন্তে ৰেমতিকো, রত্তিপরিযন্তে ৰেমতিকো. সো ভিক্খূনং আরোচেসি – ‘‘অহং, আৰুসো, সম্বহুলা সঙ্ঘাদিসেসা আপত্তিযো আপজ্জিং; আপত্তিপরিযন্তং ন জানামি, রত্তিপরিযন্তং ন জানামি; আপত্তিপরিযন্তং নস্সরামি, রত্তিপরিযন্তং নস্সরামি; আপত্তিপরিযন্তে ৰেমতিকো, রত্তিপরিযন্তে ৰেমতিকো. কথং নু খো মযা পটিপজ্জিতব্ব’’ন্তি? ভগৰতো এতমত্থং আরোচেসুং. ‘‘তেন হি, ভিক্খৰে, সঙ্ঘো তস্স ভিক্খুনো তাসং আপত্তীনং সুদ্ধন্তপরিৰাসং দেতু. এৰঞ্চ পন, ভিক্খৰে, দাতব্বো –

‘‘তেন, ভিক্খৰে, ভিক্খুনা সঙ্ঘং উপসঙ্কমিত্ৰা…পে… এৰমস্স ৰচনীযো – ‘অহং, ভন্তে, সম্বহুলা সঙ্ঘাদিসেসা আপত্তিযো আপজ্জিং. আপত্তিপরিযন্তং ন জানামি, রত্তিপরিযন্তং ন জানামি; আপত্তিপরিযন্তং নস্সরামি, রত্তিপরিযন্তং নস্সরামি; আপত্তিপরিযন্তে ৰেমতিকো, রত্তিপরিযন্তে ৰেমতিকো. সোহং, ভন্তে, সঙ্ঘং তাসং আপত্তীনং সুদ্ধন্তপরিৰাসং যাচামী’তি. দুতিযম্পি যাচিতব্বো. ততিযম্পি যাচিতব্বো. ব্যত্তেন ভিক্খুনা পটিবলেন সঙ্ঘো ঞাপেতব্বো –

১৫৭. ‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু সম্বহুলা সঙ্ঘাদিসেসা আপত্তিযো আপজ্জি. আপত্তিপরিযন্তং ন জানাতি, রত্তিপরিযন্তং ন জানাতি; আপত্তিপরিযন্তং নস্সরতি, রত্তিপরিযন্তং নস্সরতি; আপত্তিপরিযন্তে ৰেমতিকো, রত্তিপরিযন্তে ৰেমতিকো. সো সঙ্ঘং তাসং আপত্তীনং সুদ্ধন্তপরিৰাসং যাচতি. যদি সঙ্ঘস্স পত্তকল্লং, সঙ্ঘো ইত্থন্নামস্স ভিক্খুনো তাসং আপত্তীনং সুদ্ধন্তপরিৰাসং দদেয্য. এসা ঞত্তি.

‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু সম্বহুলা সঙ্ঘাদিসেসা আপত্তিযো আপজ্জি. আপত্তিপরিযন্তং ন জানাতি, রত্তিপরিযন্তং ন জানাতি; আপত্তিপরিযন্তং নস্সরতি, রত্তিপরিযন্তং নস্সরতি; আপত্তিপরিযন্তে ৰেমতিকো, রত্তিপরিযন্তে ৰেমতিকো. সো সঙ্ঘং তাসং আপত্তীনং সুদ্ধন্তপরিৰাসং যাচতি. সঙ্ঘো ইত্থন্নামস্স ভিক্খুনো তাসং আপত্তীনং সুদ্ধন্তপরিৰাসং দেতি. যস্সাযস্মতো খমতি ইত্থন্নামস্স ভিক্খুনো তাসং আপত্তীনং সুদ্ধন্তপরিৰাসস্স দানং, সো তুণ্হস্স; যস্স নক্খমতি, সো ভাসেয্য.

‘‘দুতিযম্পি এতমত্থং ৰদামি…পে… ততিযম্পি এতমত্থং ৰদামি…পে….

‘‘দিন্নো সঙ্ঘেন ইত্থন্নামস্স ভিক্খুনো তাসং আপত্তীনং সুদ্ধন্তপরিৰাসো. খমতি সঙ্ঘস্স, তস্মা তুণ্হী, এৰমেতং ধারযামী’’তি.

১৫৮. ‘‘এৰং খো, ভিক্খৰে, সুদ্ধন্তপরিৰাসো দাতব্বো; এৰং পরিৰাসো দাতব্বো. কথঞ্চ, ভিক্খৰে, সুদ্ধন্তপরিৰাসো দাতব্বো? আপত্তিপরিযন্তং ন জানাতি, রত্তিপরিযন্তং ন জানাতি; আপত্তিপরিযন্তং নস্সরতি, রত্তিপরিযন্তং নস্সরতি; আপত্তিপরিযন্তে ৰেমতিকো, রত্তিপরিযন্তে ৰেমতিকো – সুদ্ধন্তপরিৰাসো দাতব্বো.

‘‘আপত্তিপরিযন্তং জানাতি, রত্তিপরিযন্তং ন জানাতি; আপত্তিপরিযন্তং সরতি, রত্তিপরিযন্তং নস্সরতি; আপত্তিপরিযন্তে নিব্বেমতিকো, রত্তিপরিযন্তে ৰেমতিকো – সুদ্ধন্তপরিৰাসো দাতব্বো.

‘‘আপত্তিপরিযন্তং একচ্চং জানাতি, একচ্চং ন জানাতি, রত্তিপরিযন্তং ন জানাতি; আপত্তিপরিযন্তং একচ্চং সরতি, একচ্চং নস্সরতি, রত্তিপরিযন্তং নস্সরতি; আপত্তিপরিযন্তে একচ্চে ৰেমতিকো, একচ্চে নিব্বেমতিকো, রত্তিপরিযন্তে ৰেমতিকো – সুদ্ধন্তপরিৰাসো দাতব্বো.

‘‘আপত্তিপরিযন্তং ন জানাতি, রত্তিপরিযন্তং একচ্চং জানাতি, একচ্চং ন জানাতি; আপত্তিপরিযন্তং নস্সরতি, রত্তিপরিযন্তং একচ্চং সরতি, একচ্চং নস্সরতি; আপত্তিপরিযন্তে ৰেমতিকো, রত্তিপরিযন্তে একচ্চে ৰেমতিকো, একচ্চে নিব্বেমতিকো – সুদ্ধন্তপরিৰাসো দাতব্বো.

‘‘আপত্তিপরিযন্তং জানাতি, রত্তিপরিযন্তং একচ্চং জানাতি, একচ্চং ন জানাতি; আপত্তিপরিযন্তং সরতি, রত্তিপরিযন্তং একচ্চং সরতি, একচ্চং নস্সরতি; আপত্তিপরিযন্তে নিব্বেমতিকো, রত্তিপরিযন্তে একচ্চে ৰেমতিকো, একচ্চে নিব্বেমতিকো – সুদ্ধন্তপরিৰাসো দাতব্বো.

‘‘আপত্তিপরিযন্তং একচ্চং জানাতি, একচ্চং ন জানাতি; রত্তিপরিযন্তং একচ্চং জানাতি, একচ্চং ন জানাতি; আপত্তিপরিযন্তং একচ্চং সরতি, একচ্চং নস্সরতি; রত্তিপরিযন্তং একচ্চং সরতি, একচ্চং নস্সরতি; আপত্তিপরিযন্তে একচ্চে ৰেমতিকো, একচ্চে নিব্বেমতিকো; রত্তিপরিযন্তে একচ্চে ৰেমতিকো, একচ্চে নিব্বেমতিকো – সুদ্ধন্তপরিৰাসো দাতব্বো. এৰং খো, ভিক্খৰে, সুদ্ধন্তপরিৰাসো দাতব্বো.

১৫৯. ‘‘কথঞ্চ, ভিক্খৰে, পরিৰাসো দাতব্বো? আপত্তিপরিযন্তং জানাতি, রত্তিপরিযন্তং জানাতি; আপত্তিপরিযন্তং সরতি, রত্তিপরিযন্তং সরতি; আপত্তিপরিযন্তে নিব্বেমতিকো, রত্তিপরিযন্তে নিব্বেমতিকো – পরিৰাসো দাতব্বো.

‘‘আপত্তিপরিযন্তং ন জানাতি, রত্তিপরিযন্তং জানাতি; আপত্তিপরিযন্তং নস্সরতি, রত্তিপরিযন্তং সরতি, আপত্তিপরিযন্তে ৰেমতিকো, রত্তিপরিযন্তে নিব্বেমতিকো – পরিৰাসো দাতব্বো.

‘‘আপত্তিপরিযন্তং একচ্চং জানাতি, একচ্চং ন জানাতি, রত্তিপরিযন্তং জানাতি; আপত্তিপরিযন্তং একচ্চং সরতি, একচ্চং নস্সরতি, রত্তিপরিযন্তং সরতি; আপত্তিপরিযন্তে একচ্চে ৰেমতিকো, একচ্চে নিব্বেমতিকো, রত্তিপরিযন্তে নিব্বেমতিকো – পরিৰাসো দাতব্বো. এৰং খো, ভিক্খৰে, পরিৰাসো দাতব্বো.

পরিৰাসো নিট্ঠিতো.